dream-lady كتب:طلال الحكيم كتب:dream-lady كتب:[/align]
حياك الله : طلال
مرحبا بعودتك
لقمة العيش كلمة مطاطة (حسب معرفتي)...تعني كل مايعين على الحياة من مأكل ومسكن وملبس وعلاج وتعليم وترفيه حتى...!
ولم أقصد به (كيس عيش)...!!
لاأدري لِم أغضبتك الكلمة لدرجة جعلتك تجلس تعُدُها وتقتبسها بايضاح متميز!
نحن هنا لسنا في موضع تبادل اتهامات....
نحن في ذاتِ المركِب....فاتوقع الحلول المُقترحة (وان لم تعجبك أو تعجب البعض)...فهي لصالح كرامتنا التي تأتي (صم مابتجي فكة)
ان كنت في السعودية خمس او عشر او خمسون سنة حتى...
فالمهم انني اعتزمت الرجوع ولله الحمد(ولا اقول انني قد حققت ماطمحت اليه أو اكتفيت مادياً...)
ولكني امتلكت القدرة والارادة على الرجوع ..(ولكل فرد خياره الحُر طبعا)
ولا تقل لاني امرأة ....وان هناك من سيبقى لاجلي ولدعمي ماديا...
انا اكثر مشجعة لمن( قد يدعمي) بالرجوع والقبول باي وضع كان في أرض الوطن....
الخيارات الصعبة تستحق بعض المجازفات ...
لحظة....طلال ده تعبير سابق ليك ( لا نحن مذلولين للدرجة دي ولا عندنا قروش للدرجة دي)...
يعني لاي درجة طيب؟....هل لابأس بقليلٍ من الذل؟؟
(تعبيرك تجاوزته سابقا ...بحيث لم أُلزم المعنى نمطية وحدود اللفظ والنص
لكني وجدتك استخدمت لفظي (لقمة العيش)...اللفظ على قدر المعنى والتفسير
فعلمت أنك لاتُطلق الكلمات جزافاً مالم تتساوى حدود النصوص مع معانيها)
...[/align]
مساء الخير ...
خليني أرد على مداخلتك دي بالمقلوب ... يعني من أسفل إلى أعلى
حـ أشرح ليك كلامي السابق ده ( لا نحن مذلولين للدرجة دي ولا عندنا قروش للدرجة دي)... وما مفروض أصلا تخلطي بينه وبين (لقمة العيش) لأنو كلامي كان واضح زي (لقمة العيش ) ما واضحة
قال أحد حكماء العرب في قديم الزمان (أربعة عزهن ذل وهوان (الدَّين) ولو درهم , (والغربة) ولو ليلة , و(السؤال ) ولو كيف الطريق؟ , و(البنت) ولو مريم إبنة عمران)
وأسمحي لي أشرح ليك الكلام ده خصوصا الجزئية الأخيرة عشان ما يتفهم الكلام غلط ونطلع من الموضوع زي ما طلعنا هسه
أربعة حاجات مهما تكون عزيز ممكن تشعر فيها بالذل والهوان ... الدين بمعنى السلفة لما تمشى تستلف مبلغ من المال حتى ولو كان درهم بتشعر بالهوان والمذلة
والغربة ولو ليلة واحدة ... لما تتغرب عن بلدك وأهلك وناسك .. مهما يكون وضعك حـ ـشعر بعدم الراحة كونك قاعد في بلد ما بلدك وبين ناس أغراب وأنت بينهم غريب ... إذا كان في واحد من القضارف ومشى نيالا أو العكس .. حـ يحس بالغربة ودي حالتها غربة داخلية .. فما بالك بغربة عن الوطن والأهل والثقافة ..
دي الذلة المقصودة في كلامي السابق
نكمل باقي الأربعة :
والسؤال .. ممكن لو عايز تسأل عن الطريق الفلاني .. يرد ليك واحد رد يحرجك بيهو ويسمعك كلام فارغ
والبنت ولو مريم إبنة عمران ... يعني مهما البنت تكوت طاهرة وعفيفة وشريفة ... ممكن الناس تتكلم فيها زي ما إتكلمت في السيدة مريم البتول
ـــــــــــــــــــ
وكلمة (للدرجة دي) في الجملة ( لا نحن مذلولين للدرجة دي ولا عندنا قروش للدرجة دي)...
مقصود بيها نحن ما قاعدين ننضرب زي الراجل ده ما أنضرب ... ولا في زول بقدر يعمل لينا كده .. وأكبر دليل هو الراجل المضروب ده نفسه .. لأنو عشان ينضرب دخلو عليه أربعة رجال .. لو كان من جنسية تانية كان واحد منهم ممكن يكفي بالغرض بس عشان السوداني شجاع والحاجة دي معروفة وما محتاجة لكلام
أتمنى النقطة دي تكون وضحت ليك ..
----------
نرجع لكلامك ..
ان كنت في السعودية خمس او عشر او خمسون سنة حتى...
فالمهم انني اعتزمت الرجوع ولله الحمد(ولا اقول انني قد حققت ماطمحت اليه أو اكتفيت مادياً...)
ولكني امتلكت القدرة والارادة على الرجوع ..(ولكل فرد خياره الحُر طبعا)
متين جاتك القدرة على الرجوع ؟؟
بعد كم سنة ؟؟
هل ظروفك زي ظروف كل الناس ؟؟
موش ممكن في ناس أوضاعها ما بتسمح ليها بالرجوع ؟
الغربة مافيها خيارات مزاجية ... منو البرضى بالغربة وهو قادر على الرجعة ؟؟
هي ما خيارات وقانعات بقدر ماهي إلتزامات مجبِرة
بسألك ... لو طلبت منك ترجعي قبل 3 سنوات كنت حتوافقي ؟؟
أكيد لا .. لأنو في ترتيبات ما كانت جاهزة بالنسبة ليك
وفي ناس اليوم وبكرة وبعدو برضو حيكونوا في الترتيب ده
عشان كده من الغلط جدا إنو نطلب من الناس يعملوا حاجات عشان بس نحن عايزين نعملها بعد ما إستعدينا ليها
لقمة العيش كلمة مطاطة (حسب معرفتي)...
أبدا كلمة (لقمة العيش) ما كلمة مطاطة ولا شي ... إلا لو عايزة تمطيها أنت على حسب هواك
كلمة معروفة ومقصود بيها المأكل والمشرب (لقمة) و(عيشة) ... يعني فطور وغدا وعشا بالعربي كده
وبعدين أنا أي زول يناقشني في حاجة أقعد أقول ليه الكلمة دي مطاطة ؟
يعني معني كده المخارج كتيرة .. كل ما أنا أتزنق في كلمة أقعد أمطها لحدي ما ألقى طريقة أتخارج ..
لو قلتي (حياة كريمة , عِيشة كريمة) هي دي الكلمات المطاطة البتشمل التعليم والعلاج والزواج وسترة الحال ولقمة العيش من ضمنها بطبيعة الحال .. بس إنت عكست الحكاية ... وكمان عايزة تمطيها ..
وممكن كلمة تشوفيها أنت مطاطة أشوفها أنا حجر .
وأنت في رأيك نحن خلي اصل الموضوع ونقعد نمسك في الكلمة دي مطاطة ودي نطاطة ؟؟؟؟.
