كلمات الأغاني السودانية

[ناجي عثمان عبد الرازق]

حياتي والعاطفة النبيلة
للشاعر / ســـيد عبد العزيز

بإسم الحب.. أقدم ليك حياتى
حياتى .. ومعاها العطف الجزيل
عليك يا حب تحياتى عليك أوقفت غاياتى
لحبى أضحى بحياتى أحب الحب وأيامه
وذكرياته وأحلامه وما يوحيه إلهامه
حياة الحب أسميها السعادة بكل معانيها
أقيم ليلاى أغنيها روح يا لليل تعال يا ليل
أحب فى كل أوقاتى
ألاقى حبيبى يوماتى
أقول ليه ويقول لى
العهود بيناتنا مرعية
أقول ليه تعال لى نجلس جلسة غزلية
أمتع فيك عيني أشوفك وأنسى ألامي
وأقول حققت أحلامي
على تميل وعليك أميل
فيك أمعنت نظراتى
وجدتك كل مسراتى
وأفراحي وملذاتي
أحبك وأنسى فيك ذاتي
حبيبي أراعى تقديسك ويرتاح قلبي لحديثك
حديثك يشفى العليل والله يا السامي الجليل
الحب الصادق قليل البشبه حبي النبيل
فبدون جميل أهوى الجميل

[ناجي عثمان عبد الرازق]

فاكرك معايا

انا فاكرك معايا حبيبى فاكرك معايا
تسعد بسعادتى وتشقى عشان شقائى
انا فاكرك معايا وانت مع المظاهر
ماراعيت وفائى وظلمك لى ظاهر
كنت فى يوم لقائى فرحتك التظاهر
واليوم التصنع فنان فيه ماهر

ديمه عشان رضاك انا باكى بشجونى
ماراعيت ضنائى وبلوائى وشجونى
سهرت الليالى سليتنى سلبت عودى
باب غفرانى فاتح ليك لو عدت عود

تسمع كل واشى قوله عليك اثر
عاد فى زول صديقك اتوارى وتدثر
بعد ماكنت لينا احساسك تبعثر
نحن يانا نحن نخلص ليك واكتر

عود لى عش هنانا عشنا اولى بيك
كل الفى رحابك ابدا حانى ليك
كل الناس بتخطى مابحمل عليك
عود خلينى واصل ماتفارق عينى عينيك

[ناجي عثمان عبد الرازق]

"ياريت يا حبيبي"


ياريت يا حبيبي ياريت تبقى لي..
وتكون من نصيبي وأنسى المر بي...

حبيت مرة جاير اتنكر علي ..
وصادفت المحبة ياريت كان مال إليّ..

رضيت أبقى ليهو ما دام راضي بي.
. لكن ضنّوا بيهو وأبوا يدوهوا لي...


بكيت مرة تاني من دهري وزماني.
. وبقيت في حياتي ما عارف مكاني..

لو أعشق غلطّ كان حبّاني جاني..
تتوالى الليالي وتشرب من حناني...



في جنح الليالي وسابح بي خيالي..
لاقيتك منور ومتفتح حيالي..

بسماتك تضوي وجبينك يلالي.
. أو شخصيتك عظيمة وانطبعت في بالي

[ناجي عثمان عبد الرازق]

مداعب الغصن
للشاعر/ سيد عبدالعزيز


يا مداعب الغصن الرطيب
فى بنانك ازدهت الزهور
زادت جمال ونضار وطيب

يا المنظرك للعين يطيب
تبدل الظلمات بنور
وتبدل الأحزان سرور
إن شافك المرضان يطيب

تعجبنى والشىء العجيب
هادىء وأليف ماك النفور
بى عفتك صنت السفور
والحسن والأصل النجيب

أنا وإنت فى الروض يا حبيب
راق النسيم وحلى لى المرور
بقى أحلى من ساعة السرور
وأدق من فهم اللبيب

والروضة فى موقع خصيب
حضنوها واتلاقوا النهور
ترى فيها أنواع الزهور
من كل لون أخدت نصيب

يانع ثمارها ونص طيب
أشبه بربات الخدور
الأنبرجن فى يوم حبور
زادن جمال ونضار وطيب

فى الروضة غنى العندليب
ورددوا غناه الطيور
ترتيل أناشيد الحبور
وفتيانها يوم عيد الصليب

دنت الثريا بقت قريب
بين السلوك فى تانى دور
فى ثانية كم سطعت بدور
وأهلة كان نوعن غريب

شىء ينعش الروح فى الأديب
ويحيى روح ميت الشعور
للقاه ترتاح الصدور
ويفرح القلب الكئيب

[ناجي عثمان عبد الرازق]

ابو صلاح - شى عجيب فى غرامك يا فريع ياسمين

اجسامنا ليه جسمين
وروحنا واحده وكيف اتقسمت قسمين
شى عجيب فى غرامك يا فريع ياسمين



ياحبيب انا قلبى على هواكا امين
وفؤادى يعجز عن افكارى فى التخمين
وحواسى تحسد نظرى لحسنك وتظنين
وشمالى تاخدو الغيره اذاجلستا يمين

يا من اسرتا فؤادى ملكتو فى اليدين
ياملفت الانظار يانائر الخدين
غاية المقصود مادمنا متحدين
تبقا الصداقه قرابا ونكسب الودين

يالفريد فى عصرك ذى صداقتك وين
مااظن تكون ولابدعت قبل فى التكوين
على صحيفة قلبى تدونت تدوين
ودين محمد حق لايقبل التلوين
فيك ياحبيبى اتنين هم للفكر سالبين
هم شالو نوم عينى وللضمير تاعبين
بوجهك الكوكب يجهرنى ساعه يبين
وبقامتك البانات الفى الصدير لاعبين


من المنام ومعاى ولاجزء من ستين
عندى التلت من عقلى وعندك التلتين
شاقياني بسمة فاهك ودرعقيدو متين
لولها مالى صالح فى الظلال والتين

شى عجيب فى غرامك يافريع ياسمين

[ناجي عثمان عبد الرازق]

من الاسكله وحلا قام من البلد ولي
دمعي للثياب بلا ...

بي داهي العذاب حلا بي تذكاره بتسلي
قلبي الذاب واختلي وين بدر الكمال حلا
صباح الخير يا ام نفليين اهني البيك محتفلين
سيد الحسن رب اللين شرف كوستي والجبلين
زاد من بعدك الانكال قلبي الفي الهموم انكال
شاطري العاصمه يا ملكال توفيقيه صبري انا كال
هنئا حان وقد زهاك الرنك احتفل ببهاك.....

جبل أوليا حبيبي غشا وحصل في القطينه عشاء
يا قلبي الطفش وفشا الما اليته ينكفشا
حل زي الصقر خوي بي البدر الدويم ضوي

عاد لا حولة لا قوة حبيبي الليلة في الكوه

....ياكاكا الحبيب طلاك بعد زاد نفوسنا هلاك
ياملوط حليل نزلك يا زمن الفراق نسلاك

من ده الهم ما بننجي حبي الليله في تونجا
يا خالق الخلق تنجا تركاكا حلن العنجا
صب يا دمعي ما تكون جاف يا قلبي البقيت رجاف
البدر الخفا الانجاف اليوم شرف الرجاف

[ناجي عثمان عبد الرازق]

اطرد الاحلام ياجميل واصحى
قوم نقضى الليل فى ضفاف النيل ننشد الفسحة
شوف جمال الليل يا جميل اصحى
و اسمع البلبل و لهجته الفصحى
الغصون ماخدات مع النسيم كسحة
والطبيعة تخيل ثوبها كاسى النيل من جمال مسحة
عير كلامى معاك ياجميل لمحة
قوم معاى و ميل قامتك السمحة
كل شىء ميسور والظروف سامحة
منظر النوار يغنى عن انوار ولى الظلام يمحى
ديك شواطى النيل بالسرور طافحة
لابسة بدرى التم وللنجوم لافحة
شتلة الياسمين مايلة بصفحة
ميلها بيشجيك و من شذاها يجيك كل حين نفحة
شوف وجوه الروض باسمة منطرحة
وتضحك الازهار ميتة بى الفرحة
ليه شجرة الفل ياخى منشرحة
والورود بالمر لونة ليه احمر كانه منجرحة
شوف طيور منظوم روقة زى سبحة
طايرة كالامال فى الفضاء سابحة
فى جوارنا قريب ظلالها جات شايحة
ياخى ما فايتات اظنهن بايتات وفى الرياض صابحة
النسايم لو غادية او رايحة
بى ندى الازهار و العبير فايحة
و الفروع بتميل بالطرب مايحة
و السواقى تئن بى نغمة الحن صوتها كالنائحة
منظر البدرى و بهجته الفاضحة
تبدو ليك فى النيل كالدرر واضحة
و الطيور تختال فى الغصون صادحة
و السرور ميل روق و اتخيل كفتة الراجحة

[ناجي عثمان عبد الرازق]

يا ليل أبقالي شاهد

يا ليل أبقالي شاهد على نار شوقي وجنوني

يالليل صار ليك معاهد طرفي اللي ومنامي زاهد
دنالي سهري وأشاهد فوق لي نجمك ظنوني

يا جميل لي سهري واجد وأراك نائم وهاجد
مين لي عيني ناجد بي دموعي الغرقوني

لا تكون بالنظره جاحد حلمك في المية واحد
منك لي قلبي شاحد بين ايديك يا حنوني
خده البي مطارقه فاصد جامع كل المقاصد
طرفه الكحول وراصد بي سهامه الألموني

براق سنك يساعد القيم المزنه راعب
ساكن قلبي ومباعد تشتاق شوفتك عيوني
حبك في الجوف يطارد ما بين صادر ووارد
يا حبيبي اللي فارد نظراتك يأسروني

بعدك لي عقلي فاقد وقربك جوه جوفي واقد
حبك على طلمس عاقد أشوقك ضيعوني
على نار شوقي وجنوني

[ناجي عثمان عبد الرازق]

جنني نغمات القمري
وخلني محتار في أمري

ذكرني الحبو ضيع عمري
من شوفتو صحاي وخمري
من وصلو طبي وسمري
المن بعدو ولع جمري

هالكني وما جايب خبري
أصبح جسمي زي خصرك مبري
أنا ليه ما أحبك يا جميل بالجبر
مادام من لونك صفا لون التبري

أدركني بنظرة يا بدري
أو بسمة حنينة تشرح صدري
ليلة لقياك يا نفيس الدر
عندي أجمل ليلة زي ليلة البدر

أدركني يا غزال البر
أنا فاقد عقلي ومنامي وصبري
من صغري بحبك لي نهاية كبري
شوفتك يا روحي لي جروحي بتبري

محبوبي في هذا القطر
لا يوجد حسنو وعفافو الفطري
لو مر نسيمو بي أذكي العطر
يحيي الأرواح الأضحت في خطر

جنني نغمات القمري
وخلني محتار في أمري

[ناجي عثمان عبد الرازق]

سال من شعرها الذهب
فتدلى وما انسكب
كلما عبثت به
نسمة ماج واضطرب
النجيمات والخصل
فى عناق وفى غزل
نسجت حوله القبل
موكبا يغزل الطرب
فيه من سمرة الأصيل
شعرها المذهب النبيل
ثغرها اليانع البليل
كرزة حفّها العنب
يا حبيبى ... أكلما
قلبىّ المغرم احتمى
بك وانزاح ملهما
عاد كأسا بلا حبب
فاره .. مترف .. لدن ..
فنن.. لا .. ولا فنن
هزنى الوجد والشجن
فى الهوى قلبى إغترب
رقص الورد والزهر
مهرجانا على النهر
سال فى الشط وانهمر
عطره الحلو وانسرب
أى غصن إذا انثنى
فيه تحتفل الدّنا
والثريات والسّنا
غير بدرى إذا احتجب
عشت فى الحب منتهى
التيه .. ولكن بلا انتهاء
تائه .. ذاهل النّهى
شفّنى الوجد والطرب
إن تكن أنت لم تزل
يوم بدر المنى اكتمل
نحن شلناك فى المقل
وقعدنا على اللّهب
كلمات الشاعر ابوامنه حامد

[ناجي عثمان عبد الرازق]

الشاعر: سيد عبد العزيزلحن وغناء زنقار
انا راسم في قلبي صورة الباسم


أنا راسم ....
في قلبي صورة الباسم
أهو ده ....

أنا قاسم في عمري ليك أقاسم
أيام لقاك ياباسم
سويتها تاني مواسم ... أعِّيدا
أنا هائم ... بيك يالفريد ونائم
تتنى إن جيت قايم
في المشية راسي وعايم
كدا .... وكدا

هل عالم ... إني بيك متألم
ياخالي قلبك سالم
وحالي طرفك حالم
في غريدا

ياظالم ... إن فت مابتكالم
وإن عدت مابتسالم
بالله سيب دي مظالم ... تأيدا
مين زاعم ... في الكون مثيلك ناعم
لذيذ لهيجك طاعم
رشيق قوامك ناعم
غصن الندى
يالحاتم ... يالبسمة تضوي العاتم
ثناك برق القاتم
وفاك دارة خاتم
وزي كدا

[ناجي عثمان عبد الرازق]

عقلي انشغل بهواك
للشاعر مصطفى بطران
غناء الفنان عوض الكريم عبدالله
عقلي انشغل بهواك والحكمة
عيني لجة ومجافية النوم
يا أربعيني


هاك بعض حالي البي روقي اسمعيني
شاكي الغرام ما لقيت لي من معيني
لو كان كلام في الطيف مرة اسمعيني
خليني اصلى النار في هواك دعيني
فوق اللي جاري علي لا تجرديني
ثوب الغرام ودوام عنه انشديني
طايع مريد لقساك باهي اليديني
ما اخترت غانية سواك و حق ديني



مهما يلاقي عذاب قلبي السجيني
ومهما يزيد ويفيض همي ويجيني
لو كان يزور الطيف مرة ويجيني
تلبس حظوظي السود ثوب اللجيني

من يوم رماني سنان لحظك سنيني
محق علي نومي ومحق سنيني
اصبحت كل صباح يزداد انيني
كالبلبل المفرود يا مي حنيني


دائما تكيلي غرامك ما بتكيني
فوق لا اطيق من هجر تكلفيني
دائما تزيدي علي دائي الدفين
لمتين تراعي لحالتي وتنصفيني

[ناجي عثمان عبد الرازق]

لحظك الجـَـرَّاح
شعر : ابو صلاح
لحظك الجرّاح
أذاي فيه ، وفيه الطرب والراح
مناي يا زهرة الأفراح

للقلوب شرّاح
مبتعد شيء عجيب ، مسجون وعندو سَرَاح
بيّ ضاق الكون ، لا أجدلو بَرَاح
منّي فارق ، وشال نوم عيوني ورَاح

عمري أضحى مُبَاح
وفي الغرام لا أقصد غير لقاك أرباح
سِرِّي ليك يُبـاح
مع الظلام تتبسم وليلي يبقى صباح

جيش غرامك زَاح
هَـدَّ حِصـن المُهجة ، ولي دِمَاي نَزَّاح
وعقلي كـاد ينزاح
وقُلّي هجرك جَـدْ يا جافي ولاّ مِـزاح

ليك مُحَي وضَّـاح
وليك جبين بي نور ماء الحياءْ نَضّـاح
والدمع فضَّـاح
وبي سِـرْ هواي البَيْ تعلمبو دون إيضَاح

تِعبَت الأصْـفَاح
وطرفي جافى النوم من طِيب عبيرو الفاح
من جفونو صِفَـاح
في مِبيسمو عقد الدُر ، في صدرو جوز تفاح

[ناجي عثمان عبد الرازق]

في الضواحى وطرف المداين
يلا ننظر شفق الصباح

قوموا خلو الضيق في الجناين
شوفوا عز الصيد في العساين
يله نقنص نطرد نعاين
النهار أن حر الكماين
كلبي يا جمجوم أصله خاين
شوفوا كيفن يبرأ الملاين
هب شال وكشح المراح

للقنيص الخيل خف راسن
نحن ما بنخاف من مراسن
المكارم غرقنا ساسن والمجاهل
مين غيرنا ساسن
ان عطشنا نمز مر وآسن
وأن عشقنا بنعشق محاسن
فى المحاسن كفي يومنا راح

يا الطبيعه الواديك ساكن
ما في مثلك قط في الأماكن
يا جمال النال في ثراكن
ياحلاة البرعن أراكن
في قفاهن تور قرنه ماكن
لا غشن لا شافن مساكن
في الخزام والشيح والبراح

شوف صباح الوادي وجماله
وشوف خضاره وصيده ورماله
شوف يمينه وعاين شماله
شوف نسيم الليل صاحي ماله
شوف فريع الشاو مين أماله
القمر خجلان من كماله
والصباح لاح بهل الوشاح

يا أم لسانا لسع معجن
كلمة كلمة وحروفه ضجن
ديل خدودك غير داعي وجن
ديل عيونك من غير سبه ل

[ناجي عثمان عبد الرازق]

قالو على شقي ومجنون
قالوا علي شـــــــقي وجنون
صحـــــــــــــيح مجـــــــــنون
انتي جنـــــــــــوني ياحــلوين
انتو لي قلــــــــبي زاد عمرو
وليه المنـــــــــيه والســـــلوه
دمــــــــــــــــوعي عيـــــون
عيون لو شافه عطشانه
سنين يــــــــــــــــــــــروى
وليه ما اجــــــــــــــــــــــــــــــن
الليل البشيل الناس بشيل هموم
اقاسي مرارة الوحــــــــــــــــده
واقــــــــــــــــــابل لوعة المحروم
اتعــــــــــــــــــــــــــــــــذب سنين
ما ضقت طــــــــعم الـــنوم
كـــــــــــثير يا زول كثـــــــــــــير
امثالي من هــــجر الحبيب جنوا
ان شاء الله اجن وازيد في الجن
وانتو تجــــــــــــــــــــافوا ما تحنوا
ايه انا عنــــــــــــــــــدي في الدنيا
فــــــــــؤادي انــــــــــــــتو مالكنو
شبـــــــــــابي الكنت بحلف بيهو
ودرتوهو من بــــــدري

ليكم يا حــــــــــــــــــسان الحور
هديت الباقي من عـــــــــــمري
انتي بتقولي اصـــــــــــــــــــــبر
الصبر كـــــــــــــــملتو بصبري
بساهر الليل براي بساهر الليل
بشوق السنين مــــــمكون
اتحسر واشيل الـــــــــــــهم
على يوم بكره كيف حـــــيكون
دموعي الدمعا باريـه الدمعة
وانتي بتقولي مجـــــــــــــنون
وحات االضقتو في ريدكم صحيح
شقي ومجــــــــــــــــــــــــنون

[ناجي عثمان عبد الرازق]

أغنية عيون الصيد
فيها من الألم حين قال
" مع الآلام هاجت شجوني
وأطباء الكون ما عالجوني
جفوا وبي نفورهم هيجوني
متين في الطيف يصبوا ويجوني
مقر أملي وفيهم ظنوني
يزيدوا دلال وتزيد جنوني
لذيذ تعذيبهم لو ضننوني
وصالهم آه راحتي ومنوني"

ومنهم اصحاب الجراح الغائرات
"ويا طبيبي جرحي كيف يبرى
بيا تعلم وتجهل الخبرة
انت فوق للانجم الكبرى
الا قلبك قاسي ذو جبرة "
وبعضهم يعاتب الاطباء من ألم الفراق والصدود:
" اعلن حبيبي الحرب
لسكونو جوة القلب
الدكاترة كشفو القلب
لقوا قلبي زايد ضرب
انا قلبي بيك تالم يا حبيبي إنت تعلم
دمعي العزيز انهمل
لحياتي مافيش امل
الحكماء كشفو القلب
قالو لي تم الاجل
حبيبي انت تعلم انا قلبي بيك تالم
بالله قوم يا الصديق
تمشي وتجيب الطبيب
انا قلبي مرضان كئيب
علشان فراق الحبيب
انا قلبي بيك تالم يا حبيبي إنت تعلم
يجرحنى ليه و انا كلى جراح
لابد يجي يوم القاك وارتاح
ما اظن يجى يوم انساك وارتاح

[ناجي عثمان عبد الرازق]

زيدني في هجراني
كلمات :الشاعر عبدالرحمن الريح
----------------
زيدني في هجراني
في هواك يا جميل
العذاب سراني
على عفافك دوم
سيبني في نيراني
لمتين تطراني
أنظرك في النوم
جوز نواعسك راني
طرفي قصدو يراك
و ما قصدت تراني
ما بسيب حبك
و الله لو ضراني
يا نعيم أزماني
ياحياة روحي
و بهجة أمدرماني
في الحياة غيرك
مافي زول هماني
وفي بعادك أزاي
وفي وصالك أماني
بلبل الأغصان
غنى بي ذكراك
و بالنوح أوصاني
الجمال خصاك
و العذاب خصاني
و الدلال أوصاك
علي دوام تعصاني
يا درر ألحاني
يا أزاي و دوايي
يا راحي يا ريحاني
إنت نايم
و أنا ألم البعاد صحاني
حِن عليّ بغرامك
و الله كان يمحاني
مال فريعك باني
فيه بدر و ظلمه
و فيه ردفاً باني
حين نسيم الليل
بي روايحك أتاني
زاد عليّ الشوق
و دمعي سال هتاني
و على عفافك دوم
زيدن في هجراني

[ناجي عثمان عبد الرازق]

اغنية (سمحة الهيبة فوق مختار) وغناها قيقم

هو مختار ود رحمة ناظر العبيدية
كان مثل حاتم الطائي في الكرم والخصال النبيلة
العبيدية محطة القطر بعد بربر وقصاد العبيدية بالغرب الباوقة يفرقهم البحر
. قالوا كان في مرة بتفتش ليها في فكة خمس جنيه ومحصلة القطر
خايفاه يفوتها وما لقت ليها فكة حد ما فتشت
أخيرا لمت في مختار ود رحمة وطلبت منو يفك ليها القروش
عشان تحصل القطر .. العمدة مختار وقف القطر وقطع ليها التذكرة مجانا
وأداها خمسة جنيه فكة وحلف ما يشيل الصمة
وكانت المرأة عفيفة وشاعرة مجيدة
ونظمت فيه هذه القصيدة

عرش دود مراقد السار
لي الموفشار
خايلة الملكة فوق مختار
سيد الأبيض النهّار
سيد المهرة والقرقار
إيدك الما بتخون الجار
إيدك ترجم الحقار
لي المو فشار

عرش زي أبوك يا دود
أحسب لي تمانية جدود
إت فوق الرجال بالعود
ضربك جلة مو بارود


قالت أمو جيد لي
لي ناظر العبيدية

جدك يغفر السية
وخالف للرجال كية

ما بيدي ويقول أديت
ما اتفشر وقال سويت
القنديل سراج البيت
حمدالله بسلامتك جيت

العنتيل جا يتقنت
من شوفتو الرجال جنت
عرس فوقن إتعنت
ولا تخيب رجاء الظنت

ميرف ود ملوك بربر
خت الكرسي وإتحكر
قال للمستر إتذكر
مك في دارنا ما بتظهر

يا الماسك الدريب طلش
ديل ناس رحمة لا تنغش
ضربك جلة مو بالرش
شن جاب الحديد للقش

[ناجي عثمان عبد الرازق]

أنا لي زمن مفتون صباك
للشاعر محمد بشير عتيق

كتبت بأم درمان 1939
لحن وغناء أولاد الموردة عطا ومحمود عبد الكريم
أنَا لَيْ زمنْ مفتونْ صِبَاكْ
مع النسيم جيِبْ لَيْ نَبَاكْ
يا الشَادِنْ المُتهادِي فِي روضةْ رَبَاكْ
أنا من صدودك عقلي حاير في ارتباك
لو زارني طيفك أو نسيم جاب لي نباك
أهلاً وسهلاً يا حبيبي ومرحباك
********
فَلتَحيا لي أنفسنا بيعك ومشتراك
ما ضرَ بس لو مره تسمح لي أراك
حُبك تمَلك مُهجتي وحق من يراك
أنا قلبي زي قُمرية وأنتَ فِريع أراك
********
سُبحانَ من أعطاكْ جلاله مُفضلاك
تسبى الأسود والأمة تخضع لي ولاك
قللت صبري وعقلي ها هو بين يداك
يَحيَا الجمال وليحي حُسنك يا ملاك

[ناجي عثمان عبد الرازق]

تجازي
ابو صلاح

لوتجازي لوتسمحي *مني ريدك مابتمحي
بي خيول الشوق أرحمي *واروي دمعي البطمحي
بس عشوقك لاتقمحي *بي طريف العين ألمحي
بريض فاهم سر الوحي* الفي حواجبك بتلوحي
تمسي هجة ونور تصبحي *وفي قلوب الناس تربحي
ياالحمامة البتصبحي *بي فريعك بتميحي
كيف عزولك لاتروحي *وانت جنة ونار تقدحي
يازهير الروض فتحي *والنسيم بالطيب كتحي
من غصونك ماتبرحي *يوم تبكي ويوم تفرحي
المبكم بتنصحي *وبي نغيمك بتفصحي
هاك عقلي الطاش انصحي*وكان مغيب والان صحي