دوبـــــــ الحاردلو ــــــيت

[ناجي عثمان عبد الرازق]

الحاردلو

متنبئ شعراء الشعر الشعبى أو العامى بلهجة معظم اهل وسط السودان عموما
ومنطقة البطانة تحديدا

الطيب صالح قال هو بن الرومى الشعراء

لكين الحاردلو لو عايزين نقارنه بباقى الشعراء

احسن مقارنة انه يكون هو المتنبئ وسط الشعراء
عشان العبقرية الشعرية اللامحدودة العنده وجمال الوصف واستخدام بلاغة اللهجة العامية لأقصى مدى
مع تميز الصورة والمفردة عنده بشكل لافت

إسمه محمد أحمد عوض الكريم أبو سن

واشتهر بإسم بالحاردلو لدرجة انه ناس كتار ما عارفين اسمه الحقيقى

يقال انه مولود فى ريرة في سهل البطانة حوالى العام 1830م وتوفى فى نفس المنطقة حوالي عام 1916 او 1917

[ناجي عثمان عبد الرازق]

الحي والبموت رزقو ونصيبو بصيبو
وانا صابني الجدي المنجدع في خصيبو
كشف اب سته وفي سدرو وقدل عاصيبو
يا الشلتيهو قلبي وداعتك اتوصيبو

[ناجي عثمان عبد الرازق]

هَبْهَابْ الشَمـالْ الجَاني نَسَّـامْ رِيحُو
حَـرك ساكِناً أَزمَـنْ كَتَمْتَ وَحِــيحُو
الجَـرِح الدَلَكْ نَيـُو وقَطَعْ مِن قِيحُو
فَتَقُو عليْ بُريْب نَامَـه بـي سُرَيحُو

[ناجي عثمان عبد الرازق]

مـن دَيفَـةْ البِغَــادرَنْ دَرةَ الكَــرامِـــي
اللَحَـمْ إنســـلبْ رَابـنْ عليْ عَضَّـامِـي
التايـه أم شِليخ حَسرُورها قَلَّ مَنامِي
فِيهـا مَكَمَلاتْ خِـــلَقَ الجَدي البَعَامـِي

[ناجي عثمان عبد الرازق]

في واحدَ الشُهور بلا الفَوق العِليو شَرَّافَه
خلقــاً حُـرْدْ ومُـرْدْ ومَهَـدلاتْ أَكتَافَـــــــه
مِـن قومةَ الجَهل لي كِلــمةْ غُناي عَرَّافــَه
الحَمديــه في قَـلب السِمـع والشَــافــــــه

[ناجي عثمان عبد الرازق]

جُميزْ فَامِـكْ البَارِى الهَــرَفْ والفُـــرْقْ
بُرعَيمِكْ سَمِح دُغْمَـةْ بَراطمِـكْ زُرْقْ
كَحلَه وغُرْ عُيونِك يا أم حَواجباً فُرْقْ
سَخــلةْ ود فِهـيد دَيفـةَ التَنايـــا البُـرْقْ

[ناجي عثمان عبد الرازق]

لَونِنْ مـِن بَعيدْ مِتلَ البِليبلِى نُضَـافْ
حـرد ومعصرات من شبـةَ الأكتافْ
لي النَـاس البغنولِنْ بِجُـرو القــَـافْ
مالياتْ الخَشُم مِن كَامِلَ الأَوصـــافْ

[ناجي عثمان عبد الرازق]

برق الهنعه رفَّ ولاح وفكَّه أريـــاحُو
ذكَّرنِي البفــوق دهب البراتي سمـاحُو
الخلاني أقيم الليــل ملاقي صبــاحُو
بعد الشيب خفيف الروح جرحني سلاحُو

[ناجي عثمان عبد الرازق]

البارِح نَسيم ريحـاً طَــــلقْ مِـن جَبرَه
ذَكَّـرْ عَقلِي بيْ وَدْ الــــعَنَانِيفْ هَـبرَه
أَحْ مِـن فِـلانَه وجرحَها المــــا بِبرَه
قَلبي عَليها نَاح بَعدَ اليَقين والصَبرَه

[ناجي عثمان عبد الرازق]

شَرْفَتَا رِيلْ وكَفيَتَا خَـيلْ وطُولـــهـا مَوَسَطْ
سَمحَه الرِيكَّا دَرْ صَهبَا وضميرهَا مَبَسَطْ
مِـن تَـاتَاي قُدومهَــــــا وخَطْوَتَا الِلتْرَصَّتْ
حَسَيتْ بيْ قَلبِي فَارَقْنِي وكَبِدتِي إِنْقَـصَّتْ

[ناجي عثمان عبد الرازق]

رَفعْ أبصارُو حَتى النَظرَه ليْ خَصَّاها
فَـرَّ فَاطرُو تَمْرَةْ فُؤَادِي كَـعْ قَصَّـاهَا
قَدُر مَا يطــولْ أَوانْ أَقــــولْ أَنْسَـاهَا
مَجْلُوخْةً تقابِض فِي البَـدَنْ دَاسَـاهَا

[ناجي عثمان عبد الرازق]

لَتيباً حَارسو حَرَّاتُو ومسايِس وفَـارِقْ
عَقب الحَرَّه صَقَّار مِن السِموم مِدَارِقْ
أَتناينْ عُروقو ورَاح فِصيصو يزارِقْ
لامِن جَاهو نَسَّامَ الغَــــفَرْ مِسَـــــارِقْ
__________________

[ناجي عثمان عبد الرازق]

واحـدَه مِنَّهِنْ قَالتْ وَلُوفْنَا تَـرَّاهُـو
قُـتْ لَيهِنْ نَعَـمْ مَحْسوبكُنْ إِيَّاهُـــــو
الصِبا والجمالْ الدَايرو هَـا اللَّبرَاهُو
تَرا هَادا الهَرَدْ قَلْبو وقَسَمْها كلاَهُو
__________________

[ناجي عثمان عبد الرازق]

كَـمْ جَالستَهِنْ ضَحَوه وَوَكِتْ سُليبـنْ
وكَـمْ كاوشتَهِنْ جُملَه وقَبَضْ بُريبـِنْ
كَمْ سَمحاً كَتير بَيهـو بِنكَـتِّر جَيبــــِنْ
مَنع الشَيبْ مِن الوَهَقَة ولِعبْ جِقليبِنْ
__________________

[ناجي عثمان عبد الرازق]

قال مرضان هواك لى شفاهو مافى طريقة
في كبدو الحراب في جوفو باقة حريقة
قط ما ليه علاج من غير يقرطع ريقا
والا يمددوهو ويمسحوه بى عريقا
__________________

[ناجي عثمان عبد الرازق]

كَاسي كِتيفُو دِيسِكْ بَرْعَـه مُو رَارَيبْ
عَاليه أردافِـك المُـو مِخَجِلا السِليـــبْ
بِتْ خِيولْ دُنقلا وُحقَـةْ بُكَـارْ دُرْدَيـــبْ
مِنِكْ واشَقـا الصَبوَه وخَيابـةَ الشَيـبْ
__________________

[ناجي عثمان عبد الرازق]

كل ما اطراهو يا قميرية ريشات فؤادى يفرن
تقول عقد انقطع يجرن دموعى يترن
قلبى مرات يجر مرات يقيف يتحرن
واحس بى تياب جمر فوق لى عضاى انشرن
__________________

[ناجي عثمان عبد الرازق]

تقول لِى شنو

وتقولى لِى منو ،

-2-

أنحنَا السَّاسْ

ونَحنا الرَّاسْ

ونحن الدّنيا جبناهَا

وبَنيناها..

بِويت ..فى بِويتْ

وأسْعل جدى ترهاقَا

وخلى الفَاقة .. والقَاقا

-3-

تقول لِى شنو

وتقول لِى منو ،

-4-

تَالا أبوى .. بعنخى لَزَمْ

وتَالا اللُمْ..أَبوىْ أوْلبَابْ

وأمى مهيرة بتْ عبودْ

وأخويا المهدى ..سيد السيفْ

والخلى النصارى تقيفْ

هناك ..فى القيفْ ،

-5-

تقول لِى شنو

وتقول لِى منو ،

-6-

ونحن الشينْ

ونحن الزينْ

ونحن العقبه والعتمور

ونحن القِبله .. والقرعانْ

ونحن الشانْ

ونحن النانْ

أتينا عشانْ

نسوى الدّنيا للإنسانْ

تقول لِى شنو

وتقول لِى منو ،

-8-

ونحن الصّافى

والوَافى ،

ونحن الشّافى

والكافِى ،

ونحن الزادْ

ونحن العِينه

والزِيّنه ،

ونحن – يمين – أهالينا

أهلى سرورْ

ووكَتين ينزل المستورْ

تَرَانَه النور

-9-

تقول لِى شنو

وتقول لِى منو ،

-10-

ونحن الجبنه واللبريقْ

ونحن قداحنا سَاوات ضيقْ

ونحن بيوتنا مفتوحاتْ

مَسَاىْ .. وَصباحْ

ونحن وشُوشنا

مطروحاتْ

مَسَاىْ وصباحْ

ونحن السَمحه

والقَمحه

ونحن الطله .. واللمحه ،

ونحن الصِيدْ

ونحن العيدْ ،
__________________

[ناجي عثمان عبد الرازق]

-11-

تقولى لِى شنو

وتقولى لِى منو ،

-12-

ونحن عُزَازْ

ونحن حَرَازْ

ونحن هَشَابْ

ونحن قُمُوحْ

ونحن تُمُورْ

ونحن عُيُوشْ

ونحن النيلْ

وَكضَاب – يا زويل – منْ قالْ

إنّك .. تانى لينا متيلْ ،

تقولى لِى شنو

وتقولى لِى منو ،

-13-

ونحن الحَجه والتوبه ،

ونحن الهِجره .. والأوبه ،

ونحن كُتَارْ

ونحن كُبَارْ ،

ونحن – يمين – جُمَال الشيلْ

ونحن – يمين –نَضِمنا قليلْ ،

-14-

تقول لِى شنو

وتقول لِى منو ،

-15-

ونحن مِحايه

نحن طِرايه

نحن فِدايه

نحن سِمايه

نحن حجاب

ونحن اللوحْ

ونحن شَرَافه فى الدنيا

ونحن كِتاب عِلمْ مفتوحْ

على كل البُلودات ..نُورْ ،

ونحن – يمين – مَداين نورْ ،

ووشنا نورْ ،

-16-

تقول لِى شنو

وتقول لِى منو ،

-17-

ونحن الحِنه والجرتقْ

ونحن الزفه والسيره ،

ونحن ..أبشرى والشبال ،

ونحن السَىْ

ونحن الوَىْ

ونحن الرقبه .. والتُمْ تُمْ

ونحن اللَمْ ..

يكون فى الدنيا ..متلنا ..لمْ

-18-

تقولى لِى شنو

وتقول لِى منو ،

-19-

ونحن العَاجْ

ونحن الصَاجْ

ونحن البوشْ

ونحن الحوشْ

ونحن الناسْ

وكتين الديارا ..يباس

وإن درت العديل والزين

تعال يا زول ،

وإن كست الكعب والشين

أرح .. يا زول

-20-

تقولى لى شنو

وتقول لى منو ،
__________________

[ناجي عثمان عبد الرازق]

-21-

ونحن السورْ

ونحن الحُورْ ،

ونحن بناتنا محروساتْ

ونحن وِلادنا ضُلالاتْ

ونحن أُماتنا ياهِنْ ..ديلْ ،

وجِيب ورينى زيىِّ منو ،

وتقول لِى شنو

وتقول لِى منو ،

-22-

ونحن فَزَعْ

ونحن وجَعْ

ونحن اليُمه ..واليَابَا

ونحن أريتو بالتَابَه ،

ونحن – يمين – إذا حَرّتْ ،

نخلى الواطه ..رُقَابه ،

-23-

تقولى لِى شنو

وتقولى لِى منو ،

-24-

ونحن زَغَاوه والعطرونْ

ونحن الدُونَا ..مافيشُ دونُ

ونحن وِلاد مَلك خِرتيتْ

وسَابَ الجرْ

وحجَر السِكه ،

والتاكا ،

وسيّدنا الفى الجبل ..دَاكَا

ونحن – يمين – نضِمنا كُتُرْ

وشيَتنا كُتُرْ

وأسعَل ناس كَرن والطُورْ ،

وأسعَل كَررى .. والعَتْمُورْ

وأسعل – يا جنَاَ – الخرتُومْ ،

وشوف كيفن زعلنا كُتُرْ ،

وشوف كيفن فرحنا كُتُرْ ،

أنحنا الـ للرجال خُوسَه ،

ونحن –يمين – جِنَات موسى ،

-25-

تقولى لِى شنو

وتقول لِى منو ،

-26-

ونحن الدوكه

والضُلاله ، والدونكه ،

ونحن الدانقه ،

والراكوبه ، والواطه ،

ونحن الفَكَه

والشِبكَه

ونحن الحجزه .. والعكَه ،

ونحن الجُودْ ،

ونحن أسودْ ،

ونحن النَانْ ،

حديثنا إذا أرِدتو رُطَانْ

وحين دايرين ..نسوى بَيَانْ ،

-27-

تقول لِى شنو

وتقول لِى منو ،

-28-

ونحن الخَلوهَ والدايره ،

ونحن تَكيه العايره ،

ونحن الضُّلْ ،

ونحن الكُلْ ،

ونحن سبيل غريب الليلْ ،

ونحن صباح مسافر الليلْ ،

ونحن فَنَاجرةَ الدّنيا ،

ونحن حَبَابْ

حديثنا حَبَابْ

تعال شَرِف .. وشوفنى منو ،

وتقولِى شنو ،

وتقولِى منو ،

-29-

أقيف لِسَعْ

وأقيف وأسمعْ ،

ونحن صديرى منضوم ويلْ

ونحن القَرمصيص ..بلحيلْ ،

ونحن التوبْ

ونحن الووبْ

وناس حبوبْ

وناس حَرّمْ

ونحن إذا رأينا كبيرْ

نقيف طولنا ..ونقولْ لُه ..حَبَابْ

ونديه البُكَان ..ترحابْ

ونحن. اليَانَا ديل .. يا زولْ

وتسعلنى .. وتقول لِى منو

وتقولِى شنو ،
__________________