بنات الحاج

[ابن عوف]

طلال يا مبدع

شوقتنا منتظر مع الجماعة المشحتفين

[طلال الحكيم]

ومازلنا فى انتظار مذيدا من الابداع
عارف انا هوايتي توقع النهايات
كدى نمشي قدام شوية وح تلقانى نقرتها ليك
تسلم ويسلمو بنات الحاج

مرحب بيك من جديد يا أخوي ..
عايز أقول ليك سر بس ما حيبقى سر بعد كده ... أنا زاتي ما عارف النهاية كيف ؟
بس العارفو إنو النهاية لسه عليها شوية بإذن الله
الفكرة موجودة بأشكال متعددة ..
القصة ما مكتوبة جاهزة عندي وأنا بس بنسخها هنا ...لا
أنا بكتبها معاكم .. وعارف دي جراءة مني فالمفروض بعد ما أنتهي منها حتى أبدأ انزلها
بس ربنا يجيب العواقب سليمة

تعرف مرات تعليقاتكم بيكون ليها أثر في تغيير بعض الأفكار
عشان كده ممكن أغير فيها في أي لحظة .. وما حـ أخلي نهايتها زي ما تتوقع لو حسيت بيك إتوقعتها

نسأل ربنا التوفيق والقبول
وخليك قريب

[طلال الحكيم]

الله يعطيك الف عافية .. كتلتى بالضحك ..!!؟

2

أضحك الله سنك يا سنبلاية ..
و ربنا يديم فرحك ..
ممتن ليك كتير على وجودك العطر
ويا رب تتدوم طلتك .

[طلال الحكيم]

طلال يا مبدع

شوقتنا منتظر مع الجماعة المشحتفين

سمح ...
أنت تأمر بس يا غالي ..

[طلال الحكيم]

خيبة أمل

خرجت مي من الحمام وهي تلف رأسها بالبشكير ... تمشي الهوينى بقامتها القصيرة التي لا تشابه أختيها ..
كان جمالها هادئا... ليس بالجمال الصارخ ولكنه كان عميقا ..
عندما تراها لأول مرة لا تنتبه لشئ واضحا .. كان كل شيء فيها عاديا .. ولكن ما أن تجالسها حتى ينفتح لها القلب على مصرعيه فتدمن النظر إليها والإستماع إلى حديثها ...
جميلة المشية هادئة الطباع تفوق أختيها أنوثة وإن كان جسد منى أكثر نضوجا ولفتا للأنظار منها ..
كانت عيناها كحيلة من غير إكتحال .. وهذه الميزة لم تكن في أختيها ..
دخلت إلى الغرفة وأطفأت المكيف بسرعة حتى لا يصيبها الزكام والبرد .. فشعرها ما زال مبتل ..
نظرت إلى منى الجالسة في أحد الكراسي مقطبة الجبين

- منى ... مالك يا منى عاملة كده ؟

- مالي ؟

ضحكت مي وبدت أسنانها البيضاء تلمع في ثغرها الصغير

- والله عليك جنس تكشيرة !!! الدقاك منو ؟

- البدقني ما ولدوهو لسه

- طيب مالك ؟ وين الأغاني والرقيص .. كنت متخيلاك بترقصي كالعادة

- مي عليك الله خليك في حالك أنا ما فاضية ليك

ثم أشاحت بوجهها .. وسرحت بعيدا وأعادت ذكريات اللحظات الماضية
أي نوع من الشباب يكون عبد الله هذا ؟؟ لماذا لا يهتم بها ولا تجذبه محاسنها ؟
لماذا إلى الآن يراها طفلة صغيرة ؟؟ ألا يرى نضجها وشبابها ؟

في كل مكان تذهب إليه تسمع همسات الناس المعجبة بمفاتنها وتضبط نظراتهم المتلصصة على جسدها ... إلا عبد الله .. يا له من أحمق

لقد أصابتها مقابلته الباردة لها - قبل قليل - بخيبة أمل كبيرة ...

كانت تنتظر خروجه من الغرفة بفارغ الصبر حتى تنظر إلى وجهه عندما ذهبت أمه لتناديه
وعندما أتي يمشي صوبها شعرت بقلبها يكاد يقفز من صدرها فقالت له بشوق وهي تمد يدها

- عبد الله صباح الخير .. وينك أنت ياخ ؟

أجابها بفتور

- أهلا يا منى .. الرسلك منو؟

- ياخي بدل ما تقول لي أتفضلي شوية أشربي الشاي

- شاي شنو نحن هسه بقينا في وقت الفطور

- طيب أعزمني فطور

ثم ضحكت فلم يضحك فشعرت بالغيظ الشديد

- أها الرسلك منو ؟ يا بت إتكلمي

- أبوي قال ليك تعال

- لشنو ؟

- ما عارفة

- ما قال ليك عايزني شنو؟

- أكيد بكون عايز يرسلك .. يعني حيكون عايزك تشطِّفو مثلا ؟

- أمشي أمشي خلاص أنا جاي وخلي ظرافتك دي تنفعك

- وأنت خلي برودك ده ينفعك .. دمك تقيل .. أعوذ بالله

- زحي من وشي

- طيب تعال معاي قدمني شوية .. كلب ناس النعيم حـ يعضيني

- وكلب ناس النعيم ده حـ يعضيك في الرجعة بس ؟ قبيل لما جيتي ليه ما عضاك ؟

- على فكرة أنت بايخ جدا

- أمشي يا بت

لماذا يعاملها كـ طفلة وهي قد بارحت الطفولة ؟...
ليته تركها تتأمل قامته المربوعة ولونه الأسمر .. وعينيه الواسعة الحزينة ذات الرموش الطوال .. وفمه الممتلئ وشاربه الجميل ..
كانت تنظر بإعجاب إلى حلاقة شعره وتلك السوالف النازلة على خديه بفن وإتقان .. لم يكن يشبه أحدا من والديه .. من أين أتى هذا الفتى الأسمر ليسرق قلبها الغض الذي لم يعرف الحب من قبل ؟

- أمشي يا بت

كلمة قالها بكل برود وأدار لها ظهره وأنصرف ... تبا له .

- منى يا منى ..

أعادها صوت مي من ذكرياتها فقالت بحدة

- في شنو يا مي ؟

فضكحت مي كي تغيظها أكثر

- عليك الله مالك ؟ إنتي الليلة ما براك

- ياخي موش الأوضة دي أها ذاتا خليتها ليك

ثم خرجت من الغرفة وهي متعكرة المزاج فوجدت عبد الله يتحدث مع الحاج أبيها في وسط الحوش

- أها عايزك تشيل القروش دي يا عبد الله وتمشي السوق تجيب خروف يكون كويس كده

- جدا يا خال

- وتغشى معاك تجيب ضباح عشان يضبحو طوالي

- ضباح لشنو أنا بضبحو

- بالله ؟ أنت بتعرف تضبح ؟

- والله أتعلمت الضبيحة قريب .. كان عندنا رحلة مع الشباب وشلنا خروف وإتعلمت من واحد صاحبي

- يعني أتعلمت أكيد ولا حتفطس لينا خروفنا ساي ؟

- لا ما تشيل هم ..حتشوف براك

- طيب كويس والله ... أها بالمرة كده أغشى ناس الطيب وناس ياسين وقول ليهم الحاج قال ليكم تعالوا إتغدوا معانا

أتاهم صوت فوزية من المطبخ وهي تصيح

- هو يا الحاج الوكت ضيق .. والخروف ده ما بلحق الغدا .. الساعة هسه عشرة وعلى بال ما يجيبو بتكون أتناشر .. ولسه عندنا كمونية ومرارة وقيامة رابطة ... وتقعدوا بعدين تقولوا الغدا إتأخر وتعملوني السبب

- أها طيب الحل شنو يعني

- الحل أعزمهم عشا ..قول ليهم تعالو عشا ... يعني الدنيا طايرة ؟

- خلاص يا عبد الله قول ليهم تعالو أتعشو معانا

- طيب يا خال

خرج عبد الله من الحوش إلى الجنينة المطلة على الشارع فوجد منى تتظاهر بسقاية أحدى الشجيرات فقال مازحا

- ده الجنايني ولأ شنو ؟

- أهو بتعرف تهظر يا بارد .

ثم رمقته بنظره حارقة قبل أن يخرج ضاحكا .

[الفردوس المفقود]

والله يا عبدو اتلومت ياخ

ويتواصل الجمال لا جف قلمك عزيزي الرائع طلال

[3Aiz A3eesh]

أعجَبَني ...

[كيوبيد]

جميل اسلوبك جدا
وتواصل وتسلسل الاحداث اجمل
بالنسبة للنهاية
اكيد بكون فى عضم للقصة
على قول ناس الموسيقى
بس اشتقنا لي عمك طشمة ادينا ليهو زيارة يخ
ويدوم المداد

[طلال الحكيم]

والله يا عبدو اتلومت ياخ

ويتواصل الجمال لا جف قلمك عزيزي الرائع طلال

ربنا يهدي عبدو ......
تسلم كتير يا الفردوس يا غالي

[طلال الحكيم]

أعجَبَني ...

دائما تلقى البعجبك يا رب ... شكرا ليك كتير

[طلال الحكيم]

جميل اسلوبك جدا
وتواصل وتسلسل الاحداث اجمل
بالنسبة للنهاية
اكيد بكون فى عضم للقصة
على قول ناس الموسيقى
بس اشتقنا لي عمك طشمة ادينا ليهو زيارة يخ
ويدوم المداد

تسلم كتير يا خوي
سعيد جدا بتواجدك وتشجيعك

عمك طشمة حاولت اجيبو في المشهد الجاي ده بس ما لقيت ليه طريقة
المشهد البعدو بجيك بإذن الله بس خليك قريب

[طلال الحكيم]

علامات ضيق

- هووووي يا ناس البيت السلام جاكم

دخلت زينب إلى بيت الحاج أخيها وقدمت لنفسها بهذه العبارة ..
وجدت الحاج وفوزية ومنى يجلسون في الحديقة تحت ظل النيمة ..

- هـ يا الحاج ... الحمد لله على السلامة

- الله يسلمك يا زينب

وقام وسلم عليها بحرارة

- إزييك يا فوزية حمد لله على السلامة وأنت يا منى البركة أبوكم الجا طيب .

تبادل الجميع عبارات الترحيب وجلست زينب بملامحها الطيبة المنهكة .. ثم قالت فوزية

- قومي يا منى جيبي كباية موية لـ عمتك زينب

فقامت وإتجهت نحو الداخل فقالت زينب

- جيبيها لي من زيركم ده ما تجيبيها من التلاجة .. حلقي واجعني والموية الباردة بتزيدو زيادة

- سلامتك يا زينب

- الله يسلمك يا الحاج

- مالك جاتك نزلة ولأشنو؟

- ما نزلة بس ياهو النبحي الكتير ده

أحست فوزية بأن الحديث سوف يأتي بسيرة جبارة السكران فآثرت النهوض وأخذ إبنتها معها

- تعالي يا منى الـ نرسلك

قالت بنفاذ صبر وضيق شديد

- وين تاني يا ماما ؟

- أمشي البقالة جيبي حاجات الفطور ... وأغشي ناس كلتوم وعوضية خليهن يكلمن الباقيات ويجن يتعشن معنا

- يا ماما أصلو ما معقول كدا

- يا بت النسوان بشيلن حسي أكان ما عزمتهن .. براك عارفة

- بس أنا من الصباح بترسل

- عاد نسو شنو؟ ياكي الصغيرة

- يعني الصغيرة تموت ليكم في البيت ده ؟

- كدي تعالي معاي جوه شيلي القروش

دخلا إلى الداخل وتركا الحاج وأخته زينب تحت ظل النيمة
ساد صمت بعض الوقت ثم قالت زينب

- هسه ليك كم مما سافرت ؟

- عديت 3 شهور وشوية

- سفرياتك الكتيرة دي بقت ما بتخلينا نقعد معاك

- أنا زاتي ما بريد السفر .. بس مجبور عشان الشغل

حل صمت جديد قطعه الحاج هذه المرة
- أخباركم شنو يا زينب؟

أطرقت إلى الأرض وقالت بصوت متعب تسبقه زفرة حارة

- الحمد لله

- جبارة كيف ؟

- ياهو الحال في حالو .... سكران طينة ليل على نهار

- الصباح بدري كنت سامع حسكم عالي .. مالكم؟

- والله إتشبك في عبد الله كان داير يكتلو

- يا ساتر يا ساتر ..

- أنا خايفة عبد الله يهج يخلي البيت

- عبد الله عاقل ما تخافي عليه يا زينب

- كيف ما أخاف عليه ؟ والله مرات أنا زاتي بفكر أهج وأخلي الدنيا كلها

- ده كلام شنو ؟

- إتعزبنا يا الحاج

- أنا عارف وحاسي بيك .. بس كلو منك

- كيفن كلو مني ؟

- أنا موش زمان قلت ليك نطلقك منو بس أبيتي

- اتطلق منو وأمش وين لكن ؟

- تجي تقعدي معاي هنا

- أقعد معاك كيف من غير عبد الله ؟

- عبد الله زاتو يقعد معانا هنا

- يعقد كيف والبيت فيهو بنات ؟

- عبد الله زي ولدي .. والبنات زي أخواته

- الناس ما بتعرف الكلام ده وعبد الله حساس لا بقدر يقعد مع بناتك ولا بتحمل كلام الناس

- بكرة عبد الله بشتغل وبفتح بيت وبشيلك فوق راسه

- يسمع منك ربنا يا الحاج .. يسمع منك ربنا

ثم ترقرت دموعها وتقاطرت فمسحتها بطرف ثوبها .. ربت الحاج على ركبتها وأشفق عليها .. فأراد تغيير الموضوع ..

- تعرفي جبت ليك معاي هدية

- كتر خيرك

- توب سمح شديد

- ما قصرت والله

- تعالي نخش جوا عشان تشوفيه

- خليهو بعدين يا الحاج

ثم جلس الجميع حول صينة الفطور .. تتوسطهم عَمة البنات .


*****************************

سمعوا ضوضاء خارج الدار .. وصوت خروف يتعالي وجمهرة أطفال .. وعبد الله ينتهرهم
أسرعن البنات إلى داخل البيت وبقي الحاج وحده وأمامه صينة الفطور
دخل عبد الله ودفع أمامه الخروف الذي هرول في الجنينة وتلفت يمنة ويسرة ثم هجم على النجيلة

- عبد الله

إلتفت تجاه صوت الحاج الذي باغته

- يا خال .. أنت قاعد هنا ؟

- تعال أفطر

- لا أنا فطرت في السوق

- الخروف كويس ما شاء الله

- عزلتو عزل

- هسه بتقدر تضبحو عليك الله ولآ نجيب ضباح ؟

- لا بقدر

- يا زول؟

- والله جد

- الله معاك .. أضبح طوالي الوقت إتأخر ..

- طيب .. بس أخليهم يجهزو الحاجات

ثم دخل إلى الحوش ونادى على منى .. وما أن سمعت منى صوته حتى أتت تمشي بسعادة

- أها يا عبد الله جبت الخروف ؟

- آي جبتو .. أمشي جيبي لي سكين كبيرة ... أنا جبت الصاطور معاي والحبل

- الحبل لشنو؟

- أمشي يا منى وأسمعي الكلام

- مالك ياخ ؟

- عايني وجيبي معاك 3 صواني كبيرة والمفراكة

- المفراكة ؟

- آي

- لشنو ؟

- عشان أنفخ الخروف

- إنت حتضبحو ولأ حتنفخو ؟

- وبرضو جيبي معاك كباية فيها شوية ملح

- لشنو ؟

- يا بت أنت كل شوية حتقعدي ترفعي حواجبيك ديل وتقولي لشنو ؟

- لا .. جد الملح لشنو ؟

- عشان أنفخ الفشفاش

- يخســـيييي ... يخسي عليك

- مالك يا بت ؟

- يخرب بيت العلمك الضبيحة ياخ ...

- يخرب بيتك أنتي

- عبد الله أنت ما كنت ود رايق ونضيف .. السخطك شنو ؟

- أنت عايزاني أكون مدلع زيك ويومي كلو يااااي وياااي؟

- موش أحسن من نفخ الفشافيش ؟

- أمشي يا بت جيبي الحاجات القلتها ليك وبس

- حـ أكلم أبوي وأقول ليه عبد الله ما بعرف يضبح وغشاك ساي .. حيخنق الخروف وينفخو

- منى .. أنا ما فاضي ليك

- ماشة خلاص ... ماشة يا أبو الضباح

خرجت ميادة من المطبخ ومرت بهما في وسط الحوش فقالت ببرود قبل أن تدخل البرندة

- عبد الله كيفك

فأجابها ببرود أكثر دون أن يلتفت إليها

- أهلا
وظهرت على وجهه علامات الضيق الشديد .

[معتبر]

عزيزي طلال

ابداع وامتاع

واقع وخيال

ويستمر الجمال

تحياتي

[كيوبيد]

اوووووووووووو كدا معناتو فى حنك مع ميادة
يخ ديك جنها شمارات لى شنو لى شنو
يسلم خيالك

[شذي زهر]

ابداع ابداع

سرد جميل وممتع بالجد

ويسلم خيالك ذي ماقال كيوبيد

[شذي زهر]

بنات الحاج ........ لخمه لكن



اما عبدالله دواخله تئن من واقعه الذي بعيشه وفُـرض عليه ولم يرتضيه....ولكن ومع كل هذا لايعطيه الحق بان يمسك يد والده وينظر اليه بتحدي

صراحه صراحه استفذني وآلمني هذا المقطع من القصه التي اعلم انها من الخيال

رفع جبارة يده وهوى بها على وجه عبد الله ولكن عبد الله أمسك بها وهو ينظر إليه بتحدٍ نظرات قوية
- ده شنو يا عبد الله ... بتمسك يدي ؟

- ..........


اتوقع النهايه كالآتي

توبه جباره النصوحه بعد كل هذه السنين
نجاح عبدالله وزواجه من مياده
انتهاء معاناه زينب

[كيوبيد]

بنات الحاج ........ لخمه لكن



اما عبدالله دواخله تئن من واقعه الذي بعيشه وفُـرض عليه ولم يرتضيه....ولكن ومع كل هذا لايعطيه الحق بان يمسك يد والده وينظر اليه بتحدي

صراحه صراحه استفذني وآلمني هذا المقطع من القصه التي اعلم انها من الخيال

رفع جبارة يده وهوى بها على وجه عبد الله ولكن عبد الله أمسك بها وهو ينظر إليه بتحدٍ نظرات قوية
- ده شنو يا عبد الله ... بتمسك يدي ؟

- ..........


اتوقع النهايه كالآتي

توبه جباره النصوحه بعد كل هذه السنين
نجاح عبدالله وزواجه من مياده
انتهاء معاناه زينب

انا ما دايرو يتوب يخ دا كدا ظريف

http://www.akhbaralyom.net/articles.php?id=74181

[طلال الحكيم]

عزيزي طلال

ابداع وامتاع

واقع وخيال

ويستمر الجمال

تحياتي

معتبر يا غالي
نورت وشرفت ..
وحمد لله على سلامة العودة
تسلم كتير
وما عدمناك يا غالي

[طلال الحكيم]

اوووووووووووو كدا معناتو فى حنك مع ميادة
يخ ديك جنها شمارات لى شنو لى شنو
يسلم خيالك

عزيزي كيوبيد .. يسلم عمرك
توقعاتك صحيحة لو كانت بشكل عكسي
أما غير كده .. فـ لا ... على الأقل في المرحلة دي
لقدام ما معروف بحصل شنو

حيوضح ليك كلامي في المشهد الجاي بإذن الله

[طلال الحكيم]

ابداع ابداع

سرد جميل وممتع بالجد

ويسلم خيالك ذي ماقال كيوبيد

شكرا كتير يا شذى زهر
وجودك هنا أفاح عبق الورد وأعطار الرياحين
ممتن ليك كتير
مع أجمل التحايا