قلت ليه ياخوي الكاشف امرك مقضي تب اها وريني ليه
قال لي يعني اطمن تب
قلت ليه يازول اعتبرو مقضي خلاص
قال لي يالمريسيل اخوي باقي انا اليومين ديل عندي اماني عراض وعاوز ابني مستقبلي
حكيت راسي كده وقلت الجنا ده قطع شك ميرود
يازول انت بتحب
لالالا
عاوز تبني ليك اوضة في البلد
لالالا
طيب مشتهي ليك اكله زي حقت المرة الفاتت لمن سقتك العليا عشيتك في المطعم الجميل داك
ياخي لالالالا
طيب نان المسعلة شنو
طيب اصبر النقولة ليك
اها صبرتا اللهم طولك ياروح
انا باقي ياخوي المريسيل عاوزك تعلمني السواقة
شنو
السواااااقة
والليلة من هنا مابتتحرك الا تعلمني السواقة
يازول السواقة دي مابين يوم وليلة عاوزه ليها كم شهر كده
يازول بس قدر معرفتي علمني والباقي ربنا يقدرني عليه
انا طبعا الفار بدأ يلعب في عبي وقلت اخوي الكاشف ده لو مااديتو ساق وعلمتو حايختها لي نقطة سودا في تاريخي زاتو وهمهمت كده بعد ماعاينت ليه كويس وهو فاتح خشمو شبرين ونص ويضحك ويلولح لي براسو يعني وافق عليك الله وافق .
قلت ليه خلاص تعال النمشي لمكان فيه ميدان واعلمك حسبنا الله ونعم الوكيل
مشينا الميدان واول مادخلنا الميدان اشوفو ليك قعد يتململ ويفرك في يديه ويعضي في خشمو الزول ده مالو انا عازمو ضبيحة ولا سواقه
المهم قبال مااديه العربية يسوقه علمتو كم حاجة كده رجلك اليمين في الابنص ورجلك الشمال في الكلتش ويدك اليمين تحرك بيها العصاية دي بالله قبال ماتم كلامي قال لي انا ماعندي عصاية اجيبة ليك من وين هسع
يازول كدي استهدي بالله عصاية شنو وعكاز شنو
انا قاصد ليك عصاية الجيربوكس دي
ايواااا بالله دي عصاية
انا من زمان قايلة تعشيقة
تعشيقة شنو يا ابرويس عامل زي سرج العجلة
المهم قلت ليه خلي بالك قدام وارفع رجلك من الكلتش براحة ودوس الابنص حبة حبة
قال لي سمح تب
نزلت ليه وقلت ليه خلاص تعال بقادي وانا بكون جنبك لو غلطت اقدر اساعدك
نزل وركب خلق عجلة القيادة واشوفو ليك نطط عيونو وشنبو اتنبش صوفة صوفة وكرعينو يطقن في كرعيني وجسمو برد وبقي يتصبب عرق وقال لي انا دخته
عرفتو علي طول خايف قلت ليه اسمع هنا السواقه دي يامعلم انت ماعاوزه الخوف بتودينا التونج
قال لي خلاص كويس غايتو اخد ليه نفس عميق وزفرات طوال وقال استعنا علي الشقي بالله
بس اشوف ليك اخوي الكاشف دور العربية تاني وهي شغاله جخخخخ جخخخخ قرب يحرق لي الاستارتر يازول العربية دي مدورة مالك جاري علي المفتاح تاني
والله المريسيل اخوي عربيتك محت ماسمحة انا قايلة مبطلة
قول ماشاء الله
ماشاء الله والله عيني باردة تب
اها اخوي امشي عشان نمشي نحن كمان من ضوء
خلاص اسوق
لالالا
انتظرني امشي واجي خلاص
ايواا سوق يابني ادم
غايتو شويه شويه كده ساق والعربية مرة تمشي عديل ومرة تفنجط مرة تمشي ومرة تزح زححان بالجنبة كده كيف عمله انا لحدي هسع ماعارف المهم اشوف ليك الزول فرحان وفرح التقول سايق طيارة الايبرص 330 ويقول هع شنو ليك ما خطيير مش مفروض يدوني الرخصة طوالي
اي من المفروض يدوك الرخصة علي الاقل نقدر ننقص اعداد الهنود والبنغالة ديل شويه
المهم ساق شويه ولفينا كم لفة وقلت ليه كده خلاص اليوم بكرة تاني بجيك بالله مسك في الدركسون وحلف بالتقطعو مايفكو يازول مالك قال شنو عاوز اعمل بيها دور بي
دوربي ده شنو
ياخي دور بي حقت الاعراس ديك لمن يجيبو العرسان مش بلفو بيهم شويه كده في السهلة بس انا عاوز اتعلم الحتة دي
طيب تتعلمها هسع في الليل ده وده منو الكتر خيرو ده العاوز تلف بيه بعدين ده ياتو عريس المطرطش ده يازول ماتنزل اديتنا الليل ياهو الكلام الخايف منو انا زاااتي
عليك الله يالمريسيل لفة واحدة بس
طيب يلااا لف يلف قطرك زاتو
غايتو اللفة زاتة نحن لمن خلصنها في ساعة و16 دقيقة بتوقيت ام القرئ
فضلنا علي الحال ده كل يوم اجيه شويه بعد الدوام واديه سوقه غايتو اتعلم شويه وفي مرة من ذات المرات قال لي عاوز اطلع الشارع الجنب البيت ده انا خلاص زهجت من الميدان ده
يازول ماتخلينا هنا مافي زول جايب ليك خبر واهو انت بتتعلم بالمجان
عليك الله طلعني شويه
قلت خلاص مافي مشكلة
وفعلا طلعتو شارع صغير كده وماشين في امان الله بس فجأة كده ظهر قدامنا زول ماشي بكرعيه بالله سكاه ليك لمن دخل في برميل البلدية وقفنا العربية وقعدنا ننفض للزول في هدومو يازول انت كويس( ايوا صديق انا تمام بس هذا سواق مخ مافي ) خلاص معليش صديق
قلت ليه خلاص كدي النسوق انا حلف بالتقطعو مايزح من الدركسون ياخوانا دي شبكة شنو الشبكنا فيها دي غايتو مشي بالعربية شويه شويه وانا بقيت اعاين ليه في الشارع لو شفت لي زول جااي من هنااااك اقول ليه شايفو ولاماشايفو طبعا بقول لي شايفو بالرغم انا عارفو رقبتو واقفة عود ولابعاين لايمين ولاشمين وراسو ماديه قدامو يقرب يكسر القزاز بس التقول سايق ليه تور
وبعد كم يوم دق لي ف التلفون قال لي شنو يازول انا مشيت قدمت في مدرسة المرور للرخصة وبالمرة عاوز اطلعها كبيرة عشان اللوري حقي هناك امشي اجيب بيه الفحم وخرفان الضحية
يازول كبيرة شنو انت قايل البلد سايبه كدي هسع طلع الصغيرة وبعدين الكبيرة قال لي سمح
كم يوم كده اتصل عليه تلفونو مقفول قلبي اكلني عليه شديد
اتصلت باولادو قالوا لي بطلع من الفجر بجي بعد صلاة العشاء وكرعيه مورمات من السواقه
ليه هو كان بسوق العربيه ولا بجرها
يوم التلاتة كده ضربت عليه ولقيت تلفونو مفتوح قال لي انا في المدرسة وهسع موديننا علي ساحة الامتحان وانا حفظت كل الحاجات العملناها نحن سواء ماتخاف اخوك صنديد حرم لو قالوا لي ارجع بيها حركة وراء وراء ماخايف اسوقه ليهم لحدي مدني قلت ليه مدني
قالي اي
والله كلام ياعوض دكام المهم ابقي عشرة علي نفسك ومدني خليها بعدين خلاص
اتصلت عليه بعد العصر وقلت اطمن عليه الو الو الو اخوي الكاشف
صوتو كان تعبان شديد يازول انت شديد
قال لي شديد وحرم نجحت في الامتحان وكمان بلاقيود وهسع رخصتي في جيبي حارة
قلت يازول والله الف مبروك
يعني ماقالوا ليك اي حاجة
في البداية تمتم كده وقال لي ياخوي الكاشف ماادسو عليك باقي الكضب حراااام
العسكري بعد ما اختبرني في الميدان ضربني ام دلدوم في ضهري وقال لي نحن في المرور اعطيناك الرخصة لكن عليك الله ابقي عشرة علي امة محمد دي
وانا طبعا فكيته ليك ضحكة شديدة وقلت ليه يازول مبروكة تب
اها عزمني غداء عشان فرحتو بالرخصة ....
غايتو اتغدينا معاه وانا قبال ماطلع وصيت وليداتو وقلت ليهم والله انا بحبكم لله في الله بس ابوكم ده لو جاب ليه عربيه ماتركبوا معاه الا بعد سنة ....
عشان العربية دي ماحقتكم دي حقت ناس تانية راجياهم كم تفلقه وكم سكة بالطريق
الله يستر علي عباده غايتو
