سعاد

[مرسال الشوق]

شغف الرواية ....
خلانا ندردق بالواطة ماتشحتف روحنا اديتنا الليل

[ود المطامير]

شغف الرواية ....
خلانا ندردق بالواطة ماتشحتف روحنا اديتنا الليل

هههههههههههههه

أول شى يا صاحبى مشتااااقين والله

وتانى شى الكتابه على الهواء مباشره

لكن ما عليك ح نسرع الوتيره إن شاء الله

[يقين]

عسى المانع خير ود المطامير

راجينك على نار الشوق لي سعاد والحاصل عليها وليها

أتمناك طيب

[ود المطامير]

عسى المانع خير ود المطامير

راجينك على نار الشوق لي سعاد والحاصل عليها وليها

أتمناك طيب

تسلمى والله
وآسف جدا على الغياب والإنقطاع

كل الحكايه إنو كما ذكرت إنو التأليف بكون على الهواء مباشرة
أها .. بنات أفكارى . الفتره اللى فاتت دى حلفن بالتقطعهن ما يشوفن شغلهن ويجيبن لى الكلام
لكن ما عليك بكره إن شاء الله يا قامن عاسن عواستهن يا بوديهن بيت أبوهن هع هع هع

يديك العافيه

[مرسال الشوق]

لالالالا ..... الطلاق ماحبابو
دلعهن ... ومجدهن ... وبعدين خليهن يبدعن ويسيحن فينا حلاوة
وبعدين عاد مخير فيهن ... نشوف قصة سعاد دي الخلتنا ندردق بالواطة
وكرفسنا هدومنا .... غايتو صبر يبل اللآبري تب مافينا ليك ارح الكع

ماسمعت بالمثل البقول ...
كتلوك ولا جوك جوك ... عشان كده البشتنة ورقاد الواطة ماحبابو

وبكرا من دغيشا بدري تبروقتي في يدي وفانوسي وعصاي انا عارفك بتدينا انصاص الليالي


فتك بعافية ....

[ود المطامير]

لالالالا ..... الطلاق ماحبابو
دلعهن ... ومجدهن ... وبعدين خليهن يبدعن ويسيحن فينا حلاوة
وبعدين عاد مخير فيهن ... نشوف قصة سعاد دي الخلتنا ندردق بالواطة
وكرفسنا هدومنا .... غايتو صبر يبل اللآبري تب مافينا ليك ارح الكع

ماسمعت بالمثل البقول ...
كتلوك ولا جوك جوك ... عشان كده البشتنة ورقاد الواطة ماحبابو

وبكرا من دغيشا بدري تبروقتي في يدي وفانوسي وعصاي انا عارفك بتدينا انصاص الليالي


فتك بعافية ....

ههههههههههههههههههههه

شكيت محنك يا صاحبى

وحات الله يا صاحبى اليوم عندنا جو خرافى

حقو الواحد يعمل ليكم فيها شاعر ويؤلف ليكم قصيده

الليل يا حليلو لقد هرمنا

[ود المطامير]

الدكتور

هرع الكثيرون لمنزل خالتها ووجدوها فى إعياء وتعب ظاهر
كانت إبنة خالتها قد قطعت شريط من طرحتها وربطت به ساقها أعلى مكان الدغه
وكان العقرب يمشى ببطء عند ما قام ود الجاك بقتله بمركوبه الذى أكل عليه الدهر وشرب
تم حملها ووضعها على بكسى العمده السابق بقيادة إبنه .. فهم هذا طبعهم عند المحن ينسون خلافاتهم
ويغيثون الملهوف وفى لهفه وجزع وصلو بها شفخانة القريه التى ليس فيها غير الشاش وحقن البنسلين
وشوية مطهرات وبقية الرفوف تصلح تكون قفص للحمام
قال لهم التمرجى بعد أن حقنها بحقنة ما .. قال لهم ..
_ طيرو بيها طيران مدنى ، العقرب القرصتها دى الظاهر عليها سمينه ومبغ بغه
ودقائق كان البكسى يسابق الريح فى إتجاه مدنى وخلفه البكاسى واللوارى والكل يتضرع
إلى الله أن يشفى ريحانة القريه التى كانت وقتها تئن وتتوجع وتكاد تفقد الوعى
كانت تجلس ورأسها على حضن أمها وود العمده يقود ببراعه رغم كثرة الخيران والحفر
بعد رحلة قلق وسباق مع السم الذى إستشرى فى العروق الغضه كانت الجميله على طاولة الدكتور
الذى بدأ يتفحص جمالها أكثر من تفحصه لآلامها .. كانت تحفه حتى وهى تصارع الألم
فالجمال الآسر يزداد جمالا حتى فى حالات الحزن والألم
وسرعان ما أخذت محتويات الدربات تنساب فى عروقها تتبع درب السم الفتاك
ساعات مرت .. وأهلها متجمعين تحت الأشجار كيمان كيمان .. قال .. أبكرنك
_ هى العقرب دى تخلى ناس البعشوم ديل وتطق السمحه ؟
_ يا زول يطقك عكاز فى فاخورتك دى .
_ غايتو آناس إن قالو عاوزين ليها دم .. يمين أقطع ليها شريانى دا
_ ها المكعوج دا ، يمين دمك يخش جسمها كان يطلع قبال العرق ، مو لايق معاها تب
_ ها ها ها .. هع هع هع .. هههههههه
_ لا نان لايق دمك إنتا الكلو ويكه
_ ها .. ناس .. إنتو فى شنو والناس فى شنو ؟
وهم فى غمرة شغبهم اللذيذ أتتهم البشرى بأن .. السمحه .. تعدت مرحلة الخطر
كانوا بفطرتهم يعلمون بأنها كونها وصلت مدنى فهى بخير لمعرفتهم أن عقارب قريتهم
عند ما تلدغ حد ( الجارى عليهو ما بحصلو ) ولكن عناية الله كانت مع السمحه
التى وجدت رعايه وعنايه فائقه من الدكتور الذى أكثر من المرور عليها والجلوس بقربها
والكشف عليها .. لاحظت ( سعاد ) بريق فى عينيه ورعشه فى أنامله كلما يمسك
ساقها وعند ما يضع السماعه كانت تكاد تسمع صوت أنفاسه
كان المفروض أن تخرج فى اليوم التالى ولكن الدكتور أمر بمكوثها بالمستشفى ثلاث ليالى
بحجة أن ترتاح وتكون تحت الملاحظه المستمره .. بالنسبه لها .. كان القرار فيه شى من حتى
وبالنسبه لهم كان قرار الدكتور مافى أى داعى له لأنهم يعرفون اللى ( بجلى ) من قرصة عقاربهم
فى الساعه الأولى بعد اللدغه ( تانى ما بتجيهو عوجه تب ) ولكنه قرار الدكتور فإمتثلوا له
وأصبحت النيمه الكبيره فى باحة المستشفى هى مأواهم ، ينامون تحتها ويأكلون تحتها
وأكواب الشاى وفناجين القهوه والتمباك والسجائر مدوره على مدار اليوم
وفى معظم ساعات اليوم ينشرون فى مدنى وأسواقها وشوارعها وأكشاكها
وخرجت ( السمحه ) يزفونها كالعروس وتم إستقبالها فى قريتها إستقبال حافل بالزغاريد والذبائح
وبدأت الورده تتفتح من جديد بعد أن أصابها نوع من الجفاف من الإعياء جراء السم الفتاك
بعد إسبوع .. وعند المغيب توقفت عربه أمام منزل العمده ونزل منها الدكتور الذى عالجها
ومعه بعض الرجال وإستقبلهم العمده بكل حفاوة أهل البلد وأتت ( سعاد ) للسلام
فرآها وهى مزدهره يانعه فإنخلع لب فؤاده وعند ما غادرت شعر بروحه تخرج منها وقال لوالدها
_ ما شاء الله .. سعاد .. بقت ذى الورده
_ تسلم الله ما ضراك
_ الصراحه يا عمده أنا جيت أحمد ليكم السلامه وكمان برضو عندى غرض
_ تسلم والله وقول غرضك إن شاء الله مغضى تب
_ أنا فى الحقيقه جبت أعمامى وجيت طالب يد بتك ( سعاد )
_ لينا الشرف والله ، لكن أظنك متزوج وعندك أولاد
_ إحمم إحم .. كح كح ، آى متزوج وعندى ولد وبنت لكن الخير كتير والحمد لله
_ والله يا دكتور .. خير الله راقد فى كل مكان علا بتنا ما بنديها لغير واحد من أهلها تب
_ يا عمده كدى قول خير
_ خير كيفن وإنت بوليداتك ؟
_ الشرع حلل ل....
_ شرع الله بنعرفو يا دكتور .. بتى ما بتفوت جنيات أهلها
_ وين هم الجنيات ؟ سعاد دى عاوزه ليها واح.......
_ أفو ؟ أفو آلدكتور ؟ العمده .. ألقطو بعكازى دا ؟
_ أقيف آحامد الزول ضيفنا وفى بيتنا ، يا دكتور كتر خيرك على وقفتك معانا
_ يا عمى العمده وقفة شنو ؟ حرم من هو قال تقعد تلاته أيام فى المستشفى أنا قلبى أكلنى
_ أيّا صدقت يا المبارك
_ صُح والله البنيه من أول يوم شفت علا أبفقره دا كان راقدلو فوق راى
_ ها ناس أسكتو .. أسكتو
_ سكتنا يابا العمده
_ الظاهر نحنا غلطانين بجيتنا ليكم .. إجيكم دكتور .. دكتور وتسمعوهو جنس الكلام دا ؟
_ ها زول ها .. حرم هنى نحنا أكتر من ألف زول طقتو عقرب عالجناهو فى فرد ساعه وبدون سماعه
_ أيّا .. أيّا وحات الله البعشوم دا السم المصاهو من كريعات الناس يملالو جركانه
_ عاد البعشوم دا تطير عيشتو فى السم جايبين سيرتو
_ ها ها ها .. هع هع هع .. هههههههههههه
_ أها ودعناكم الله
_ كدى كملو الشاهى
_ ما دايرنو
_ فى أمان الله
وإنتشر الخبر كالنار فى الهشيم
السمحه جاها دكتور .. عاد مين زيك يا سعاد ؟

[ام اسامه]

1
قبل غروب شمس القريه الوديعه التى توسدت بخجل الضفه الشرقيه للنيل الأزرق
تجمعت فى الأفق الغيوم والسحُب الداكنه التى كانت تتشكل بأشكال مفزعه كأنها رؤس الشياطين
مما جعل أهل القريه ينشطون كخلية نحل فى ترميم وشد كل ما يحتاج شد من أجل مواجهة الخطر القادم
فبخبرتهم الطويله يعلمون بأن أمطاراً غزيره مصحوبه برياح عاتيه على وشك الوصل لقريتهم الوديعه

على مشارف القريه أطلق الراعى صيحته المعهوده التى تعنى لقطيع الغنم أن تفرقوا إلى بيتكم
فسار القطيع فى صفوف كثيره طويله محدثاً جلبه وغوغاء وغبار فى الأزقه الضيقه
وسرعان ما كانت النساء فى الزرائب يحلبن الماعز لإعداد شاى لليله يحسبها الجميع سوف تكون طويله

كان الجميع يتراكضون فى كل الإتجاهات ويسابقون الزمن من أجل سد كل الثغرات
تراهم على رؤس البيوت يردمونها بالتراب وفى الزرائيب يشدون الحبال ويفتحون مجارى مياه الأمطار
التى هطلت على رؤسهم بغزاره منقطعة النظير مصحوبه برياح عاتيه وبرق يخطف الأنظار
وسرعان ما كان الجميع داخل المنازل مجتمعين حول أكواب الشاى والزلابيه ويدعون الله أن تكون أمطار خير وبركه
وبينما كانت الرياح تتلاعب بالأشجار والرواكيب وصوت الرعد يصم الاذان وفى غمرة إنشغالهم بأحوالهم
تصل لمسامعهم صرخات شقت طريقها إلى عنان السماء الماطره بقوه وعنف

_ الله ليييييييييييييييييييي ... يا الله لييييييييييييييييييي

خبطت دار السلام على صرها وهى تهتف فى فزع

_ كرررررررر على أكان التايه عاوزه تلد لينا فى الجو دا !!!

خرج الرجال والنساء من المنازل وإتجهو صوب منزل ود الفكى مصدر الصوت وزوجته التى على وشك الولاده
تزحلق جاد الرب وسقط على وجهه فى الوحل فساعده بله الخدرجى على النهوض ونهض وهو يشتم فى المره التى لا بتعرف الوقت المناسب
كانوا يقدمون رجلاً والرياح العاتيه ترجعهم إلى الخلف وبعد معاناه شديده وصلوا لباب ود الفكى الذى
خرج لهم وهو يضع مصلاته على رأسه وأخبرهم إنو التايه على وشك الولاده

_ إتا يا ود الفكى ؟ مرتك دى ما لقت إلا اليوم دا شان تلد فوقو ؟
_ نان يا الخدر بيدها يعنى ولأ بيدها ؟
_ ها ناس هووووى خلو كلامكم الشين دا كدى واحد فيكم يمشى يجيب علويه الدايه
_ نان يا أبوضراع علويه دى فى ظلط مدنى بتوحل ، هسى تجى كيف ؟
_ يا زول إن شاء الله تشيلوها شيل ولأ يعنى عاوزين التايه أختى تلد براها ذى النعجه ؟

ذهب ود نمر وإصطحب معه ود حجيلان ووصلا منزل علويه الدايه وهما يرجفان من البرد القارص
طرق ود حجيلان الباب وهو يصيح

_ علويه هووووووووووووى جهزى الشنيطه وأبقى مارقه ، التايه خلاص ختت نمره 3

أتاهم صوت علويه من الداخل وهى تلوك الزلابيا

_ أجى ؟ وحات أمى أكان ولدت براها ما بمشى ليها فى الشهفوفه دى
_ ها مره أنجرى لا برا وخلى المكوضما دى

خرجت إليهم وهى تتدثر بقطعة برش وناولت ود حجيلان شنطة أدواتها وقالت لهم

_ عاد يا ود حجيلان جنا التايه دا إلا بدور يزلقنى و يكسر لى مخروقتى

أمسك ود نمر وود حجيلان بيديها وساعداها على المشى فى الطين وهم يقاومون المطر والرياح
العاتيه ، كانت علويه الدايه قد إقتربت من الخامسه والخمسين من عمرها وبحكم عامل سنها
فهى فى الظروف العاديه لا تقوى على المشى بسرعه وعليه كانت تتلمس خطواتها بحذر
وكانت تغمض عينهيها كثيرا لدخول قطرات المياه فيهما
لكز ود نمر ود حجيلان و فهمها صديقه على الطائر فما كان منهما إلا وقد أمسكا بها
من تحت إبطيها وسحباها سحباً

_ أجى يا ولايداتى ؟ دا كلام شنو دا ؟
_ عاد إنتى تقعدى تتكى لينا كدا لما التايه تفطس ؟
_ هى نان هادك تراهو شبشبى إتملص
_ والله البسمع شبشبى يقول حق نانسى عجرم ، عليك الله يا حاجه هو دا شبشب ؟
_ هى لكن ما إتملص من كراعى أقيفو جيبوهو لى
_ ها مره نقيف نجيب شنو ؟ على الطلاق يستناك للحول وفِرد زول ما ح يدنقر عليهو

بهذا المشهد ، سار الثلاثه إلى أن وصلوا بيت التيايه ووقفت علويه الدايه تتنفض وهى تشتم فى ود
حميدان وود نمر وحملت شنطتها ودخلت على التايه وهى تصيح بها من على البعد

_ ها مره إنتى جنيتى وعاوزه تلدى لينا فى المطره دى ؟ بالله البسمع يا الله ليييييييي يقول خلاص جايبه لينا ليلى علوى
_ أجئ يا علويه ؟ دا كلام شنو دا ؟
_ هوووووى يا البخيته إنتى أسكتى ، عاد كان ناس ود نمر وود حجيلان جروك زىّ ذى شوال العيش ما كنتى قلتى كدا ، كدى أمشى سخنى المويه

فى البيت المجاور كان معظم رجال القريه يحتسون الشاى ويتسامرون ويدعون الله أن يحل التايه بالسلامه

_ إتا يا ود الفكى ؟
_ أيّا يا أبضريس ؟
_ على النعمه جناك دا جايى وجاب معاهو الهوا
_ ها زووول فال الله ولا فالك
_ عليك النبى من بدور يمرق كبست علينا المطره والشعفوفه رقدت نص البيوت سلطه
_ أستغفرو الله يا ناس وأدعو للوليه ربنا يحلها بالسلامه
_ امييين
_ امييين
_ امييين

قريه وديعه توسدت بخجل الضفه الشرقيه للنيل الأزرق
ها هى الآن تحت رحمة الله وتتلاعب بها الرياح كما تتلاعب بخُصلات صبيه فى عمر الزهور
ومعظم مبانيها قد إستسلمت وسقطت أجزاء منها

فى بيت كانت التايه تولول وتدعو ربها ثم عم الصمت ولحظات خرجت البتول وتوجهت للمنزل الذى به رجال القريه

_ يا ود الفكى ، هووووووووى يا ود الفكى
_ حباب البتول ، بشرى
_ مبررررروك البنيه

وإسدل ستار تلك الليله و ( سعاد سيطره ) تطلق أول صرخه لها فى الحياه

ود المطامير
سرد قمة في الروعه والجمال
في شوق الانتظار

[يقين]

تسلمى والله
وآسف جدا على الغياب والإنقطاع

كل الحكايه إنو كما ذكرت إنو التأليف بكون على الهواء مباشرة
أها .. بنات أفكارى . الفتره اللى فاتت دى حلفن بالتقطعهن ما يشوفن شغلهن ويجيبن لى الكلام
لكن ما عليك بكره إن شاء الله يا قامن عاسن عواستهن يا بوديهن بيت أبوهن هع هع هع

يديك العافيه

صح كلامك والله ..

عندي قصة معلقة ليها خمسه شهور في الجزء الخامس

بس انت شد حيلك مع سعاد حبة ..

ومطرة الليله دي بتجيب الإلهام تب

أقعد عافيه اخوي

[ود المطامير]

ود المطامير
سرد قمة في الروعه والجمال
في شوق الانتظار

أهلييين أختنا أم أسامه

تسلمى والله

إن شاء الله خاصه مع أجوائنا الخريفيه دى

[ود المطامير]

صح كلامك والله ..

عندي قصة معلقة ليها خمسه شهور في الجزء الخامس

بس انت شد حيلك مع سعاد حبة ..

ومطرة الليله دي بتجيب الإلهام تب

أقعد عافيه اخوي

ههههههههههههههههههههههه

أيوااااا يعنى إنتى مجرباها لمن تعصرج

تعرفى ؟ أنا قلت مع قرصة العقرب دى أكتل ليكم سعاد دى وخلاص

[نسيم الشمال]

اخي ود المطامير متابعين بكل شوق يحفظك الله...

[ام اسامه]

أهلييين أختنا أم أسامه

تسلمى والله

إن شاء الله خاصه مع أجوائنا الخريفيه دى

ايه عدم الاحترام دا
وين يا خالتو

[ود المطامير]

اخي ود المطامير متابعين بكل شوق يحفظك الله...

الله يديك العافيه

وكلامكم الطيب دا هو بمثابة وقود لمحرك القصه

[ود المطامير]

ايه عدم الاحترام دا
وين يا خالتو

هههههههههههههههههههههه

وحات الله فعلا خالتو عشان الخالات قويااات

[ود المطامير]

البلدات
وأتى الخريف
وإزدهرت القريه ولبست اللون الأخضر الزاهى
والعصافير الملونه زاحمت ( ود أبرق ) فى فروع أشجار النيم
وما بين الجروف الخضراء والبلدات وعيدان الذره والسمبر والرهو كان أهل القريه
يقضون يومهم .. ففصل الخريف عندهم فصل نشاط وحصاد
وذات عصر جميل والسماء صافيه والجو بديع كان معظم أهل القريه منتشرين فى ( البلدات )
الكل يعمل فى همه ونشاط رجال ونساء وشباب من الجنسين وأطفال
كانت .. سعاد .. ترتدى أجمل الملابس التى جعلتها فى قمة الحُسن
كان ذهابها ( للبلدات .. الزراعه المطره للذره ) كانت تمشى من أجل الترفيه فقط
تلعب وتنطط وتغنى وتطارد الفراشات الملونه فتطاير ضفائرها وتهتز فتنة الإنوثه المكتنزه فيها
كانت عيدان الذره بطولها أو أطول قليلا وكانت أحيانا لا ترى من الذى بقربها
وهى فى دلالها ودلعها خلف الفراشات الملونه لم تلحظ أن ذئباً بشريا يحوم حولها
كانت أنفاسه المحمومه تلسع شواربه وظل يتربص بها كما يتربص الذئب بالفريسه
كانت قد إبتعدت عن القوم مسافه غير قليله وكانت الشمس على وشك الغروب
وبينما هى فى لهوها ودلعها ودلالها كان ذلك الشخص قد دنا منها وأصبح بينهما صفين من عيدان الذره
وإنحنت الجميله لكى تلتقط ورده أعجبتها وفجأه كما النسر ينقض على صوص الدجاج
إنقض عليها بقوه وفى ثوانى معدوده شل حركتها وألجم فمها بيده وبدأ يسحبها بعيدا
وهى تحاول الإفلات ولكن هيهات .. هيهات لها أن تنفلت من قبضة الذى إشتعلت فى جواه
نيران الشهوه براكين تتفجر .. جرها جرا عبر سرابات الذره إلى مكان تكثر فيه شجيرات
( اللعوت ) بكثافه .. كان يضغط عليها بقوه أشعرتها بالألم
كان قد طوق الخصر اليانع بيد ويد على ثغرها المثير ويسحبها سحبا على عيدان الذره والحشائش
فى تلك الأثناء .. بدأ الجميع ترتيبات العوده .. وبدأ الجميع ينادون بعضهم بعضا إيذانا بالعوده
كان الجميع منهمكون بترتيب أشيائهم وحملها وبدأوا ينسلون فوجا بعد فوج من داخل المزارع المطريه
وفجأه صاحت البخيته .. سعاد وينى ؟
وصاح الكل ينادونها وفى دقائق عادوا وإنتشروا بين عيدان الذره الكثيفه يبحثون عنها
حينها كانت الشمس قد غابت وبدأ الليل ينسج خيوطه على القريه
وليل الخريف داكن السواد والكل مرتعب ومهمة البحث فى مساحات الذره الشاسعه صعبه للغايه
كان الضحاك ذو السبع سنوات قد أطلق ساقيه للريح وأخبر أبيها العمده بالذى حصل
فركب البكسى ومعه خفره من الذين كانوا يعملون فى جنينة العمده السابق وقد تسلحوا بالبنادق
هذا كان حالهم ، مرعوبين فزعين ، فكيف كان الحال مع .. سعاد ..
والذئب البشرى خلف شجيرات اللعوت مرتديا قناع كلصوص البنوك فى أفلام الغرب الأمريكى

[مرسال الشوق]

علي الطرب بتلاتة ود ابرق ده زاحمنا نحن زاتنا
اهااا

ارح استعجل

[مرسال الشوق]

يارب سترك ولطفك ....
سعاد اكان حصل ليها حاجة الرمادة في خشم العمدة
عليك الله طلعها منو بالسلامة
ان شاء تقول عضتو في الدقائق الاخيرة وهربت
مالك عاوز تخلينا ننصب صيوان الحزن علي ضفاف نهر الفرح الدفاق
غايتو اكان نهيتها كده قطع شك اليوم جاقم ليك كباية

[ود المطامير]

يارب سترك ولطفك ....
سعاد اكان حصل ليها حاجة الرمادة في خشم العمدة
عليك الله طلعها منو بالسلامة
ان شاء تقول عضتو في الدقائق الاخيرة وهربت
مالك عاوز تخلينا ننصب صيوان الحزن علي ضفاف نهر الفرح الدفاق
غايتو اكان نهيتها كده قطع شك اليوم جاقم ليك كباية

هع هع هع هع هع

والله لقيتك فقرى خلاص

قلت ليك .. أنا كان جغمت لى كبايه كنت جبت التفاصيل

[مرسال الشوق]

هع هع هع هع هع

والله لقيتك فقرى خلاص

قلت ليك .. أنا كان جغمت لى كبايه كنت جبت التفاصيل

يعني عاوز تفطس القصة
يازول نحن هسع بعكاكيزنا وسط السرابات والجداول
لانبالي بخريش الزراعة ولابوخذ شوك الحسكنيت
وازيدك من الشعر بيت لمن نطينا الترعة
مركوبي غرز في الطين فتو قبلو وجيت جاري
ماتخلينا نرجع والسكليب مالي المكان