انتم معي ام لا

[شذي زهر]

معاك معاك معاك

اهلين ساره
وجميل كونك معي

[شذي زهر]

سلام عليكم
وعندي شي عايزه اقوله لكل اعضاء منتدي انا سوداني

الخلافات الشخصيه بين الاعضاء داخل المنتدي
ليه ماتكون محصوره بين طرفي او اطراف الخلاف...بمعني ان لايدخل فيها اعضاء
آخرين لاذنب لهم ولاعلم لهم بتلك الخلافات
اوضح اكتر
عضو علي خلاف مع عضو آخر...ماعندهم اي تواصل مع بعض داخل المنتدي
من خلال البوستات والمشاركات.....ولكن احدهم اذا توجه له سؤال او اي مشاركه
من اعضاء آخرين.....نجد الآخر.يلتقط المشاركه او السؤال
ويرد نيابه عنه...وللاسف (برد غير جميل)

واحيانا

يكون اسم احدهم ضمن مجموعه من الاسماء....
فياتي الآخر ويحذف الاسم في الاقتباس(برضو حركه ماجميله)

الاسلوب دا بيكون فيه ظلم لبقيه الاعضاء
لانهم ماعندهم ذنب انهم يتعكروا بخلافات غيرهم
لانه احتمال كبير ان يطلب العضو من الكنترول بحذف اقتباس لمشاركه له
اذا احس انها كان سبب في خلافات بين اعضاء
او يطلب صاحب البوست من الكنترول ان يحذف كاااااامل البوست

علي ايه دا كله؟؟؟؟؟

انت عندك خلاف مع عضو كلموا عديل انا اخدت منك الموقف الفلاني ....
في الحته الفلانيه ....اذا اخطأ في حقك ملزم يعتذر...واذا انت من اساءت
الفهم ...ملزم انت تعتذر...
او تتجنبوا بعضكم نهائيا ...وبكده الخلاف ينتهي..او يتوقف
عشان خاطر غيركم
وجميعنا اصلا جاين هنا عشان نرفه ونفرق عن انفسنا ولغيرنا
دا غير الاستفاده من بعضنا

انتم معي ام لا

[يوسف مدير]

اولا اختي شذى زهر احب احييكي على هذه الصراحة التامة ...
ثانيا بالنسبة للموضوع في حد ذاتو في رأيي المتواضع انو مهما كانت هنالك خلافات في هذا المنتدى فيجب ان تكون خلافات فكرية ناضجة ايجابية بمعنى انتي قلتي شئ وانا جيت قلت عكسو تماما او نفيت كلامك بدلائل وقرائن أكيدة ... هنا الخلاف ما اظنو يمتد الى الجانب الشخصي الا في حالة انو على طووول انا واياكي في مناكفات وفي اي موضوع تكتبيهو انا يكون عندي راي مغاير ... هنا للاسف الخلاف بيكون طلع من حتة الخلاف الفكري لخلاف شخصي ...
نجي لنقطة تانية مهمة جدا وهي انا لو كتبت موضوع في اي قسم من المنتدى فمن حق اي عضو يقراهو ويرد عليهو ويعلق لكن في حدود اللباقة واللياقة اللي بتحفظ حقوق الكل ... ممكن يكون في شوية مزحات او تعليقات طريفة لزوم اضفاء جو من المرح على الموضوع اللي ممكن يكون جاد او جامد نوعا ما ... وحتى التعليق لازم اراعي فيهو كل شروط وآداب الرد ... يعني ما يكون فيهو نوع من المطاعنات او التلميح بالاستخفاف بالموضوع او كاتبو او حتى الاستخفاف المباشر والسخرية ... والشئ ده اذا اتكرر معناها في قصد بطريقة او اخرى ...
وما ننسى اننا هنا بيجمعنا كيان واحد والقصد والغرض من اللمة دي اننا نقدم الافضل لينا كاعضاء ولزوار الموقع ...
وقبل كل شئ ما يفوت علينا اننا لما جينا سجلنا فبنلقى تحت شروط التسجيل هذه الآية " ما يلفظ من قول الا لديه رقيب عتيد " وما أظن انها اتكتبت للتجميل وانما للتنبيه للحاجات اللي بنكتبها ...
اختنا شذى زهر ...
لما تحصل حاجة زي دي بين عضوين او اكتر والادارة ما لاحظت الحتة دي فمن واجب العضو المتضرر انو ينبه الادارة ويسعى بكل جهدو انو يعرف اسباب الخلاف مع العضو ده وايه الاسباب اللي بتخليهو يتحامل عليهو لأنو الحتة دي ممكن تضر بالمنتدى وسمعتو وكمان ممكن بعض الاعضاء وخاصة الجدد يشعروا انو في حاجة ما طبيعية بتحصل في المنتدى وبالتالي ممكن الواحد ينسحب او يكتفي بالدخول كزائر او حتى ما يشارك في الاقسام اللي فيها الخلافات دي حتى يتجنب حاجات كتيرة ...
كلنا بنغلط بس المهم اننا نعرف الغلط وين ونحاول نعالجو ...
المسألة ما مسألة مكابرة او مزايدات او بقاء للاقوى او غيرها من المنغصات انما هي اكبر من كده بكتير ... هي رسالة بنقدمها لغيرنا فمن شاء استفاد منها ومن شاء عرفها وتركها كما هي ...
اتمنى انو اي خلاف من اللي اشرتي ليهو يكون راح واي طرفين او اطراف عندها الحاجة دي تتواجه وتتكلم وكل واحد يعرف غلطو او فلان ده غلط معاهو في شنو ويعالج الحتة دي من منطلق انو الدنيا ما دوامة ...
اذا انا زعلان من زول وقطعت علاقتي معاهو من دون ما هو يعرف تفتكروا المشكلة اتحلت ؟؟؟ لا أبدا ... الزول ده حيحاول يعرف انا مالي قطعت علاقتي بيهو لغاية ما يوصل للسبب هو حتى يشعر بالارتياح وبعد كده اذا كان هو فعلا اخطأ أكيد حيحاول يعالج الخطأ او يوضح سوء الفهم ...
ربنا يوفقنا جميعا لتقديم ما يرضيه ...
واعتذر على الاطالة ...

[كيوبيد]

هيوية سلامات
الكلام دا عندنا هنا
كان كدا انا قاعد فى السهلة ساى
لانى ما لاحظت الكلام دا
واذا حصل منى انا شخصيا بهظر
واذا حصل من زول تانى ورينى ليهو
وانا بشيل ليك معاهو وشح القباحة وانبهو

[يقين]

[شذي زهر]

[تائب]

[شذي زهر]

[بانه]

[شذي زهر]

[شذي زهر]

[شذي زهر]

هيويه صباح الخير

طيب لو حصل نقاش او. سوء تفاهم بين اي 2 اعضاء

(ياريت الخلاف بس يكون محصور ما يمتد )

لواتطور الخلاف الناس تلجأ للاداره

والاداره بدوره بتشوف المشكلة وين وبتحلها

ولو فرضنا انه المشكلة ما اتحلت

اي زول يكون في مكانه وعارف حدوده كويس وما يتعداها

والمنتدي يسع الجميع

تحياتي بأنه
اتمني وأتمني أن الإداره . تكون علي علم بكل شارده ووارده
بالمنتدي وبصوره يوميه.أكرر بصوره يوميه
..وترجع كل شي تخطي حدوده
وتحل وتعالج كل الخلافات.وتحفز.... دون تميز أو تحيز
وبكده المنتدي بيرجع لسابق عهده.......

الشي الملاحظ انه المنتدي .أصبح ضعيف جدا
من حضور ومشاركات

[شذي زهر]

سلام عليكم جميعاً
إداره واعضاء في منتدي انا سوداني
عارفين أهم منتدي ...في داخل منتدي انا سوداني
هو شنو؟
منتدي الأصدقاء والاحبه
لأنه يشمل كل مايخص الاعضاء من أحزان وأفراح
فياريت كلنا اول ماندخل المنتدى.....أول شي
نمر علي منتدي الأصدقاء...ونشوف احوالهم ونعرف أخبارهم.
ومانطلع إلا ونترك مشاركه.......إذا كان تهنئه.أو تعزيه أو مشاركه دعاء.
واكيد الأمر .دا بيترك أثر كبير في نفسيه العضو

انا عارفه انكم أصحاب واجب.. ...لكن كلامي دا. بمثابة.
تذكير ودعوه. لي أنا في الاول ولكم ثانيا....بتكثيف الإهتمام بهذا
المنتدي........منتدي الأصدقاء والاحبه

وماعارفه....انتم معي أم لا

[يوسف مدير]

سلام عليكم جميعاً
إداره واعضاء في منتدي انا سوداني
عارفين أهم منتدي ...في داخل منتدي انا سوداني
هو شنو؟
منتدي الأصدقاء والاحبه
لأنه يشمل كل مايخص الاعضاء من أحزان وأفراح
فياريت كلنا اول ماندخل المنتدى.....أول شي
نمر علي منتدي الأصدقاء...ونشوف احوالهم ونعرف أخبارهم.
ومانطلع إلا ونترك مشاركه.......إذا كان تهنئه.أو تعزيه أو مشاركه دعاء.
واكيد الأمر .دا بيترك أثر كبير في نفسيه العضو

انا عارفه انكم أصحاب واجب.. ...لكن كلامي دا. بمثابة.
تذكير ودعوه. لي أنا في الاول ولكم ثانيا....بتكثيف الإهتمام بهذا
المنتدي........منتدي الأصدقاء والاحبه

وماعارفه....انتم معي أم لا

كلام زي العسل والله ...

أكيييييييييييييييد معااااكي ...
انطلاقا من مقولة " الناس بالناس والكل لرب العالمين"...
وكمان الظروف بتمر بينا كلنا وبنحتاج لوقفة بعضنا البعض لتخفيف المصائب والمشاركة في الفرح ودي احلى منها مافي والا فمافيش لزوم الناس تكون موجودة اصلا ...
تحيااااتي يات رايعة ...