الشعب منك وبيك ولك
ونحن ليك نهتف عديل
تحيا القلوب الحبتك
والثورة زاتها الجابتك
والانتخابات اللتك
والله اكبر حقتك
والشعب ماغنمك عديل
بس انت أشر وقول لي تك
ياخ انت هو الزيك منو
ياخ انت ماراجل نبيل
غيرك انت السلطة لي منو
وغيرك انت منو الكفيل
نحن لو فتناك انت
العيشة بعدك مستحيل
انتخابات تاني ليشنو! !
ساكت اقعد ياجميل
انعل ابو القال بسألك
وانعل ابو القال ليك بشيل
ياخ انت هو الزيك منو
ياخ انت ياخي عسل عدييييل
هذا البلد لولاك ماجرى تحتو نيل
كيفن نجيب غيرك بديل
ياخ انت هو الزيك منو
سفلتنا ياشيخنا اب زلط
طاعم كلامك وسلسبيل
متعنا ياخي ومطو مط
حاشاك لاكضاب ولا بتغش نفر
واحد كلامك وقدرو زط
ونحن من عيشتك يمين
متكيفين ووقفنا لط
ياخ انت هو الزيك منو
قالو الحرامية المعاك
اكلو وشبعو بالهنا
مال البلد ماحقكم
هو ف ياتو يوم كان حقنا
مانحن اولاد كلب ساي
بالنسبة لولادة الهنا
خمو القروش ودوها ماليزيا السويد
وان اعترضنا دقنا
مانحن شعب قليل ادب
جد ليك حق ماتحبنا
ماانت ياخ الغنو ليك اوريك طبك
انت ياخ ماااطبنا
ونحن كان ماساي وهم
كيفن بنغضب ربنا
ما انت زي ماقلت ليك
قبال ده بي اسم الله جيت انقذتنا
تسعة وتمانين الف خازوق محترم ركبتنا
وبقينا ياخي مهذبين الحمد لله
الذي بي حكمتك ادبتنا
ياخ انت هو الزيك منو
ياخ انتو ماناس المهابة
ونحن ناس ساكت مساكين
يعني بين قوسين غلابة
قبل ماتطلونا انتو الفهم كان بالترابة
لاعلاج لاصحة لادين
لاوطن ساي كنا غابة
بس بعد ماجيتو انتو الحمد لله اتحدنا
عاد جنوبنا شموخ مهابة الله اكبر
صنتو دارفور كردفان في امان الله زاهية
وصنتو للاوطان شبابا
اما عن صحتنا ده بالنسبة ليكم
انتو ليكم حق تغنو الغنية دييك
وطني ياوطن الصلابة
اما عن تعليمنا اصلا انتو ماافقرا الكتابة
انتو بترولنا ودهبنا وانتو في السما ده السحابة
انتو كان ما الدنيا خاينة كنتو طاااخ جايين صحابة
انتخابات تاني ليشنو
يعني ليه ساويها زاتو
مافي مشكلة في امان الله نحن
والوطن ماتو جباتو
اوع تسمع للمعارضة وافتراهم
ناس حفاتو وناس عراتو
ديل بيقصدو ديننا نحن
وديننا مابنبيع صلاتو
للنصيحة وللأمانة عيبو لي
حكمك ده مالو
في امان الله حلاااااتو
واي زول كان شاكي منك
شاحد الله تقع لهاتو
انت ياخ زيك في انسان
ولا بعدك نحن بنعيش
مافي مشكلة لو كملنا
بكرة اشتري ليك مواطنين
تحكمهم طبيز ودقيش
القروش ماراقدة عندك
والمواطنة في الزمن ده
إما بالسكن إما بالعيش
نحن اسفين ياسعادتك
نحن تعباك معليش
كل مانقول ليك دايرين
تمشو تقتلو فينا بالجيش
قبل ماتدقونا بالنار
كنتو لمن قلنا دايرين
انتو كنتو تقولو مافيش
اوع تزعل من سؤالنا
بعد ذلك ببقي داك الرقدة ياعيش
تبقي ضيقة ولا مافي ماالعمارة
عشة كان معروشة بي خيش
نحن اسفين ياسعادتك
نحن تعبناك معليش
انت ياخ زيك في انسان
ولا بعدك لينا قيمة
انتو ما اهل التسامح
انتو ما اهل العزيمة
انتو ما النية السليمة
انتو ما الاسرة الكريمة
وانتو بينكم والملايكة
تحت تحت عشرة قديمة
اوع تزعل ياحبيبنا عليك الله
اوع تزعل مننا
دي تكون غبينة حاقدين
ماتشتغل بالمردفين المارقين الزينا
هاك بيع واشتري فينا ساي
ماضعاف انحنا ومامصدق جسنا
مبروك عليك الانتخابات
يازعيم الامة يامدلعنا يامشبعنا ياممتعنا
يا.... احييي انا
بنباركو ليك الفوز ضمان
بس للأسف
لا اتت لا الناس المعاك اصبحتو حاجة تخصنا
بس هاك مني واسمعها
الكلمة البتمرق كل يوم ضد القيود
مادمت انت وشلتك يومي بتختو ف نارنا عود
صدقني والله العظيم
شوف عينك اكتوبر بيعود
بيننا الشوارع يازعيم
لا تقول ( عصر الحضارة ) وانت شايف الدنيا غابة البلد ملصت هدوما عريانة بس خلت ( شُرابها ) الرجال عبدوا ( الفياغرا) البنات هجروا ( البكارة ) السياسة بقت نخاسة شرف الكلام أصبح نجاسة الدراما بقت ( عوارة ) الكضب خَنقَ المنابر النضال ( شباك تذاكر ) الصحف تِفلْ المحابر الظُلم أصبح شطارة والغُبن عِدِم الشرارة . ............ لا تقول الحالة حارة وانت ساكت بس تنقنق وانت لابد في مغارة شاتوكا ( بالبوت ) الكبير سووكا ( همبول ) وزول عوير يا ( صانع الثورات ) حليلك ما لاقي لي حالك بصارة ( تأكل في خاطرك ) ليل نهار ومرات تضوق ( لحم الحمير) يازول أقيف عِيشتك تطير ما تخلي ( نعيك ) يوم يصير لا ( تبيع جروحك ) لي ( مفتش ) أو ( وزير ) أشعِل خيوط غُبنك جسارة ما تنوم وتَشخُر في المغارة . .............. لا تقول ده عصر الحضارة الحالة شينة وموت غبينة والمخازي تلد مخازي الكعب مقبول وعادي القيامة تدور تقوم و ( اللبّع ) دقولو طارة . ............. كل زنقة تباري زنقة . الحكومة - ومش قلنا ليكم- ( قونقوليسة وعاملة منقة ) ؟ التهتُك صار ( حداثة ) القِيم جدعت ( لباسا ) البلد ( مفتوحة بيت ) بالنهار أو بالمبيت كلو ( لبوة ) لقت مقاسا وكل طاهر صار نجاسة . ............ يا صانع الثورات حليلك نومك تِقل صُبحك رماد غضبك قعاد شاييك تِفِل وقهوة صباحك فنجان أسا. يوماتي فك ريقك صيام من الصباح حتى المسا . حيلك فتر سخسخ حَرَن عند الإشارة وطنك قطار تاه وضاع جوه المغارة . ............. يا صانع الثورات صحصح وقوم خلي القيامة عديل تقوم أفتح عذاب غُبنك كتاب قول للصعاليك والفواتي الليلة يوم جرد الحساب . موت شان تعيش ما تعيش تموت ( موت الحياة ) أرفع رويسك للسما ما تَحنْى شرفك والجباه أشعل قيامتك بالجسارة ( أول النيران شرارة ) . ........... لا تقول دي البلد القبيل سمحة ونبيلة عاين وشوف وش المخازي وعورة الشين والظروف حتي ( الحمير ) خدعتنا بي جلد ( الخروف ) جونا ( ناس كسري ) ومعاهم ( قوم لوط ) السرقة والبنقو ودعارة البلد رفعت كراعا السقوط بس بالإشارة القيم بايرة وتجوط ( الــ......) إيمان وتقوي ما خلوا شرفاً لي بكارة وبعد البنات (...........) النجيلة ........... آآآه يا بلد ديل ( مسلمين ) ونحنا يارب ناس نصاري ؟ ............ لا تقول ( مافي في الوطن السلامة ) أنا برضي شايف في كل شارع أو مصانع أو مزارع أو متاجر أو منابر أو جرايد أو محابر أو مقابر باينة واضحة ظاهرة فاقعة وساطعة أكتر من علامة إنو جايانا القيامة . ............... لا تقول الحالة صعبة القعدة حارة والمرقة جايزة وحالتنا كعبة. يا صانع الثورات حليلك أستخير نار جيلي جيلك أبصق علي ( فيزة ) رحيلك مزق ( جواز ) أحلام ( مطارك ) حدد رسم وطنك مدارك أنحت علي الأنقاض نشيدك أكتب وصيتك ثُور وموت القعدة حارة والمرقة حارة والرماد سكن البيوت. وطنك وقف جوة المغارة والخلاص داير دبارة . ........... يا صانع الثورات حليلك أكرم تصادم لو حتي بي أصبع إشارة . .......... لا تبكي من هول البشاتن. وطنك طمس وشّو الخليفة ما خلي عَبقَاً للأماكن وإنت صاغر لا بْتجَابد لا بْتغَامر للذلة راكن. سووكا زول صامت عوير وشبعت من ( لحم الحمير) سرقوكا في عز العصير غَشّوكا زي طفلاً صغير شالو السرير أدوك حصير خنقو الهتاف طلقوا الصفير وقلّوكا بي خُطب العوارة عصروكا بي ( البوت ) والحقارة لزوكا لي ( فيزا ) السفارة ............ يا صانع الثورات حليلك ما قمت من نومك عُصار ما حن ليلك لي نهار ما ضِقت من غش الشمار ما قلت يوم كيف الدبارة . ............. لا تقول ده ( عصر الحضارة ) وانت شايف الدنيا غابة البلد ملصت هدوما عريانة بس خلت ( شرابها ) الرجال عبدوا ( الفياغرا) البنات هجروا ( البكارة ) السياسة بقت نخاسه شرف الكلام أصبح نجاسه الدراما بقت ( عوارة ) الكضب خنق المنابر النضال ( شباك تذاكر ) الصُحف تِفْل المحاابر الظلم أصبح شطارة والغُبُن عدم الشرارة .
عفوا.. رد لى قصيده وجدتها فى الواتس
ولا أذكر كاتبها.. ما قدر المقام ولكن....
معقـوله بس
ناس تقـومـ من الدغش
صلوه ما صلوه الفجر
تمشى تنحت فى الحجر
وناس يبدأ نومه مع الدغش
لا شايله همـ لا فـكر
ما الجيب ملان بالقـرش
ياناس حرامـ بالجد حرام
هو شنو الحرام؟؟
معقـوله بس
الناس تناست رب العرش
أقـسامـ بدت مع العمر
لبسك قـديمـ
وضعك عديمـ
مااا مهمـ
ما الناس بتحسد فى بعض
بيتك سمح
جيبك ملان
مااا مهمـ
شـن النفـوس من غير وئامـ
معقوله بس
عايز رصيد
بيهو أجرى مكالمه من جواى
جوًوًه الصدر
لى ناس نست رب القـدر
بقـت عميانه تب
عمه بصيره
ما هو عمى البصر
شحنت بى 100 أمل
يجى الفرح
يجى المطر
بيهو يغـسل كل
قلب فى جوف بشر......
الشفيف وايا...
نعمل شنو غير الدعاء
والناس تشيل الصبر
عشان سودانا ما يبقى
زى جيرانا هنا وهناك
شىءنهب وشىء ضرب
والأمرً... هناك كمان نحِر
وحكامنا
نشكيهمـ لى رب القـدر
