السلام عليكم ورحمة الله
عدت بعد شوق وحنين لانا سوداني و الاصدقاء
وارجو ان تعذروني علي الغياب لانو ظروف عمل
والليلة جاييكم ببتاع اللبن عشان ده ارث سوداني قديم
طبعاً بتاع اللبن الشخص البكون اول الطارقين للباب من الصباح بتصبح بيه ست البيت من فتحت عينها من النوم بتقوم جاريه عليه بالحله ما تهتم بانها تلبس كويس وهو ما برفع عينو بعاين ليها لابسه شنو فى احترام متبادل فى صمت بيناتهم والغريبه الواحده منهم لو جاء راجل ماشى بكل عفويه بتقول ليه ( هى سجمى الراجل) وتروح قافله الباب عليه وبعرف تقريباً كل اخبار البيت العيان منو والابه عشاهو منو والماهيه اتصرفت ولا لسه فى تفاهم غريب بين ست البيت وسيد اللبن هو البحدد مزاج ست البيت يعنى لو نقص اللبن شويه تكون ست البيت زهجانه وصاره وشها وتلعن سيرته وتطير عيشتو ياخ زيد هو لبنك زاتو بتزيدو مويه عامل ليه بنسلين هنا تثور ثائرته ويخلف باغلظ الايمان انو لبنو صافى (وبيور) .
كل المهمن اطورت مع تتطور الحياه يعنى زمان كان بجى بالحمار ابو تنكتين وتانى اتطور شويه عملها عربه كارو فيها فتحه فى النص عشان الزباين كترو واسى فى الزمن العلينا بقى يجى بى بوكس ومرات بكون اخر موديل على الرغم من انو فى اللبان مبستره وعلبه وتجيك مفوره الا انو كل كل الاسره تحرص على اللبن الطبيعى المقنن ويشرب صباحاً ومساء .
يبقى سيد اللبن شخصيه اساسيه ومهمه فى حياتنا .
الاخ الرائع ابن بطوطه
كل الشكر علي البوست الرائع ده
واكيد بتاع اللبن ذي ما قلت ارث
سوداني والناس ماقادره تترك
بتاع اللبن رغم انو مصانع
الالبان انتشرت وفي بدايل كتيره
جدا لبتاع اللبن بس النسي قديمه
تاه وفي ناس رابطنها بالعشره
بقولوا ليك عم فلان ده ليه 10
سنه او كم طاشر سنه وهو
بجيب لينا اللبن والشغلانيه فيها
مجاملات وعشره طويله وعشان العمر
الطويل ده ما بقدروا يتخلوا عنوا
ودمت اخي علي الطرح الاجتماعي
الرائع ده
شكراً احبتي والله العظيم سعيد جداً بالتجاوب
مع المشاركة وندمان شديد علي الفترة القضيتها بعيد عنكم
شكراً نورا وشكراً الاخ صلاح مشرفنا العام مرورك نور
البوست وديل خمسة ارطال لبن هديه ليك من بتاع اللبن شكراً
احبتي والي لقـــــــــــــــــــــــــــــــاء
؟؟؟؟؟؟؟؟؟؟؟؟؟؟؟؟؟؟؟؟؟؟
