ياسكان حوشنا كللللكم تعالو نقعد في الدايمه دي و نتحاسب

[M.Hadad]

المنتديات موزعة كل حسب تخصصه
مثلاً خبر طازج عن السودان ماممكن أضعه في منتدى الحوار العام
لأن مكانه الطبيعي منتدى السودان هذا الصباح
وموضوع نقاش او معلومة عن السودان بوديها طوالي منتدى السودان العام

كمان عندنا خلط كبير بين منتدى الشعر و مكتبة الشعر
ف منتدى الشعر هو للقصائد والأشعار من الأعضاء أو الشعراء
يعني ممكن اخت فيهو محاولاتي الشعرية الخاصة أو قصيدة معينة للنقاش
يعني أي قصيدة أو أبيات عجبتني اقوم اجيبا عشان الناس تقراها.
أما مكتبة الشعر فهي لتوثيق المجموعات الشعرية للشعراء
بمعنى فاروق جويدة مثلاً أجيب قصائده كلها وأختها في المكتبة
أو مجموعة قصائد شعرية لعضو معين برضو اختها في المكتبة
يعني مكتبة الشعر للدواوين والمجموعات الشعرية
و منتدى الشعر للأشعار الفردية والقصائد ومناقشتها وهكذا....

طيب يا ود الشيخ انا اتم ليك باقي المنتديات

وبالترتيب
المنتديات العامه
المنتدي الاسلامي ظاهر من اسمو
الحوار العام للنقاش في المواضيع عامه (باستثناء التي تخص السودان)

منتدي الاعضاء
الترحيب بالاعضاء الجدد وده فقط للعضو الجديد تلتعريف عن نفسه وللترحيب به
منتدي الاصدقاء والاحبه للتهاني والمجاملات والمناسبات الاجتماعية بكل أنواعها

المنتديات الوطنيه
منتدي السودان العام للنقاشات والحوارات وكل ما يخص وطننا الحبيب
منتدي المغتربين لكل ما يهم المغتربين في غربتهم نقاشات وحوارات عن الغربه واجتماعيات الغربه
منتدي السودان هذا الصباح فقط للاخبار اليوميه الطازجة عن السودان

المنتدي الادبي
منتدى الشعر هو للقصائد والأشعار من الأعضاء أو الشعراء وللنقاش فيها
ويضم أيضاً الدوبيت والحلمنتيش وغيره من ضروب الشعر.
منتدي الخواطر للخواطر والنثر وما شابههم
الاحداث والتجارب الشخصيه وهو للاحداث الحقيقية والتجارب الخاصة بالأعضاء أنفسهم
القصص الواقعيه والروايات وهو لكل انواع القصص والروايات الأدبية وما الى ذلك
مكتبة الشعر للدواوين والمجموعات الشعرية للأعضاء والشعراء

المنتديات الاسريه
منتدي المرأه السودانيه وهو لكل ما يهم المرأه السودانيه
منتدي البيت السوداني وهو لما يخص البيت السوداني من ديكور وزينه وما الي هذا
منتدي الصحه والتربيه وهو لما يختص بهما

منتدي الاغاني السودانيه
منتدي الاغاني السودانيه ويختص بالاغاني السودانية المسموعه فقط
منتدي الفيديو والكليبات السودانيه ويختص بالاغاني المصوره
منتدي المدائح ويختص بالمدائح

منتدي الكمبيوتر
منتدي الكمبيوتر العام يحتوى على كل ما يتعلق بالكمبيوتر عامه
منتدى التصاميم ودروس البرامج يحتوي علي تصاميم الاعضاء وشرح الدروس والبرامج

منتدي الانترنيت والاتصالات
منتدي الانترنت وبرامج الانترنت يهتم فقط ببرامج الانترنت
منتدي الاتصالات يتهم بالاتصالات عامه والموبايلات ووسائل الاتصال

منتدي الصور
منتدي الصور السودانيه يهتم بالصور السودانية فقط
منتدي الصور المتنوعه ويشمل الصور بكافه انواعها

منتدي الرياضه
منتدي اخبار الرياضه ويهتم بالرياضه المحليه فقط
منتدي الرياضه ويهتم بالرياضه العالميه

منتدي الونسه والتسليه
منتدي الراكوبه
منتدي الالعاب
منتدي الفكاهه
ثلاثتهم منتديات ترفيهية للجميع

المنتديات المتنوعه
منتدي المعلومات يهتم بالمعلومات عموما
الاقتراحات والشكاوي وطلبات الاعضاء يهتم بالاقتراحات والطلبات والشكاوى الفنيه فقط
ملحوظة :(الشكاوى الشخصية والخلافات ترفع للإدارة بواسطة الرسائل الخاصة فقط)

منتدي المشرفين (خاص بالمشرفين فقط)
ملتقي المشرفين
مشاركات تحت المراجعه

هذه هي المنتديات المفتوحه وتوجد منتديات اخري مثل المناسبات الخاصه وما شابهها تفتح في وقت الحدث ولمدة محدودة ويتم الإعلان عنها مثل منتدى رمضانيات وغيره .

وساعود مره اخري لعقد مقارنات بين مهام المنتديات حتي يزول اي لبس

[عاشقة محمود عبد العزيز]

التحيــه أولا لكل الاداريين بأنا سوداني ونشكر لكم جهودكم الساعيه دومـا لتطوير
وضمان استمراريه أنا سوداني
ودالدرديري قال تعالو نقعد ونتحاسب أنا الليله عاوزه أحاسبكم وأعاتبكم والمتهم
بريء الى ان تثبت ادانته
سؤالي لماذا تم حظر Still I Need U
يمكن حظر أي عضو من أعضاء المنتدى ما يلفت انتباهك زي حظر استيل
و عضو في قامة استيل كان في السابق المدير العام للمنتدى
اذا!!!!!!! فهو على درايه تامــه ووعي بلوائح و قوانين المنتدى يعني حظره يجعلك تقف مستغربا

و بما اننا أسره واحده في أنا سوداني وبعد الاذن منكم يااداريين عاوزين نعرف
ماهو الخطأ الذى ارتكبه استيل ودعاكم للفت انتباهه ولم يستجب وتم مراسلته على الخاص
ولم يستجب مما ادى الى حظره ...........؟
السبب الذي ادى الى حظر استيل شنو؟!
استيل من الناس البيفيدك قبل ماتفيده بالجد كانت المفاجأه اني أدخل وأجد العضو استيل Banned
والتوضيح علشان ما عن طريق السهو نقع في يوم من الأيام في خطأ مماثل
ونجد أنفسنا Banned

[M.Hadad]

الاخت عاشقه انتي رديتي علي نفسك بنفسك

عضو في قامة استيل كان في السابق المدير العام للمنتدى
اذا!!!!!!! فهو على درايه تامــه ووعي بلوائح و قوانين المنتدى يعني حظره يجعلك تقف مستغربا

و بما اننا أسره واحده في أنا سوداني وبعد الاذن منكم يااداريين عاوزين نعرف
ماهو الخطأ الذى ارتكبه استيل ودعاكم للفت انتباهه ولم يستجب وتم مراسلته على الخاص
ولم يستجب مما ادى الى حظره ...........؟

اولا لازم نتفق انو عندنا هنا لوائح وهي تسميه تانيه لي معني قوانين
طيب تفتكري انو الزول البيحمي القانون ده لو غلط وطبعا هو ادري الناس بالقانون حيكون عقابو نفس العقاب؟؟

وبعدين سؤال بسيط من وين حددتي تسلسل الحاجات دي لفت انتباه ومراسله علي الخاص وكلام زي ده؟؟
تفتكري كل اللوائح ده بيكون التسلسل بتاع طريقه التعامل معاها؟

للاسف لا

الحاصل انو ادري الناس بالقانون وواحد من الناس الكانو بيطبقوهو خالفو مخالفه صريحه وعن علم واستوجب العقاب وكونه عارف الغلط قبل ما يعملو ده بيستوجب اشد العقاب لكن نسبه للقدمو للمنتدي تمت معاملتو زيو زي الماعارف

افتكر كده كلامي واضح

وتعليق تاني صغير نحن عشنا مشاكل كبيره جدا في المنتدي بسبب المجاملات والشلليه وتعبنا من الحاجه دي فلو سمحتو ما ترجعونا ليها الصاح صاح والغلط غلط وكلنا بتحكمنا اللوائح من المشرف العام لي اخر عضو سجل وكل شاه معلقه من عرقوبها

[صلاح يحيى سليمان]

السبب الذي ادى الى حظر استيل شنو؟!

العضوة الكريمة

عاشقة محمود عبد العزيز

الاخ مهند استيل نزل مشاركة يعلن فيها فتح منتدى جديد
ويدعوا فيها الاعضاء الى زيارته.
ملحوظة:
الاخ مهند استيل واحد من مؤسسى لوائح المنتدى ولقد
شارك فى تفعيلها فترة من الشهور...اليوم وللاسف
الشديد تعدى الاخ استيل على لوائح المنتدى بهذه المشاركة،
لذلك قررت ادارة المنتدى تأكيد الحظر،،،ادارة اناسودانى
لا تفرق بين العضو او المشرف ،، الالتزام بلوائح
المنتدى تسرى على الجميع وهذا ما يميز منتدانا
والحمد لله...!!!

وشكرا

[sunni]

العزيزة عاشقة محمود عبدالعزيز

أولا بشكرك على غيرتك على كل من وضع حجر على منتدى أنا سوداني. زأخونا ستيل لما طلع من المنتدى،، طلع بمحض إختيارة وبغير رضى الجميع،، وكلنا إحترمنا رغبته. ثم بدأ في العودة،، وكان المشرفين أول المرحبين بيه في المنتدى على المشاركات في صفحات المنتدى،، أو على مستوى الرسائل الخاصة. وبمجرد عودته، تم تقليده أحد أوسمة المنتدى. ده على مستوى التقدير وطريقة التعامل مع من له فضل على منتديات أنا سوداني.

من الجانب الثاني، فللمنتدى اللوائح والقوانين البتضبط العمل فيه، وكان أخونا ستيل من الناس الوضعوا هذه القوانين،، عشان كدة غلطته لا تحسب كغلطة عادية (شوفي لما القاضي يسكر ولا يسرق ولا يعمل أي خرق في القانون، القانون بيقول في دي شنو؟). الإستثناءات الكنا بنقوم بيها في تطبيق القانون على الناس في أغلب الأحيان، كانت تعتمد على نقطتين،، الأولى إنه ده عضو فعال ونشط وليه لمساته (ودي تنطبق على ستيل) والنقطة التانية إنه (قد) يكون ما مر على اللوائح وقراها،، عشان كدة نرشده لقراءة اللوائح والقوانين. وفي الفترة الأخيرة، وبعد ما راجعت الإدارة الحاصل، وجدنا إن أغلب المشاكل حاصلة من المجاملات التي لا معنى لها. عشان كدة بقول ليك، هناك خطوط حمراء، وصفراء في اللوائح، لو تعداها أي عضو، ونحن مقتنعين بمعرفته بهذه اللوائح، فلا يمكن التساهل معاها. والمشرفين هنا في المقدمة

[M.Hadad]

السلام عليكم

شايف البوست ده اندثر تماما

عندي تساؤول للاداره ولقيتها فرصه احرك البوست ده

(وللما بيعرفو انا تم تنيحيتي من الاشراف عشان كده بخت تساؤولي ده هنا)

في عضوه تم حظرها وليس لي سابق معرفه بها لكن اعجبتني جرءتها في النقاش وطبعا ما بقدر اقول كلامها صاح ولا غلط
المهم ليه العضوه دي اتحظرت؟؟

عشان كلامها القالتو؟؟

انا قريتو كلو وافتكر انو الموضوع عن تطوير المنتدي ولازم يكون بشفافيه
علي العموم ده كان كلامها امبارح

زي ما بقول المثل : سقط القناع عن القناع عن القناع عن القناع عن القناع !!!!!!!

هسي المشرف كابو بتكلم عن الميل إلى الحوارات الفكرية ... إلخ

رغم أنكم لو اطلعتم على منتدى الونسة والتسلية ستجدون أكتر المواضيع الجاذبة للأعضاء والمثيرة للاهتمام

بواسطة كابو ... مع احترامي

أيضا إذا ضغطتم على آخر مشاركات المشرف (كابو) ستجدون أن معظمها في منتدى الونسة والتسلية

أسامة خضر محمد علي والحسس 356 مشاركة و1356 مشاهدة !!!!

أكاديمية أبوحمامة لتعليم أصول الشرامة (بالله دا اسم لي موضوع ؟؟؟ ) 248 مشاركة و 1110 مشاهدة

وهذا فقط من المشرف كابو الذي يحثنا على النقاشات والحوارات الهادفة


قال تعالى : (أتأمرون الناس البر وتنسون أنفسكم )


انت تأمرنا بالبر وتطبق العكس



مع احترامي الكبير للسني لأن مشاركاته جادة وهادفة بكل ما تحمله الكلمة من معنى

انا جديده في المنتدي ويمكن دي اول مشاركه لي لاني واخيرا لقيت مكان اتكلم فيهو بكل حريه وصرااحه
اعزاائي انا معاكم نطور منتدانا الحبيب ويا اخ كابو ان كان ما تتكلم عنو انو جميعا نسعي وسوا انا معاك
ولو كان بس انت بتعظنا وانت ماعايز تشتغل اعزرني انا حارجع زي ما كنت مراقبه من بعيد
انا بخش المنتديات السودانيه بتعلم منها حجات عن بلدنا الحبيب وبتألم شديد من الونسات والكلام الجارح
يعني حتي لمن نجي نتونس ونضحك ما بنلقي نفسنا لانو معظم الونسه جارحه

انا عايزة رد منكم ومن الاخ كابو علي كلامي ده لو كان فيهو شي غلط وياريت توضحو لي
اعزائي انا عارفه نفسي عارفه انو يمكن اتحظر بس ما مهم
المنتدي فيهو بنات صغار وانا بيألمني انهم يشاركو في حجات زي دي نحنا مفروض نكون رقابه ليهم


تحياتي

واليوم لقيتها محظوره ممكن نعرف السبب ادارتنا الكريمه؟؟ وهل اي شخص يناقش ويقول كلمه الحق بيكون ده مصيرو؟؟

ارجو التوضيح عشان ما نفهم غلط

[sunni]

العضوة يا محمد تم حظرها فعلاً،، ولكن ما بسبب المشاركة دي،، إنما بسبب مشاركة تانية تمت فيها الإساءة بألفاظ غير مقبولة. والمشاركة المعنية تم حذفها بسبب هذه الكلمات،، أما المشاركة الإنت واضع إقتباس منها هنا، ما هي سبب الحظر. والدليل انه هذه المشاركة موجودة على صفحات المنتدى. وإنت تعلم انه المشاركة التي فيها خرق للقواعد وتسببت في حظر العضو، يتم حذفها،، ولا انا غلطان

[M.Hadad]

فعلا كلامك صحيح المشاركه المخالفه بتتحظر

شكرا للتوضيح ويديك العافيه

[الاشيتر]

صدق البوست ده مريت عليهوا الليله بس التقول عاملين لي عمل ما اشوفوا وقريت اغلب المشاركات ولسع قاعد اقراء فيه عشان اكون لي فكرة كويسه كده وبجيك صاد .



ولي قدام

[ودالدرديري]

في انتظارك

[ibn batoota]

الاخ ودالشيخ صباحاتك نديه وكده

وكل عام وانت بخير

بعد غياب دام حوالي شهرين او اكتر رجعت ولقيت المنتدي ماشاءالله حضور كبير من الاعضاء ومشاركات كتيره جدا ولكن للاسف اغلب المواضيع منقوله ومكرره (انا هنا بتكلم عن منتدي الحوار العام بصفه خاصه لانك انت صاحب البوست ومشرف الحوار)،،، علما بي انو النقطه دي حصل فيها نقاش يطول شرحو ووصلت الناس لي اتفاقيه انو يتم النقل الهادف والقابل للنقاش فقط مع اضافه كلمه منقول غير ذلك يحزف مباشره،،،،،
ولكن للاسف الان الحوار العام وهو العمود الفقري وروح المنتدي يحتوي علي 68 صفحه واغلب المواضيع منقوله ومامشار ليها بالنقل ناهيك عن ركاكه المواضيع وهشاشتها،،،،(لي درجه انو في عضومنزل لعبه) معقول بث ياجماعه

ودالشيخ عارفين مشغولياتك كتيره لكن برضو ماعايزين الناس ترجع وراء ولي نقاش اتقفل والناس وصلت فيهو لي نتيجه واتختت ليهو قوانين مفروض تكون مطبقه زي مابتتطبق قوانين الحظر والحزف والخ....


الكلام ده اعوووووج عدييل ياودالشيخ زي مابتطبقو القوانين بي ضبانتها طبقو قانون النقل ده


ولي قدااااااااااام

والباقي علي الله

منقوله عن ودالشيخ



نسيت اقول ليك مشتاقين وكده:D

[الحلنقي2]

جميل ورائع والله

[الاشيتر]

خلاص الشات شالوا وانا اقتراحي زاتي شلتوا الحمد لله والشكر لله دي كويسه زاته معانا

[السودانى الاصيل]

ود الشـــــــــــــــــــــيخ


الحوش لازم
اتفتح

تــــــــــــــــــــــــــانى
ليه مشيتو منو

[ودالدرديري]

الاشيتر

شكراً على احياء الموضوع بعد غيبة
رجيتك وفي انتظار عينيك كملت الصبر كلو

يديك العافية

[ودالدرديري]

ابن بطوطه الغائب الحاضر في الوجدان دوماً

الشوق بقى كميات تجارية جاهزة للتصدير

رد متأخر ولكن الحوارالعام كان كما أسلفت وذلك لغياب المشرفين عليه بسبب السفر

الآن والحمدلله عاد كما كان ولازلنا نعمل عليه لكي يستعيد صدارته قريباً

كلامك في محلو بخصوص المواضيع المنقولة وياريت الاعضاء كلهم يمروا بي جاي ويقرأوهـ

يديك العافية


وليييييييييييييييييييي قدااااااااااااااااااااااام










و...................الباقي على الله

[ودالدرديري]

السوداني الاصيل كيفنك واريتك طيب

حوشنا مفتوح ودائماً مخليين باب الريد متاكى
اهاا ابقى لاجوه


يديك العافية


وليييييييييييييييييي قداااااااااااااااااااااام










و.................الباقي على الله

[حســـن]

جميل اننا نلقى باب زي ده فاتح ومشرع..


والاجمل اننا نلقى الرحابه دي من الادارة ومرورا بالمشرفين والى الاعضاء

وبما اني اعتبر نفسي عضو فخلوني كدا اجيب سجادتي واقعد في الحوش ده


وبعد فنجان القوة خلوني اشيل نفسي عشان اقول ...

القول ما عتاب ،، ولا شكوى ... ولا هو كمان نقد

بس خلوه دردشة وفضفضة سااااااااااكت

لما نبحث عن منتدى فالغرض الليهو كان البحث
اننا نتلاقى وفي الدايمه دي نتحاكا

ونشرب من المعرفة ونشبع جوع التثقيف

وناخد وندي ونتفاكر ونحكي ونشكي ... وفينا ناس برضو بتبكي


واجمل واحلى شيء اني لقيت بعد البحث (انا سوداني)

وبكل الفرحة مشيت سجلته.... وانا والتسجيل وبينا الفرحة
يلاقيني سؤال ...
((ملحوظات تود تسجيلها للإدارة: الاسم الحقيقى،نبذه تعريفية عن شخصك،كيف تعرفت على المنتدى،هل تعرف اعضاء مسجلين فى المنتدى؟ايه معلومات اخرى قد تساعد فى تسريع اكمال اجراءات تسجيلك.))






وبالجد بالجد ... استغربته ..

وبين الدهشة وبين الغيظ ... اتأكدته اني

وبعدما ما ...


مشيت رديت وجاوبت بأني بس (سوداني)

،،


والتحية لادارة انا سوداني وللاعضاء
وزي ما قلت ما هي سوى فضفضة

بس بالجد .... ملحوظة مستفزة



اها ......


بس ما اكون خشيت وقعت ... وبالغلط عكيت

[ودالدرديري]

جميل اننا نلقى باب زي ده فاتح ومشرع..
والاجمل اننا نلقى الرحابه دي من الادارة ومرورا بالمشرفين والى الاعضاء
وبما اني اعتبر نفسي عضو فخلوني كدا اجيب سجادتي واقعد في الحوش ده
وبعد فنجان القوة خلوني اشيل نفسي عشان اقول ...
القول ما عتاب ،، ولا شكوى ... ولا هو كمان نقد
بس خلوه دردشة وفضفضة سااااااااااكت
لما نبحث عن منتدى فالغرض الليهو كان البحث
اننا نتلاقى وفي الدايمه دي نتحاكا
ونشرب من المعرفة ونشبع جوع التثقيف
وناخد وندي ونتفاكر ونحكي ونشكي ... وفينا ناس برضو بتبكي
واجمل واحلى شيء اني لقيت بعد البحث (انا سوداني)
وبكل الفرحة مشيت سجلته.... وانا والتسجيل وبينا الفرحة
يلاقيني سؤال ...
((ملحوظات تود تسجيلها للإدارة: الاسم الحقيقى،نبذه تعريفية عن شخصك،كيف تعرفت على المنتدى،هل تعرف اعضاء مسجلين فى المنتدى؟ايه معلومات اخرى قد تساعد فى تسريع اكمال اجراءات تسجيلك.))

وبالجد بالجد ... استغربته ..
وبين الدهشة وبين الغيظ ... اتأكدته اني
وبعدما ما ...
مشيت رديت وجاوبت بأني بس (سوداني)
،،
والتحية لادارة انا سوداني وللاعضاء
وزي ما قلت ما هي سوى فضفضة
بس بالجد .... ملحوظة مستفزة
اها ......
بس ما اكون خشيت وقعت ... وبالغلط عكيت

حسن

اولا مرحب بيك وحبابك عشرة بين اهلك و ناسك وجوه بيتكم

جيب سجادتك وافرشا في الضل البعجبك واتكي واخد ليك غمضة كمان

اها نجي للملحوظة
قبل فترة ليست بالطويلة تعرض منتدانا لعدة محاولات اختراق وتهكير وفوضى غير طبيعية
وظللنا متابعين لتلك المحاولات والتي نجح بعضها وفشل البعض الآخر
حتى انه في واحدة من تلك المرات تم مسح قاعدة البيانات كاااملة
وفي كل مرة كانت الادارة تنجح في استعادة المنتدى والمعلومات
وقد قررت الادارة وقتها إغلاق باب التسجيل وفلترة العضوية الموجودة لإكتشاف المندسين
وبعدها فتحنا باب التسجيل ولكن بشروط معينة و من ضمنها ماذكرته أعلاهـ
ومن يومها ظلت الشروط كما هي
وللضرورة تجدني أذكر لك أن اي معلومة تكتبها عند التسجيل تكون سرية وخاصة بالادارة فقط

هذا بإختصار وأرجو أن اكون قد وضحت وإن التبس أمر فتجدني موجود بإذن واحد أحد

مرحب بيك مرة أخرى ويديك ألف عافية

وليييييييييييييييييييييييييي قدااااااااااااااااااااااام












و.........................الباقي على الله

[حســـن]

الاستاذ ودالدرديري ....


لا درأ الله لك حساً ولا صوتا ولا .....قلماً

فقد اوفيت وكفيت



والله ما كتبت.. ما كتبت
ليس للسؤال في ذاته وإنما لتعليل السؤال


فلك ولإدارة المنتدى خالص التحية
والف شكر وتقدير