رايكـم في اغـتراب المراءة السـودانـية لوحـدهـا للعمل
بالخـارج ..؟ الاخـوة والاخـوات
غريب الموضوع انو حـاولته مناقشـته بيني وبين نفسي قبل ان اطرحه
هـنا ... وايضـا مع اقـرب الاصـدقاء والخـبراء من
المتزوجـيين من الجهتين ... للضـرورة احـكام ..
الموضـوع هـو اغـتراب المراءة السـودانيـة ... واعرف جـيدا انو الاخوان
المتواجـدين باقطـار العـرب لاتؤثر عـليهم هذه المعضـله ... فالمتواجـدين
هـناك غالبا مايكـون الاغـتراب عـائلي او بمحـرم
...
اعـيش ببريطانيا ... وتعـلمت بها واعـمل بها ... وليس حديث عهد بها
يقـلقـني مصـير ومسـتقبل
الاعـداد الزائده للفـتيات السودانيات التي تجـاوز تعداده
الالفيـن واكثر .. لااقصد العوائل او المتزوجـيين
او القادميين للعلم
...
شي اود توضيحـه السـودانيات هـنا مثال الاحـترام وانا شخصـيا افتخر بهن.
ولكنني .....
لااود الان ذكر اجـابتي او احد اراء من حـولي حتي لايتـوقع احـدكم مني
كلمة شكرا علي مروركم والكلمه دي زي ماقال اخـوى ودالدرديـري بتفور الدم
وهـناك اشـياء اخري عن العمل هـنا
المهم والسـؤال رايكـم في اغـتراب المراءة السـودانـية لوحـدهـا للعمل
بالخـارج ..؟
ولغير المتزوجـيين من الشـباب
هل لهم وجهـة نظـر خاصـه مـثلي؟
الاخ ود الدسوقى :
لااراها مشكلة كبيرة لان التربية والمسؤلية هى الفيصل هنا
الخوف هو من يجعل كثير من الاهل يرفضون ان تغترب ابنتهم سواء للعمل او للدراسة ولكن ارى ان الاهل عندما يغرسون فى ابنتهم تحمل المسؤلية منذ الصغر والثقة بالنفس فلن تكون معاناة كما نراها
فى دول الخليج هنالك الكثير من الفتيات من مختلف الدول العربية يعشن لوحدهن من اجل العمل بغض النظر ان كانت بعضهن سلوكهن غير سوى لان مايحدث من البعض لايعمم على الجميع
اخونا المرهف الراقي الفنان ودالدسوقي
تحيات فارهات بقدر قامتك ياسمح
لو اخدت راحتي كـ أغبش فشنو .. ناس كتار ماحيرضوا
أصلو القوارير ديل طواااالي سبب وجع راسنا .... وبرضو سبب إنبساطنا والله
لكن كمان النجيضة بتتقال
إغترابها للعمل بموافقة ولي أمرها وبتعاقد مع جهة معروفة بعقد يحترم خصوصيتها كـ أنثى ... مافي مشكلة
تغترب بـ دعم ذاتي من نفسها وبطريقتها الخاصة لتبحث عن عمل ..... دي أنا مامعاها والله
ياخوانا الغربة دي الرجال ماقادرين عليها تقول لي النسوان وكمان يمشن براهن لا ضل راجل لاحيطه ؟؟
والله دي عجائب
لكن المؤسف انها حاصلة وبصورة ملحوظة كمان
وكما قالت الاخت zaina الفئة السيئة بتطغى على الحسنة ويتم تعميم السُمعة على الجميع
يعني حتى بنات الناس لوالواحدة حافظت على نفسها برضو سُمعة الباقيات بتشملها
ومابتسلم من القيل والقال حتى وإن كانت بريئة ولاذنب لها
وقدامنا وشايفين بعيوننا يعني لاسمعنا ولاجابوهو لينا
والله جد مشكله وبدت تكتر شديد في الاونه الاخيره
من وجهه نظري الشخصيه مستحيل اسافر اشتغل بره براي حتى ولو كان العقد كويس
في بلد مافيه لا اهل ولا قرايب الظروف ما معروفه شنو ومافي حاجه بتقدر تضمنها
لازم الواحده يكون عندها سند وظهر تحتمي بيه وشكرا للموضوع وتقبل مروري
من منظور اسلامى لا يجوز سفر البنت بدون محرم وين ما كان.. قولوا متخلف قولوا رجعى ..بس دى حقيقة والبيحاول ينكرا بيغالط فى نفسو..ده دينيا.
عايزين منطقة وكده جدا..الرجل الشرقى قد يدعى نظريا لا ضير من الارتباط بمرأة مستقلة..واكيد طالما عايشا لوحدها فهى متحررة(لا اقصد بالتحرر الانفلات معاذ الله)..طيب الراجل العايز يرتبط بواحدة من ديل اكيد عايش فى الغربة..واخواتنا ديل بقن عمليات وناس تاكل سندوتش عشان مافى زمن ونلحق ايقاع الزمن..يعنى بقن متخوجنات والمرأة زى الرجل وكده..طيب شنو البخلى راجل عزابى يتزوج عشان يبقو اتنين راجل عزابى وامرأة عزابية..ناقصين بيوت عزابة؟؟؟ولو اساسا الرجل العايش برة ده مندهش بالحياة الغربية وشارقاهو ليه يتزوج واحدة عاملة غربية؟؟مايجيبا غربية اصلى بلادا..
المرأة مهما قوية علميا وخبراتيا فهى تلك القارورة الرقيقة الجميلة ..وإن هى أنكرت ذلك فاسمحوا لى أن أفلس مع سبق الاصراروالترصد واقول ليها سجمك والرماد كال حماد..
ود الدسوقى إنتا واحد بتاع شبك جميلة..
لمست وتر ...
انا اخترت الجزئية دي من كلامك لأنو عندي فيه وقفة زيادة حبة ... ولو سمح السادة القراء من غير زعل
حقيقة انا سافرت كتير .. وبتعامل بمقولة دع الخلق للخالق ... لكن في الغربة لم تلقى سوداني من الجنسين كأنك لمست السحاب ..
فما بالك لم سوداني تاني يتصل يقول ليك والله انتو ناس جداد في البلد وشايف الناس كبسوا عليكم اعملوا حسابكم ديل معروفين ب كيت وكيت و,,,,
والا تمشي السوق وتحس من كلام التاجر انو عندو ليك عرض خاص شان انتي سودانية ...
والا يجي يتحرش بيك سوداني في السوق والحضرمي يثبتو (دي خارج النص معلش)
والكلام ده في بلاد عربية .. طالبات وموظفات وحمانا الله ربات بيوت ... وانا متأكدة نسبة اعوجاج الطالبات والموظفات في البلدان الاوروبية ح تكون أقل من هنا .. ليه؟ لانو الازدحام وضغوط الدراسة بتقلل فرص الصياعة ...
اخوي درس في الخارج وهو متعصب وضد الموضوع ده نهائي ... انا كنت دائما على نقيضه ...
في رأي المتواضع المجتمع السوداني ككل دخلتو مجموعة متغيرات شقلبت كيانو .. وفي حوجة لي وقفة لكن للأسف الناس خايفة تقيف شان القطر ما يدوس عليها ... وقطر السناحة ده وادينا لا وين الله أعلم ..
رأي الدين واضح في الحتة دي وبما إننا مسلمين وبتلزمنا تعاليم الدين الحنيف
سفر البت لوحدها لأجل العمل مخالف للدين ...
وكان جينا لي شهامة ورجالة .. كان من ناحية أبو أو أخوان أو أهل
كيف يهون عليهم .. يخلو بتهم تغترب وتعاني ما تعانيه من الغربه
ياخي أنا راجل .. وكنت مفكر أغترب امش اوروبا
لمن حسيت إنو الوازع الديني عندي ما بردعني من الانفلات
صرفت نظر .. تقول لي بنات يغتربن في بلد سام كيفن الكلام ده
جاييييك في قصـه اكـبر من كدى وقبال مااجـيك كان حسـيت
بى نقاط وضحـت ... انـا عـارفك مابتقصـر .. وماتعـتبر ده ردي بس قصـة عقـودات وموافقة اهـلها شـيل الموضـوع ده
من راسـك بريطانـيا لاتعـترف باي شهـاده ولا الامريكـيه ذاته البيقروا عندهم هنا
او معادلة مافـوق الجامعـيه
وتاكـد انو الخمسـه سنين الاولى ضايعه شمار فى مرقه
لكـين كان مفتح بعدن بتبقي زووول وحسابات السـنين دي مابنفع معاهن الاخـت bet-handasa
تلاته انته ذكـرتهـن ديل ياهو الموضـوع ذااااااااتو الاولي ..
واخواتنا ديل بقن عمليات وناس تاكل سندوتش عشان مافى زمن اتهريـنا سندوتشـات ... نلم شان نعـرس السنين دي كلها برضو
سـندوتشـات لالا اناما دايـر سندوتشـات ...فهمتني. التانـية
ولو اساسا الرجل العايش برة ده مندهش بالحياة الغربية
وشارقاهو ليه يتزوج واحدة عاملة غربية؟؟مايجيبا غربية اصلى بلادا.. اهى دى الانـا ماكنته قادر اقـوله ... تحـيا الرأسمالية ..
والله فلاحـة الخواجـيات الكنا بنسمع بيها دييييك ... بيان بي العمل.
والحكومه هنا التقول شغاله خاطـبه كمان يدوك معاها بيت
وفى ناس عملوا شهـر العسـل بالاول
لاحـولة ولاقـوة الا بالله
ده شـرك عـدييييل .
اما انا جماعة
بنحب من بلدنا ومابره البلد
انـا رجعـى والحمد لله
.حبوبة
اول حـاجه ياحـبوبه محترمات دي والله ماعشان هـنا
والبلد دي مازي هـناك البرقصـو وبقتو دقنهم هنا مافى
وكل شى واضح ومكشـوف ... ياابيض يااسـود .
كلو موجـود ...
المشكله حتكـون ليهن غربه وعـدم عـرس
دى تبقى م ......
المثل تمي براك انتى مش حـبوبتنا
وقلتي اخوي درس في الخارج وهو متعصب وضد الموضوع ده نهائي ...
انا كنت دائما على نقيضه ...
اخـوكى صاح وليهو خـبره كمان كان تقـولي ليهـوشـفت عليهن شـنو
لانـو متاكـد انو انسـان متحضـر زيو يرفض حتى مبدأ الحـوار
معناها متاكد من كلامـو ...
والقصـه لسـع
فوق اوله
تغترب بـ دعم ذاتي من نفسها وبطريقتها الخاصة لتبحث عن عمل ..... دي أنا مامعاها والله
ياخوانا الغربة دي الرجال ماقادرين عليها تقول لي النسوان وكمان يمشن براهن لا ضل راجل لاحيطه ؟؟
ومابتسلم من القيل والقال حتى وإن كانت بريئة ولاذنب لها
وقدامنا وشايفين بعيوننا يعني لاسمعنا ولاجابوهو لينا
طبعا من شاف ليس كمن سمع وانت ياودالدرديرى مغترب واكيد ترى بنفسك
طبعا فكرة الاغتراب بدعم ذاتى دى مرفوضة ولو القيت نظرة ستجد غالبية المغتربات السودانيات (خاصة فى دول الخليج) بيكون معها اخوها او شخص من الاسرة (ليس الزوج ) وديل الانا بعرفهم
يعنى ممكن تجد غالبية المغتربات من الدول العربية (سوريا ولبنان خاصة بتجدهن لوحدهن وده حسب ماقراءت ولكن العكس ممكن يكون فى المغتربات السودانيات (يمكن لانو فى الغالب الرجل السودانى لايرضى بان تكون ابنته او اخته لوحدها فى الغربة ودى حسنة وقلة من يرضون بذلك )
وياود الدسوقى (هى غربة وبورة دى والله يبقى انتحار عديييل )
الإهتمام بالتربية السليمة من أهم مقاومات النجاح بالحياة ؛ فالإنسان بدون تربية سليمة لا يمكن الإعتماد عليه أي كان النوع ذكر أم انثي ؛ فالنحسن التربية لننتج كوادر واعية تعي واجباتها ومهامها وتصرفاتها داخل وخارج الأسرة .
أما بخصوص إغتراب المراءة فكل بوجهة نظره فقد نجد التربية السليمة ولكن تنقصها جوانب اخري كقوة الشخصية والشده في المواقف التي تحتاج فيها لذلك ؛ فطبيعة العمل بالخارج تحدد ان كان الإغتراب مجدي ومفيد وليس له إنعكاسات سلبيه عليها وعلي الاسرة ؛. فاصبحت المراءة تقاسم الرجل الهموم والمعيشة وخصوصا في ظل التقلبات العالمية من حروب وانتكاسات إقتصادية بالأسر ؛ فلا حرج ولكن عليها الإلتزام بأمور الدين وتخير مع من تعمل ومع من تتعامل.
اخي ود الدسوقي بعد السلام والتحية
اولا اشكرك على اهتمامك بالمرأة السودانية وخوفك عليها
في رأيي اغتراب المرأة لوحدها في بلد غير السودان ربما يدخلها في مشاكل هي في غني عنها وذلك للأسباب الاتية: -
1- عدم وجود محرم
2- اختلاف العادات والتقاليد حتي ولو كانت من اسرة محافظه وذهبت من اجل هدف معينه ذلك المجتمع الذي تذهب اليه لايرحمها سواءا كان عملا او دراسة
3- وربما تتعرض لمشاكل هي في غني عنها لذلك اطلب من المرأة السودانية بالذات ان تبحث عن العمل والدراسة في بلدها لان المرأة والسودانية بالذات عزيزة كريمة عظيمة في بلدها ولا ارضي لها باي زلة او اهانه في البلاد الاخري مهما كان
موضوع هادف ويستاهل فعلا النقاش تسلم أخي
اولا عجبني جدا اراء الاعضاء وخصوصا راي الاخوات اغلبهم ضد الفكرة دي ومقدرين النظرة الاسلامية في الموضوع دا الحمدلله الدنيا بخير . انا ضد الفكرة دي تماما ولا اؤيد اي بنت تسافر لوحدها مهما دعت الظروف .
ثانيا في نظري التربية صحيح مهمة لكن ما تنسو انه البيئة لها ألف ألف تأثير وبتغير افكار و اخلاق الناس انا عايشة في بلد يعتبر اسلامي لكن تعالو شوفو التغيير اللي بيحصل للبنات والاولاد اللي جايين للدراسة والبعض للعمل واكيييييد جايين من بيوت طيبة فما بالكم بالبلاد الغير اسلامية وا هله ا قاصدين انحراف الشباب ؟؟؟؟
لأسباب كثيرة 
