علقة فى باب شريف بى سوط عنج

[سودانى معذب]

السلام عليكم ورحمة الله وبركاته
القصة دى ياجماعة حدثت قبل 5 سنوات واللى خلانى اتذكرها قصة حصلت اليوم المهم يوم واقف عند الاشارة بالقرب من سوق باب شريف بجدة وواقفة جنبى عربية فيها سودانى راجل كبير ومعاه مجموعة من النسوان الظاهر بناته وزوجته وجمبهم واقفة عربية فيها شباب سعوديين فجاءة عمنا ده نزل وفتح الشنطة بتاعت العربية وطلع سوط عنج ومشى جهة العربية اللى فيها شباب سعوديين ودخل يده من زجاج السيارة (مافتح الباب)وطلع منهم واحد بالشباك قام الباقين شردو فى اللحظة دى الاشارة فتحت وعمنا شغال فى الولد بالعنج انا نزلتا فورا وما اكذب عليكم عملتا نفسى بحجز فيهم وكنتا متعمد امسك الولد كويس حتى يتمكن عمنا من تجويده وعمنا الله يديه العافية ماقصر واعتقد زى ده تانى لو لقى عربية فيها سودانيات ما حايعاين والقصة اللى حصلت اليوم فى نفس الشارع واحد سودانى وكمان واحد سعودى نزل السعودى يسب ويلعن والسودانى ساكت قام سباه بأمه ماشاء الله كف واحد من السودانى سكت الراجل
انا مامتحيز لكن عارف انه اللى بيغلط على سودانى حايكون ده مصيره .

[ودالدرديري]

والله ياسوداني قصة تخلي الواحد يتفشا وعفيت منو عمك دا
وفعلا في ناس عايزين تعامل جنس دا عشان يمشو عدييييييل


ومرة في الرياض وكنا في كبري الخليج الساعة 2 ظهرا ودي ساعة الزحمة المبالغ فيها تفاجأنا بواحد سوداني نازل من عربيتو وموقفا بالعرض فوق في نص الكبري بحركة شديدة وخطيرة جدا ونزل ومشى اتجاه عربية فيها واحد مصري ومعاهو زوجتو وحاول يفتح الباب بالقوة قام المصري نزل التأمين من جوة ورفع القزاز قام اخونا السوداني ضرب الشباك بى رجلو وكسر القزاز واتناول المصري من جوة العربية بالشباك ووقع فيهو ضرب لحدما نزلنا كلنا ولاحظ الحركة في الكبري اتعطلت وصوت مليون بوري وكوراك من ناس مستعجلين وأقسم بالله كنا اكثر من سبعة اشخاص وماقادرين نخلص المصري ولا نمسك السوداني وبعد المشكلة انتهت اكتشفنا انو المصري اتجاوز السوداني وشتم أمه فتمنينا لو كنا ماحجزناهم لكن طبعا بتكون مصر كلها عرفت الحكاية دي وبيكون تاب من السودانيين
وكدا كويس عشان يتأدبو





ولييييييييييييييي قدام

[كيمو]

ههههههههههههههههههه
والله يا سوداني قلتا لي داير تسندل الود لعمك
عمك تلقاهو ما قصر زاتو لكن تمام يا مان
دا كلام صاح ديل عرب مجانين ساي

[سودانى معذب]

ود الدرديرى شكرا لمرورك وفعلا احنا السودانيين مابنحب الحقارة ولو لقينا سودانى فى مشكلة لاشعوريا تلقى نفسك واقف معاه وعفيت منه زولكم

كيمو والله سندلته سندلة بعدين شكلك كده بتحب الشمشرة فى المشاكل اوعى يوم تجيك بنية طايرة ههههه

تخريمة
كيمو مبروك النجمة الثالثة

[حزن السنين]

ودالدرديري
مشكور علي القصة يارائع و حقيقي نحن كسودانين ما بنقبل الحقارة ابداً لكن المصري
دا كان لازم ياخد اكتر من كدة عشان يعرف يتعامل مع السودانين كيف و لا شنو .....؟؟؟

[معتز]

والله عمك دا ماقصر تب وانت برضو شاركاته مسكت ليه كويس
الله يديك العافية انت وعمك القاطع

[sarona]

والله يا جماعة القصص دي حقيقي بتاكد لينا ان اعتزازنا بزاتنا ودمنا الحار ده...

اجمل ما يميزنا ...الرجل السوداني معروف بكرامته واعتزازه بنفسه....

سوداني معذب ... ود الدرديري....

مشكورين ...

..

[سودانى معذب]

مشكورة سارونا على المرور والبرشنا بالموية بنرشه بالدم خصوصا فى عرضنا (نحنا ولاد بلد نقعد نقوم على كيفنا)

[العسوله]

اموووووووووووووووت انا في الحرارة
دمتو لينا يا اخوانا
نمشي ورافعين راسنا بوجودكم معانا
اتكيفت كيف يا معذب
وطوالي على كدا
تحياتي

[سودانى معذب]

عسولة لو واحد عاين ليك بس عين ماعجبتك قولى ياابو مروة
ومشكورة على المرور

[العسوله]

طوالي يامعذب
ويسلمووووووو

[amattr]

السلام عليكم
بمناسبة ذكر سوط العنج في العنوان
اخواني الكرام كنت عايز اسأل على سوط العنج السوداني الأصلي كيف اميزه عن غيره
مواصفاته وانواعه وكيف امسكه في يدي اعرفه انه سوداني اصلي ؟
هل له لون معين او رائحة معينة ؟
وما افضل الأنواع ذيل الجمل ام الفيل ام الخرتيت ام القرد ؟
وهل المتواجد في مصر في حي الحسين السياحي لو كنتم شفتوه هو سوط عنج سوداني فعلا ؟
وكيف اعرف انه قديم ام حديث ؟
وايه الفرق بين العقلة والكسرة ( سوط العنج المعقل ) ؟
ومن اين احصل على سوط العنج السوداني الأصلي ولو عن طريق الشحن من السودان مثلا ؟
لو حد من اخواننا الكرام يقدر يشحنه لي على مصر اكون شاكر افضاله
وجزى الله خير كل من افادني بمعلومة ولو بسيطة
معذرة اخوكم مصري وخبرته قليلة بالحاجات دي
علشان كده قلت اسأل اهل الخبرة والفضل في هذا المجال
ارجو منكم الا تبخلوا عليّ بما عندكم
جزاكم الله كل خير

[غريبه]

قصه حلو والعبره منها حلوه