الى زوجتى ..

[ودعازة]

هى مجموعة محاولات شعرية تحت مسمى الى زوجتى وحبيبتى بالنسبة لى وقد تكون الى حبيبتى لمن لم يتزوج بعد .. ابدأها ببلاك ببقى ولعل خربشاتى تعجبكم..
بلاك ببقى؟


إنت قايلا بلاك ببقى
أو بضوق الراحة حبه..
كيفن أضوقا أو أشوفا
ومصدر هناى عنى غبّا..
بلاك إنت الغربة مرة
ولو معاى ألف صحبه..
ما إنت لىّ كل حاجة
بأعلى بيك كل رتبه..
تايه زمان قبل أعرفك
ما سماى ما فيهو نجمه..
بلاك إحتار الدليل
وين النجيم يكشفلو دربه..
ودونك إتعرت دروب
حتى الرياض يبسانه جدبه..
ودع يمام فارق بلوم
خاف المكان يبقالو تربه..
حتى الخرير لجمو السكون
جمد حراكو الفيهو شبّه..
أما القمر مخنوق هزيم
راجى الشمس تفرجلو كربه..
ما بلاك بتنعكس الضواد
وكل العلوم بتبقى كذبه..
وتختل موازين البحور
حتى المفردة بتبقى صعبه..
إنت قايلا بلاك ببقى
أو بضوق الراحة حبه..

[عاشقة توتيل]

[align=center]ياسلام عليك ياود عازه،،،،
ربنا يحفظها ويخليها ليك،،،
ويديم عليكم السعاده يااااااااااااارب،،،،
،،،
انا هنا،،،ومنتظره الجاي من خربشاتك،،،
والجاي اكيد احلى،،،
تحياتي لزوجتك،،
لانها مصدر كل الجمال والروعه دي،،،
،،،
وتحياتي ليك يارائع،،،[/align][/u][/size]

[محمد سليمان]

مشكوووووور والله يعطيك الف عافيه

[ودعازة]

[align=center]ياسلام عليك ياود عازه،،،،
ربنا يحفظها ويخليها ليك،،،
ويديم عليكم السعاده يااااااااااااارب،،،،
،،،
انا هنا،،،ومنتظره الجاي من خربشاتك،،،
والجاي اكيد احلى،،،
تحياتي لزوجتك،،
لانها مصدر كل الجمال والروعه دي،،،
،،،
وتحياتي ليك يارائع،،،[/align][/u][/size]

وياسلام على البشجع الهواه..
وياسلام على الناس البترفع المعنويات..
تسلمى عاشقة توتيل لمرورك المشجع وربنا يهنيك مع القليب الخايف عليك،،

[ودعازة]

مشكوووووور والله يعطيك الف عافيه

سلام اخى محمد سليمان..
يسعدنى مرور من مثلك دوما بنوافذى استجمع منهم شجاعتى الادبية فاستمر بالخربشات..
يديك العافية،،،

[ودعازة]

[blur1]فيّض الفرح..[/blur1]
قالو الفرح بيحويه شعور
إلا بيك عم المدائن والثغور..
يتنسم الياسمين شذاك
تبسم تشع كل الزهور..
أما المسيد ولهان ذكر
خالط الفرح عطر البخور..
رفض الكنارى يحط رحال
زان الفضا يصول يدور..
وكل الحياة طعمت سمو
إنهزم الحزن عم السرور..
وإتغيرت صور الدروب
كساها الوميض زى البدور..
كل الورى تنهل فرح
ولسه الفرح ما فيو كسور..
كيف تنتقص أو ينكسر؟
وإنتى النبع لكل الحبور..
تتشابا ليك كل القلوب
تهديها منك أحلى العطور..
غاب البدر قايدو الخجل
كيف للنجوم معاك حضور..
وحاشاى ما عرفت الحسد
لما السحر كسر جسور..
ثملان أنا مشبع عشق
عايز مزيد مدمن شعور..
مشتاق كتير رغم اللقا
كيفن يكون لحظ الفتور..
أمنان أنا فى عشرتك
ما بحضرتك بتتلاشا الشرور..
وكيفن تحل غيمة كدر
والطيبة روية منك بحور..

[عاشقة توتيل]

[align=center][quote="ودعازة"][blur1]فيّض الفرح..[/blur1]


أما المسيد ولهان ذكر
خالط الفرح عطر البخور..

..[/quote]


تقول لي هواه،،،
ياخي انت ابدعت عديل في الحته دي،،،
ذكرتني أم ضوابان والمسيد،،،،
التقابه وحلقة الذكر،،،وعطر البخور البعد ما ترجع
البيت يكون لسه ريحتو في ملابسك،،،
،،،،
تسلم يامبدع جد،،
وحاكون هنا طوالي منتظره الجديد،،،
يديك العافيه،،،
،،[/align][/u][/size][/size]

[ودعازة]

[align=center]تقول لي هواه،،،
ياخي انت ابدعت عديل في الحته دي،،،
ذكرتني أم ضوابان والمسيد،،،،
التقابه وحلقة الذكر،،،وعطر البخور البعد ما ترجع
البيت يكون لسه ريحتو في ملابسك،،،
،،،،
تسلم يامبدع جد،،
وحاكون هنا طوالي منتظره الجديد،،،
يديك العافيه،،،
،،[/align][/u][/size][/size]

اختى عاشقة توتيل عوافى عليك..
تسعدنى جدا تعليقاتك وتزيد من ثقتى بأن مااكتب قد يجد من يقرأه..
ومن القارئ بقامة اديبة تعجبنى كتاباتها..
لازلت هاوى وتلك حقيقة..لانى اكتب وانا لست ملما ببحور الشعر جميعها..
كتاباتى مثل الدوبيت والنم تعتمد على الايقاع السماعى..
لكى كل التحايا لحضورك الجميل ولشخصك الكريم،،

[مومو و بس]

يسلمو........

[ودعازة]

كيفن ارد؟

سألونى عنك كيفن اجيب؟
ووينو الحرف البملى مساحات جمال
مزروعة فيك
وينو اللحن ؟
وينو الشعر البوصف الحسن العجيب
كيفن اجيب؟
احكى فيك روع الحضور؟
احكى فينى احساس الذهول؟
احكى لمن ارتمى بحضنك نعيم؟
وكيفن بتبدد ظلامات الغيوم
وبترتحل عصابات كل الهموم
ولا احكى عن الحبيب
لما يكون قريب
وادور مزيد ادمان شعور
او لما يكون بعيد
ويتباعد معاو كل الوجود
القى المكان متروس سدود
منو البفك منى القيود؟
وسؤال صعيب يمر كمان
انا لسة عايش؟
طيب وينو الوجود؟
كيف الحكى
ووين الكلام البيتلقى
ماكل الكلام بيكون ممل
بيكون رتيب
وأرد اقول
انتى الهبة
و خير من نعم الحمر
زى ماقال الرسول
ارد اقول
انتى السبب لكل الرضا
ويكفينى بيك للفجر بقوم
ارد اقول
والرد محال يقنع جواى
حتى لو شهدو الشهود
ارد اقول
انك معاى يكفينى قول

[ودعازة]

يسلمو........

وتسلمى اختى مومو وبس..
مرورك دوما مرحب بيو..

[ودعازة]

المحاولة لها قصة..كنت عاقد على زوجتى حينها فى إنتظار إنتهاء سنتها الجامعية ثم تكملة مراسم الزواج ..
وكنت أطمع أن تنطق كلمة بحبك..ولما فشلت محاولاتى خربشت..

مشمشه

يامشمة سيبي الجفا
خليها تطلع من شفا
فيها السعادة المترفا
قوليها مافيها الشفا
وما تخافي ابدا احرفا
بيها المحنة نولفا
ننبذ اناتنا نكتفا
تعسكر موده ونعرفا
تسري السكينه مع الدفا
تصبح ارواحنا مرفرفا
وحاشانا ابدا نخالفا
*******

قوليها وسيبي الاختشا
معذوفا حلوه مدندشا
تطفي ليهبا بالحشا
تحضن حواس وترعشا
تزيد الحماس وتحرشا
نصل القمرا ونهبشا
نتسامر معاها ندردشا
وامرح معاك في فرفشا
واهتف بحبك مشمشا
ما القلب بيك انتشا
وودع ايامو الموحشا
***************

قوليها وسيبي الوسوسا
كرامتك باقيه مترسا
حاشايا قطعا ادنسا
اظلل عليها واحرسا
صرح وقولا و اهمسا
خلي الخجل والدسدسا
ارحم شعوري ماتجرسا
كانت قويه متمرسا
معاك عايزه تدرسا
وعن حياتك تحدثا
تمعن ملامحك تفرسا
تملاها رقه تهندسا
تخلد معاك تهامسا
قولا اوعك تحبسا

[ودعازة]

صمت الخجل..

تتذكرى يوميها داك
لما الخجل حبس الكلام..
ورحت أشكيك للقمر
كيف اتحرمتا من الغرام..
وسردت لليل والنجوم
عن العشق السور عظام..
لفاها وبقى ليها اللحم
لما العشق بقى ليو قوام..
ياالسمحة عذبنى الصمت
ومناهدة الولهان دواام..
اياما ماعرفت السهر
وصحبتنا دامت الف عام..
وماخلصنى غير اللقا
وبشير فرح تم المرام..
حتى اللقا كحلو الخجل
وقتلتا أنا من بدر التمام..
أصبت من قوس العيون
صريع أنا بأحلى السهام..
الموت جريمة وماحلال
بس موتى بيكى ماحرام..
صيبينى ديما بسهامك
وكان فيها موت أنا الملام..

[ودعازة]

حكى العشاق..

أحلى كلام حكى العشاق
لما الحس يتقل بقلب ولهان
بتبقى الكلمة كايسة الباب
تخفف عن قليب تريااان
تصل للجميل مقصود
لو آهة او جمل ألحان
حكى العشاق حنين والله
بخلط الدمعة مع الاشجان
بحكى القصة بعفوية
فيها المعنى للإنسان
واصل احكى يامشتاق
بنسمع حسك وبإمعان..
عشان نتعلم الريدة
رغم الريدة بس عطيان
قولك ببرد حشا الحبيبة
ويمكن يرد خطى التوهان
احكى الرعشة والغمة
احكى الحكمة والسرحان
ابنى طريق معاهو مسيد
يلم اللابس والحفيان
تهيم اللمة فى ملكوت
يذكرو الخالق الرحمن
ويشرد لهناك مجدوب
تحلق روحو والوجدان
احكى وقول حكاوى الريد
بنسمع نحن بتحنان
نعرف الريدة ماهى صنم
ندور حوليهو فى طوفان
نعرفو حلم فيهو علم
فيهو عمل وبإتقان
نعرفو بصيمة محال تكرارا
وإن إتشابهو الحبان
احكى وقول كلام الريد
فيهو عبر مرور ازمان
افصح وبين الانواع
نعرف الدرب عيان وبيان
احكى وقول كيف بنتوه
لما الريدة تسيب ايمان
كيف الفتنة فينا تكون
واحكى حكاية التيمان
لما غراب دفن لغراب
لما العشق قتل اخوان
احكى وقول كل الحاصل
وترخ لعشق ازمان

[عاشقة توتيل]

[align=center]ود عازه صباحاتك نور وسرور،،،،
،،
كيفن أرد؟؟
أبدعت فيها لدرجة إني ماعارفه أقول ليك شنو،،

يامشمشه،،،
فيها نوع من الرجاء المغلف بالود،،
والتدلل الذيذ منها،،وبرضو أبدعت فيها،،،

حكي العشاق،،
متعب ،،ومرهق،،ودايما بتسبقه ابتسامه باهته،،
ماعارفه لكن محتاجه اقراها تاني وتالت وعاشر،،،
،،،،،
حبيت أقول ليك واصل،،،وانا متابعاك دايماً،،،
ربي يسعد أيامك،،ويخليكم لبعض،،،
،،،،
تحياتي،،،
،،[/align][/u][/size]

[ودعازة]

اختى عاشقة توتيل..
متابعاتك تكفى للإستمرار..

[ودعازة]

قليب غريب..

زعلان شديد من خجلتى
السجنت جواى قبُل لجبهتك
يوم السفر الحار شديد
واتفارقت وجهتى من وجهتك
كنت عايز اقبلك
او احضنك
او احتويك للحظة بحنتك
كنت عايز الغى الحضور
ومااشوف غير سحنتك
ارتمى بحضنك سنين
او نرجع سوى واقنعك
انو السفر ماليهو داعى
ومابسوى حتى لدمعتك
وحمانى قلبى العنيد
كيفن تهونى ومااسعدك
ماتشوفى امك لا ابوك
وتزورى حتى لغرفتك
شوفى القليب كيفن غريب
مقتول هواكى وببعدك!!
بضحى بيى وبيو كمان
عشان تقصى لبسمتك
لمن تعودى من الحنان
تحكى السعادة بسفرتك

[مومو و بس]

تسلم يا ودعازه بالجد مباااااااااااااااااااالغه

[ودعازة]

تسلم يا ودعازه بالجد مباااااااااااااااااااالغه

اختى مومو وبس هوافى ..

الله يسلمك من كل شر ..
ويديك زوج يقدرك وتقدريو وتعيشو السعادة مع اليقين..
سرنى مرورك الجميل ويديك كل السعادة والصحة،،،

[مها]

كيف حبى يحول وفؤادى معاك يازينة الحى
حلمك ياجميل انا دانى رحول
تركنى هواك بين ميت وحى
كيف ليك وصول وسكونك فوق لى سهيل وثرى
النوم من عينى دوام مفصول
دموعى تلاقى وتسرف رى
خدودك ام ازهار فى حقول
سقانى غرامن صافى حمى


بالشوق يانسيم ابقالى رسول
لو يعطف ثانية يزيل البى