ممكن تدوني من وقتكم شويه وتردو على سؤالي..؟؟

[غرام الليل]

السلام عليكم جميعا ويسعد لي صباحكم / مساكم جيناكم بعد غيبه وما شاء الله المنتدى ماشي في تطور وتحسن وتقدم وانشاء الله دايما كده وكل سنه وانتو طيبين وانشاء الله تصومو وتفطرو على خير حادخل ليكم في الموضوع على طول عشان ما اطول عليكم بس اتمنى بالجد من الاعضاء التفاعل والرد بكل صراحه عشان نستفيد من ارائكم ونقاشكم..

لي ناسنا العشاق والعايشين في عالم الحب والرومانسيه والكانو عايشين قبل كده عايزين ارائكم وعيشو معاي الوضع عشان تقدرو تجاوبو من الناحيتين لو انت حبيت انسان وعشتو فتره وانتو بتحبو بعض وجاتك انت ظروف خلتك تسيب حبيبك بسبب الظرف ده وهو ما سابك بالعكس كان متمسك بيك وبعد ما سبتو بي فترة من الزمن حسيت انك ما قادر تعيش بدونه وانك ندمان على انك سبتو بسبب الظرف ده وحاسي انو الدنيا ما بتسوى من دونه وتتمنى من كل قلبك انك ترجع ليهو لكن انت عارف انك سببت ليه الالم والجرح عشان سبتو وهو حباك بالجد هل حتجيك الجرأة تكلمو وتعترف ليهو من جديد ولا حتكتم في قلبك وتقول انا العملت في نفسي كده وبستاهل؟؟

طيب اتخيل نفسك مكان الانسان الساابك حبيبك ده لو جاء واتكلم معاك واعترفت ليك وقال انو ندمان على كل الحصل منو ده وانو ما قادر يعيش من دونك وحاسي انو قلبه ما شايف غيرك وبتمنى منك ترجع ليهو وتسامحو على غلطته هل حتسامحو وترجع ليهو زي الاول وتحبو وتنسى الاول ولا حتقول ده جرحني قبل كده وممكن يعملها تاني او مستحيل ارجع ليهو بعد ما كسر قلبي وجرحني؟؟

اسفه على الاطاله ووبتمنى بالجد بالجد من الجميع التفاعل مع البوست والرد لو بالقليل المفيد وتقبلو من خالص الود والتحيه..

اختكم /غرام الليل

[همسة حنين]

اول شي والله موضوعك حلو
وأنا عن نفسي لو جرحت حبيبي وسبتو وبقيت ماقادرة اعيش بدونو ودا شي اكيد لازم هرجع ليو واقعد اتأسف ليو كثير لحد مايرضى وطبعا حاجة اسمها كرامة انا عندي مع الحب منسية لأنو الحب مافيو كرامة
ولو هو الي جرحني وجاني تاني هاخد منو وعد مايعمل حركتو دي تاني وهسامحو فوري عشان هو حبيبي وحرام اخليو يعذبو بعدي

[الحرامي]

طالما انا بحب حاتمسك بحبي لاخر لحظه .. لان الحب اخلاص واكيد اللي جرح مصيره يعرف ..وانا لو جاني راجع ومعترف بغلطه اكيد بسامح وا خلق ليهو العذر مع اني عاااارف انه جرحني لكن اعمل شنو بحبوووووووووو وبتم احبووو ... لاني قلبي ماداير غيرو
والدليل لو كنت بقدر انساااه كان اتخذت القرار ده و نسيت الماضي ..
فبشوف طالما رجع ياااهلا والفين مرحبااا لانه انا مابقدر اعيش بدونه لو شنو ما سووواه فيني
مابيدي
ويادروب الشوق لي وين تودينا كفايه تديني الاحساس وتخليني اتمسك
وتحيااااتي ليك رحمك الله الخالدي ياروووعه

[وجهة نظر]

لو انا بحبها وما بقدر اعيش بدونها حاعتذر ليها واطلب منها انو نرجع علاقتنا بس
بشرط يكون فهما راقي وما فهم ضيق يعني ما تكون من النوع البيفهم انو اعتذاري ليها ضعف
ومذله لي واني ارخص في نظرها وتتعود انو كل ما تزعل حراضيها وتمشيني زي خاتم في اصبعها

وبعدين زي ما قالت همسة حنين الحب مافيه ذلة وكرامة وحتى لو افترضنا انو مذلة فهي ذلة لمصلحتي
ومين عارف ممكن ترجع العلاقه اقوى من اول وتتوج بالزواج

اما لو هي الجايه تطلب انو نرجع علاقتنا هنا بشوف عوامل كتيرة :
شنو سبب الخلاف؟
هل ممكن تتحل المشكله ولا المشكله حترجع تاني مستقبلا ؟؟
من سبب المشكله ؟؟
منو الانها العلاقة ؟؟
الطريقة الي انهت بيها العلاقه يعني لو مثلا مثلا قفلت التلفون في وشي مستحيل ارجع ليها تاني

لكن في حاله رجعنا لبعض لازم نحل المشكلة الكانت سبب الخلاف وناخذ وعد بانها ما تتكرر

معليش على الاطاله

[نهر المحبه]

لو انت حبيت انسان وعشتو فتره وانتو بتحبو بعض وجاتك انت ظروف خلتك تسيب حبيبك بسبب الظرف ده وهو ما سابك بالعكس كان متمسك بيك وبعد ما سبتو بي فترة من الزمن حسيت انك ما قادر تعيش بدونه وانك ندمان على انك سبتو بسبب الظرف ده وحاسي انو الدنيا ما بتسوى من دونه وتتمنى من كل قلبك انك ترجع ليهو لكن انت عارف انك سببت ليه الالم والجرح عشان سبتو وهو حباك بالجد هل حتجيك الجرأة تكلمو وتعترف ليهو من جديد ولا حتكتم في قلبك وتقول انا العملت في نفسي كده وبستاهل؟؟طبعا حاعترف ليه بالفي قلبي لاني مادام حبيتو ومتاكده من حبه لي اكيد ماحاقدر اكتم في قلبي لانه ده عندي اهون منو الموت لانه حااكون عايشه في حسره وهو بالطبع حيتفهم الموضوع لانه مافي احلى من الحبطيب اتخيل نفسك مكان الانسان الساابك حبيبك ده لو جاء واتكلم معاك واعترفت ليك وقال انو ندمان على كل الحصل منو ده وانو ما قادر يعيش من دونك وحاسي انو قلبه ما شايف غيرك وبتمنى منك ترجع ليهو وتسامحو على غلطته هل حتسامحو وترجع ليهو زي الاول وتحبو وتنسى الاول ولا حتقول ده جرحني قبل كده وممكن يعملها تاني او مستحيل ارجع ليهو بعد ما كسر قلبي وجرحني؟؟حاسامحو واخدو منو وعد عدم تكرار الغلط عشان مانخسر بعض للابد
وتقبلي مروري

[ودالفضيل]

للاسف مابتنازل عن اختياري لانو
انا اصلا ما بتجرا اسييب من احببت
الا بقناعة تامة لارجعة فيها مع العلم
ان عملية امشي وارجع دي مش حلوة
...........................تسلمي

[غرام الليل]

مشكورين بالجد على المرور وردودكم صراحه تفتح نفس الواحد وردود منطقيه بالجد وانا بصراحه راي بيمشي مع همسه حنين وانو في الحب مافي حاجه اسمهما كرامه طالما انت بتحب بالجد وانشاء يجو باقي الاعضاء ويدونا ارائهم تقبلو مني خالص الود والتحيه ..

اختكم/غرام الليل

[غرام الليل]

طيب يا ود الفضيل مع احترامي الشديد لرايك كل واحد فينا ممكن يغلط في حياته وممكن يغلط في حكايه انو يسيب حبيبو ممكن كان في فتره والظروف غصبتو يعمل كده وحتجي ليهو لحظات ندم كتيره يعني هل من الصح يفضل ندمان على غلطه ولا يمشي يتكلم معاه ويتعذر ليهو مع انك بتحبو بس ممكن حاليا الواحد لو ما عاش الموقف ممكنما بقدرو زي العاشو دي مداخله بسيطه بس وتقبل ودي وتحيتي..

اختك/غرام الليل

[ود الزوحي]

لك التحية .. غرام الليل ..

بالنسبة للسؤال الأول ..
طوالي حمشي أعتذر ليه .. ولا زم أخت في بالي أني ممكن أسمع منو كلام جارح .. ده طبيعي نظام ردة فعل وكده .. يعني من الآخر كده حقعد احنس فيه حدي ما يرضى ..والبادي أظلم .

التاني ..
لو كان السبب مقنع بما فيه الكفاية وحسيت إنو الزول ده ممكن ما يكرر الشي ده تاني أكيد حسامحو ..


دمت بود ..

[مواطن مصري]

الطرف الاول يلتزم الندم


والطرف الاخر يلتزم التسامح


هذا اذا كانوا بالفعل يحبون كل منهم الاخر بصدق وليس لعب اطفال

[بنت الاصايل]

مشكوووووور والله يعطيف الف عافيه

[مواطن مصري]

توقيعك رهيب جدا يا بنت الاصايل



راااااااااااااااااااااااااائع

[Tawfik omdur]

هو انا بعد ما فاتت لظروف وانا لسه بحبها ومتمسك بيها
تجيني راجعه اقعد افكر اسامحه ما اسامحه يا بت الناس
دي دايره ليه تفكير مسامح مسامح بس هي تجي راجعه

[نهـاد]

[glow=0000FF]

لو انت حبيت انسان وعشتو فتره وانتو بتحبو بعض وجاتك انت ظروف خلتك تسيب حبيبك بسبب الظرف ده وهو ما سابك بالعكس كان متمسك بيك وبعد ما سبتو بي فترة من الزمن حسيت انك ما قادر تعيش بدونه وانك ندمان على انك سبتو بسبب الظرف ده وحاسي انو الدنيا ما بتسوى من دونه وتتمنى من كل قلبك انك ترجع ليهو لكن انت عارف انك سببت ليه الالم والجرح عشان سبتو وهو حباك بالجد هل حتجيك الجرأة تكلمو وتعترف ليهو من جديد ولا حتكتم في قلبك وتقول انا العملت في نفسي كده وبستاهل؟؟
طيب اتخيل نفسك مكان الانسان الساابك حبيبك ده لو جاء واتكلم معاك واعترفت ليك وقال انو ندمان على كل الحصل منو ده وانو ما قادر يعيش من دونك وحاسي انو قلبه ما شايف غيرك وبتمنى منك ترجع ليهو وتسامحو على غلطته هل حتسامحو وترجع ليهو زي الاول وتحبو وتنسى الاول ولا حتقول ده جرحني قبل كده وممكن يعملها تاني او مستحيل ارجع ليهو بعد ما كسر قلبي وجرحني؟؟

سؤالك صعب جدا
أول لو أنا كنت سيبتو من غير سبب مقنع في الاول ولقيت نفسي ما قادرة على بعدو: أول شي بعملو اتأكد هل هو لسة بحبني زي الاول أكيد طبعا ما حيكون زي الاول لكن الاهم انو لسة بحبني او لا
لو اتأكد من الشي دا أحتمال أقول ليه لكن في الغالب عشان أكون صريحة أكتر ما أظن أني أقول وحأكتم في نفسي ورزي ما قلتي انا العملت كدا في نفسي
وغير كدا عندي سبب تاني بخليني أكتم وما أقول أنو لو كان حبيبي هو الاتنازل عني وسابني من غير عزر مقنع ولأسباب واهية تقريبا مستحيل أرجع ليه تاني حتى لو أعتزر


بس عايزاك تختي بالك في الردود يا غرام
لانو الردود تقريبا كلها بتكون كلام نظري وبنقولها على حساب خيالنا
بنتخيل المشكلة وبنرد عليك
بس أكيد لو كنا عايشين المشكلة الظروف بتختلف وردة فعلنا بتختلف



تحياتــــــــــــي[/glow]

[السودانى الاصيل]

غرام الليل
تحيه طيبه وبعد

السؤال هو

كيف تركتى حبيبك فى المره الاولى والتى اطلقتى عليها اسم غلطه ؟؟؟
هنا يكمن السر

اذا تركتيه وهو يعلم تفاصيل الامر الذى من اجله تركتيه وايضا يعلم محاولاتك لعدم تركه
فى هذه الحاله يجب عليه ان يسامحك ولا يبتعد عنك ابدا

اما اذا تركتيه دون مقدمات او اعذار او بطريقه قاسيه او تركتيه من اجل شخص اخر
وحينما فشل وصولك للشخص الاخر عدتى واعتذرتى

حينها لو تمثل جمال الكون فى خديك لما ادرت وجهى نحوك
ساظل اكره الحب مدى عمرى بسببك

وهنالك واحده من البنات كانت تحب شابا حبا شديدا وجاء لخطبتها فرفض اهلها وبعد ذلك
اغترب وفى هذه الاثناء تقدم لها اخر اشد ولها بها ومجنون بها فوافقت به ولم تنسى الاول
فعاد الاول من الاغتراب وقابلته واتفقا على الخطوبه واتت الى الاول تعامله معامله قاسيه
ولا ترد على جواله
فتقدم لها من تحب وهذه المره رفض اهل الشاب بحجة انها رفضته من قبل
فحينما ادركت تمااما ان الشاب الاول ليس لها عادت واعتذرت لخطيبها وتزوجته

اذا كنتى مكان الخطيب هل تقبلين الاعتذار ؟؟؟؟؟

[غرام الليل]

ود الزوحي مشكور على المرور والرد الحلو ورايك حلو بس سؤالي ليك
لو حصل ليك الموقف ده بتقبل برجوعه ليك تاني؟؟؟

[غرام الليل]

مشكور مواطن مصري على المرور وبحترم رايك شديد بس اعتقد لما تكون
في موقف زي دا حتغير رايك تقبل ودي..

[غرام الليل]

مشكور ياالغاليه نانا رايك حلو شديد وانشاء الله حاستفيد من الاراء التنايه واخت بالي
منها زي ما نصحتيني ولو في نصحيحه تاني ماتحرميني منك تقبلي ودي..

[غرام الليل]

الاخ السوداني الاصيل رايك حلو كلامك منطقي وانا لو كنت سبت حبيبي عشان
واحد تاني ما كنت وريتكم وشي ولا استفسر رايك لاني كده ببيعو برخيص عشان تاني
لكن هو عارف كويس انا سبتو لي شنو .. مشكور على المرور والرد الطيب..

[غرام الليل]

بعتذر على تاخير الرد وتقبلو ودي للجميع..