مذكرات مسافر...............للسودان

[احمد يس]

الانتظار اسوأ شىء فى الحياة..............مابين الكوفيرة والاستوديو............ومكان الحفلة.......تمر الدقائق وكأنها ساعات.............بس انا كنت عامل حسابى وشاحن الموبايل ..............اها لسه الصور ما خلصتوا...............يابوى استوديو نحيس خلاص .....اتأخرنا عن مواعيدنا عشرين دقيقة دخلوا العروس البعدنا.............هو فى كام عروس عندهم ............والله امكن اربعة........... مشالله.......ربنا يسهل
...... يا احمد اتأخروا شديد دايرين نخت العشاء.............الناس تقريبا كلهم وصلوا..............ادينى جوالك اشوف البنات ديل متأخرين لشنو.......... اها قربنا يا امى بقى لينا الصورة الجماعية.........
اها قولى لى شعرها طلع كيف .......انا ما كلمتها مافى داعى تصبغ الخصل........والله يا امى اريت دا حالى............بتك بس ملكة جمال..........يابت قولى مشالله............ اها يا استاذ احمد نحنا جاهزين نخت العشاء......مستعجل على شنو يازول ..........ما لكين الساعة 8 حسع ......... خت العشاء...........اها شيلة الورد شكلها كيف يابت مع الفستان...............هههههه العريس يا امى خربليكى وردك ......جايب ورد طبيعى...............الرومانسية مقطعة بعضها.............. يعنى انا ما رجولى ورمت فى السعودية عشان اجيب ليها احلى شيلة ورد.....انسى يا امى........... اهلا اهلا يا دكتور.............الف مبروك يا احمد وعقبال الباقيين............. شرفتنا كتير...........لكن انت منو الكلمك ........انا ما عارف ليك طريق من اخر مرة اتقابلنا فى حفلة وداعك فى الدمام.............الدنيا صغيرة يا احمد...........
احمد بنات عمك ديل الجايين من البلد امشى بس ولو دقيقة على طاولتهم جاملهم........... اها يا احمد ...ما تدينى خبر انو بناتك حلوين كدى ..........ما اولادنا قاعدين.........انتى بس قولى لى اخبار البلد شنو.... وعمى كيف..........والله كان داير يجى العرس لكن ما بيقدر على السفر............
احمد احمد ............استعد الجماعة خمس دقايق بيكونوا وصلوا ................ اها ...... امشى وين انا من اللحظة الصعبة دى .................

[الدكتوره]

سيد احمد الحكايه شنو
نشفنا جمب باب النادى عروسكم دى بتجى بتين

[احمد يس]

عزيزتى الدكتورة

ما اكدب عليكى...............حاولت انا ذاتى ان اصل الى البوابة ولكن فى كل مرة تخوننى دموعى.......
كتبت الصفحة اكثر من مرة ولكنى اجدها اقل كثيرا لما كنت عليه فى هذه اللحظة ..............لكن اوعدك ان اكون على البوابة قريبا جدا فى استقبال العروس والعريس وسوف اصحبك انتى والاعضاء لما بعد الحفلة الى منزلى المتواضع لنرى الجرتك سويا..................

[احمد يس]

ما راح اكون صادق معاكم لو حاولت اوصف ليكم شعورى فى لحظة وصول العريسين لمدخل القاعة.......
انا سامع حاجات لكين ما قدرت استوعبها الا لمن وصلت سريرى انفث فى دخان سجائرى وارتشف قهوتى
زغارييييييددد .......ابواق سيارات..........ناس بتبارك...............ما قدرت اتحرك مع المستقبلين.........امكن
خايف من دموعى تفضحنى او خايف عليها تكمل................ قوم ياحمد بتنا وصلت............مبروك يا ابوالعروس
........قومى يابت ارح نتفرج ........... ايوووووووووووووويوووووووووو يووووووووووووو كميات .......
اقرب كرسى اقعد يا احمد.............انتظر لمن يقعدوا فى الكوشة وقوم بارك ليهم............... طيب بس اشوفها
وهى داخلة ..........اتقل ما يصح منك كدا...........طيب هو الناس زاتهم مدينك فرصة تتفرج.........ناس بتبارك وناس مجرد شمارات.................. لكين برضو القمر ظاهر.............................
عاينت فى شاشات مثبته فى جوانب القاعة وقعدت اتفرج................ وماشعرت الا هى بتحضن فينى هى وعريسها
..... يابت المكياج بيخرب عليكى............كدا بعدين .................. دار الشريط كلوا تانى فى راسى.......حتى الفستان ده ما انا تعبت انا وانتى وامك لمن لقينا الحاجة اللى تليق بيكى........مش انا اللى اخترت اللون السكرى ده لانه ما عادى وانتى عروس كمان ما عادية............. طيب العقد ده اللى فى رقبتك انا اللى اخترتوا ليكى.............
..............متذكرة لمن مشيت بيكى للدكتور وانتى بيبى وقال الامل ضعيف جدا............. متذكرة لمن تعملى مشكلة فى المدرسة وانتى فى المتوسط وامشى اتكلم مع المديرة من الانتركم لانو عندنا هنا ممنوع الرجال يدخلوا مدارس البنات واقعد اقنع فيها انك ما غلطانة لان البت السعودية اهانت بلدك فعلمتيها الادب ...................
شريط طويل شفتو فى عينيكى وانتى بتحضنى فينى.......................... موسيقى سلوووا يالله يا عرسان ما خلاص
........ انشالله ما اكون قصرت فى ابوتى فى الرحلة الطويلة...............ما عارف لكين الحضن ده بيقول انى ما قصرت ................ يالله ياراجل انا ماشية جنب بتى ..........لا خلينى هنا عشان اقابل المعازيم .........
من عادتى دائما فى الاعراس ان امثل الجانب المتزن فى المنظومة ...............يعنى بحاول ابعد شديد عن الهجيج بستفيد بمقابلة الاهل اللى مدة ما شفتهم .......ارحب بالناس الجاملونى وتكبدوا المشاق للحضور...............
يا راجل قوم كدا ما شايف ابو العريس وامه فى نص الحلقة يبشروا.................بطريقتهم......... وبينى وبينكم انا بس كنت قاعد وكل مفصل موجود فى جسمى بيتحرك .............. من الفرح شعرت انو الفنان كان احسن فنان والناس اشكالهم جميلة وانا ذاتى شعرت انى جميل ..................... يارب اسعدهم وهنيهم......
عمو عمو الف مبروك وعقبال اخواتها ................طابور طالبات زملاء بناتى تقولوا عاملين رحلة ..................
يا استاذ احمد ...... ما داير عشاء...............لا والله شبعان تب .................. ( ما اتغديت ) ...............
انتى يا بت راجلك دايما كدا ما بيبرد قلبى ..... انا قمت ومسكتو من يدوا عشان يرقص معاى ونجامل العروس والعريس ( حماتى ) .............. ما انتى عارفة طبعه مالك وماله................اها مال بنات اختك ديل مكشرين ............ ما كلموهم يمشوا معاهم الصورة الجماعية...................... مافى مفر يا احمد يس ...........الجماعة جايين عليك ابو العريس واعمامه والا تبشر معاهم..............اها ما باليد حيلة ..................والله ابوها صغير ...
النسوان ديل ما يخجلوا شوية يشاغلوا فيك وانا واقفة ...........هههههههه.........انا صدقت نفسى........

لنا عودة

[ود القبائل]

أخي الحبيب أحمد
يا ابو عيون جريئة
السلام عليكم
طول وصفك وسردك وأنا الزم الصمت متابعا في هدوء
لكن الان فقط افتح فمي اتعلم لماذا
لأني غدا ان شاء الله سوف أشد الرحال للسودان من الدوحة مرورا بالبحرين
لحضور حفل تخرجي من الجامعة
انت عارف انا عشت كل تلك اللحظات معك
سأحاول سرد رحلتي لكم في مقبل الايام
والان سأواصل صمتي حتى تنتهي من رواية مذكراتك
الله يديك العافية

[الدكتوره]

تحياتى لك
لم تتخيل كم عشت معك هذه اللحظه بالذات وانا اقرا فى سوطرك ومع كل حرف تزيد دقت قلبى اتخيل نفسى بالفستان السكرى الجميل وذالك العقد الراقى وانا امسك بيد زوجى وادخل من الباب كيف ستلاقى عيونى عيون ابى فى تلك اللحظه شعور جميل ومخيف فى نفس الوقت . وكما ذكرت لك سابقا انى ارى فيك صوره والدى

[صلاح يحيى سليمان]

اخى احمد ....تقريبا كل شخص بقرأ فى هذه المذكرات بسرح معاها خالص والبعض بتذكر احداث مرت به
تكاد تكون طبق الاصل لما تسرده لنا فى هذه المذكرات.....!
واصل.............!!!!

مع تحياتى

[بت أبوظبي]

لحظات جميله يا احمد ..
وواضح من الكتابه انك ما زلت متأثر بهذه اللحظه الرائعه واكيد ما حتنساها !!

اها حنسمع جدو بتين ؟؟!!

[احمد يس]

الاخوة والاخوات
ود القبائل.....الدكتورة......مشرفنا العام.......بت ابوظبى

شكرا على متابعتكم وتشجيعى.................
انا سعيد لان ود القبائل قد تشجع لكتابة مذكراته عندما يعود بالسلامة.........رحلة سعيدة
انا سعيد لانى رجعت الذكريات لمشرفنا...........ربنا يديك العافية
انا سعيد لان الدكتورة عاشت فى الفيلم بكل وجدانها ............ربنا يديكى ابن الحلال
انا سعيد عشان بت ابوظبى حللت احمد يس صح ....فعلا انا لسه عايش فى الحالة يا بت ابوظبى

شكرا ليكم جميعا

[احمد يس]

ما تقوم يابوى هجج مفيش حد واخد منها حاجة ........(ولدى)...............كدا تعال انت شوف فى زول ما اتعشى.............ما تخاف يا بوى ......ام العريس جننتنا ......تقول فى ناس عندهم ما اتعشوا نمشى ليهم بالسفرجى نلاقيهم مدبلين عشاء........بالله يا ابوى خليك من المثاليات حقتك دى........
كل اسباب التوتر راحت منى ......الناس مبسوطة واعرسان مبسوطين............عرض الازياء اكتمل والناس ماخده حريتها.................بدأت مرحلة التلفزة ............
اها .......حفلتكم دى لسه مدورة يا استاذ احمد عندكم تصريح خاص والا شنو...........( صديق)....ماتخاف
ماخدين كل التصاريح وزيادة شوية...............
الف الف مبروك يا احمد وعقبال الباقيين .....فى حياتكم............ ايوووووويو يوووووى
اها يالله خلينا نحصل نمشى البيت عشان الجرتك ورقيص العروس ( ام العروس ) ............. بالله ما كان مفروض يعملوا رقيص ابو العروس كمان..............ده كلام شنو دا يا راجل.........يعنى بذمتك بعد الصرف التقيل اللى صرفته ده .......... اكيد البرج الفاضل حيطير من راسى ....... حقو اعمل لى رقيص ابو عروس والبس لبس الافارقة فى الغابة ............... ونعمل حفلة للرجال نسميها رقيص ابو العروس ............... طيب يالله نحصل عشان نستقبل الناس فى البيت............
الخرطوم فى الليل ما فى اجمل منها................هدوء وجمال ونسمات باردة............. ونيل بيلمع .....
حلوة يا بلدنا...........................لنا عودة

[بت أبوظبي]

والله نفسي اشوفك يا احمد وانت بترقص ..
حكايه حتكون ظريفه ..

[احمد يس]

حسع انا طالع .... الدوام انتهى .............بكرة برد عليكى ههههههههههههههههه

[الدكتوره]

السيد احمد يس
نحن فى الانتظار
دا بقى مسلسل مكسيكى

[احمد يس]

الدكتورة

وينك ما ظاهرة علينا ........انشالله انتى كويسة
ما عارف يمكن سحرونى كل ما انوى اكتب تكملة للمسلسل المكسيكى ده ....حاجة تشغلنى عن الكتابة
طبعا انتى عايشة الموضوع بتفاصيلة وكمان بت ابوظبى دايرة تشوفنى وانا فى رقيص ابو العروس
انشالله بكمل الموضوع ................ بس النفس تسمح

[احمد يس]

قعدت اضحك وانا فى الطريق من الحفل الى البيت .........مالك جنيت ياراجل ........لا بس اتخيلت نفسى وانا لابس لبس ناس الغابة ومشغلين لى شريط قسمة وبرقص رقيص ابو العروس .............. خلاص ما تيجى كمان نعمل رقيص ام العروس ..........هههههههه يالله بسرعة وصلنا خلينا نتمم على اللمسات الاخيرة قبل الناس ما تصل
او ل شىء سويته انى تخلصت من البدلة فى اقرب دولاب ...........بحب البساطة وما بطيق ربطة الكرافته..........
اها كل شىء تمام ياست الكل .....................ليه انت ماشى وين ................ما قعدت نسوان فى نسوان .........
طيب فى رجال بيكونوا تحت منتظرين النسوان لم ينتهى الجرتك ...................عندك ولدك يقوم بالواجب انا ماشايف قدامى .................... طلعت فى الراكوبة حقتى فى السطح .........جناح خاص صغير ولذيذ ......ركن خاص لمن اكون تعبان الجأ اليه .......................... الشريط تانى من الاول ................كلاكيت...........
اخر شىء سمعته كان زغلرييد وبدأت حفلة االجرتك ............................ ابوى قوم سلم على العرسان ما كنتوا خلونى نايم ...................انا من الصباح ما شفت الراحة ...........بينى وبينكم انا هربان من اللحظة دى
.......... اها خلاص ماشيين ...................... دعواتكم لينا ورضاكم يا ابوى.............. ربنا يسعدكم ......
الساعة 3 صباحا ......................وين يجى النوم بعد ده ................كل البيت صاحى مافى زول جايهيو نوم
..... الحمدالله يا احمد اتسترنا مع الناس ................... طيب ممكن فنجان قهوة عشان استوعب اللى حصل من يوم وصلت الخرطوم ...................يعنى خلاص كدا بتنا بتجينا زيارات بس ................يا راجل سنة الحياة الدنيا ...... ما قلت ليك فى ناس اتكلموا الليلة على اختها ............. رأيك شنو .............
ما داير اسمع اى حاجة ................ تعرفى انا وانتى محتاجين لينا اجازة طويلة ................ كدا خلينا بس الصباح اصبح دايرين نرجع حاجات الجرتك للمحل ................... الاكسسوارات .........
ما بحب الوداع فى المطارات او محطات السكة الحديد .................... يالله يا احمد ميعاد الطيارة قرب عشان نودع العرسان ..............لازم يعنى ......ما خلاص ودعناهم .........يا راجل داير اهل العريس يقولوا شنو ..................
مطار الخرطوم ...............صالة السفر ....... ممنوع دخول المودعين ................... اهل العريس عاملين رحلة وداع الابو والام والاخوات واولادهم ................... ابو العروس وامها فقط ..............اختلاف فى وجهات النظر
يالله يا بتى كونى عشرة على راجلك ............. ماتخلى زول يدخل فى خلافاتكم ............... اهم حاجة الاحترام المتبادل بيناتكم ................ اسراركم دايما ما تتعدى جدران بيتكم ................... اها مع السلامة ........

نتابع

[الدكتوره]

سيدى احمد يس
زواج مبارك ان شاء الله
ربنا يسعدهم ويهنيهم
ويديك الصحه والعافيه ويطول عمرك وتعرس لى اولاده
ان شاء الله

هى دى الحلقه الاخيره
ولا نستنى الجزء التانى

[كاتم الاحزان]

عمنا العزيز احمد ياسين

كل يوم يمر علي في هذذا المنتدي اتعلم شي جديد لم اكن استطيع ان التعلمه لولا ان التقي بصفة من البشر تحمل بدواخلها روح الابداع و التميز لله درك عمنا احمد روعة الاسلوب و روعة السرد هي التي تفرض نفسها هنا و فتلك المساحة البيضاء التي لعلها لا تكفي لهذا السرد الرائع ....
لك التحية و التقدير و الاحترام

و فلا تحرمنا من جديدك دوماً .....

[احمد يس]

الدكتورة

معليش الرد جاء متأخرا سنه وكم شهر لانى كنت محتار ياترى هى الحلقة الاخيرة والا فى جزء تانى وما اكدب عليكى كانت عندى النية لاجزاء اخرى كتيرة ولكن حالت ظروفى الصحية فى ذلك الوقت لكى اواصل ....... بعد ان زالت هذه الظروف لقيت نفسى ما قادر اكتب يمكن لان الكتابة بتحتاج راحة نفسية وانا ما كنت مرتاح لظروف مرت بالمنتدى على فترات ......... شكرا ليكى وانتى وين غايبة عن المنتدى
ارجوا ان يكون المانع خير ..........تحياتى

[احمد يس]

العزيز كاتم الاحزان

شكرا جزيلا على ازاحة الغبار والتراب عن هذه المذكرات القديمة ...... انا اعتقدت انها قد دخلت الى دهاليز الارشيف .......... مره اخرى شكرا ليك

[الغريبة]

طبعا ...انا متشوقة شدييييد...متييييين اصل الصفحة الرابعة....
والحمد لله وصلتها...وانا مبتسمة...

عمو ..احمد تسلم على دى اروع مذكرات....
ويديك العافية....
ومبروووك العرس...


بس الفكرة انو اى زول يمشى على السودان ..يجى يحكى الحصل معاهو شنو....
وكدا اوعدك انو ما حتكون فى حلقة الاخيرة....
ورأيك ورأى البقية مهم فى النقطة دى....


ويسلمووو..
ولك تحياتى