حكاوي الحلة

[Hoomy]

أردت في هذا البوست تدوين قصص قصيرة ليست لمنطقة محددة وليست لأشخاص محددين وانما الفكرة من صلب الواقع ومابداخل النص خطرفات هاوي تحياتي

(1)
- سجمي يا حسن تعرس فيني انا سويت ليك شنو (صاحت محاسن)
= كدي خلينا من الموضوع دا جيبي الغداء
- لا انا سويت ليك شنو
= كدي جيبي الغداء قلت ليك ماكتري الكلام
- سمح
شوية وصاحبنا يمصمص في اصابعيه
= هسي عليك الله دا ملاح
- مالو الملاح دا
= أغبش كدا التقول عاملاه من موية ترعة امشي الله يقبحك انت ماشفت الملاح السوته البت اخت فاطمة دي ملاح التقلية الأمس
يصمت شوية ويسرح بي تفكيره

هييييييي والله البنية أخت أخت فاطمة جارتنا دي بنية سمحة شايفها جاتهم زيارة (قطع تفكيره صوت مرته وهي تصيح من داخل المطبخ ) أجيب ليك الشاي

- جيبيه تجيك الطاوية حبالها
ثم عاد للتفكير وبعدين البنية على العليها طباخةً والله انا يوم فطرت معاهم دا ضوقتني حلاة ملاح تقلية
- هاك الشاي (قالت زوجته )
= جيبيه تجيك الـ
- ياراجل مالك
= انا في ملاحك المسيخ دا
-مافي مشكلة المرة الجاية دي بطعمه ليك
ثم شرب الشاي وخرج


اليوم التاني
- صاحت محاسن لي فاطمة (هوي يافاطمة انا بديك صحن بتاع ملاح ويكة قبل الغداء ولما اطلبه منك جيبيه لي )
- ودا كله لي شنو
- الراجل يابت امي بقى ينبز برا شغلة خلينا النشوف حكايته شننو
- سمح مافي عوجة

ساعة زمن يدخل حسن وهو يصفر
- الغداء يامرة
- والله اليلة ياحسن حسيت لي بي شوية صداع كدا وماطبخت لكن طلبت من فاطمة جارتنا شوية ملاح كدا بيغديك انشا الله خليني النتناولوا ليك
- ماطبختي مش - يلا يلا مافي مشكلة جيبيه
- يافاطمة هوي ناوليني معاك حبة ملاح للراجل دا
- سمح هاك
يبدأ حسن في تناول غداءه ولما انتهي

= شفت الفرق وااااااااااضح دي أم رقيقة مش زي ملاحك المسيخ داك اتلقي هسي عملته البت الضيفة المعاهم دي يدها طااااااااااعمة
- يدها طاعمة مش كدا
= ايوة عندك اعتراض
- لا بس دا ملاحي انا عملته واديته لي فاطمة بس عشان اشوف فصاحتك دي سببها شنو
= كدي يعني عملت فيني مقلب مقالبك وبلاويك دي الخلتني أفكر أعرس فييك ذاااااااااااااااااتها
حررررررررم بكرة اكان اخطب اخت فاطمة

وتم العرس

ومازالت حلة محاسن مسيخة

وحلة أخت فاطمة جارتها بدت تمسخ

وفكر حاج حسن في حلة تالتة

لكن مالاقي سبب للأن

ونشوفكم في قصة جديدة

[ود الزوحي]

جدعة يا هومي والله ...


ذكرتني حكاية البصلة .. لكن ده بتكون سمعتها لأنو شكلك كده غاوي قصص ..


يلا راجين الجديد ..


تحياااااااااااااتي ..

[امرأه نخلة]

القصة دي بتأكد أنكم معشر الرجال لما تجوا تغيروا لازم تتنكروا للقديم عشان كده الملاح بيبقى مسيخ .
في أنتظار القصة التانية .
مشكور ياهومي

[Hoomy]

جدعة يا هومي والله ...


ذكرتني حكاية البصلة .. لكن ده بتكون سمعتها لأنو شكلك كده غاوي قصص ..


يلا راجين الجديد ..


تحياااااااااااااتي ..

الراقي دوما ود الزوحي
حكاية البصلة دي شنو كمان ياحبيب
والقصة من الخيال بس واقعية مش كدا


تشكرات يامان يا قامة

[Hoomy]

القصة دي بتأكد أنكم معشر الرجال لما تجوا تغيروا لازم تتنكروا للقديم عشان كده الملاح بيبقى مسيخ .
في أنتظار القصة التانية .
مشكور ياهومي

إمرأة نخلة البت الراقية

نحن معشر الرجال مادايما كدا ولا انتو النساء دائما مظلومات
محي الدين الفاتح تتطلع لإمراة نخلة ترمي ثمرا فلم يجد
وأنا اتطلع لأمراة نحلة (بالحاء) تعطي شهد
لو لقيتها أقدر أكل ملاح بي مزاج حتى لو مسيخ
لكن الله أعلم
انتظريني في القصة الجديدة بوريك كيد النساء

تشكرات علي مرورك الراقي ياراقية

[مسلمة وافتخر]

ابدااع يا هوومى واتحفنا بالمذيد

بس يا هووووومى ادم دا عينو دى ما بتملاها الا الترااااب

يا الله الصبر

[امرأه نخلة]

إمرأة نخلة البت الراقية

نحن معشر الرجال مادايما كدا ولا انتو النساء دائما مظلومات
محي الدين الفاتح تتطلع لإمراة نخلة ترمي ثمرا فلم يجد
وأنا اتطلع لأمراة نحلة (بالحاء) تعطي شهد
لو لقيتها أقدر أكل ملاح بي مزاج حتى لو مسيخ
لكن الله أعلم
انتظريني في القصة الجديدة بوريك كيد النساء

تشكرات علي مرورك الراقي ياراقية

أنت أيضاً مزواق وأنتقائي ولكن ماتؤكده كتاباتك ( عندك طار بايت مع صنف الحريم ) أي نفي يفيد التأكيد ......................!!

[Hoomy]

ابدااع يا هوومى واتحفنا بالمذيد

بس يا هووووومى ادم دا عينو دى ما بتملاها الا الترااااب

يا الله الصبر

ذات الشجون البت الروعة سلام

والله أدم مظلوم لكن جنس الحاج متولي هو البحيب لينا الزعل
عموما بجيب ليك قصة عن كيد النساء
واحدة بي واحدة
أنظريني

[Hoomy]

أنت أيضاً مزواق وأنتقائي ولكن ماتؤكده كتاباتك ( عندك طار بايت مع صنف الحريم ) أي نفي يفيد التأكيد ......................!!

عندي طار بايت مع الحريم ماهن براهن بيجبنوا لروحن
عموما انا بعد دا كلو بكاي بكاء
بقولو الجمرة بتحرق واطيها
بس صنفكن يخوف بيني وبينك كيدكن عظييييييييييم
وبثبتو ليك في قصة قرييييب

[ملاك الورد]

إمرأة نخلة البت الراقية

نحن معشر الرجال مادايما كدا ولا انتو النساء دائما مظلومات
محي الدين الفاتح تتطلع لإمراة نخلة ترمي ثمرا فلم يجد
وأنا اتطلع لأمراة نحلة (بالحاء) تعطي شهد
لو لقيتها أقدر أكل ملاح بي مزاج حتى لو مسيخ
لكن الله أعلم
انتظريني في القصة الجديدة بوريك كيد النساء

تشكرات علي مرورك الراقي ياراقية

هههههه القصه نااااااااااايس
و ما شاء الله خيالك اوسع من المحيط
لكن و الله انا حاسه بغتاته بالذات في الملون ده ... و ضحكت شديييييييد
قلت عسل و شهد يا هومي ......انت متاكد .... :D

مياو ...

[دعد]

عشان تشوفو الراجل لما عينو تزوغ تاني ما في شي بيعدلها

لا ملاح لا يحزنون

لكن بالجد ابدعت يا هومي

في انتظار البقية

[رغودة]

ماشاء الله مبدع ياهومي.. ربنا يحفظك..
والقصة فعلا معبرة وكويس إنه كاتبها رجل حاسي بالظلم الواقع على بعض النساء من بعض الرجال..




(لاحظوا قلت بعض ) :d

[mazza mohammed]

دا عشان تعرفوا الرجال بيطلعوا حاجات من مافي عشان يعرسوا على نسوانهم
طبعا ما كلهم .............
منتظرين ابداعاتك

[Hoomy]

هههههه القصه نااااااااااايس
و ما شاء الله خيالك اوسع من المحيط
لكن و الله انا حاسه بغتاته بالذات في الملون ده ... و ضحكت شديييييييد
قلت عسل و شهد يا هومي ......انت متاكد .... :d

مياو ...

ملاك الورد
ازييييك ومشتاقين
والله انا الحاسي بقتادة في حكاية شهد دي وانت شكلك ماخدة الاسم مش الصفه
اها نقول شنو كيدكن عظيم
ومشكورة على المرور الراقي ياراقية
مياااااااااااااااو

[Hoomy]

عشان تشوفو الراجل لما عينو تزوغ تاني ما في شي بيعدلها

لا ملاح لا يحزنون

لكن بالجد ابدعت يا هومي

في انتظار البقية

يادعد مايمكن الملاح مسيخ
وبعدين انتو برضو هينات والله البتلم ليها في راجل ..................... ولا بلاش

عموما مرورك أسعدني يازولة يارائعة وانتظريني61.gif

[Hoomy]

ماشاء الله مبدع ياهومي.. ربنا يحفظك..
والقصة فعلا معبرة وكويس إنه كاتبها رجل حاسي بالظلم الواقع على بعض النساء من بعض الرجال..




(لاحظوا قلت بعض ) :d

رغودة
كيف أخبارك
سعيد انا بي مرورك والله
واهو المرة دي وقفنا معاكم وبقينا الرجال هم الخاينين
نشوف المرة الجاية بيحصل شنو اترقبيني
شكرا ليك كتير ياروعة

[Hoomy]

دا عشان تعرفوا الرجال بيطلعوا حاجات من مافي عشان يعرسوا على نسوانهم
طبعا ما كلهم .............
منتظرين ابداعاتك

أهلين معزة وكيف أخبارك
ماببرئ ليك الرجال لكن انت معاي في نسوان يستاهلوا يدبلوا فيهن صح
بعدين يمكن الملاح مسيخ ولا شنو
وبعدين انتو زاتكم كترتوا لازمكم 5 مليون سوداني الحاج متولي
عشان يفك البورة
يلا عموما انا سعيد بي مرورك وتعليقك
شكرا ليك

[نهر المحبه]

ههههههههههههههههه
ماشاء الله عليك ياهومي
سوري على الضحكه الفي البدايه بس القصه عجبتني...
وربنا يحفظنا بعد كيدنا العظيم ده

[Hoomy]

(2)

صورة تراجيجدية لواقع مرير



جلست الحاجة سكينة في راكويتها المتواضعة وهي (تسوط ) في حلة عفا عليها الزمن وأكاد أقسم ان هذا اللون الاسود الداكن هو ليس (سكن ) كما يسمونه بل هو غضب متواصل من الحلة تجاه إحراقها بالنار من دون مناسبة فلايوجد اللحمة التي تزين حلة ناس حاج الصافي الرجل الثري الذي يمتلك لوري الطوب .
نفثت الحلة غضبها في شكل بوخ متواصل.
نظرت الحاجة سكينة حولها فلم تجد غير دجاجة تبحث الأرض في إصرار لكتكوتين صغيرين هما ماتبقى بعد أن أختطفت الحدأة ثلاثة من صغارها. ولم تجد الحاجة سكينة بدا من الابتسام حين وصل تفكيرها لمصير هذين الكتكوتين الصغيرين في هذا البيت الخاوي.
حين نظرت يسارها وجدت (صغير ماعز أو سخلة) ترقد دون إزعاج وكأنها ترابط في انتظار ماتجود به الام عند عودتها مساء من الرعي .
انتبهت الحاجة سكينة فجأة إلي حلتها ووجدتها تقريبا نضجت ووضعتها جانبا بعد ان تزوقتها للمرة النهائية (والله ملاح عدس مافي زيه )
كانت في انتظار أبو العيال المرابط في حقله بصبر وجلد تحسده عليه أجيال الحاضر
وضع الحاج عطا المنان قليلا من الحشائش على الأرض المتسخة للحمار الذي أعلن قبوله للموقف بصيحات قصيرة ومتقطعة وأتم صيحاته عندما وضعت له حاجة سكينة جردل من المياه إلي جواره. وحاولت الماعز الصغير سطو قليل من الحشتئش من الحمار الذي ركلها بقوة وانحسبت الأخيرة مفضلة انتظار أمها.
- كيف البنية بقت من الحمى .
- والله عملت ليها مكمدات وسقيتها من الدواء الجبناه لحبوبتها.
دخل عليها الوالد ووجدها متدثرة بثوب متسخ تقريبا ولا يظهر منها شيء سوى أهداب متعبة ووجه كالح من المرض. وضع علي جبينها يده بحنية ذائدة قائلا (الله يتم عافيته عليك يابتي)
تناول الحاج عطا وجبته المكونة من ملاح العدس أعقبها بكوب من الشاي وحاول أن ينام ولكنه أرقه منظر البنت التي يشتعل جسدها بالحرارة
حمل بنته في حماره الذي أستغرب طلوع سيده في هذه الأثناء الغير معتادة قائلا لزوجته الصابرة (ياسكينة والله انا مابقعد أعاين للبت بتموت قدامي ) وأكمل كلامه وهو يتحرك خارجا (بوديها للحكيم وأجي راجع )
- بتك عندها ملاريا (قالها الحكيمباش الوحيد في القرية ) وتلزمها جرعة كاملة من الكينا
- يلا ربنا يقدم الفيه الخير (قالها حاج عطا)
أخذ بنته بعد أن تناولت 4 حبات كاملة من الكينا وعاد للبيت مطمنا نفسه مؤقتا بأنها ستصير بخير
وحين بدأت عيناه في الثبات أوقظه صراخ الحاجة سكينة فهب منزعجا ومتسائلا عما يحدث
فوجد بنته في متشنجة فنظر لها وحملها على نفس الحمار عائدا للحكيم
- انت سويت لي بتي شنو البت كان عندها حمى بس
- ياحاج قول بسم الله في شنو
- البت دي مالها بترجف كدا
- انتو اديتوها شنو
- ما اديناها حاجة دواء جبناه السنة الفاتت لمن كان حبوبتها عندها حمى
- ياحاج وانتو بتدو بدون استشارة .
- اها والحل
نظر الحكيمباش للبنت وخرجت من عينه دمعة دون أن يدري قائلا للحاج (انشا الله البركة فيكم)
وصرخ الحاج صرخة هبت لها جميع القرية (انت السبب ) قالها للحكيم باشا
جدل مطول تسمعه وانت ذاهب لتعزي الحاج عطا
فتسمع حاج الصافي الرجل الثري قائلا (هو البنية ذاتها كتلها الجوع أكان جابوا ليها موز ولا برتكان فيها شنو)
من جهة أخري تسمع عم العبيد قائلا (والله الجنى الحكيم دا من خشا البلد انا ما ارتحت ليه السبب الكينا الاداها ليها دي)
وتنظر لأطراف الصيوان تجد شباب يتجادلون في فريق الكورة في القرية الذي مني بهزيمة ثقيلة من خصمه في القرية المجاورة.
ووسط هذا الزخم من الكلمات ضاعت البنت نتيجة للثالوث المخيف (الجهل الفقر المرض )
الحاجة سكينة لم تزرف ولا دمعة وهي تغسل بنتها بل نظرت إليها قائلة (الله يرحمك يابتي ) وتـأوهت بحرقة ذائدة .
عادت الحياة لطبيعتها بعد أيام قلائل ونسي الناس الفاجعة الا الحاجة سكينة الجالسة في راكوبتها المتواضعة تصنع فطورا متواضع للحاج الذي سيحضر بعد قليل وهو يحمل كل الهموم .نظرت يمينها فوجدت ان الدجاجة تبقى معها كتكتوت واحد وقد كبر قليلا معلنا استمرار الحياة أما الماعز الصغيرة فقد اضطرت حاجة سكينة في أيام العزاء لذبحها حين فاجأها ضيوف
فوجدت نفسها وحيدة في الراكوبة فتنفست بحرقة وهي تقول (الله يرحمك يابتي )
وواصلت في تحريك طبيخها بأسى واضح
تمت

[Hoomy]

ههههههههههههههههه
ماشاء الله عليك ياهومي
سوري على الضحكه الفي البدايه بس القصه عجبتني...
وربنا يحفظنا بعد كيدنا العظيم ده

جعلك الله دوما ضاحكة يانهر المحبة
بس خلي ملاحك دائما طاعم اوك
ابقى قريبة عشان تواصلي معاي
حبابك ألف