نافذة علي الماضي الجميل

[الشمالي]

عوووووك نااس ست نور جابو ليهم تفزليون ,كان يرددها واحد من الشفع وهو جاااري علينا ويلهث ,كنا مجموعة من الصبية غرقانين لاضنينا في لعبة شليل وينو وجنبنا واحدين مدورين ليك لعبة الرمة وحراسة وعلي صوت صلاح الكديسة توقف اللعب وتجمعنا حول صلااح الكديسة باقي خبرو مولع ناااار , وطوالي هاشم النعجة سألو :- ها صلاح تلزيون ده شنو ؟ رد صلاح :- والله ده حلو حلا ! يتدخل الجيلي ود نفيسة :- ذي الكستر ذي الكستر ولا ذي الجبنة ؟ يرد صلاح كديسة :- بس جاااري علي كرشك دي كستر شنو انت قايلو بياكلو , هنا مسكت زمام الحديث :- اسمو التفلزيون ! عااد الود ما ناقش وعراااف وشاف الخرتوم عاد في زول بغالطني (كااااك) ده صندوق مربع اصفر بجيبو فيهو الناس اتكلمو وبجيبو فيهو الموسللات (المسلسلات) عاد الزول ما شاف التلزيون مرة واحده عند ناااس خالتو فاطمة لما مشي زارم مع اموا وقعد حاااارس الشي ده ومنطط عينيهو لمن رجع البلد , وقال صلاح كديسة الناااس ملمومين عند ناااس ست نور بيركبوا في الداهي ده وانتو قاعدين مع شليل يلاكم , وقمنا بذمرتنا ديك وااااي واحد مسك عراقي الدمووورية (الذي القومي في الحلة) في سنونو وهااااك يا شتات علي ناااس ست نور وصلنا هنااك ولقينا الاعمي شائل المكسر والنااس الكبااار والمنظراتية بركبوا في الاريل وكنا بنقول عليهو الارسال تسمع النعيم ود حمد بيقول : هاجنا ركب الارسال ده خلنا نشووف اللخبار اتسرع , طبعا بعد جهد جهيد ويمين يسار الارساااال جاء وطبعا خااااتين التلفزيون معلقنو فووووق علي برميل والبرميل خاتين تحتو طوووب ونحن نجي نتحسس الجهاااز والواحد يقووول هد هلا هلا السمح , بعد الصورة ظهرت وكان شغااال برنامج اسمو ربوووع السودان يعني وقع علي العروووب في جرح والناااس دي اتكيفت جنس كيف ها جنا اسكت خلنا النسمع كويس .الجنيد داااك لما شاااف المصيبة دي والناس راااح علي الصندوق عشااان يلمس النسوان البرقصن والجماعة مسكو يا الله ويامين هاازوول اقيف ماش وين وداك شغال خلني النلمسها ,تلمس شنو يا ابرويساً يشبة التبشة اقعد يقعد فرتك , بجاي الضبع ود اللمين مااارق لسانو تلات امتار وفاتح خشمو فتحة فرن والريالة سائلة بحووور , وبهناك حميدان العربي حااال ما اندمج في الشي ده كان خاتي ليهو سفة قدر الهقلة ووتف تف بصقها فوووق الناااس القدامو , يا اخي ده منو البذق فوقنا السفة ده , ده انا حميدان ما قدرت اتلفت .
بعد برنامج ربوع السوداني انتهي جاءت الدعايات (وطق في طق ومن انتاج حلويات سعد) العرب ديل اي وااحد مسك عكااازو وربوها جنس ربه لامن الدعايات انتهت وبداء برنامج يتحدث عن ادغااال افريقيا وفجاءة ظهر اسد متوحش ساااكي ليهو غزالة وجابو ليك شكلو كااامل في الشاشة , كان تسمع فططتك
فططتك كرب طاااخ كش كرااااااش دش ها زول عفصتني , هي اقيفوا ................


الباقي بكرة جعت وماشي اتعشي

[The Sniper]

كما عهدناك دائما
ابداع x ابداع

في انتظار البقية


سلمت يداك اخي

[الشمالي]

كما عهدناك دائما
ابداع x ابداع

في انتظار البقية


سلمت يداك اخي

المبدع اسنبر
اسعدني جدا مرورك و
وابقي قريب

[mis.silent]

هييي ما يكونوا كسروا التلفزيون عشان يقتلوا الاسد
وحيروا ست نور
مشكور يا اخ الشمًالي على الابداع

[الشمالي]

هييي ما يكونوا كسروا التلفزيون عشان يقتلوا الاسد
وحيروا ست نور
مشكور يا اخ الشمًالي على الابداع

الغالية مس سايلنت
تسلمي علي الاطراء
ومرورك وكلماتك
وسام اعتز به ,
ولمعرفة البقية
ابقي قريبة

[The Sniper]

نحن في الانتظار يا عمو الشمّالي

عجّل شوية

[محمد نعيم]

الشمالي على ما اظن انت مولود في التمانينات يعني باختصار الحضارة جاتكم متأخرة وبعد دا تقول لي انا من البندر.

موضوع جميل يا شمالي دحين يا خوي الدمورية لسا في البلد في؟

[الشمالي]

نحن في الانتظار يا عمو الشمّالي

عجّل شوية

هااا جنا ما تستعجل
هسع دي بنزل ليك
كبسولة ,

كاااااااااااااك
الشفقة تطير

[الشمالي]

الشمالي على ما اظن انت مولود في التمانينات يعني باختصار الحضارة جاتكم متأخرة وبعد دا تقول لي انا من البندر.

موضوع جميل يا شمالي دحين يا خوي الدمورية لسا في البلد في؟

الحضاااارة تطير يااا ود النعيم
شن جابتلنا غير الجفاء والفرقة
,بعدين ياااا خوي ما تكشف
الورق انا من مواليد الخمسينات
كااااااااك .
يا حليل الدمورية وايامها , الله
يرحم .

مشكور ود النعيم اسعدني تواجدك
بالبوست وكن قريب يااااااا
ود النعيم ياااااااااااااا

كااااااااااااك

[omar babikir]

العاجبني في الموضوع دا والمواضيع الزيو انك يا الشمالي
ما دسيت حكاية انك من اهل العوض ..والله دي حاجة
بقت مافي ...الايام دي ...يعني الواحد او الواحده اول ما يرتاح شوية
ويضرب الكدنشة ...ينسى اي حاجة ...ياخ حرف الجيم ..بقا حاجة
تانية عارفو (jيم)...فبحييك على نقلك لواقع عشتو ومتقبلو وبتفتخر بيه...
لكن بالراحة ...المنتدى دا مليان حناكيش:D...وفيهو ناس بعرفو من
الايسكريم:D وانت طالع...يعني جرعتك دي زيادة شوية..


هسة طبعا يا الشمالي ..الجماعة مركبين ستالايت ونايل سات وحاجات
زي دي....وعاملين فيها ولا بيروت...

مشكور يا الشمالى وواصل نحن متابعين..

[الشمالي]

عـــــــــــــــــــــــــــــدنا

اها كان اسمع ليك طش طراااااش ها زول كسرت فقرتي والله ان ذاتي انخلعت وما عارف حاجة واقوم جااااري سااكت مع النااااس , وشوفلك ود الحريقة طائر فررررر تقووول شائلوا الهوا , والنعيم ابزرد عتر ليهو سلك التلزون الجاي من البطارية وصلاح الكديسة يصرخ بطول حسو عووووك يا ابو مروووة
والجماعة يمين اشتتوا بِلي وفكو في بلاااااط اي بلية طاارت علي بلد اقصد اي واحد في اتجاه والجني المريود طقش عدلان العوير واحد سنونو اتكسرت والتاني جبهتو خيطوها ليهو اربعة فتلات , انا للوكت داااك ما فاهم حاجة النااس جروا جريت معاهم وفي اللخير الناااس شتتوا من اللسد (الاسد) واي واحد دائر يخارج نفسوا الله يلزمنا الصبر المهم بعد عرفته السالفة رجعت وانا فطسااان من الضحك , هي اتو في ده الغنم طفشن من الاسد في التلزون وحمااار ناااس ست نور يااا هسي ما لقوه الله قاادر . المهم رجعت ولقيت والواطة خلا اتوهطت وصنقرت وقعدت براااااي في العنقريب الهبااااب وقعدت اتفرج اها الجماعة حسوا بي رجعت وقفوا بعيد , وانا اندمجت مع التليزيون شوية كده اسمع ليك حميدان جاي يترتر ويتلبد وعكازو جاريهو مرق الزووول دائر يكسر التلفزيون اقصد دائر يكتل الاسد ورفعتو للمرق اقصد العكاااز انا اتبهته ومسكت الزووول ها حميدان هااا زول سم يعني قول بسم الله , ها جنا اترحمن يعني خت الرحمن في قلبك , وستة ساعات انا بقنع في البشر دي انو دي صورة ساااااكت وده ما اسد حقيقي حتي حسن الممرض ما اقتنع المهم بعد حق وتحنيس الجماعة اقنتعوا الا بعد مشيت للتلفزيون وشلتو بي اسدو وكفت الاسد في جضومو وطبزت ليهو عيونو المحومرات (الحمر) وهنا هاااشم النعجة جاي متاخر الزول مشي جاااب سيف ابوه وجاء , غايتو جنس حاااالة معركة كرري بس الجاري ليهو عكاز والشائل ليهو دمير والمشلع ليهو راكوبة اها بعد الناااس اقنعت مشو علي المزيرة (مكان الازيار ) خمسة ازيار شفطوا الموية دي في دقائق خلعة سااااكت , بعد كده ست نور بداءت تتفقد في وليداتها ها ام حمد شوف شووف ازيرق ولدي جنبك باقي الجنا ازيرق ده حكايتو حكاية ده مره شاااف ليهو قندراني الجنا سكة القندراني ميلين لمن الحلة كلها قامت جارية وراهو ورجعو تاااني , ده مرة جات طيارة هيليكوبتر بتاعات الرش الجنا يومين ايفتشوا عليهو ما لقو كلو كلو البقول ليك غرق والبقول سرقو سيد القندر , المهم اهلو قنعو منو ودائرين يفرشو عليهو والناس من البحث تعبت فواحدة من الحريم دائرة تولع طش العواشة كان مرق ليها شتن اسود من تحت الطش المرة انخلعت وقعت في الواطة , ياااربي ده سخيل ده شيطان اها السخيل ده طلع الشافع ازيرق ولونو من السجم فحمة ومن اليوم داك سموهو ازيرق اتاري الجنا كان مندس من الطيّارة من امس , اها الجنا لما شاااف الاسد طفش والحلة قامت تفتش اتاااني ولقوا جنب الحواشات
المهم اليوم الاول داك عدي علي خير واليوم التاني كان يوم الحبوبات وشاء الله مسلسل الدهباية كان شغال اعادة نص نهاااار عليك الله ياست نور حبة كركار وودكة النختها في راس باقي راسي يسوي هو وتج تج من وجع الراس ده صوت السرة بت حمد و .......................

استراحة اجبارية ونعود

[الشمالي]

العاجبني في الموضوع دا والمواضيع الزيو انك يا الشمالي
ما دسيت حكاية انك من اهل العوض ..والله دي حاجة
بقت مافي ...الايام دي ...يعني الواحد او الواحده اول ما يرتاح شوية
ويضرب الكدنشة ...ينسى اي حاجة ...ياخ حرف الجيم ..بقا حاجة
تانية عارفو (jيم)...فبحييك على نقلك لواقع عشتو ومتقبلو وبتفتخر بيه...
لكن بالراحة ...المنتدى دا مليان حناكيش:d...وفيهو ناس بعرفو من
الايسكريم :d:40: وانت طالع...يعني جرعتك دي زيادة شوية..


هسة طبعا يا الشمالي ..الجماعة مركبين ستالايت ونايل سات وحاجات
زي دي....وعاملين فيها ولا بيروت...

مشكور يا الشمالى وواصل نحن متابعين..

المبدع عمر بابكر اسعدني مرورك رغم ان هذه الحكايات
بها كثير من الواقع وشي من خيالي لكني فخور جداً باني
العوض نفسه فنحن الساس واهل الجلد والراس والبلد
كان ما فيها عوض من العوض وليهو العوض ,
وانا عارف يوم بفهق لي حنكوووش ببوست وبجير خبرو
الله يصبر الحناااكيش علي , هسع عليك الله اهل العوض
ديل ما كلهم حلوين وجميلين ومبدعين شعراء وفطاحلة
وروايييين و و و و و
واسعدني جدا تعليقك وابقي قريب وراجع الجرعة اعلاه

[بكور]

المبدع الشمالى .... احييييك ع الحكايات الظريفه عن البلد و اهل البلد ... يلا مستنين الباقى

[الشمالي]

المبدع الشمالى .... احييييك ع الحكايات الظريفه عن البلد و اهل البلد ... يلا مستنين الباقى

الجميل بكووووور
قمة الفرحة حضورك الاَثر
عندي وتضميخك للبوست
بالق اطلالتك الجميلة ,
كن قريب

فرااامل

توقيعك كده
كااااااااااااااك

[الشمالي]

الناااس دي بتقراء وتقوووم جارية الشفقة تطير

[اريج محمد]

هههههههههههههههههههههههههههههههههههه
هههههههههههههههههه

[الشمالي]

هههههههههههههههههههههههههههههههههههه
هههههههههههههههههه

الله يجبر بخاطرك اريج اختي
ومرحب بيك بيناتنا ونورت المنتدي

[بعد الزمن]

والله الموضوع اللاتك سمح عديل

وكارب , عفيت منك يا ود ابوي

[الشمالي]

والله الموضوع اللاتك سمح عديل

وكارب , عفيت منك يا ود ابوي

ها جنا عفيت منك ورضيان عليك
انا ما عارفك زووول ذواقة وعندك
حاسة شم قوية بتعرف من اين يؤكل
الكتف ,

كاااااكية
اللوري وين ؟.
كاااااااااااااك

[mis.silent]

هههههههههههه
شكلك حتعمل مسلسل تاريخي يا الشمُالي
بس حيكون ممتع واصل يا اخوي