دنيا الريد غريبة
سر ما بنفهمو
ناس أفراحا زايدة
وناس يتألمو
أبيات ياما سمعناها وغنيناها ورردنا في الحان كتير وقلناها ، والجميل إنو في أغاني كتير بتلامس ملامح من شريط ذكرياتنا ، وانا بت الابيات دي لغرض اني احكي ليكم قصة من قصص دنيا الريد الغريبة .
بعد حب دام فترة طويلة وبدون مقدمات
هناية : أنا آسفة شديد يا ..... ربنا ما كاتب لينا قسمة ، وربنا يعوضك ببنت الحلال التحبها ، وانا ما عارفة اقول ليك شنو لكين القسمة إختارت كل الناس حاكماها ظروف ، وبتمنى ليك التوفيق في حياتك الجاية وسامحني وأعرف إني حبيتك بالجد حب ما ليهو حدود .
هناي : جر نفس عمييييييييييييييييييق ، معقولة الحب ده كلو ينتهي بالبساطة دي ، بجرة قلم تقولي لي انتهينا ونحنا يادوب إبتدينا .
ربنا يوفقك ويهنيك في إختيارك ويجعل حياتك كلها خير وإنشاء الله تلقيني أخ عزيز تلقيهو وقت تحتاجي اي مساعدة .
ومرت الأحزان والايام وصاحبنا داير يرد القلم لهناية . قوم أمشي إتقدم لصحبة هناية عشان هناية تتغاظ وتعرف إنو ما هي الزولة الوحيدة في الكون ويرد ليها الصاع صاعين .
وبعد ايام
هناية : طبعا يا هناي أنا لما قلت ليك إنو مافي قسمة كان قصدي أمتحنك وأشوف ردة فعلك وبسرعة مشيت إتقدمت لوحدة تانية وبالطريقة دي اثبت لي إنك ما بتحبني ..........
غلطانه هنايه اكيد
فى بنات بحبن العبن بمشاعر الشباب
ودى اسوء حاجه فى الحب
وبعدين الحاجات دى ما فيها هظار يعنى من البدايه لو فى واحد من الطرفين ما عايز التانى ما فى داعى للاستمرار فى العلاقه
بس هناي يقوم يمشي لصاحبة هناية عشان يغيظ هناية دي ماحلوة
لان مشاعرو ناحية صاحبة هناية بتكون ما صادقة اغاظة وكده
وهنا بكون غلط علي صاحبتها
هناية الحب ما فيهو امتحانات
تسلم حبيبنا أبو سن على مداخلتك الجميلة
هو فعلا بيكون هناي غلط في حق صاحبة هناية بإنو يتقدم ليها وهو قلبو مع هناية
لكين لما الزول ينجرح من حبيب كان بيمثل ليهو كل أحلامو بيفقد منطقو وبيكون مختل التوازن ، الليلة الحب ده تضحيات أكتر من إنو إمتحانات ولو كل 2 حبو بعض وقعدو يمتحنو في مقدار حبهم حيفقدو بعض بنسبة كبيرة وده البيخلي أغلب العلاقات العاطفية تنقبر في قبر واسع وغريق
اعتقد الشىء الاساسى فى الحب هو الثقه وبدون ثقه بيفشل الحب وهنايه كانت غلطانه لمن اختبرتو بهذه الطريقه واعتقد مافى مزاح فى الحاجات دى وهناى غلط غلطه اكبر لمن اتقدم لى صحبتها اعتقد عندو عزرلانوالزول لمن يزعل ممكن يعمل حاجات يندم عليها
طيب ياحبيبنا حبيب الناس
انا شايف الغلطانه هناية لانة ماقدرت تحبك سيناريو كويس او اختبار.......... امتحان (او خطة)
والاسواء من هنايه هو هناي لانة بالفعل اثبت انه ماكان بحبها ؟؟؟؟؟؟
هناي اتضح لنا انه شخص غير جادي لامع هنايه ولا مع صاحبتها شخص بلعب بالمشاعر فقط
لو كان حباها صاح وفكر فيها زوجة ورفيقة للدرب الطويل لايمكن ابدا يتخلي عنها بمجرد ماقالت ليهو
اعتبر البينا انتهت كان علي الاقل يدافع عن حبه ليها ويحاول معاها ويعمل الكثير ولمايتقفل الطريق قدامو
يخليها للايام ..................بدون ضرر ولاضرار ؟
لانه من المستحيلات تضر ليك بنت انت حبيتها يوم من الايام او تحاول ان تغيظها
بماانه الدنيا فرقت بينكم لكن الحب الصادق سيظل جاري في الوريد الي مالانهاية
وحااتشوفها في كل ثانية قدامك تسمع ضحكتها ونقاشها وكلامها الطيب وانتقادها
كل حاجه بتزكرك ليها بتشوفها جميلة والبينكم سيصبح زكره جميلة خالده في الوجدان
ان كان اصلا هنالك حب صادق؟؟؟؟؟؟؟
هناي وبطريقة واضحه اثبت لنا انه شخص غير سوي وغير جادي في الحياة
وشخص بتاع لف ودوران والحمد لله الربنا كفي هنايه شر شخص في مقام هناي
لانه كان حا يطبق فيها كل السيناريوهات الفاشلة والغير سويه .....
الواضح في الموضوع انه هنايه بنت علي نياتها وحبها كان صادق
وهناي كان غير جادي وبلعب بمشاعر بنات الناس والدليل انه اتقدم لصاحبة هنايه
ماعشان يرتبط بيها لكن عشان يغيظ هناية ..يااخي حرام عليك اتق الله في نفسك
هل فكرته انه ممكن يجي واحد يطبق نفس النظريه في اختك زي ماانت طبقتها في هناية وصاحبتها
حاجه مؤسفة جدا ياحبيب الناس انه في بشرية بالعقلاية دي ......
واقول لهناية انتي بنت طيبة والحمدلله الربنا اكفاكي شر هناي وبلاوية
ولو كنت في مكان هناية والله مااتزوجو تاني حتي كان بقي اخر رجل في العالم ....
لان هناي شخص غير امين مع نفسة فكيف يكون امين علي هناية
رحم الله الحب ..............
وكما قال الشاعر
الحب في العصر الحديث كسلعة معروضة في أبشع الأسواق
يتندر العشاق فيه يبعضهم ويقاطـــــعون مكارم الأخــلاق
ويمهدون له بكل عبارة مأخـــوذة من دفــتر الفســـــــــاق
كسروا براءته وطافوا حولها يستهزئون بطهرها المـهراق
وتعلقوا بغناء كل غريقة في لهوها مصبوغة الأشــــــــداق
تبكي وتضحك وهي اكذب ضاحك باك واصدق عابث أفاق
تحياتي حبيب الناس
وحياة سعيدة لي هناي وهناية.........
كيفك حبيب الناس والله الحاجه ده اتفاق بين طرفين ويكونو صريحين في كلامهم ويحددو مصيرهم ويكونو متفقين في التجهيزات والسكن وكل مايلزم مراسم الزواج دون تدخل الاهل لان هذه حياتهم الخاصه بهم ولازم يحلو المشاكل بعيد من العائلتين ولايفكرو السكن عند الاسره لان هذا اكبر غلط للرجل لان بتزيد من المشاكل وفي النهايه طبعا قسمه ونصيب
يا أخوانا ليه نخلي من علاقتنا العاطفية مكان للإمتحانات ، وليه ما نخليها سلسة عشان كل واحد من الطرفين ينال أكبر قدر ممكن من حبيبو وينعم بحب رايق وهادي .
في كتير من الشباب بيضع حبيبو في إختبرات لإثبات الوفاء والإخلاص ، لكين غالبا ما بتفشل لإختلاف الأشخاص وطريقة تفكريهم .
ممكن واحد يختر وحدة بإنو يرسل ليها واحد يحالو إستمالة قلبها عشان يعرف مدى حبها ليهو والكتير بيقع في الغلط ، لإنو ممكن الشخص التاني يقوم يتعلق بالبنت ويحالو بمختلف الطرق إستمالة قلبها وحينجح لأنك في الفترة دي حتكون بعيد عن البت عشان تحقق هدفك السعيت ليهو وتقع الفاس في الراس .
وفي بنات كمان يتحاول إنها تعمل زي هناية زولتا ديك ، وفي البتقوم تبعد وما ترد على الشاب عشان تعرف هل حيفتش عليها ولا لا ؟ وقال المثل البعيد عن العين بعيد عن القلب ، والواحد مننا بيكون محتاج لمواصلة حبيبو ومعرفة إحتياجاتو ومشاركتو مشاعرو وأحاسيسو .
في نوع من الناس لما يقولو ليهو بنحبك بيقول خلاص ده بيحبني ما حيقدر يستغنى عني أبدا ويقوم ينشغل عن حبيبو بمشاغلو ويبعد عنو وهنا يقع في الغلط ويجي زول تاني يقرب من حبيبو أكتر منو ويستميل عوافطو وهو هنا بيكون متأهب عاطفياً . الإنسان بطبيعتو بيحب الإهتمام سواء كان رجل أو إمرأة فلما يلقى إهتمام من شخص أكيد حينحاز ليه .
خلونا نكون سلسين في التعامل وما نفقد حبايبنا الإخترناهم عشان ننعم بالسعادة الننشدها
اذا وجد الحب الحقيقي والنفس الصافية من الخبث لااعتقد ستكون هنالك مشكلة حتي ان وجد الامتحان؟؟
لكن قد يكون هنالك حب صادق واقول صادق جدا من طرف واحد وخلينانقول من طرف البنت مثلا
فهي صادقه في مشاعرها اتجاه الشاب بتتعامل معاهو علي انه هو فارس احلامها وهو الشخص الكانت بتتمناه بينما صاحبنا (الشاب ) شخص يلعب علي الحبلين مافي حاجه اسمها حب في قاموسه
ولكن في حاجه اسمها التلاعب بالمشاعر والخداع والكذب وتنميق الجمل الرنانة وتعدد الاقنعة مع كل فتاة
يكون بوجه اخر .؟؟؟؟؟
من حق الفتاة ان تعرف مصداقية الشخص الذي يريد ان يكون شريك حياتها
وليس بالضرورة ان توصل المعلومه بفهم الشاب لانها بتعمل الكلام البتشوفو منطقي او صاح في نظرها
وعلي الشاب استدراك الموقف والدفاع عن حبه ان كان هو صادق .
فالقلب الصادق لايمكن ان يكره قلبا احبه وقدسه يوما من الايام .
والحياة تجارب سيندم فيها من كذب وخدع من احبة
وسيغني ندمان انا ابدا وحاتك عمري ماعشقت الندم؟؟؟؟
تحياتي
كثير من الشباب إعتادو اللعب بمشاعر البنات وده سبب في تشويه الصورة التانية للشاب المحافظ ، البيكون صادق جدا في إختيارو لمن يقول ليها (بحبك) ، وللأسف النوع ده من الشباب بقى منتشر بصورة غريبة وخيفة جدا ، وهو بيتسر بقناع الطيبة والاخلاق النبيلة وإنو ما بيخادع ولا بيكذب وبيقنع البنت القدامو بإنو ما بيقبل الكذث في طرفها مع إنو هو لو فتحو قلبو حيقوهو أكبر مخادع .
والحال منطبق كمان في البنات البتوهم الشاب بالحب والمصداقية وتجي ترميهو من أبعد هاوية إنتقام من شاب تاني ما قدرت ترد ليهو رميتو ليها .
الحاجات دي مخزية جدا وبتخلي المجتمع متفكك جدا وما عندو مبادىء ، وفي حوادث وشواهد كتيرة بتقول إنو في ناس بينتهزو الفرص عشان يخربو العلاقات النبيلة ويأذوها بشتى الطرق ، تحفيز لنفسو غنو مرغوب فيهو من طرف الجنس الآخر .
وهو عبارة عن مرآة مشروخة ما واضحة ومتسخة بقذارة حجبت صورتو الحقيقية وخلتو عايز وسخ الحولو كلهم .
السناريو كان جميل و الفكرة كانت احمل لاكن القصه بصفه عامة ما عجبتني يعني كانت هناية دي تمتحنوا باي طريقة تانية و هو اكيد يعني الواحد كمان ما بظل علي الذكرى طوال عمرة الدنيا ماشيا ولازم نمشي معاها لانوا لو بقينا في مكانا ما حنتقدم اي خطوة للامام و زي ما بقولوا الفات مات و إنتها يعني انا شايف ردة فعلة عادية جد ممكن اي واحد يعملها اكيد الواحد ما بنسا الحب و خصوصا إذا كان الحب الاول بس إنتهاااااااااااااااااااااااااا ولازم اتقدم
مشكور اخي علي الموضوع الجميل و ارجوا اني اكون خفيف الظل :)))
ناس من كلمة عابةر كل الريد يهون
وناس في الحب تضحي بالعمر والعيون
دي قصة تانية من قصص دنيا الردي البرزخية بتقول حكايتنا الليلة :
لؤي: طالب في كلية الهندسة في الدفعة التانية قسم هندسة مدنية من أسةر متوسطة الحال ساكن حي المسالمة وسط أم درمان زول وسيم ومسبب وقالو كمان صوتو حلو وعندو محاولات غنائية .
قمر : طالبة في كلية الآداب الفرقة الاولى (برلومة طاااازة) من أسرة مرتاحة ومرطبة شديد - أبوها إستشاري في دولة خليجية وما عندو غير قمر حياتو الوحيدة مدللها دلال الأميرات وما بيحرمها من حاجة .
بدت القصة لما كان لؤي واقف قدام صاح البيرجر بينقنق مع العامل (ياعمك زيد الكتشب ده وخت لي شوية جبنة) .
وقفت جنبو بنوتة حلوة وحنكوشة (قمر) وبكل رقة وأنوثة (لو سمحت ممكن تديني ساندويتش بس بدون بيض وشطة) .
لؤي : أسمعني يا مان ما ممكن أبقى أنا السندويتش الحتديهو للبت دي .
العامل : خلاص ما عندك مشكلة - تعال أقطعك نصين عشان احشيك ليها .
قمر : بليس ممكن تكون عندك ذوق شوية .
لؤي : هو فضل ذوق تاني بعد ما ولدوك يا ذوق .
العامل : والله فعلا قمر دي قمة في الذوق .
قمر : ميرسي على ذوقكم - ويلا سوري انا عايزة امشي أديني بليس عشان الجو حار خالص .
لؤي : أبقى ليك أنا مكف إسبلت زاتو .
وبعد مدة
لؤيا ماشي في ممر بين القاعات وعلى غفلة عين يشوف قمر زولتنا .
لؤي : معقولة بس أنا شكلو امي دعت لي من جووووووة قلبها - يا عسل انا بفتش ليك لي كم يوم .
قمر : أهلا بيك - وبتفش فيني لشنو .
لؤي : انا من يوم شفتك في الكفتيريا النوم حماني - وبقيت زي الرايحة مني حاجة .
قمر : بإبتسامة بريئة كده - معقولة للدرجة دي يا .......... قلت لي إسمك منو ؟
لؤي : انا إسمي مجنون قمر بس .
قمر : ضحكة وسنون من لولي لالا بليس بطل مجاملة انت إسمك مين ؟
لؤي : انتي دايره يكون إسمي منو بس وانا حاضر .
قمر : والله إنت زول عجيب خالص اوريجنال تو متش - ريحني دقول لي إسمك .
لؤي : حقول ليك إسمي وأي شي عني بس لو سمحتي أمنحيني الشرف وخليني أعزمك على حاجة باردة .
قمر : خليا مرة تانية معليش .
لؤي : ليه بس كده دمرتي إحساسي انا العزيمة دي بمثابة موت أو حياة بالنسبة لي .
قمر : خلاص أوكي بس على شرط أنا أعزمك على حسابي .
لؤي : معقولة بس نحنا ما عندنا بنات يعزمونا وشرطك على راسي بس دي ثوابت عندي - انا البت البكون ........ لازم أدفع ليها من جيبي وبس .
قمر : البت الشنو بليس .
لؤي : البت الـ الـ الـ ..... البت وخلاص .
قمر : خلاص طالما مصر يلا نمشي عشان تعبت من الوقفة .
وقعدو مع بعض وإتبدالو الكلمات وإتكررت المقابلات وحصلت الإعجابات والتكسرات والحبكانات بين قمر ولؤي .
وزيها وزي أي قصة حب مرت أول أيامها حلوة كلها عذاب وحب وعيون تحكي عن دواخل وأحسايس وكل شي جميل وأحلام نبيلة بالزواج وامنية اللقاء .
وبعد كم شهر كده .
التلفون بيرن .
ألو
أيوة نعم
لؤي مالك ليك كم يوم كده ما بترد على جوالي أنا زعلتك في حاجة .
أهلا يا قمر - لا والله - بس زهجان ومضايق شوية .
ده ما سبب عشان تخليني أقلق عليك قدر ده - إنت عارف أنا ما قاعدة أنوم بسبب عدم ردك علي انا مشتاقة ليك شديد - إنت ما عارف انت بقيت شنو بالنسبة لي - حرام عليك وهاتك يا دموع ونواح .
لؤي : ما تبكي يا حبيبتي - انا والله بس عندي مشكلة كده في ثلبيت عايزأحلها وبعدين اروق .
قمر : طيب ممكن تحكي لي مش يمكن اساعدك .
