نافذة علي الماضي الجميل

[الشمالي]

نواصــــــــــــــــــــــــــــل

اها ياا الحبان اليوم التاني بقينا في حنة ازهري ود عمي الضوء والجماعة اقترحوا تكون الحنة عند ناس الطيب عشان بيتهم قريب من المسجد ونجر لينا سلك من كهرباء المسجد , والاعراس بصورة عامة انذاك مع انها كانت بسيطة لكن كانت مميزة وجميلة جدا وتبداء الافراح قبل الزواج بشهر وتبدا بحنة العريس الاولي في بيت امه ولازم يحننوا اخواتوا وبنات عمو في الحنة الاولي , اليوم داك غسلت عراقي الما خمج داك وكويته بمكوة الجمر وقعدت اتجهز من بدري للحنة والعصر كدة مشينا وصلنا الكهربا معانا واحد اسمو مرغني باقي عندو خبرة بالكهربا وصلنا كشاف كبير , والمغيرب كده شربنا شاي المغرب عند ناس عمي الضوء وبعد العشاء الحنة دورت طبعا قبل الحنة بيتم تحضير وجبة شعيرية مع الشاي وعصير (فراولة ) , وده برنامج بالنسبة لبساطة الناس انذاك فوق التصور الواحد لما ايدوهو كباية الفراولة دي ما يفكوها منو الا جبد يااا زول جيب الكباية الفاضية يقول ليك لسع ما كملتها وهو ما باقي غير يلحسها بلسانو وهاشم النعجة داك ما سك كباية الفراولة وقبال يكملها يفكر في الزيادة ماسك الكباية بيدو اليمين ويدو اليسار ماسك جردل الفراولة ياا هاشم فك الجردل , اقيف النشبع ! تشبع شنو ياا ابراس ماكن , الفراولة ما فيها شبع , وهاشم راسو والف سيف لو كبوا ليهو كباية تاني ما يفك الجردل وبجغمة واحدة شفط الكباية الاولي وملاء التانية , حسبنا الله ونعم الوكيل انضهالة شنو دي ياا هاشم اخوي , وصلاح ده لما ادوهو كبايتو مسكها كده وقعد يبكي ودموعو نزلن جو وقعد يغني (عذابي معااك ) دي ما كانت فراولة دي حالتها بدون تلج موية من الزير للجردل, والعجب العجيب خضر اللبرق ده طبعا اخر قندفة والود عامل فيها ظريف والظرافة دي طبعاً لفت نظر للجكس وكدة ( ناس فاطنة السمحة) خضر ماسك الكباية ويجغم فيها جغمة , الجني كمال بعدو منتظرو عشان يشيل منو الكباية لما انتظارو طال ختف منو الكباية وباقي فيها نص شفط النص وملاء الكباية تاني كاااك اوقال داك نص خضر اداهو ليهو , المهم الجماعة بعد ما شربو الشربات تتوافد صواني الشعيرية والصينية يكون فيها عشرة صحون , ها الزين جيب لناس خالد ديل صحن بجاي , امسك ياا كمال انت والجماعة المعاك وفي لمح البصر بكون الصحن اتغسل وانكوي , اما الشفع الصغار ديل حكايتم حكاية ديل بكملوا الصحن قبال يختوهوا في الواطة يعني بكملوها علي الطائر في الجو , لكن صدقوني كانت اجواء اقرب الي الخرافة والقداسة , ضحكات من الصميم والنفوس نظيفة والضحكة صافية والقلوب ابيض من الحليب والفيها علي اللسان وكل البنات شرفك واخواتك لا نعرف مصلحات العصر الحديث (جكسوية , وحناني , وفردتي , والجو بتاعي , وهلمجراء) كان عندنا فقط مصطلحين وهم ( اختي , وزوجتي) , ما علينا نرجع لجو الحنة وترامس الشاي الجات شايلاها الرضية وفاطنة وخلود وناس امينة شايلات اللقيمات باالجرادل , وفي نقطة مهمة جدا عن التكافل الاجتماعي انذاك اهل العريس ما بخسرو حاجة ايام الحنة , تلقي عليش جاب ليهو جردل لبن وود الماحي شائل ليهوعشرة ورقات شعيرة وكمال جاب ليهو باقة ( جركانة فراولة) ومنو داك جاب سكر والبنات جابت الدقيق والزيت للقيمات وو ووو حتي الحنة ( حنة التاج الممتازة ) بتجي من برة العريس ده بس عليهو يمد كرعينو ويدينو ويتحنن وبس , اها لما اللقيمات والشاي وصلت الــــ .......................................... تعبت والله ناخد استراحة اجبارية واعود ليكم .

[أبو صديق]

الشمّالي يا أصلي حرّم شهيتنا العرس تاني وتالت ورابع
بس الله إستر بعد الهيلمانه دي كلها ماتجي مطره وتفرتق اللمّه الحلوه دي
منتظرنّك علي جمرا تهبّو الريح

أمنياتي يارائع

[محمد نعيم]

الشمّالي يا أصلي حرّم شهيتنا العرس تاني وتالت ورابع
بس الله إستر بعد الهيلمانه دي كلها ماتجي مطره وتفرتق اللمّه الحلوه دي
منتظرنّك علي جمرا تهبّو الريح

أمنياتي يارائع

يا خوي شكل الجماعة مافي شايفك اخدت راحتك تب
يا زول البركة في صديق واخوانو.
الشمالي عرسكم دا طاعم والله منتظرين

[أبو صديق]

يا خوي شكل الجماعة مافي شايفك اخدت راحتك تب
يا زول البركة في صديق واخوانو.
الشمالي عرسكم دا طاعم والله منتظرين

ها ها ها هاااااااااي دي آخر ضحكه بمزااااااااج قبل رمضان
نحنا لمّة الناس والمطره جات وإرمو ليك منديل وجيبو التور
وولعو البخور وكل الطقوس الجميله التي دحرتها كندشة القاعات
وبطاقة الدعوات عوجت مصرانّا ونشّفت لهاتنا..

إنت شغال الكمده بالرمده
مخيّر الله

[الشمالي]

الشمّالي يا أصلي حرّم شهيتنا العرس تاني وتالت ورابع
بس الله إستر بعد الهيلمانه دي كلها ماتجي مطره وتفرتق اللمّه الحلوه دي
منتظرنّك علي جمرا تهبّو الريح

أمنياتي يارائع

هلا بالغالي ابوصديق

مالك دائر تجيب لي هواء مع ام صديق كمان
مثني وثلاث ورباااااااااااع كااااك

لكن صحي مرات كتيرة بتجي المطرة لكن
ما بتفرتق الحنة عندنا ناس سماعين وود النعو
بقوما يخطفوا ليك العريس ده كف ويدخلوه جوه
الصيلون ( الصالون ) ونتم باقي حنتنا
وخليك قريب

[الشمالي]

الشمالي عرسكم دا طاعم والله منتظرين

ايديك العافية ود النعيم وفعلا زمان
الناس ذاتها طاعمة ,
وخليك قريب

[الشمالي]

ها ها ها هاااااااااي دي آخر ضحكه بمزااااااااج قبل رمضان
نحنا لمّة الناس والمطره جات وإرمو ليك منديل وجيبو التور
وولعو البخور وكل الطقوس الجميله التي دحرتها كندشة القاعات
وبطاقة الدعوات عوجت مصرانّا ونشّفت لهاتنا..

إنت شغال الكمده بالرمده
مخيّر الله

الله يقطع الكندشة وكروت الدعوة
وتقريباً طقوس الزواج زمان في السودان
كانت بتتشابه بنسبة كبيرة وكل الشكر

[الشمالي]

عـــــــــــدنا

اها ياا الحبان بعد البنات جابن الشاي بالترامس واللقيمات واي واحد مسك كباتو في يدوا والخير باسط وبدل الكباية تشرب اتنين ولا تلاتة , اها الجماعة بهناك يحنسو في دفع الله عشان يغني باقي الجني ده بجضم الربابة دي جنس تجضيم وصوت حااااني وجميل وندي جنس نداوة ,نداوة بادية سااااكت , بهناك الرضية وفاطنة جابن صحن الحنة والريحة وبداءن يحنن في ازهري وقالت كدة امه واخواته وعماته وخالاته ضربن الزغروووودة ايويويويويويويويويو شقت الحلة علي اتنين والشباب مع الشبعة ديك شغالين ابشر يااا عريس ابشري يااا خالة ابشري هع والواحد يطب ليك العريس من فقرتو وتسمع ابشر هع واركز يااا عريس الواحد لما يعمل ليك وجع فقر , والجو كان قمة في الرووووعة همبريبة محمّلة بنفحات وعبق ذاك الزمان رائحة جميلة مخلوطة بعبق الخريف والدعااااش والبادية وروث البهائم وريحة سعن الموية المشدود فوق الشدرة والموية بااااااردة ممزوجة بريحة القرض باقي السعن لسه عاملينو جديد , الله عليك يااا زمن وما بكون بالغت لو قلت ليك هناك اكثر من عشرين عنقريب (سرير) وكلها مليانة باهل العريس واصحابة وطبعا النسوان بجانب والرجال بجانب اخر , الناس كانت مهذبة بالبديهة , ومع صوت الزغاريد والرواريو (ضرب الكوراك) يجي عليش اب صنقور شائل السوووط وشغال في الجماعة شو بالسوووط , اركز ازوووول وتشوف السوووط يعانق ضهر الجنيد وهو رافعا يدو الي اعلي , رجالة شنو دي البتخلي الضهر ذي الحواشة المحروتة جديد والواحد من الوجع واثر السوط اسبوع ما بقدر ينوم علي ضهروا ,اها بعد الزغاريد ديك والحنه ختوها للعريس قامن البنيات يغنن اغاني الزمن داااك (عريسنا زائر ياا ود القبائل العجبني لي ) ( والشيخ سيرو البريد الشيخ انا بريدو ) طبعا الرقيص والاهتزازات الحديثة دي ما كانت معروفة وغير سائدة قمة الطرب والمتعة تمش ترفع يدك وتشمر العراقي وتبشر فوق العريس وامهاته وتكون سعيد جدا لو جااااك شبال وبراحة تجي تتلازم العنقريب الكنت قاعد فيهو , هاا جنا خلف الله عليك الله املا الكوز من السعن ولا القربة باقي العريس قال عطشااان وخلف الله جري علي القربة وبدا يفتح في القربة وتسمع شووو ده شنو ياا خلف ؟ باقي الجنا كشح نص موية القربة في الواطة تتسود عليك ياا ابراس غليد ,بعد كده الجماعة قالوا خلاص نخلي الجنا دفع الله يغني لينا والشافع في البداية رفض وقال بخجل من البنات , والناس بقوا يحنسو فيهو , بعد شوية البنات قعدن يغنن لدفع الله عشان يغني نظام تشجيع وكده وغنن ليهو ( دفع الله قام ياا سلام خلا الفجة ضلام ياسلااام) الشافع مما سمع البنيات قطعن فوقوا اغنية نجر اخدر قام ترترب ونط فوووق وقعد يبشر اها بعد كده الشافع مسك الربابة ومع ترنتنتنتن وقام يغني ( الفرع الكندابة اوبنا شقاوة العذابة الزينا ) كان تشووووف عليش طار فوووووق ...................................................................

ولنا عووووودة

[محمد نعيم]

الاخ الشمالي عوداً حميداً لهذا الموضوع الرائع

وقول لهيثم تعال انقلو تاني لكن اكتب حقوقنا فيهو
تحياتي

[ام مودة]

الشمّالى المبدع لك التحيه على التميز والابداع لقد اسعدتنا باسلوبك الرائع البسيط

تحياتى واحترامى ليك

[الشمالي]

الاخ الشمالي عوداً حميداً لهذا الموضوع الرائع

وقول لهيثم تعال انقلو تاني لكن اكتب حقوقنا فيهو
تحياتي

صديقي العزيز ود النعيم هلا بيك
اسعدني مرورك جدا

[الشمالي]

الشمّالى المبدع لك التحيه على التميز والابداع لقد اسعدتنا باسلوبك الرائع البسيط

تحياتى واحترامى ليك

الاخت الغالية ام مودة
اسعد الله ايامك وكل
الشكر علي الكلمات
التشجيعية

[الشمالي]

نوااااااااااااصل

بعد كده الشافع(دفع الله) مسك الربابة ومع ترنتنتنتن وقام يغني ( الفرع الكندابة اوبنا شقاوة العذابة الزينا ) كان تشووووف عليش طار فوووووق ذي الصقر تتسود عليك اشي شنو ؟ مركب اجانحين ونزل وسط الحلقة وشالها عرضة صقارية ( واعرض يااا صقر فوقك ود بدر) الجني باقي عراضاً شديد وقام كده شغل الرقيبة واتني لوراء وشغل الرويس تسود عليك يااا عليش اشي رقيبتك دي عدمانها العضم ولا كيف لكن بصراحة الجماعة ديل اكيفو من جنس كيف وقامت كده ام العريس شالتها الهاشمية ومع زغرودة كبيرة قامت تعوم عوم ويااا سلام الوزين بصديرو عااام وهااااك يا شبال لعليش ومع دخول ام العريس عاد الما دخل منو الازيرقاوي وازيرق والسنجك حتي الطيب المجنون خش يعرض وشويتين كده ما تشوف غير العلالة رابطة في السماء ويمين الجنبك ما تشوفو من الغباااار اها بعد الجني انتهي من غنيواتو الجميلة (الفرع الكاندابة) و ( الوزين) و ( الكنداكة ) وغيرها الجماعة قالو نشغل شريط في المسجل باااقي المسجل الوحيد في الحلة حق الجِقر كتر خيرو قدر ما يسمع ليهو في حنة يخطف مسجلو وشوية اشرطة لزوم الحنة وكدة وطبعا مسجل بالحجاااار , المهم الجني شغل شريط لي ابراهيم الكاشف واول اغنية رحلة بين طيات السحاب ) يمين الكاشف ده قبال ما يخش في الكوبليه التاني اكان اسمع ليك صوت زوول اجعر بطول حسو , قام من جنبي ودخل فيني جنس خلعة يااا هسة ما مرقت مني , هااا ناس ده شنو ده ؟ اشرحو لينا وفهمونا الحاصل شنو ؟ الجماعة قالو ده الزين فيمتو الحالة طوااالي بجيهو لما اسمع صوت ابراهيم الكاشف باقي ده فنانو المفضل وبعد شوية الزين ده اتدردق وسط الحلقة في السباتة وخش في حالة غبيوبة اقصد غيبوبة والغريبة عينيهو مفتحات لكن ما بفرز نسأل الله السلامة يااااربي ده يكون ديحالة اذبهلال ولا نازل فوقو دستور رجالي , اها قمت انا الشليق ده قلت النرحم الزول ده من الحال الفيها دي ومشيت علي المسجل بدور اوقفو واريتني ما مشيت لقيت روحي طائر فووووق ومحلق في الهواء وجنبي جاء ابو الرقيع طائر وانا في الهواء كدة قعدت افكر يااااربي انا الجابني فوق شنو ؟ دقشني قطر ولا خبتني لوري عليمو الله ! المهم لمن وصلت الواطة ما وعيت تاني غير القي الجماعة جايبين هبابة بهببو فيني وانا مدد في السباتة (الفرشة) عاينت كده وسالت الجماعة الحاصل شنو ؟ رد لي ود الماحي بتهكم خبتك الزين فيمتو يااا الشقي انت الوداك تقفل المسجل شنو غااااااغ , حسبي الله ونعم الوكيل الزول العاتي السمين ده كان علي شوية مودرني فوق ابراهيم الكاشف سااااكت , المهم انا فهمت انو دي حالتو الطبيعية وما في طريقة يغيرو الشريط الا يحصل ليهو اكتفاء ذاتي من البكاء والتدردق واقلب الشريط بالجنبتين ست مرات و ...................................................................................

كفاية كدة اليوم ونواصل

[omar babikir]

نوااااااااااااصل

بعد كده الشافع(دفع الله) مسك الربابة ومع ترنتنتنتن وقام يغني ( الفرع الكندابة اوبنا شقاوة العذابة الزينا ) كان تشووووف عليش طار فوووووق ذي الصقر تتسود عليك اشي شنو ؟ مركب اجانحين ونزل وسط الحلقة وشالها عرضة صقارية ( واعرض يااا صقر فوقك ود بدر) الجني باقي عراضاً شديد وقام كده شغل الرقيبة واتني لوراء وشغل الرويس تسود عليك يااا عليش اشي رقيبتك دي عدمانها العضم ولا كيف لكن بصراحة الجماعة ديل اكيفو من جنس كيف وقامت كده ام العريس شالتها الهاشمية ومع زغرودة كبيرة قامت تعوم عوم ويااا سلام الوزين بصديرو عااام وهااااك يا شبال لعليش

كفاية كدة اليوم ونواصل

لوحة شعبية اخرى بريشة المبدع الشمالي
الشمالي الحفلة ما جنننتها جن

واصل يا مبدع

[الشمالي]

لوحة شعبية اخرى بريشة المبدع الشمالي
الشمالي الحفلة ما جنننتها جنthumbup.gif

واصل يا مبدع

صديقي العزيز ود بابكر كل الشكر علي المرور والاطراء
الجميل

[مصعب الحداد]

ياسلام على زمان وايام زمان وناس زمان
موضوع روعه والله

برمة ...... زي بعدو

شهيتنا للع.............

يارب اوعدنا

[مرسال الشوق]

الشمالي الظاهر فاتني كتير لكن الحمد لله حصلته
بس سؤال انت فاطمة دي مكسراك انت بس والحله كلها
لانك كل كلمة فاطنة عملت فاطنة لبست توب ورقصت
والرقيبة قزاز ياخي القصة قربت تبقي عن فاطنة بت عمك
اها يلا منتظرنك وقراب بس انت اسرع



يالشمالي فاطنة جاية الحنة بتاعت ود عمك الضؤ

دا كلو كوم ياميرة بس حاجة واحدة داير اعرفه
اللسلس بتاعك دا كبر كدا بتين

[الشمالي]

ياسلام على زمان وايام زمان وناس زمان
موضوع روعه والله

برمة ...... زي بعدو

شهيتنا للع.............

يارب اوعدنا

مشكور ياا غالي وان شاء الله ربنا
يحقق احلامك وينعم عليك بالزوجة
الصالحة والذرية الصالحة

[الشمالي]

دا كلو كوم ياميرة بس حاجة واحدة داير اعرفه
اللسلس بتاعك دا كبر كدا بتين

يطرشني في نظري كان فاهم
حاجة غااااغ

[الشمالي]

نوااااصل

المهم انا فهمت انو الزين فيمتو دي حالتو الطبيعية وما في طريقة يغيرو الشريط الا يحصل ليهو اكتفاء ذاتي من البكاء والتدردق واقلب الشريط بالجنبتين ست مرات وبعد شوية اشوفلك الزين هجد تب مع اغنية الكاشف (عدنا وبينما طال الغياب في رحلة كانت ..... ) وبدا يستغفر ويتوب حتين الجماعة قالوا الزول خلاص الدستور نزل منو ووصل مرحلة الاكتفاء الذاتي , اها الزين اخوي خلاص نوقف المسجل , خلاص وقفوهو , اها طبعا الليل الوكت داك هوَّد تب والنعاس اتجقلبنبو الخيل ونص الجماعة اتراوحوا علي بيوتم ,والناس الباقية قالو جعانين الحاجة ام العريس جابت ليهم قدح فطيرة بي لبن , القدم ده مليااان لبن حليب صااافي والفطيرة دي تسبح بتيه ودلال وسط القدح , وطبعا الاكل ما بي ملاعق , والبياكل بمعلقة ده طوالي بكون في نظر النااااس (مدلع) وود دلع (حنكووووش) بلغة الزمن ده اهم شي لازم تشمر العراقي ده فوووق الضراع وتنزلها علي القدح ذي الكوريق وتنهل من الفطيرة واللبن اكبر قدر ممكن باقي ناس الكدّك العيقة ديل الواحد بشفط القدح في شفطتين , اها الجماعة اتجمعوا حول قداحة الفطيرة وشويتين ما تسمع الا صوت (اللغف) شييط شييط شييط ترزي وبفصل في قماش غاااااااغ بعد دقيقة وتلاتين ثانية القداحة ( الصحون) اتلحست واتغسلت واتكوت وطبعا العريس ده ما بضيعوهو امو بتجيب لي كورية ام قعر كان بتعرفوها يستلذ بها لوحده وممكن يخلي فيها كمان باقي ودي دائما بتكون من نصيب الزبير ابلغوفة تلقاهو بعد يكمل القدح مع الجماعة عينو علي كورية العريس نسأل الله السلامة من اللقافة واللغف كااااك ,بعد كدة بكون ختام ليلة الحنة وباقي الجماعة اي واحد يشوف ليهو اقرب عنقريب او هباب جنبو ويتمدد عليهو والهباب ده عنقريب صغير جدا (جني عنقريب) غاااغ لما تتمدد عليهو بكون كرعينك في الواطة , اها والما بلقي عنقريب بمشي علي السباتة واتمدد مع باقي الشلة , طبعا مخدة ومرتبة وملاية معظم الجماعة بكون ما عندهم الواحد يلتحف الارض واتوسد يدو واتكور تحت جلابيتو او العراقي وسبحان الله الواحد ينوم هنئياً قرير العين وكمان يحلم احلام سعيدة , وما تسمع الا صوت الانفاس والشخير وفي ذي لقمان ده عندو جنس شخري شييييط غييييغ غاااااااا امبوووووح كركرك ياربي مصيبة شنو الوقعت فيها انا دي باقي انا جني وجن الشخير بعد لقمان يعزف السيمفونية بتاعتو يرد ليهو بهناك عوض العوقة بسيمفونية اخري ومعاها رمية غاااااااااغ خاخاخاخاخخا نها , ياربي نها دي منو ؟ دي شخرة ولا الزول ده بنادي لنها ولا الحاااصل شنو ؟ المهم انا هنا النوم طار من عيني وسهر الجداد ولا نومو وبقيت اتفرج في خلق الله ديل الواحد نائم شلوووووت لكنهم نائمون باطمئنان غير طبيعي , شويتين كدي اشوف لي واحد من ناس السباتة شغال اتدردق واتقلب وسدر سااااكت وزحف ببطنو وضرب الخلا ياربي الزول ده صاحي ولا مستهبل ولا نائم الزول بقي دبيب وزحف فاااات , قمت جريت كان القي ليك ده عكود الزول اتاريهو بحلم وعااادي لما يكون راقد في العنقريب يقع ويدق الدلجة برويسو والزول من التوقع الكتير راسو بقي كلو تضاريس منخفضات ومرتفعات واشكال هندسية دوائر ومربعات , بعد شوية الزول قام علي حيلو وسدر فااات هنا انا عرفت الزول اكيد حلمان ومشيت عليهو جري مسكتو من عراقيهو وصحيتو والزول من فتح خشمو قعد يصرخ ويكورك بطول حسو الجماعة صحو ولقوني ماسك الزول وجايبو من قريب جنينة العبد , هنا الجماعة كوركو بصوت واحد (تااااني يااا عكوة ) اها انا قمت سألتهم التاني شنو يااا جماعة رد لي الطيب قال الزول ده كل يوم حمار النوم شائلو ومر جابو من نص الترعة , يعني الشغلة بعد ما شخري جابت ليها حمار نوم نسأل الله السلامة , طيب الحل شنو ؟ قام رد الجقر قال الزول ده امو في البيت بتربطو علي العنقريب , وفعلا ربطنا الزول في العنقريب وانا ما قدرت انوم الا قريب الصباح , والصباح الناس دي قامت تقول الواحد قائم من تُرب مغبرين والجلاليب اخذت لون الارض ومع تفتيحة عيونا لقينا الشاي واللقيمات ديل قدامنا ضربناهم وهنا سالت عليش اها الليلة عندك شنو قال الليلة عندي سريقة دائر ابنيها وماشي اشرك للقمري والقطا قلت ليهو خلاص انا معاك و ...................
واستراحة واعود