الفيفا تتدخل فى قضيه الموسم

[hanody]

ميشو .. فعلتها أيها الثعلب !

[hanody]

يوم الاثنين قبل الماضي( 9 اغسطس الجاري) كان مدرب الهلال الصربي ميشو ضيفا علينا في قوون حيث تابع مباراة الاتحاد و النصر الليبيين في كأس السوبر الليبي من داخل مباني الصحيفه .. رصد ميشو الاتحاد بالورقه و القلم و كان دائم السؤال عن لاعبي الاتحاد و


سجل الكثير الكثير من الملاحظات .. قال ميشو ان أكثر ما لفت انتباهه في فريق الاتحاد هو التركيز علي اللعب بالأطراف حيث يبني 80% من هجماته عن طريق جانبي الملعب ثم ارسال كرات عرضيه عالية مستغلا الطول الفارع و التميز في الألعاب الهوائية لكل من احمد الزوي (18) و محمد زعبيه (27) كما ذكر ميشو بأن هنالك ثغرة في وسط ملعب الاتحاد تتمثل في وجود لاعب ارتكاز و حيد و هو عبدالناصر صليل بالرقم 18 مما يخلق فراغا كبيرا في وسط الفريق عند التقدم للهجوم بالاضافه الي بطء الدفاع الليبي متمثلا في الثنائي يونس الشيباني وحميد بوجار. اذن كيف بني ميشو خطته لمواجهة الاتحاد علي ضوء هذه المعطيات ؟

اولا ركز ميشو علي قفل الطريق في الاطراف لايقاف البناء الهجومي للاتحاد و ذلك بوضع خليفه لمساندة بوي علي الطرف الأيسر و علاء الدين لمساندة يوسف علي الطرف الايمن بالاضافه الي الاعتماد في خط الدفاع علي لاعبين طوال القامه يجيدون الضربات الرأسيه و هم سامي ومساوي و بوي و قد كان مساوي أبرزهم تألقا و أبعد الكثير من الكرات الهوائيه فيما تفرغ عمر بخيت للعمق و الضغط علي مستوي دائرة السنتر فأصبح البرنس حرا طليقا فأبدع ورفد المهاجمين بالتمريرات القاتلة.

و عند الهجوم يتقدم احد اللاعبين خليفه أو علاء الدين ( خاصة خليفه لسرعته في الاختراق) الي جانب هيثم , كاريكا و سادومبا و قد ظهر هذا بوضوح في التسديدة التى ردها القائم من خليفه في الشوط الأول.

و في الشوط الثاني و بعد دخول بشة بديلا لسادومبا تحول بشة للناحية اليمني مع يوسف محمد و دخل علاء الدين الي العمق لمساندة عمر و ثنائي قلب الدفاع مساوي و سامي ثم استعان ميشو بمهند بديلا لخليفه للاستفادة من الفراغات الكبيره التى ظهرت في دفاع الاتحاد نتيجة الاندفاع الهجومي و اتيحت للاعبي الهلال فرص بالجمله كان يمكن أن تنهي المباراه باكثر من أربعة أهداف. نجح ميشو في اختبار الاتحاد و اقتنص للهلال فوزه الثاني أفريقيا علي التوالي خارج الأرض و قد كان مفتاح النجاح هو دراسة الخصم و معرفة كل صغيرة و كبيرة عنه و هو امر يجهله كثير من المدربين .. برافو ميشو.

[hanody]

[align=center]لَوْ دِي كُورَتْكُمْ... جُوعُوا سَاكِتْ[/align]

{افضل تسمية لفريق المريخ الحالي هو ان نطلق عليه فريق (النازحين)...فريق فيه 7 اجانب.

{الكوتشينة فيها 8 شوايب.

{هسع ناس مرابط ومهدي بن ضيف الله ورمزي فرقهم شنو من (الشوايب).

{حالتها دي (كاسروكا) ما حسبنا ليكم.

{اربعة جنسوهم ...وثلاثة محترفين.

{دا غير الراحوا ..ايداهور وكلتشي والنونو واليجا تانا وباولو و...و...و..

{انت المريخ دا كان فيه لاعب اسمو (جلبكو).

{صومالي وإلا كمروني ...ما عارف.

{اصلو أي اسم تقطعو من رأسك ...تلقاه كان بيلعب في المريخ.

{شاروغا ...ساندروا ...كولوتك ...الدافي.

{انت هسع المريخ ذنبو شنو؟.

{الهلال غالب الاتحاد الليبي في طرابلس ومتصدر مجموعته في داعي تدخل المريخ في الموضوع.

{تدخل المريخ ...تقوم تقول لينا (الطابق التاني).

{ولو جبت سيرة الطابق التاني ...بتقول لينا جمال الوالي (اتنحي).

{انا انا في التنحي ديمة هديلي ساجع ...ما لقيت لي مغيث وما لقيت لي مراجع.

{تستاهل يا جمال الوالي ..في زول بشتغل مع ناس (همد)..وقريش.

{قريش دا هسع غير (البيانات) بيعمل شنو؟.

{البيانات دي عندنا في الهلال ...(برجاس) بطلعها.

{برجاس هسع ذنبو شنو؟.

{خلونا هسع في كورة الهلال.

{انتوا عارفين المريخ دا الاتحاد في (مدني) ما قدر يغلبو...نحن الاتحاد دا في (طرالبس) غلبناه.

{هيع.

{دي يشرحوها ليكم كيف يا ناس المريخ.

{ما بتفهموها لينا بالساهل.

{جبنا هدفين في الاتحاد ...قون جابو هيثم مصطفي من (ضربة جزاء) وقون جابو محمد احمد بشة من (ضربة رأسية).

{صعبة دي كمان.

{نحن بنتلفت.

{نحن صعبين.

{حالتنا (جيعانين).

{هيع.

{انا خايف جمال الوالي يقول لعبدالله حسن عيسي ...جوعوا ناس بلة جابر ديل.

{الجماعة ديل لو ما جاعوا ما بيلعبوا.

{اصلوا أي حاجة نحن نعملها ناس المريخ بعملوها.

{يا ضلنا.

{قالوا ليك هيثم مصطفي حفظه الله ورعاه ..لو قال عندي (وجع ضرس) ساكت ...اليوم والتاني فيصل العجب بشكي من (ضرسو).

{هسع ضرس العجب ذنبو شنو؟.

{براكم يا ناس الهلال بتفتشوا للمشاكل.

{انتوا عارفين ناس المريخ ديل بفتشوا ليهم 4 سنوات عن زول بقلب (الهوبة).

{فتشوا البلد فتيش.

{جنسوا وسجلوا ..برضو ما لقوا ليهم زول يقلب ليهم (الهوبة).

{اخر حاجة في (انطوان) صعب...قال ليهم انا بلقي ليكم زول بيأكل (الديوك) نية.

{جاب ليهم زول اكل ليه (ديك) ني في مطار الخرطوم.

{رجعتونا لجدودنا القدماء.

{كمان عاوزين تبقوا (سحاحير) يا ناس المريخ.

{انت موضوع اكل (الديك) ني ...مالك خليتو.

{بقيت ما بتجيب ليه سيرة.

{اخير نكون جيعانين من نأكل (الجداد) ني.

{والله يا هيثم مصطفي البشوفك تقسم في الكورة زي (المرارة) ما يقول الزول دا طلع ليه بيان قبل اسبوع بشكي فيه من الجوع والعوز.

{العوز هسع ذنبو شنو؟.

{يمين بالله هيثم مصطفي دا كان تقول بالع اوركسترا الاذاعة.

{قول ما شاءالله ...مذيع المباراة خلي الكورة وقعد يتغزل في العاب هيثم مصطفي.

{المذيع تقول كان بسمع في (كاظم الساهر).

{حاجة ما بتتخيل.

{حاجة ما بتتصور.

{لو دي كورتكم يا ناس الهلال ...كل مرة يا هيثم مصطفي طلع ليك (بيان).

{نحن نطلع في البيانات وهم يطلعوا في (الجنسيات).

{خلاص عاوز تمسك لينا موضوع (الجنسيات) لبانة.

{قالوا ليك (مهدي بن ضيف الله) ثبتوه في نقطة مرور في شارع مدني الخرطوم.

{نظام الولد سوداني بسافر مدني كل خميس.

{بتاع المرور قال لي مهدي بن ضيف الله : جنسيتك شنو؟.

{مهدي قال ليه : سوداني.

{يعني إلا يشلخو ليك.

{بتاع المرور قال ليه انا اول مرة اشوف لي سوداني بقول : (برشة).

{موسي الزومة ذاتو بقي يقول (برشة).

{طارق مختار برضو ...انتوا ما شفتوا (انبراشة) طارق في النيجر.

{طارق مختار دا مفروض يعسكروا بيه في (المعاقيل).

{انبراشة الزول (الشبعان) شينة طبعا.

{زي مزلقانية اكرم الهادي سليم ...وقت سادومبا جاب فيه قون.

{سادومبا جاب فيه قون وجاب ليه (الحصوة).

{نرجع لبتاع المرور.

{بتاع المرور قال ليه : يا مهدي عاصمة السودان شنو؟.

{عارفين مهدي قال شنو؟.

{مهدي قال ليه عاصمة السودان (قبرص).

{قبرص في عينك ..شايفنا نحن بنقع في البحر.

{عليك الله يا مهدي بن ضيف الله ...شايفنا نحن (متقبرصين) عشان تقول عاصمة السودان (قبرص).

{هسع في واحد (قبرص) هنو؟.

{زمان كنت فاكر أي زول لابس ليه (طاقية) هو قبرصي.

{ما عارف الاعتقاد دا جاني من وين؟.

{دي فكرة طائشة كدا...زي ما تقول اعتقاد كدا.

{اعتقاد في عينك.

{قالوا ليك واحد مشي للدكتور يشكي ..يا دكتور انا ما بنوم الليل ..يا دكتور انا ما بشوف ..يا دكتور انا ما باكل.

{الدكتور وقت سمعوا يقول : انا ما باكل ...قال ليه : يعني الواحد يأخذ راحتو علي الاخر.

{الدكتور فتح (الدرج) وطلع ليه (فرخة)...وقعد يضرب فيها.

{زولكم العيان خمش ليك (الفرخة)...وقال للدكتور انا صحيح ما باكل ...لكن ما باكل شنو؟.

{انا ما باكل (الفول والبامية)...لكن الفراخ دي حقيقة ما جربت اني وقت اكون عيان باكلها وإلا ما باكلها ...عشان التجربة دي ما مرت علي قبل كدا.

{انت تعال هنا (البامية)...البامية ..ذنبها شنو؟.

{نرجع لي مهدي بن ضيف الله.

{انت جنسيتك دي طلعتها من (كافتريا).

{قادر الله.

{كلتشي (حننوا) للعرس وطلعوا ليه (جنسية).

{الحنة طلعت ...والجنسية طلعت.

{كلتشي شطبوه.

{قودوين هسع في المريخ مدور زي (اس الشيرية).

{كلتشي المريخ انتهي منو.

{خلوا الموضوع دا.

{احكي ليكم قصة من (الخيال) العلمي.

{قصة زي مسلسلات رمضان دا.

[hanody]

مسلسلات رمضان السنة من (البوخة)...البرنامج من المسلسل ما بتعرفو.

{اقول ليكم حاجة غريبة.

{المسلسل من الاعلانات ما بتعرف.

{الاعلان والمسلسل واحد.

{كلو زي بعض.

{حاجات بايخة بشكل.

{انتصار مرة في برنامج ومرة في مسلسل.

{انتصار دي منو؟.

{ممثلة مصرية.

{يعني ح تكون ممثلة هندية.

{هسع الهنود ذنبهم شنو؟.

{احكي ليكم القصة.

{قالوا ليك بلة جابر وموسي الزومة ووارغو و محمد كمال ورمزي صالح مرة كانوا في معسكر خارجي.

{نظام شنو؟.

{نظام المريخ عندو معسكر في الخارج.

{انا ما عارف انتوا تعبانين كدا ليه للوصافة.

{يا جماعة (الوصافة) دي ما محتاجة لكل هذه المعسكرات.

{ما محتاجة للصرف دا كلو.

{ناس الموردة والخرطوم وحي العرب ...لو عسكرتوا ليهم في (سوبا) بتتغلبوا عليهم.

{الموضوع ما بستاهل.

{الحكام ممكن يحسموا ليكم موضوع (الوصافة) دي.

{المهم بلة جابر وموسي الزومة ووارغو ومحمد كمال ورمزي صالح كانوا في معسكر خارجي.

{الساعة 3 صباحا ..بلة جابر سمع ليه (كركبة) في المطبخ.

{كركبة ما طبيعية.

{اول حاجة بلة جابر عمل فيها ما سامع...حاول يطارش (الكركبة).

{لكن خاف علي (موبايلو).

{بلة جابر صحي موسي الزومة وقال ليه : قوم شوف الحاصل شنو؟...ورجع نام تاني.

{النوم طار من عين موسي الزومة.

{موسي الزومة ما عرف يتصرف كيف؟.

{حاول يضاير ...لكن برضو ما قدر.

{اخر حاجة ..قال احسن اصحي (وارغو) عشان يشوف الحاصل شنو؟.

{الموضوع دا احسن يتصرف فيه (وارغو) بي طريقتو.

{يمكن (الكركبة) دي تكون (نيجيرية).

{زول قابض ليه 5 مليون دولار ..وكمان ما يشوف لينا الحاصل شنو في المعسكر.

{اصلو نحن في الملعب قنعنا من خير فيه....ما قادرين نستفيد منو أي حاجة.

{وارغو قام يتنفض متل (الدو) البفكوا في اخر اللعب.

{انا اول مرة اشوف لي (دو) بتلفت.

{(دو) هو وإلا عربية باسطة.

{وارغو اول حاجة قعد يعاين في كرعينو.

{تاني حاجة ربط (الكدارة).

{الكدارة عيشتها تطير.

{موسي الزومة قال ليه : يا زول امشي شوف الحاصل شنو ؟....انت عاوز تسدد ليك (ضربة جزاء).

{وارغو اتذكر (الكشافات)..اطفوش.

{رجع نام.

{موسي الزومة قنع من (وارغو)..قال احسن ادرع الحكاية في (محمد كمال).

{يا محمد ...يا محمد ...انت (حارس) شنو؟...قوم شوف (الكركبة) دي من شنو.

{محمد كمال قال ليهم : يمكن دا (كاريكا).

{كاريكا هسع ذنبو شنو؟.

{كاريكا عامل ليكم (حول) يا المريخاب.

{محمد كمال عاوز يقوم اتذكر ...(الفدائي).

{رجع طوالي ...قال نحن وقت عندنا (مناضل) تعبانين علي شنو؟.

{الشغل دا شغل (مناضلين).

{الكركبة دي ما ادونا ليها في (التمرين).

{يا رمزي ...يا مناضل ...يا فدائي ...قوم شوف الحاصل شنو؟.

{رمزي قام ..قال ليهم زحوا لي منها ...انا ممكن (افجر) نفسي عديل.

{انا ما بسكت ..انا ما بتراجع ..انا صعب ..انا الاسد النتر ...انا مناضل.

{لكن وروني في شنو يا جماعة؟.

{محمد كمال قال ليه في (كركبة) في المطبخ.

{كركبة بسيطة كدا ...ما محتاجة ليها لي (نضال) كبير.

{شوية (فدائية) ممكن تحسمها لينا.

{رمزي صالح قال ليهم انا (النضال) كمان بوصوني عليه..انا زول فدائي ...ممكن افجر نفسي عديل.

{انا صعب..انا خطير ..انا مناضل.

{رمزي صالح ...اتراجع شوية وقت سمع صوت (الكركبة) في تصاعد مستمر.

{بيني وبينكم (الكركبة) كانت قوية ...الكركبة دي ناس رمزي صالح ما بقدروا عليها ...الكركبة دي عاوزة المعز محجوب.

{رمزي اتلفت هنا ...واتلفت هناك ..وقال ليهم : جيبوا لي (مدرب اللياقة).

{جابوا ليه مدرب اللياقة.

{غايتو يا رمزي نضالك دا طلع أي كلام.

{والله (نضالك) دا اخير منو (حصوة) اكرم.

{انتوا بتناضلوا في (الجرايد) وإلا شنو؟.

{نضالكم دا طلع في (الاعمدة) الصحفية فقط.

{رمزي اتقدم شوية ومعاه مدرب اللياقة ... قام اتراجع تاني.

{قال ليهم قبل ما اقتحم (المطبخ) وانفذ العملية ..جيبوا لي (مدرب الحراس).

{الكركبة دي فيها (زيادة).

{يا ود الناس (كركبة) هي وإلا فيضان؟.

{جابوا ليه (مدرب الحراس).

{رمزي صالح اتقدم خطوة ... شعر بي رجفة ...شعر بي (خوفة)..اتراجع تاني.

{قال ليهم جيبوا لي (مساعد المدرب).

{الموضوع كبر اوي...مدرب اللياقة ومدرب الحراس براهم ما بعملوا حاجة.

{المشكلة (الكركبة) كانت في تصاعد مستمر.

{اكرم عرفها ...اتخارج من بدري.

{اخير ليه (الحصوة) من التلتلة دي.

{انت يا رمزي (فدائيتك) دي كانت في (الكبد والكلاوي).

{كانت في شنو؟.

{المعسكر كلو كان منتظر (رمزي صالح) يقتحم.

{ورمزي صالح كل مرة يقول ليهم جيبوا لي زول.

{لمن الموضوع وصل للاستعانة بي (رئيس البعثة).

{ما في زول قادر يقتحم.

{رئيس البعثة قرب يعمل ليه (مؤتمر صحفي).

{في واحد قال ليهم الكركبة دي يكون وراها ناس الهلال.

{الكركبة دي كركبة ما طبيعية.

{كركبة ما اعتيادية.

{كركبة مخيفة.

{اخر حاجة ..رمزي صالح قال ليهم : رغم الطواريء هنا كم.

{في السودان تلات تسعات ...هناك كان تلات اربعات.

{ضربوا التلات اربعات.

{عارفين ناس الطواريء لقوا (الكركبة) من شنو؟.

{لقوا (الكركبة) من (كديس).

{رمزي صالح قال ليهم : والله لو كنت عارفها (كديس) ما كان اترددت ...كنت اقتحمت المطبخ ...وكان ناس الهلال فهموا حاجة.

{هسع ناس الهلال ذنبهم شنو؟.

{نرجع للمباراة ..كلو مرة تتطلعونا منها.

{الهلال غلب الاتحاد في بلده ...رغم ان الاتحاد الليبي 6 سنوات ما اتغلب في بلده حسب ما جاء في صحف الامس.

{يعني الجماعة ديل نحن (قبرناهم) في ملعبهم.

{الاتحاد الليبي في هذا الموسم كان قد انتصر علي الاهلي المصري في طرابلس 2- صفر.

{وكان الاتحاد قريبا من الضربات الترجيحية لولا ان الاهلي سجل هدفه الثالث في اخر ثواني المباراة.

{ما نريد ان نقوله هو ان الاتحاد الليبي من الاندية التي تمتلك قوة اضافية عندما تلعب علي ارضها.

{نحن رأينا كيف تعامل الهلال والجهاز الفني مع الاتحاد وهو يلعب علي ارضه.

{اظن من ناحية فنية ان الهلال لعب ببرود رغم المخالفات العديدة والكثيرة التي منحها الحكم لاصحاب الارض علي رأس خط 18 الهلال.

{بل ان الحكم اعطي الفريق الليبي ضربة غير مباشرة جاء منها هدف التعادل للاتحاد بعد ان كان الهلال متقدما بهدف.

{برود لاعبي الهلال وتعاملهم مع المباراة باريحية وتصالح ساعدهم في فرض اسلوبهم علي فريق الاتحاد رغم ان الاخير كان يمارس ضغطا كبيرا علي الهلال واستطاع أن يصل لمنطقة الهلال دون ان يكل خطورة حقيقية.

{مع ذلك كان هناك برود كبير عند لاعبي الهلال وان كان حكم المباراة البنيني شكل ضغط اخر علي الهلال.

{لكن الهلال لعب المباراة باستراتيجية باردة وبوعي تكتيكي ..بل ان فرص الهلال كانت الافضل وكان لاعبي الهلال اقرب للتسجيل.

{الشي الاخر الذي كان واضح عند لاعبي الهلال هو الاصرار والعزيمة التي استطاعت ان تتغلب علي كل الظروف.

{لاعبو الهلال نزلوا ارض الملعب لينتصروا وقد كان لهم ذلك.

{سجل الهلال هدفه الاول من ضربة جزاء ثم اغلق المنافذ علي الفريق الليبي ولولا مساعدة الحكم البنيني للفريق الليبي لما عرف الاتحاد طريقا للوصل لمرمي الهلال.

{الهلال رد بعد اقل من 120 ثانية وسجل محمد احمد بشة هدف رأسي جميل من عكسية مدثر كاريكا.

{مثلما كان هدف هيثم مصطفي في وقت عصيب وبعد توقف المباراة لمدة 5 دقائق كان هدف بشة لوحة فنية اخري.

{البرنس سدد ضربة الجزاء بهدوء يحسد عليه رغم التشنجات والاحداث العصيبة التي سيطرت علي المباراة.

{الغالب ان ضربة الجزاء التي تنفذ بعد وقت من احتسابها تشتت عقلية المنفذ وتجعل تسديدته طائشة.

{لكن هيثم مصطفي كان مركزا ...سدد ضربة الجزاء بعد ان وضع الكرة في ناحية وحارس المرمي في ناحية.

{واعتقد ان جمهور الاتحاد الليبي كان في ناحية ثالثة خالص.

{ضربة الجزاء التي سددها هيثم مصطفي تمثلت فيها روح القيادة والابداع والاختلاق عند سيدا.

{لا بد من القول ان هيثم مصطفي قدم افضل مبارياته مع الهلال في الفترة الاخيرة

[hanody]

{لعب هيثم مصطفي مباراة اقل ما يمكن ان يوصف به هيثم في هذه المباراة ان البرنس قدم كل الدورس والعبر.

{هذا الذي قدمه هيثم مصطفي في تلك المباراة كان عبارة عن خلاصة الفن وسلافته.

{كان كل الابداع.

{تمريرات (سيريالية) هذا اقل ما يمكن ان توصف بها تمريرات هيثم مصطفي.

{هيثم مصطفي يضع أي لاعب في المقدمة الهلالية وجه لوجه امام حارس المرمي.

{تمريراته تتجاوز كل العوارض والحواجز ...وتجعلك امام القون.

{مدثر كاريكا اكثر من مرة وجد نفسه امام الشبكة وكذلك سادومبا وبكري المدينة.

{حتي محمد احمد بشة وجد نفسه امام القون.

{تمريرة هيثم مصطفي يا قون يا قون.

{ما عندها خيار ثاني.

{هدف بشة الثاني للهلال كان رد عملي لظلم التحكيم.

{ناس الهلال بعد ان سجل الاتحاد الليبي هدف التعادل شالوا الكورة وجابوها قون.

{ناس الهلال ما شالوا الكورة لنص الملعب ...ناس الهلال شالوا الكورة وجابوها قون.

{هيع.

{تاني نعمل ليكم شنو؟.

{في اقناع اكتر من كدا.

{في منطق اكتر من دا.

{بشة سجل علي طريقة نمشي (الفيفا).

{هدف هيثم مصطفي من ضربة جزاء كان علي طريقة صلاح ادريس نمشي للتحكيمية.

{لكن هدف بشة كان هدف (فيفياني) عديل.

{انت مالك يا ود الناس عاوز تذكرني بي (افياني).

{انتوا ليبيا دي موش البيلعب فيها احمد الباشا وافياني وايفوسا.

{نحن مشينا غلينا هناك ...عشان احمد الباشا يفهم حاجة.

{والله يا الباشا نحن نتلحك في أي حتة نلاقحك.

{في ليبيا ما بنسيبك.

{نحن خطرين...نحن صعبين.

{نحن ما في زول بلحقنا.

{سبعة اجانب وتلبعوا لي في دورة ودية.

{هسع دي عاوزة ليها 7 اجانب.

{كان تمشوا الامارات بي ناس سعيد السعودي ...الموضوع ما بستاهل.

{نرجع الي محمد احمد بشة ونقول ان هذا اللاعب ظل في تتطور مستمر ...وهو في تقدم دائما واصبح من مباراة الي اخري يظهر بصورة افضل من الصورة التي كانت في المباراة السابقة.

{بشة غير كل هذا ظل يسجل بصورة مستمرة مع الهلال ولو راجعنا معدل اهدافه مع الهلال سوف نجده ينافس أي مهاجم.

{الاروع من كل هذا ان محمد احمد بشة يسجل اهداف صعبة ويملك ان يضع الحل عندما تتقفل علي الهلال.

{محمد احمد بشة يحتاج الي تكريم خاصة ...فما يقدمه هذا اللاعب جدير بالتقدير والاحترام.

{من الواجب ان نقول لمحمد احمد بشة (شكرا) علي هذه الروائع التي تقدمها.

{اللاعب الاخر الذي يستحق التكريم هو اللاعب عمر بخيت الذي يحكي في الهلال كل الاخلاص والالتزام.

{عمر بخيت يقوم بادور في الهلال غير محسوسة ...وادوار لا يشعر بها احد.

{عمر بخيت فعلا هو الرجل الخفي في الهلال.

{كذلك لا بد من القول ان اللاعب المعز محجوب تقدم كثيرا واصبح اكثر خبرة.

{المعز محجوب لاعب تشعر بحبه الكبير للهلال ...وهو كأنه جاء ليقدم لنا الفرق بين الهلال والاخرين.

{لاعب يشعرك بالامان وهو يقف في خشبات الهلال.

{المعز تحس انه اصبح اكثر استقرارا واكثر هدوء وينتظر من المعز محجوب الكثير في الفترة القادمة.

{فريق يحرس مرماه المعز محجوب جدير بالفوز بالبطولة الكونفدرالية.

{الكونفدرالية دي نحن ما بتتبلع لينا ...لكن برضو ح نجيبها.

{نحن أي حاجة عندنا بي نظام.

{هسع النظام الدخلو هنا شنو؟.

{بس عاوز ليك سبب.

{يوسف محمد عاد كما نريد ونشتهي...

{ماشاءالله ...عشان الهلال نيتو (بيضاء) يوسف محمد رجع اخطر من الاول.

{تقول ما كان مصاب.

{كل الذين جاءوا مع يوسف محمد انتهي عمرهم في الملاعب السودانية وباعدت الاصابة بينهم والمواصلة.

{عدا يوسف محمد الذي عاد اخطر.

{علاءالدين يوسف صاحب (البصمة) الشهيرة ...هو الاخر جمل الهلال واضاف اليه الكثير.

{ما يقال عن هذه المجموعة هو انها تستحق الفوز ببطولة خارجية لاسيما وانهم جميعا يتشبعون بحب الهلال وفيهم من الاحترافية الكثير.

{نجم مباراة الهلال والاتحاد ورجل المباراة الاول هو اللاعب هيثم مصطفي الذي قدم اجمل مبارياته مع الهلال في الفترة الاخيرة.

{يا ربي مامون ابوشيبة بقول شنو؟.

{يا ابوشيبة لو عاوز ترتاح اعمل العملوه ناس حمودة بشير وعلاءالدين يوسف.

{انتوا طمبل وين؟.

{كل ما اقرأ لي خبر عن طمبل ..القي الخبر بقول وقد قام اللاعب هيثم طمبل باجراء تمارين منفصلة.

{انت لمتين عاوز تجري تمارين (منفصلة).

{يا طمبل ان عقدك مع المريخ كلو عاوز تقضي تمارين منفصلة.

{الجماعة ديل بتلعب معاهم متين.

{فيصل العجب عاوز يعتزل بعد كدا وانت الي الان بتجري حول الملعب.

{نرجع للمباراة ونقول ان اللاعب سيف الدين مساوي قدم هو الاخر اجمل مبارياته مع الهلال وشارك اللاعب هيثم مصطفي نجومية المباراة.

{بعد مساوي يمكن ان نقول ان اللاعب الذي اجاد واحسن هو اللاعب مدثر كاريكا.

{كاريكا بهذا المستوي الثابت والرائع يمكن ان يكون نجما للموسم اذا واصل بهذه الاجادة.

{اللاعب الاخر الذي يجب ان نتوقف عنده هو اللاعب عبداللطيف سعيد.

{بويا في اول مباراة رمسية افريقية له مع الهلال احسن واجاد بصورة لم نعدها في مشاركات النجوم الاولية.

{هذا اللاعب لو ترك المخالفات الكثيرة التي يتسبب فيها يمكن ان يعيد للطرف الشمال هيبته ..ويمكن يرجع تاني زمان منصور بشير تنقا ...ومحمد حمدان.

{علي العموم هذه المباراة جعلتنا نقول ان الهلال ضرب موعدا مع النهائي وبالتخطيط السليم والاحترافية العالية يمكن ان شاءالله ان يفوز الهلال بكأس الكونفدرالية.

{لكن دعونا نقول الكلام دا بدري عليه..وما عاوزين نتكلم كثير عن البطولة.

{السنة دي عاوزين ننظر الي المباراة القدامنا ...وما سوف يأتي بعد ذلك سسوف نتركه للايام.

{فقط نحتاج لمجلس ادارة يكون جدير بالفوز باول بطولة خارجية قارية للهلال.

{المجلس القادم هو مجلس سعيد بالجد ..سوف يورث فريق عظيم وبطولة قريبة جدا.

{يلا يا هلالاب خططوا صاح.

{وقولوا يا رب.

{ملحوظة : ما تشربونا.

هوامش

{قالوا ليك طارق مختار في الامارات وقع مع هدف بشة الثاني.

{الهلال يحتاج الي مجلس ادارة عاجل.

{مجلس ادارة لله.

{هيثم مصطفي مفروض تاني يطلع ليه (بيان).

{كل ما هيثم يطلع ليه (بيان) نحن بنمشي لي قدام.

{الهلال لعب امام الاتحاد باسدومبا ويوسف محمد فقط.

{انتوا اجانبكم ديل يا ناس المريخ إلا تعملوا بيهم (فندق).

{خليتوا لينا (الدولار) يرتفع.

{الدولار وصل السماء.

{فريق النازحين بحق وحقيقة.

{نذكر ان المريخ عندما تعادل مع الاتحاد في ليبيا ..ناس المريخ احتفلوا وابتهجوا وعملوا ليهم (كرامات).

{نحن غلبنا عديل.

{والله البشوف دخان ناس الاتحاد يقول ناس خليفة ديل ما بثبتوا.

{طلعتوا أي كلام يا ناس الاتحاد.

{الهلال هو الفريق الذي انتصر خارج ارضه.

{انتصار الهلال لم يحققه نادي افريقي في هذه المرحلة ..لا في بطولة الاندية الافريقية لا في بطولة الكونفدرالية.

{نحن برانا.

{الاهلي المصري خسر امام شبيبة القبائل.

{ناس المريخ فرصتهم هو ان يجمد الفيفا السودان.

{ناس المريخ بحلموا ان الوزير لا يمتثل لقرارات الفيفا ...عشان الفيفا يجمد السودان وتروح علي الهلال.

{نحن الهلالاب مع ديمقراطية الحركة الرياضية حتي لو تم تجميد السودان من قبل الفيفا.

{في ستين داهية البطولة.

{لكن مفروض الوزير يكون عارف ...انه سوف يحرم السودان من بطولة قريبة.

{المريخ يعملوا ليه أي حاجة ..ويدفعوا ليه تكاليف سيكافا وينظموا ليه البطولة عشان يفوز بكأسها ...والهلال توضع امامه العراقيل.

{يا ربي الهلال داى بمثل العراق.

{نحن بقينا ما عارفين.

{لكن اقول ليكم حاجة.

{الهلال ما في عوجة بتجيه.

{نحن ماشيين لي قدام.

{خبر عاجل : حالتهم دي صايمين.

[hanody]

[hanody]

استقبال الفاتحين لهلال الملايين ... الجماهير الهلالية تحسن الوفاء واستقبال الابطال ... دعوة للوحدة والالتفاف حول الفريق وتناسي الخلافات ...ميشو يطوي صفحة الاتحاد ويفتح ملف الجيش ودجلوبا ...المريخ يخذل التوقعات ويسقط امام الوصل ...رغم مشاركة المحترفين المريخ يفشل في التعديل

[hanody]

{ استحقت بعثة الهلال الظافرة والعائدة من ليبيا بعد فوز الفريق التاريخي على الاتحاد في عقر داره بثنائية البرنس وبشة مقابل هدف، استحقت الاستقبال الكبير الذي وجدته من الجماهير الهلالية.

{ واستحق مدرب الفريق ميشو الاستقبال الخاص الذي حظى به.

{ وكم سعدنا بتصريحاته في المطار لقناة قوون الفضائية وهو يشيد بابطال الهلال والفوز الذي تحقق رغم الكثير من الضغوط والعوامل غير المساعدة التي واجهها وهو يلعب مع فريق صاحب جمهور صعب.

{ من حق ميشو ان يركل مباراة الاتحاد خلفه ويفكر ايضا في الفريقين الاخرين ومؤمنا في ذات الوقت على اللعب المحلي الذي يصقل ويساعد في الاعداد.

{ من اول يوم لقدوم هذا المدرب لم يخسر الهلال وظل في حالة انتصارات متتالية داخل وخارج الارض وليته كان قد لحق بالهلال قبل جولتي الاسماعيلي في الابطال فمستوى الهلال في الكونفدرالية اكبر من هذه البطولة ونتائجه ومستواه تؤكدان بانه كان الاحق بالابطال.

{ تفاءلنا بهذا المدرب منذ اول يوم وهو يضع خططه ويؤكد معرفته بالكرة الافريقية والأكثر من ذلك انه كان يرغب في تدريب المنتخب الوطني حتي يقوده لنهائيات كاس العالم وياله من طموح.

{ مثل هذه التصريحات المتفائلة والثقة في النفس تؤكد بان هذا المدرب ومع النتائج التي تتحقق الآن يمكن ان يحرز البطولة.

{ استطاع المدرب ومن خلال فترة قصيرة أن يخلق توليفة رغم الاصابات والايقافات ورغم انضمام نجوم جدد وعودة لاعبين ابتعدوا كثيرا من الملاعب مثل النجم يوسف محمد.

{ وكم كان يوسف محمد سعيداً بعد عودته مع البعثة امس وهو يعد الجماهير بكأس البطولة.. ومثل بطولات الكاف ليست بالغريبة عليه.

{ احاديث قادة البعثة الظافرة تركزت في الوحدة ولم الشمل والتفاف الجميع حول الفريق حتى يواصل المشوار ويحقق النتائج المطلوبة.

{ رغم الكثير والذي اثير في الايام الماضية حول الهلال وأوضاع اللاعبين الا ان تقدير المسئولية ومحاولة التألق واسعاد القاعدة الجماهيرية بجانب الدفع المعنوي والحماس من الكثيرين هو الذي قاد لهذا الفوز ليؤكد اللاعبون بان ولاءهم للفريق لايمكن ان تؤثر عليه وفيه اي عوامل خارجية أو تقصير من اية جهة.

تواصل

ليبيا فتحت

ليبيا فتحت والتيحة في داره اتدمر

الهلال في طرابلس استدار واتقمر

والشعب الليبي بنور الهلال اتسمر

الهلال الغزال الشارد وهافو مضمر

ساعد الجد في الجماهيرية شداه وشمر

الهلال كسب النقاط الفيها طمعان نمر

الازرق في طرابلس بحره فائض حمر

الهلال الاتلالا كالياقوت والمرمر

اعاد لكرتنا سمعة مرمطها غيره ومرمر

مخبازة الهلال تصنيعا جميل ومقمر

التيحة شنو حمام شوربة ولا محمر

قارة افريقيا الهلال عازم عليها يتأمر

والتمثيل الخارجي فيه ازمن وعمر

الكونفدرالية الهلال لسوقها روج وعمر

نسخة الكاس الحالية عليها حدق وحمر

في عرين الهلال اسدا حاشاه ما بتذمر

والدفاع الهلالي صلب ما بنخرق اتطمر

ايقاع الوسط اللحن الطروب ليه زمر

وهجوم الهلال علي الدوام سلاح معمر

التوليفة الزرقاء كالذهب الصافي مجمر

عيار واحد وعشرين اللامع نضيف ومتمر

العشق السرمدي الداخل الحنايا مطمر

التحية لكل عاشق بالازرق ميولو مخمر

يوسف ابو رزق

لحن الختام

{ خيب المريخ التوقعات وخسر امام الوصل الاماراتي بهدف رغم مشاركة معظم النجوم الكبار بمن فيهم المحترفون القدامي والجدد حيث شهدت المباراة مشاركة وارغو وبن ضيف الله والمرابط ومن خلفهم الحارس المناضل رمزي ورغم ذلك فشل في تحقيق حتي التعادل.

بالخسارة فقد المريخ كل حظوظه بالظفر بكاس البطولة والتي من الواضح انها ستكون حصرا بين الاهلي والوصل بعد فوز الاهلي بثنائية علي الوحدات الاردني.

{ نتمني ان يحفظ المريخ ما تبقي من ماء الوجه في اخر مبارياته امام اهلي دبي.

{ لا يوجد اي سبب وجيه لتاجيل لقاء الهلال واهلي مدني في الممتاز ولا اعتقد بان انضمام لاعبين او ثلاثة الي معسكر منتخب الشباب يمكن ان يقود لهذا التاجيل.

{ حسنا والفرصة والحظ الان مع العصمة الكاملين في مواجهة الهلال علي كاس السودان بعد الفوز الكونفدرالي التاريخي حيث يتوقع ان يحظي اللقاء باكبر عدد من الجماهير.

{ دخل النجم بشة قلوب جماهير الهلال من اوسع الابواب واصبح مصدر سعادة وفألا لها وهو يسجل باستمرار مستفيدا من تمريرات وجهد زملائه فكانت اهدافه وتمريراته الرائعة من خلال الكونفدرالية ذات تاثير ايجابي كبير في مسيرة الهلال واستمراره وتفوقه وتصدره حتي الان.

{ ولا ننسي ادوار القائد هيثم مصطفي صاحب التمريرات القاتلة في اللقاءات الاخيرة وكذلك استمراره في غزو شباك الخصوم ويكفي هدفه في كابس يونايتد وهدفه بالامس ايضا خارج الارض ومن ركلة جزاء ركلة اعصاب في شباك الاتحاد الليبي في عقر داره ووسط جماهيره.

{ مبروك للهلال ايضا صحوة وعودة نجمه مدثر كاريكا للتألق والذي اصبحت له بصمة في كل مباراة يشارك من خلالها.

[brain]

طااااااااااااااااااااااااااااااااااااااااخ
حرقتك وين ما تكون بس ...........
اللهم اني صايم
قال ايه عشم ابليس في الجنة انتوا خليكم في بطولة دبي الوديه كع
قال ايش محترفين

بالله شوف الاسلوب طااااااااااااااااااااااااااااا اااااااااااخ حرقتك وين ما تكون بس ...........
اللهم اني صايم
يعرفوك كيف هلالابي

[ابو ايووودي]

بالله شوف الاسلوب طااااااااااااااااااااااااااااا اااااااااااخ حرقتك وين ما تكون بس ...........
اللهم اني صايم
يعرفوك كيف هلالابي

انا برد على حسب اسلوبك يا وصيفابي

[hanody]

الجماهير الزرقاء استمتعت بالسهرة الكروية الرمضانية والاهداف الـ 17 البيضاء ... هلال الكونفدرالية يمزق شباك الجميعابي بأهداف قياسية ...المرعب سادومبا يتلاعب بالدفاع ويعتلى صدارة الهدافين بتسعة أهداف

[hanody]

ســـــــــــــــيـــــــــــــــــد البلد

[hanody]

حقق الهلال فوزا كبيرا وتاريخيا علي منافسه الجميعابي الكاملين ضمن مباريات كاس السودان امس باستاده حيث احرز رماته 17 هدفا نظيفا جاءت علي مدار الشوطين احرز الزيمبابوي ادوارد سادومبا 9 أهداف وبكري وعلاء الدين يوسف هدفين لكل فيما احرز هيثم وعمر ومهند واحمد عادل هدفا لكل.

[hanody]

الشوط الاول

استهل الجهاز الفني للهلال مباراة امس بالتشكيل التالي: جمعة في المرمي يقف امامه في خط الدفاع المحترف المالي باري ديمبا وسيف مساوي اضافة ليوسف محمد وخليفة وفي خط الوسط محمد احمد بشه وعمر بخيت وعلاء الدين يوسف ومهند الطاهر وهيثم مصطفى وفي المقدمة الهجومية لعب المحترف الزيمبابوي ادوارد سادومبا ليظهر الهلال بهذا الشكل تجانسا وانسجاما كبيرا حيث عمد اللاعبون الي السهل الممتنع والتمرير اولا باول ليشهد الشوط عددية وافرة من الاهداف كان للمحترف الزيمبابوي سادومبا فيها نصيب الاسد حيث احرز 9 أهداف كان احدها من ركلة جزاء احتسبها الحكم لملامسة الكرة يد احد مدافعي الجميعابي الكاملين فيما احرز علاء الدين يوسف هدفين وهدف للقائد هيثم مصطفي الذي ادي اداء رائعا وصنع العديد من الاهداف كما شهد الشوط الاول تألقا جماعيا للاعبي الهلال ولم يختبر حارس المرمي جمعة وخط الدفاع مطلقا.. تلاحظ ايضا ان اعداد غفيرة من جماهير الرياضة بالكاملين قد رافقت فريق الجميعابي وبدات في التشجيع الداوي ومع انهمار الاهداف كالمطر خفت صوتها ليختفي نهائيا.

[hanody]

الشوط الثاني

اجري الجهاز الفني للهلال ثلاثة تبديلات مع بداية احداث الشوط الثاني حيث ادخل سامي عبدالله بديلا لسيف مساوي واحمد عادل بديلا لمحمد احمد بشه وبكري عبدالقادر المدينة بديلا للقائد هيثم مصطفى لتتواصل الاهداف ليحرز سادومبا ثلاثة اهداف ويدلي مهند بدلوه محرزا هدفا رائعا ويضيف بكري المدينة هدفين اخرين وهدف لاحمد عادل واخر لعمر بخيت لينتهي اللقاء بسبعة عشر هدفا للهلال دون مقابل للجميعابي الكاملين

[hanody]

ميشو: لم نستفد من المباراة فنياً

وعقب انتهاء اللقاء قال المدير الفني للهلال ميلوتان ميشو ان المباراة تعتبر تاريخية بالنتيجة الكبيرة التي حققها الهلال ولكنها لم تفد الفريق فنيا وبالعكس يمكن ان تدخل الغرور لدي اللاعبين وقال انه سوف يعمل علي تهيئتهم نفسيا قبل مباراة هلال الساحل.. واضاف ميشو بانه يعمل بصورة مدروسة لذلك قام باشراك ديمبا ومساوي معا في خط الدفاع لتجهيزهما لقادم المباريات خاصة وان امام الفريق مباراة مهمة امام الجيش النيجري والتي تعتبر صعبة لان هذا الفريق قد تخطي اربعة فرق كبيرة ولايمكن ان يحدث هذا بالصدفة.

[تندلقي حن]

فوق فوق هلالانا فوق

[hanody]

لهلال يغادر الي بورتسودان عصر الاحد

يغادر فريق الكرة بنادي الهلال الي بورتسودان عند الساعة الرابعة من عصر غد الاحد وذلك عبر الخطوط الجوية السودانية لمواجهة هلال الساحل ضمن مباريات النصف الثاني لدوري سودان ون الممتاز هذا وسوف يرافق الفريق السيد اشرف سيد احمد الحسين الكاردينال.

[hanody]

احتفال الكاردينال بلاعبي الهلال يتأجل للثلاثاء
تأجل الاحتفال الذي كان مقررا قيامه اليوم بدار نادي الهلال احتفالا من قطب الهلال اشرف سيد احمد الحسين الكاردينال باللاعبين للنتيجة الطيبة التي حققوها امام الاتحاد الليبي بطرابلس هذا وسوف يقام الاحتفال يوم الثلاثاء المقبل بعد عودة الفريق من بورتسودان

[hanody]

مدرب الجميعابي: قدمنا هدية لجمهور الهلال
قال الكابتن ديسكو مدرب الجميعابي الكاملين عقب انتهاء مباراة الامس انهم قدموا هدية معنوية للهلال قبل الدخول في المباريات الافريقية الصعبة متمنيا للهلال التوفيق وقال ان الخبرة لعبت في صالح الهلال.