سلام طبعا فى ناس ما عندهم فكرة عن التفاصيل الدقيقة فى تكاليف الزواج عشان كدا اختصرت ليكم المشوار دا كلووو وعشان كمان ما يدقسوكم لازم تكون عارفين البحصل شنو
دى تكاليف الزواج السودانى من قولة تيييت لحدى الفنان ما ينزل من الحفلة وخلونا نتحاور شوية فى التكاليف دى حسب اهميتها
أول ما العريس يجى يطلب البنية بجو الرجال من طرف اهل العريس لفتح خشمهم (يعنى يقولو أحنا طلبنا بتكم لولدنا دا) وطبعا هذة الخطوة لا تتم الا بعد سؤال اهل العروس عن العريس عن اهلو واخلاقة ووظيفتة وغيره حتى بعد ذلك بجى الرجال ويتم وقوف أحد كبار الاسرتين بالقاء كلمة حلوة وعن نسبهم وتنتهى بالدعاء والموافقة وتنتهىالجلسة بقراءة الفاتحة.... يتم فى هذة الجلسة توزيع المشروبات الباردة والخبيز بكافة اشكاله (كحك بتفور - والمكسرات) ويتم بعد ذلك توزيع صحن ملى بالفواكهه والجاتو وبعض الاسر تقدم البيتزا والفطائر تقديرا" لجيتهم اول مرة...
نجى بعد كدا لقولة الخير ودى مخصصة للنسوان بجيبو معاهم طبق حلاوة وهدية العريس لعروسة وهيا كريمات وعطور وبعضا" منهم مبلغ مالى بسيط وفى ناس بتجيب دهب (حسب قدرتك المالية) هنا عديل بعملو ناس العروس صحانات العشاء لعدد بسيط من اهل الاسرتين (ليلة مختصرة). وينتهى الليلة بدري.
سد المال:-
يحدد اهل العريس موعد لاهل العروس لاحضار سد المال وهو عبارة عن المهر والشيلة ، تحتوي الشيلة على ملابس للعروس والعطور ، عطور ناشفة مثل الضفرة والمسك والقرنفل والعطور السائلة مثل الفلير دمور وعطر الصاروخ والصندلية والمحلبية والسرتية والمجموع ، بالاضافة الي المواد التمونينية اللازمة لصنع الوليمة ومنها السكر وزيت الطعام ودقيق القمح ودقيق الزرة ، وفي ليلة سد المال تتم التجهيزات في منزل العروس حيث تتم دعوة الاهل والاقارب والجيران وتقدم المرطبات والحلويات وتحرص والدة العروس على دعوة قريبات العروس الاخريات من النساء الطاعنات في السن وخالاتها وعماتها وجاراتها ، ويحضر من اهل العريس النساء فقط لجلب الشيلة وهن يرددن الاغاني التي تمجد حسبه ونسبه وتتحدث عن كرم اصله ومن الأغاني التي تتداول في هذه المناسبة
أم العروس إحنا جينا
البيت ما بشيلنا
دقي لينا خيمة
أم العروس إحنا جينا
غدانا بقرة وعشانا ناقة
وبعد انتهاء طقوس ومراسيم استلام المهر تستعد ام العروس للتحضير لحفلات الفرح
ايضا تُردد
يا نسيبتو شن بدوري جبنا ليك عقيد اللولي ..يا نسيبتو شن بدوري
جبنا ليك الغالي علينا وجبنا ليك نور عينيننا يا نسيبتو شن بدروي .. جبنا ليك دهب ما نحاس جبنا ليك وليد الناس يا نسيبتو شن بدوري
الشيلة غالبا" فى هذة الايام تحتوى على:-
1/ شنطة الملابس تبتدى بي(6-8-12) عدد قطع الملابس + الثوب السوداني مابين شفون وتوتل - احذية - شنط يد وغيره(حسب العدد بتكلفك مابين مليون ونص - و4 مليون)
2/ شنطة فيها العطور البلدية والافرنجية والناشف ودى بتكلفك ما بين(مليون - وبين 2 مليون).
3/ علبة المكياج (حسب ذوق العريس واهله لا تكلف كثير)
4/ دهب الشبكة ويبتدى بى (طقم بسيط 3 مليون - مفتوح المبلغ للاغنياء)
5/ الدبل ودى سعرها بسيط جدا" والموضة بقت مع الدبلة حباسة يعنى خاتم شبهه الدبلة.
6/ المهر المادي(فى ناس بتدى 5 مليون - وفى ناس بتدى 50 الف دولار فى زمننا هذا).حسب حالة العريس
يتم الأتفاق على ايجار النادي من قبل ناس العروسة وما تدقس ياعريس النادى على العروسة والعشاء..
العريس عليهو الكوفير - الحنة- التصوير- الفنان (واذا طلعت العروس ظريفة بتتقسم معاهو الحاجات دي حسب درجة الحب بق))
أها يا جماعة الخير انتهينا من مرحلة الخطوبة وبعد كدا يجى إتفاق البحبو بعض وترتيباتهم مع بعض فى مصاريف العرس والعقد والحفلة ..أكيد أى بنت بتتمنى اليوم دا بفارغ الصبر..زمان كان شراء فستان الفرح واجب على الزوج كان كسر رقبتو يشتريهو وطبعا الشراء ما زي الايجار المهم!!
البت الفالحة الواعية تفكر لو إشتريت الفستان حوديهو بعدين وين؟ فأحسن حاجة تأجري فستان الزفاف بتاعك وطبعا الاسعار الايام دي خرافية لكن عموما المبلغ ما كبير عشان تشوفى فستان مناسب ..الايجار بملغ 750- لحدى مليون ونص حسب الفستان والماركة يبقى دا خيارك بعد ما يدوك المهر ..
نرجع للمهر ياسيدي العريس زي ما قولتا سابقا حسب مدى تقارب وجهات النظر بينك وبين حبيبتك فى مسالة القروش لكن عشان انتا تكون منصف وعشان ما تسمع كلام كتير من أمها وخالتها وعماتها تدي الشىء الوسط وريح نفسك من هم شراء الشيلة والجوطة الكتيرة ديك واديها مستكفي(المستكفي : هو مال يعطى للعروس شامل المهر وكل حاجاتها الشخصية من فستان وكوفير وحنة) ماعدا الفنان والتصوير عليك ياعريس – التصوير معرفو بي 500-600 جنية اما تصوير الحفل من مليون لفوق حسب الجهة الحتصور حفلك ..الفنان يختلف والخيار متروك ليك وللعروس تجيب فنان درجة اولى او عشرومية..!! اهم شىء وألفت نظر العريس بإنو النادي والعشاء على العروسة ..على العروسة!! ما يمقلبوك ويورطوك فى النادي فهمتا سمح؟!! الا اذا قدرت العروس وأقنعتك بإنك تشيل الشيلة كلها وتكون هنا دخلتا الشرك !! اوعا تتمقلب!
النادي فى حدود 5 مليون – لحدى الريفيرا والخليل ..الخ أسعارهم عالية شوية عموما العشاء بالنادي مثال فى النادي السوري بيكون فى حوالي 20 مليون عشاء + ايجار لكن لو عاوز الغالي امشى ناس كزام- الريفير وغيرهم الايجار بالعشاء يكلفك 27- 30 مليون ..طبعا فى صالة جديدة اسمها القاعة الذهبية فى بحري العشاء بالايجار 40 مليون وطبعا دا للناس المرتاحة شديد..
تخطيط الزفاف يتم بالورقة والقلم تقعد مع العروس وتحسبو الحاجات المحتاجينها شنو تشوفو اسعار كروت الفرح واختارو الشىء المعقول لنو فى النهاية الكروت دي حيرموها الناس وحاولو ما تكتبو اسم الله فيها عشان الناس بتجدعا فى القمامة !! وجب التنبيه..
قبال العرس بشهر لازم الراحة النفسية والجسدية بقدر الامكان عشان ما يحصل مشاكل بينكم فى ترتيبات الفرح ..المساج ضرورة للاسترخاء ..البعد تماما عن المكيفات القهوة والسجائر والصعوط..(عارفة روحى بنفخ فى قربة مقدودة).
نجي لحجز السفر لشهر العسل ودا يعتمد على ميزانتك سواء داخل العاصمة ام برة البلد والخيار شخصى ليكم ..
حجز النادي يتم قبل العرس بمدة وكذلك ترتيب العشاء..
لحدى الان عرفتو النادي العشاء والتصوير وفستان الزفاف فى الجزء الأخير حتكلم عن الشيلة ومكوناتها وليلة العرس...
بيت مال وعيال ..العديلة والزين
الجزء الأخير...
طبعا حكلمكم عن الشيلة عشان أكيد فئة كبيرة من الرجال ماعارفين الشيلة فيها شنو ..
ياسيدي الشيلة هي تقدير خاص منك لعدد ماتريد شراءة لزوجتك من ملابس يعنى أقل عددية للشيلة عدد (6) قطع من كل حاجة مثال: ستة شنط يد..ستة ثياب سودانية فيها الشيفون وفيها التوتل العادي ..ستة جزم أو شباشب + ستة قطع ملابس جزء سهرة وجزء عادي ...الخ
كدا دي شنطة الشيلة عندك كملان شنطة الريحة الهيا لأقل تقدير يكون عدد (2) مثل الضفرة والمسك والقرنفل والعطور السائلة مثل الفلير دمور وعطر الصاروخ والصندلية والمحلبية والسرتية والمجموع...بالاضافة للعطور الباريسية ودي على حسب تقديرك ..نجي بعداك للمواد التمونينة ودي بسموها (الدكان )عشانم يجيبو ليكم فطور العريس أما اذا والدة العروس رفضت الفطور فخلاص مافى داعي تودي الدكان...عموما الدكان يحتوي على.. السكر وزيت الطعام ودقيق القمح ودقيق الزرة..شعيرية مكرونة فحم بصل..و 2 خروف او خروف واحد حسب قدرتك..
شنطة الهدوم بتكلفك لو اشتريتا من سعد قشرة(4-5 مليون) + الريحة (1800- 2 مليون) ممكن الحسبة كلها تطلع (6) مليون لو اشترت المهم فقط ..
الدكان ممكن يكلفك مليون ونص على الأقل..
المهم تغلفو الحاجات وبالحلاوة والقروش ..اها نسيت اوريكم المهر كم والمستكفي..
عشان تريح روحك من شراء كل الجوطة دي وتدي العروس مهرها احسن تديها القروش وهي تشتري براها المبلغ ممكن يكون (15)مليون لو عاوز تفرحها كويس اما اذا وضعك أسوء فيمكن تديها (10) مليون وتشيل انتا قصة النادي لو خايف من زعل أهلها اما اذا كانت قنوعة وبتحبك حتكتفى بالمبلغ دا وأبوها يتم الباقى ..
ممكن تتم اتفاقية بينك وبين أبوها انك تجيب النادي لو عاوز تساعد والدها ..او اى حاجة شايف انو انتا مفروض تعملا..
طبعا المكياج فى حدود مليون ونص لى 2 مليون عند هند حمدتو أو غادة شرفي + الحنة بي 300 لحدى 500 الف جنية دا تبع المستكفى ماعندك شغلة بيهو ..لكن عليك التصوير وطبعا عند ماجستيك بي 600 الف جنية وعليك الفنان فى حدود 4 مليون لو فنان خطير لو كشا مشا بي مليون او مليون ونص حسب مرتك برضو!! تصوير الحفلة+ موسيقى الدخول عليك برضو..
للعلم العشاء ممكن يكلف ابو العروسة 10 مليون ولفوق على حسسب العددية والنادي...العروسة عليها عدة المطبخ والستائر لفرش شقتها وبرضو لو وضعها المادي كويس ممكن تساهم مع العريس ..
اهم شى ما تخلو زول يتدخل فى خصوصياتكم فى الاعداد ممكن تشوفو الأفكار المتحة لكن فى الاول والاخير رأيك انتا كرجل وكزوج وحبيب ومع الاتفاق مع عروستك كل شى ممكن يمشى بسهولة بدون مشاكل وضجة..وكل ما كنت قريب من والدة العروس كل ما كانت ظريفة معاك وكل ما خلقت حواجز وما اشتغلتا برأيها كل ما هي حتعاند وتقلب حياتك جحيم..والاولو شرط أخرو نور..وريهم ظروفك المالية من الأول والليك والعليك فالتفاهم أساس الحياة الناجحة...
شهر العسل بتقديرك انت وظرفك المالي على حسب ماعاوز وتحب ممكن تقلل تكلفة العرس عشان تمشى شهر عسل برة البلد أو تقضو فترة اسبوع او 10 ايام بشقة فاخرة فى حدود 50-60 جنية لليوم وتمشو شقتكم بعداك او بيتكم وبعد الاستقرار بمدة ممكن تمشو شهر عسل كلو بعتمد على وضعك المادي...
حنة العريس ممكن تتندمج مع حنة العروس بعد العقد وبكدا تقللو التكلفة كتييير بدل حفلتين منفصلتين وتنادو الاصدقاء المقربين والاهل ..وتتجرتكو بعدها وخلاص...وبس..والدفع مشاركة بينك وبين والدها عموما والد العروس ما منو خوف دائما متفاهم .. خليك قريب من والدة العروس عشان تكسبا وماتحاول تبرهن ليها بأنو بنتها خلاص بقت حقتك وانها ماليها كلمة معاها..كل ما كنت ظريف حتكون ظريفة معاك وتكسبا... خلى حبيبتك تقرب من أمك عشان تكون علاقتوم مع بعض حلوة وتعيش بلا نكد لقدام..
الدهب حق العرس ممكن يكون طقم او طقمين او تلاتة على حسب قدرتك برضو عموما الطقم فى حدود 3-4 مليون على حسب ارتفاع الجرام عموما الايام دي الدهب بقى بي 100 ويمكن ينزل او يرتفع انتا وحظك!! لو جبتو من برة السودان بيكون احسن وانا شايفة طقم واحد كفاية فى الوقت الحالي...الكوشة بتاعت العرس فى حدود 500- مليون جنية
العرس انتهى كدا بكل حاجاتو ممكن تنتهى بتكلفة فى حدود 30-50 مليون جنية بكل التفاصيل الصغيرة ..
ياريت تقنع والدتك مافى داعي لفطور العريس لأنو تكلفتو فى حدود 4 مليون جنية ..
ممكن تعرس بأقلا كتيييير أو أكثر بكثييييير على حسب قدرتك المالية..
اتمنى لكل العزاب الزواج بنات واولاد والعقبة لينا..
وفى انتظار مشاركاتكم
ومن اول
