حليل العزة الكانت فينا .. موقف كده !!

[ود الزوحي]

الساعة الـ 1:25 ظهرا بتوقيت المملكة العربية السعودية

حين عودتي إلى مقر الشركة وتحديدا حينما ارتجلت من السيارة .. كان هنالك ثمة صوت ينايدني !!

اللخو !! سؤال لو سمحت

توقفت لأنظر من المنادي ..

رجل في مرحلة الشباب ومعه آخر وامرأتان يرتدي الشاب جلابية ولن أقول ثوبا لكي أوضح ماهي الحال عليه !!

أنا : مرحب ..

الشاب : الأخ سوداني ؟

أنا : طبعا

الشاب : والله بس نحن أخوانك من أم درمان .. حي العرب

أنا : حبابك ألف ..

الشاب : الله يديك العافية

أنا : تسلم

الشاب : والله جينا نسأل من واحد اسمه محمد حامد .. وقالوا الناس هنا نقلوه المدينة المنورة .. بلد الرسول عليه الصلاة والسلام ..

أنا : عليه الصلاة والسلام

الشاب : وأنا والله شفتك سوداني اتوسدت فيك الخير !!

أنا : مرحب بيك والله

الشاب : وحسي نحن جينا وانقطعنا هنا وعايزين نمشي ليه المدينة مشينا سألنا حق الباص قالوا 55 ريال يعني حوالي 250 لينا نحن الأربعة فقلنا تساعدنا لو أمكنت الظروف !!

انا عرفت الحاصل طبعا !! فكان الرد ..

والله تستاهل بس أنا زاتي كنت في مشوار بفتش لقروش .. ومالقيت والعربية ده عربية الشركة ..
الشاب : قال لي شكرا واستدار !!

بالجد حسيت بنوع من الأسف لحاجتين ..

الأولى إنو الراجل .. ده حسسني بالذنب إني كذبت عليه ..

التانية .. إنو بالجد خسارة علينا وخسارة عليه اسم سوداني وخسارة الصحة اللي هو شايلها .. وغيرو مالاقيها .. والله لو قال كده وخبتني . .كان أكون حسي في دنقلا !!

لمتين حنكون في طريقنا للهاوية .. و لمتين حنكون شايلين اسم مغتربين ونحن من الكشة زايغين ..

الناس هنا بقت عاملة فيها ناس عز .. وهم حالهم غير ربنا ما يعلم بيه !!

يتحسبو علينا مغتربين سودانيين سااااااااااااكت ..

الله يكون في العون غايتو ..

سلاما علي بلدا
معزة ناسو بالدنيا
يلمو الجوع محل مايكون
يعيشو بدالو بالعزة
ونحن الفي طريق غربة
بقينا نبيع كرامتنا
ونرضى الزلة والشينة

[الدغري]

انت شفت شنو .........هناك مصائب اكبر

تيل انو في مدينة الدمام كا فترة بيداهموا بيت دعارة لسودانيات

[المعزب]

ود الزوحي مساك الله بالخير
ماكان ممكن تديه الطلبوا وتحتسب ذلك عند الله ؟
ليه الناس ماظروف ممكن الزول ده مريض ،ممكن المت به فاقة ،ممكن ممكن
ليه بتحكم على الناس بشكلهم ؟
ياحبوب ادي لوجه الله وماتستنى شكر من احد بتلفاه قدام.
مع كل الود

[عمار ود الشرفه]

هذا الامر لايوجد في السودانيين فحسب بل في كل بقاع الارض لكن تختلف طبائع الناس وسلوكهم فلو عرف المرء قدر نفسه وما وهبه له الله لعاش هنيئاً كريماً ولا يقال له لقد كنت في الماضي كذا وكذا ... فالشاب ربما يكون مخطئ او العكس لكن الكره تعيد نفسها والسهل يريده الانسان بطبيعته .. فاليوم وجدها سهله فغداً تكون اسهل ومن يهن يسهل الهوان عليه ....

تحيااااتي

[ابو ايووودي]

احتمال يكون محتاج فعلا وشافك زول سوداني قال احسن ود بلدي ده من الغير
ما ضروري تدي المبلغ كلو كان ممكن تساهم باي شي
اكيد بقول ليك بارك الله فيك وربنا يرزقك ودعوات حلوة ذي دي
بصراحه يا اخي ود الزوحي كلنا محتاجين انا وانت وغيرنا ولو ما كده كنا جلسنا في بلدنا بدل الغربة المريرة المعانين منها
بس نعمل شنو المسئولين من البلد هم اجبرونا على كده
تحياتي

[ود الزوحي]

المتداخلين جميعا ..

تحية طيبة

هذا هو طبع وخصلة شعبنا السوداني .. الطيبة والثقة الزايدة

أنا قلت أشوف وجهة نظركم شنو لكن الشخصية ده أنا قابلتها أكتر من مرة والفكرة مافي 250 أو 1000 ياشباب القصة ما حلوة في حقنا ..

السوداني كريم خصلة وكبرياء تهز العالم ..

متين وصلنا حتة إنو الزول يقيف يشحت .. ياخي احترم الجلابية الانت لابسة واللغة البتتكلمها السودانية !!

وصراحة بقينا في الغربة ما بفرزو بينا وبين التشاديين والصومالين غير بالكلام عشان كده لازم تكون العزة هي الحجاب الحاجب بينا وبين تلك الخصال المشينة ..

الموضوع ما موضوع أدي وألا لا وعمرو ماكان سوداني يبخل على ابن قبيلته لكن العيب أن ننزل لدرجة الشحتة من الشارع والأمر من ذلك هو أن نرتدي تلك الثياب التي تحفظ هيبتنا ونتهاون أمام جاليات البلدان الأخرى بأن لدينا من هم يمتهنون مهنة التسول ..

لا ولن أكون معينا لمثل هؤلاء ..

[السنبلاية]

الله اعلم بما فى النفوس ..

أن الله لا يضيع أجر من احسن عملا ,,,

وربنا يكون فى عون الجميع ,,...

[احاسيس]

لاحول ولا قوة الا بالله العلى العظيم لا اقول الا حسبى الله على من اوصلوهم الى هذه المرحلة لكن اخى الكريم ليه مادليتهم الى السفارة السودانية او القنصلية او ما شابه ؟

[رغودة]

لاحول ولا قوة الا بالله العلى العظيم لا اقول الا حسبى الله على من اوصلوهم الى هذه المرحلة لكن اخى الكريم ليه مادليتهم الى السفارة السودانية او القنصلية او ما شابه ؟

لأنه هو اغلبهم يا أحاسيس (أغلبهم) البيتبعو الطريقة دي ماصادقين يعني ماحيكونوا عايزين سفارة .. وياما لاقينا مواقف زي دي حكاية اتقطعنا وماعارفة شنو ومن كل الجنسيات .. (ومرة بتذكر في واحد حكى انه اتعرض لموقف زي ده وبعد كم يوم مر بنفس الطريق ولقى نفس الشخص مع نفس الحكاية)

بس الصحيح بما انه الشخص مامتأكد وحتى لو متأكد يستحب إنه ما يرد السائل ويحتسب الشيء ده عند ربنا وربنا إن شاء الله يقبلها منه بنيته القاصدها

[بت مختبرات]

يتحسبو علينا مغتربين سودانيين سااااااااااااكت ..

m

اللخو السودانى المغترب.. سلام عليكم...



الفهمتو من الحوار انو عندهم زول عيان وعايزين يمشو ليو وما عندهم حق التوصيلة .. عااااااااااادى جدا" ما غريبة علينا،،
عموووما" كدة قصة الشحدة دى (هنا ولا هناك) ماساة وحاجة مخجلة جدا" ،، وعلى فكرة بالنسبة للى بيحصل هنا ،قصتك الذكرتها دى : ولا شئ،،
ما بدافع عنه ،، بس مشتغربة فهمك.. لانو حسيت من كلامك انك مستنكر انو ده يحصل برة_بالتحديد_
وأنا معاك الواحد يتبهدل فى بلدو وسط أهلو أحسن من يمشى يتبهدل فى بلد غربة...لكن... مفهوم بسيط حقو نعدلو لفهم الناس عن الاغتراب .. زمان الناس بتغترب عشان الرفاهيات،، عشان كدة كان بيكون المغترب هو الأفضل ماديا" ،، لكن الان بقت الناس بتغترب عشان تعييييش ...عشان تاكل عيش ،، وفى ناس بتسافر ومعاها حق التذكرة بس( مرات شهادة يشتغلو بيا ذاتها ماف) فما غريبة لمن تلاقى زول هناك بيشحد....

[ود الزوحي]

لاحول ولا قوة الا بالله العلى العظيم لا اقول الا حسبى الله على من اوصلوهم الى هذه المرحلة لكن اخى الكريم ليه مادليتهم الى السفارة السودانية او القنصلية او ما شابه ؟

والله لو هم عايزين السفارة .. ماكان غلبوا ..

أنا ما متحامل عليهم ..

سبحان الله ..

لما نجي وننقض شي ده معناته نحن بنفتش عن الافضل .. ماحكاية نشر سلبية عن وطن بجمعنا ..

وماظنيت في سوداني ما بيعرف وين مقر السفارة .. حقو الناس تكون واعية شوية ..


بالجد القصة حرقتني لأنو نحن السودانيين كانو بضربو بينا المثل في الدول الخليجية .. فكيف أشوف حاجة زي ده وأسكت ..

والله ما حسكت وأتمنى لو في زول مسؤول يقرا الكلام حقي ده ..

[ود الزوحي]

m

اللخو السودانى المغترب.. سلام عليكم...



الفهمتو من الحوار انو عندهم زول عيان وعايزين يمشو ليو وما عندهم حق التوصيلة .. عااااااااااادى جدا" ما غريبة علينا،،
عموووما" كدة قصة الشحدة دى (هنا ولا هناك) ماساة وحاجة مخجلة جدا" ،، وعلى فكرة بالنسبة للى بيحصل هنا ،قصتك الذكرتها دى : ولا شئ،،
ما بدافع عنه ،، بس مشتغربة فهمك.. لانو حسيت من كلامك انك مستنكر انو ده يحصل برة_بالتحديد_
وأنا معاك الواحد يتبهدل فى بلدو وسط أهلو أحسن من يمشى يتبهدل فى بلد غربة...لكن... مفهوم بسيط حقو نعدلو لفهم الناس عن الاغتراب .. زمان الناس بتغترب عشان الرفاهيات،، عشان كدة كان بيكون المغترب هو الأفضل ماديا" ،، لكن الان بقت الناس بتغترب عشان تعييييش ...عشان تاكل عيش ،، وفى ناس بتسافر ومعاها حق التذكرة بس( مرات شهادة يشتغلو بيا ذاتها ماف) فما غريبة لمن تلاقى زول هناك بيشحد....

والله انا الاحترت في كلامك ..

انت بتقولي انك فهمت من الكلام انو هم عايزين زول وماشين ليه ..

بت مختبرات ..

تفتكري لو أنا فهمت زيك كده كان جيت تعبت نفسي وكتبت البوست ده ..لا طبعا !!


إيه رايك أنا الشخصية بالتحديد مرت علي أكتر من مرة .. وشيل عندك كمان الفلسطينين المعاي جو واتريقو علينا .. عارفة ليه !!

ما عشان الشحدة .. لأنو الزول عادي ممكن تتقفل بيه السبل ويضطر يطرق باب الشحدة .. والعياذ بالله !!

لكن لأنو ده ما طباع السودان !!

فهمت أنا زعلان ليه ..

أقل درجات المغتربين لو قلنا مثلا هنا في السعودية .. هم الرعاة .. وأكترهم مبسوطين وبي أملاكهم في السودان ..

والواحد لو فتش مابلغب .. بس الشحدة لا !!

أنا ما معاكم فيها ..

[نهر المحبه]

أول حاجه الواحد بقول لا حول ولا قوة إلا بالله...
وربنا يكون في العون...
للأسف إنه الحاجات دي موجوده هناك..

[نهر المحبه]

أول حاجه الواحد بقول لا حول ولا قوة إلا بالله...
وربنا يكون في العون...
للأسف إنه الحاجات دي موجوده هناك..
باختلاف أسبابها..في ناس بالجد بتكون محتاجه...وبتكون ماقادرة ترجع السودان وبتكون فقدت مصدر الدخل....بس عادة النس في الغربة بتقيف مع بعض وبتحل مشاكل بعض...
بعرف عدد من العائلات اتغير حالهم فجأه بس في النهاية النس في الغربة أخوان...
دي في حالة السبب معروف...
اما الشخص البيقيف بشحد في الشارع ده شيء منه هو وفي أحيان بكون مرض...
وفي أحيان بكون نتاج عجز...
في كل الأحوال الواحد يتوكل على الله ويترك كل شيء لله...
يعني لوجاك سائل ماتردو..كان ممكن تجر معاه حديث وتعرف نهايته شنو منه هو ...

[جسور الود]

[align=center]ليه بس الواحد يقبل لنفسو الزله ,,, معقول تهون عليك كده ؟؟؟!!!
الناس دى غريبه .. فيه النفسو عزيزه والله لو يموت مايمد ايدو
سيماهم على وجوههم من اثر التعفف
ود الزوحى يا اخوى بس حنقول شنو ربنا يهدينا ويهدى الجميع
ويصلح الحال .. ناسين انو بيأتى السائل يوم القيامه وليس فى
وجهه مزعة لحم والعياذ بالله
حزينه للبيحصل ده ..
اللهم قوى الايمان فى قلوبنا
شكرا ود الزوحى[/align][/size]

[الزعيم1]

انا بقول كلمة حق وانا زول مغترب وهذه العاده البتقولي عليها دي في السودانين
مافي وحتى لو في مرات الواحد بمر بظروف والمسلمين اخوه وكلامي يعني مابشجع على الشحده
والله في عون العبد ما كان العبد في عون اخيه

[ود الزوحي]

المتداخلين ..

تحية تليق بمقام عزة وطن كاسية المشاعر والظنون

انا لي حكاية بتاعت 20 سنة هنا في المملكة وماحصل لاقيت سوداني بشحت لأنو وضعنا ما بسمح بكده .. ليه عايزننا نتنازل ونقبل بحاجه زي ده ..

للأسف بالجد لقيت ناس راضية بالوضع وبتقول الظروف وعادي ممكن نشحد لو السبل اتقفلت بينا ..

كنت متمني انو الناس تقيف وقفة واحدة وتصل لحل يوقف الحاجات ده ..

والمفروض مننا كسودانيين حتى لو اتقفلت بينا السبل نفتش عن مقرسفارتنا .. او نشوف اقرب الناس لينا عشان يساعدونا بدال الوقفة في الشارع وحس البلد ينشال ..

لكن خسارة بقينا نرضى لنفسنا اي شي !!


سلاما على بلد
عزيز غالي
محل مايقيف ..
يعبر عن مقام ناسو..

[ملاك الورد]

ود الزوحي الموضوع بالجد خطير و مؤلم ,,,
المشكله دي ما بتلاقيها الا في السعوديه ,,, بسبب انه السعوديه بتواجه مشكله الاعداد الهائله للحجاج البدخلوها سنويا بالجد ما في ضبط دقيق لموضوع الاقامات ,,, في كميه من السودانيين بكونوا دخلو نظام عمره او حج و يعملوها اغتراب و الاقامه ما بتكون ساريه المفعول في حالات كتيرة
و شي طبيعي يكونو البشحدو ما موظفين , شي مؤسف في حقنا و يا ريتهم ما طلعو من السودان اساسا ,,, لانهم في السودان مهما وصلت بيهم ما بشحدو و هم شباب اقوياء و بأسرهم كمان
سلامي