اذا حبّيتك
وكان غيم الدرب بيتك
قلب فتح النشيد نفّاج حنين
ولقاني غنّيتك
اذا دسّيت هواك في ايد
مسكتك جوّه طعّمت الوريد بي ايد
وفرّيت في السما اسمك سحابة حب
وناديتك
تعال
تعال ميّل علي حجلة نهارات شفّع الروح
واتكي
نلعب
نشخبط دمّنا بالحب
هل تقدر انسامك تزح محراكة الصيف
من
تنبل حقول العاطفه بالمطره
واتيربك دم
تخش في وريدي زي بيتك ؟
اذا قلمي سكر بالشوق
وشال شبّال
رقص فوق خدّك الحبر المستّف ضو
وكم موّال
اتقريفت رئة الورق تتنفّسك
وانبل عطر النجمه
لامن بالسهر كمّلتو دوبيتك
هل تقدر تفر زيّ الطيور جوّاي
وتغرّدك..؟
وافرّحك
من الطريف رمشك حنين
والعين سواك ما ركّ فوق انسانها روح
كم مرّه طلعت قمرتك
ضوّت قصيدتي ... واروح
تروح عتمة فقدتك ومشتهيك
اذا سمّيتك حلم
خدش الكتابه سنين ولاقيتك
نظمتك عقد فوق رقبة نهار العيد
وصنقرنا علي باب العشق مسدار
حكيت عنّك
سحرتك بيك
زمن والايد محل ما كحّلت ب
بالريد بنات
ينقدّ ماعون القلب
وتسيل علي الشارع جداول شهقتك
نخلك يشدّ الحيل
نميل برّانا نلقانا معاً ضد البلاد
ان عسكرت بالخوف هوانا
وجرتقت كل المطارات بالرحيل
هدّام جروف وعي الولد
هاجر وريّح بال
وبال الروح
ان سافرت منّا حمامات الحنين مجروح
نخش جوّانا نلقانا علي خط التماس اتنين
نوازي البرّه بالجوّه
عشق حدّ الكفاف
ضدّين ونتلاقي
نعلّق في القطاطي علم بلد
ويرف
ترف عين الحبيب وتلف
تكوس عن العباد
صمتاً وقوف
في كل رصيف تنمدّ ايد
يا رحمتك
اذ كل ما سبّح اما م
يفرد شراع الجهجهه عاماً
ونام الكل
وعام في بركة الغبش النعام
دافن جمال معرفتو
صفّق في الزحام
لي كل امام
يسرق من الواقع رغيف المرحله
ينقصّ في الحلق الصراخ
ومع الغياب نتماهي في الوجع الاسيف
يا كم نزيف
وانا كلّ ما حبيت
اقيف
ارجي الخريف
يفوت حصاد القول حريف
مدبّي لابد فيهو زيف
ينخجّ جوّاي الحنين والروح تميّل حيطتا
واقيف كما لو كنت شاهد قبر
او شاهد علي مجنون
مجنون ؟؟؟
مجنون بحبّك ايوه
برقص سامبا نص الزهلله
والولي ارقص كمبلا
اطراك تبشّر لي غياب
والصفقه ما بتكملا
ما الكلمه كل ما بقّ ريحة صندلا
تنشرّ في الشارع قصيده
رجت مواعيدك تجيني واكمّلا
ارحل..
ارحل اذاً منّك جواي
او حصّلك في آخر الشارع ولمّك من غناي
بس بسألك
لو اذا حبّيتك
هل
تقدر تطول زيّك وتشبه روعتك جوّاي
عشان اتقبّلك ؟
واهبش ملامحك برّه
دافرك جوّه ...مرّه اتأملك
لو عارفه بحبّك كيف
لو عارفه الصيف بينز
في وريدي
و غرف القيف
انخرشت فيها ألوان الطيف
كان بدري صحيتي
و مرقت منّك
جملة روحك
سمحه
تونس في جواي الغربه
و ناضم طيفك
ريق غنواتي
و جفل الحزن بعيد
منّي
لو عارفه عيونك كيف
ما كان غمّضت احساس
احساس الخطوه الجايه علي
و انا من يوم شفتك
بل رميشك حلق الذاكره
و نط القول
من ايد الشوق
و ندهتك
حتّي الشوك آ بنيّه
الفزع
انطعن الحيل
و عويل الصبر
انمدّ شوارع جوّه الجوف
لو عارفه
خدودك كيف
امّات الدمعه تنقّط
طق
و يسيل جدول حنيتك
طق
وجعه ورا وجعه
و طق
دمعه ورا دمعه
انطقّ المرق الساند
جدول فرحي
اتلخبطت
اتشظي وداري
اتشتت في المليون ميل
احمر اصفر ازرق اخضر اسود
بمبي
جمبي جنيات الحب
الحان مختلفه
زمن و النسغ الحي
في قصيدتي ينوح أحّي
يا حليلك لو أطراك
و تبشّري لي
موّالك يلمع ضي
لو عارفه
بسيمتك كيف
شفتيك بيناتهن ورده
اتفتح طين البال
الندي سلّم
أهلين
مقرن
نيلين اتلاقو
ارتبك الحب
و حبيت
قنّبت حداك
ضلّك هدهني نسيم
و نسيت انّك جواي
و أناك جوّاهو أنا
و بقينا سوا
واحد في صيغة جمع حنين
لكني حزين
ليش ليش
و الحبل الشعري فردتو متين ؟
لو عارفه الشعر بريدك كيف ؟
يدّي كتّابة النم
دوبيت الدم
و العطر اللاح في الجو تم تم
و السكّه
براح الغنّايين
وطني
و بني شقّيش ما تلفّت
تلقي غلابه
حكومه عقابا
تفنّك بالمافيش
و طناش الديش
الدين
الدين
الحمّي
غبش
و عمش
و بني صابرين ايضاً
و شوية شفّع
دقّوا الطار
قنطار ألعاب
و اصحاب شايفني براي
يبراني النوم من جاي لا جاي
يا الجيّه متين
لو عارفه بجيلك كيف ؟
زي ونسة نجمه لبت الليل
زي شعرك
حين انسدلت روح الغنوه ضفيره
و هيلا هيلا
يا ام احمد دقّي المحلب
و لمّن كنت صغيّر و يافع
كم في الخط من فكره و فطره
و زي
زي شبّالك يمكن اجيك
لو عارفه غيابك كيف ؟
ابداك و اطراك و اقراك و انساك
انساك ؟
كيفن انساك !!؟
بشتاق يوماتي
و برضو براي و معاك
لو عرفه مقيله و قلوة بن
في قلبك كيف ؟
يا حلاة الكيف
و انا ضيف و نضيف من حر الصيف
اضّاري في نفسك
اطلع برّه
و اخش رئتيك
وانوم و انوم و انوم
لو عارفه
حلمت بباكر كيف ؟
حسناً
شكراً
لكن لو بس عارفني بريدك كيف ..؟
يا صاحبه أوعي تودري الريد
ضمضميهو في حشا العين
لبّسيهو بنطلون وعيك
قميص الشوق نضيف
أي مشّطيهو بالتبلدي الذاتي
في الغرب
البنات ساكت يعوسنّك كلام دافي
يصرّن نكهتك في الواطه
يحلبن الكتابه من الشدر
ويونسنّك بالعديل والزين
و زول في العين
سرح غادي
يغدّي شفع الموضوعي
بالدوم والقطاطي والنخل
ما تصدّقي انّو الحكومه شمال
وانّو في الجنوب مافي تمر
حتّي الشرق
فيهو دواليب للمحايه
المن جبل مرّه بتسيل جدول حنين
ببداني بالريكه
واملاني بالويكه
ادق نقّاره
واحتار من مشي الطمباره
في ود عين مسامتي
اشوف سيف البطانه
قطع مشاوير الرقيص في الداره
واتحزّمت
اتلزّم فمي بالانتباهه
رطانة الامّات
رموا الشبّال شرق ادروب
وادوب في كوب لبن انساني
من دوبيت شلك
شكّوني بالابر الحلال
وياالحلّال
كضب لو مرّه
قلتي الواطه حقّت شمله عربانيه
فيها الضيف قدل
والنيل ملك كل الزنوج
قوليلي كل الناس سواسيه في الحنين للحب
سواسيه
والقلب لونو براهو سمح
طنّش سؤال اللون
الضل فضح ابيض جسد
سودنهو
ما غربنهو
ما شملنهو
ما شرقنهو
ما جنوبهو
حرّيتك مدي عرفة بني زهنك
لادلجة العواطف بالنبيح الجهوجي
لونك كتاتيح السكات
انفك يشير للسكّه
هل شمّة عطر ابيض حتنفع
حين هديلك امّهاتك
زغرتو نادوا العيال
اوعي تحاربو ساي
اهو الصاج انطفي
والكسره محّنها الملاح الفي القصايد
نشّفت جتّة نهاراتهو
السراريق
المطاليق
البعرفو الغش وعش المال
أيا زول انستر
مالك ومال الهضربه
حمّاك تفتّش ليك طريق
ترصف لايديك الحريق
وتسمّعك صم
للمساكين الرجوك في باب سياسة عرفتك
يا بنيّه ما تبري القطيع
دايرك براك متفرّده
وافرد عشم قولك جناح
واطير بعيد جدّاً
قريب منّك هناك جوّه القلب
بين ضفّتين انزل
واسلّمك العواطف سالمه
ما انكسرت حداي قولة بريدك
او بغنّي للشباب اصحابي
ياااا اصحابي وين انتو
لبد فيكم عشم خمجان
تشلّعو كل يوم راكوبه
تشّانا البرد
ما قلتو ايدينا سوا
نبني غرف وطني سوا ؟؟
يا صاحبتي
ما تسأليني عن تواريخ للسفر
يوماتي بدخل لوحتك
وارسمني جنبك يااا سلام
ما بين شهيق الرحله والراحه الزفير
اذّنت حيّ علي العشق
كل المشاوير الشفافيه الصدق
كل الاماكن عيّطت
نادتني قبّل جاي تعال
ومرقت من مخ النشيد
خلخال نخلة الحب
يكشكش
كش
بحبك
مات صبر
صفّر قطر راحة الضمير
وكواني بالحس المتين
كم حول و أحول كنت
يا نفس انتظار مركب رحيل
احلم اطير
واعدّي للحب العديل
ياصاحبه بيناتنا الحوار
شوفيهو لمّاع انحني
بيناتنا حلّقت الظنون
ومسحنا نجماتها بهمّ الاسئله
وانا ما بهم
ما انت لي
زيّ النخاع الشوكي للورده ام رحيق
حرقتني نارك
باااااارده
ضاريت الزعل واشتقت ليك
شاكلت ناس حلّة اناي
انتي براك لو تفهمي
وتسوّي شاي للزهلله
يمكن حنفهم ريق مزاج الامكنه الجوّانا
نحلب دمّنا احساس صبي
ونبي الكلام يعرض
وتاني يلمّنا
يا صاحبتي
وكتب أيضاً .. ذات مساء (مليااااااااااان حُب)
تعرفي
كلّما اهش صورتك جواي .. تفر جموع طير المحنّه و جنّه من زحمة تفاصيل المسلامه .. عندما ارتشفت عسل يديك ذات لقاء .. فارتجفت يداي كما شاء المطر .. لم اندم حينها .. لكن عرفت ان هنا يكمن الخطر كلّه .. أن استبيح عورة شقاي .. أديك اوسم غنيه من دفتر بهاي .. اهتف معاك تحيا البلاد المن لهاث ليلا الجريح .. بتهئ الزول شان يصادف زول مريح .. و اهتف براي إنت المسافه البين خطاي و الاسئله .. بمشيك طريق و اصلك معاي .. يهتف نزيف فوق يا وريف حزنك شفيف .. و كدا تصمت الرقّه .. و ينشغل العطر بالمكان الخالي من زحمة سواي .. و البحر ذاتو يشتهي لو اقرّب و اختفي في زرقة الموج الندي
شفتي كيف ؟
يا بت
قد أكون مفقوداً فيك
ابحثي عنّي
سأبحث معك
حسناً
اتذكري تلك الممرات الخلفية للذات التي ذكرتها لك ذات حنين ؟؟ سأعبرها كلها الان .. سأعبرها منهكاً بتحدّب الرئتين من كثرة تنفّس صوتك .. منهكاً لحالة فقد تنهمر .. منهكاً لتصحّر لوت الكتابة حين انت بعيدة .. قريبة داخلي و لا أراك .
سأعبرها و أفتت الالغام الملقاة علي جانبي سكاتك
ممر سرّي يؤدي للسهر
اكشح كلامك في الخيال .. انقش علي النيل رسمتك .. اغرق
ممر سرّي يؤدي للخطر
أشرح حدود اللهفه .. ترهف ضحكتك .. أجفل
ممر سرّي يؤدي للفتر
أنتح محبّه .. أطش في خلاك .. أعطش
ممر سرّي يؤدي للوتر
أفرح لهذا التوتر .. إذا ما حضرت .. اغيب
ممر سرّي يؤدي للعطر
أفتح خياشيم النعاس .. أتحسسك .. احلم
ممر سرّي يؤدي للصبر
أجرح خلايا الدم .. يسيل نمّك .. أغسل من الدم كل هم .. أرقص
ممر سرّي يؤدي للمطر
[quote="ريانه امام"][align=center]وكتب أيضاً .. ذات مساء (مليااااااااااان حُب)
شفتي كيف ؟
يا بت
قد أكون مفقوداً فيك
ابحثي عنّي
سأبحث معك
حسناً
اتذكري تلك الممرات الخلفية للذات التي ذكرتها لك ذات حنين ؟؟ سأعبرها كلها الان .. سأعبرها منهكاً بتحدّب الرئتين من كثرة تنفّس صوتك .. منهكاً لحالة فقد تنهمر .. منهكاً لتصحّر لوت الكتابة حين انت بعيدة .. قريبة داخلي و لا أراك .
سأعبرها و أفتت الالغام الملقاة علي جانبي سكاتك
ممر سرّي يؤدي للسهر
اكشح كلامك في الخيال .. انقش علي النيل رسمتك .. اغرق
ممر سرّي يؤدي للخطر
أشرح حدود اللهفه .. ترهف ضحكتك .. أجفل
ممر سرّي يؤدي للفتر
أنتح محبّه .. أطش في خلاك .. أعطش
ممر سرّي يؤدي للوتر
أفرح لهذا التوتر .. إذا ما حضرت .. اغيب
ممر سرّي يؤدي للعطر
أفتح خياشيم النعاس .. أتحسسك .. احلم
ممر سرّي يؤدي للصبر
أجرح خلايا الدم .. يسيل نمّك .. أغسل من الدم كل هم .. أرقص
ممر سرّي يؤدي للمطر
[/quote]
باااااااااااااااااالغ عاصم ,,, ده غرق في بحر الحب غرق ما بتوصف
صارعتك شرقي
لابد في وريدي وفقري
سرّحتك يا الزول الجوّاي
بالقهوه الفكريه الساده
وقصايد سكّرها زياده
اتحكّر في جنباتك ضو
شهّدت عليك الشارع
بت الجيران
صيوان الحفله وكت غنّوك يا عريس
بلدك .. بلدك
ايدك مدّها للشارع
جرتقها رقيص
الدلوكه في خاطر الريد كانت بتدق
والشفّع حين ركّوا في قلبي
حسّيت بالدم
حيران نازف
متوسد المو
ضلّمت الساحه
الدلّوكه كانت بيتدق
دق دق دق دق
ورقصت .. عرضت
قعدت في نص الميس
انشرقت فيني العرفه
وكت سلّمت جراب الغنوه لاهل الكهف
النوم جابدني
عروسي
رقيصي
قميصي
وصحيت ...
دلّعني الكابوس
ادّاني الواقع بنيه
شكراً قلت
ومشيت
ما همّاني
لا رغيف
لا عشق نضيف
ما همّاني
ما الكل
احزان
بمبان
والجوف سكران بالاس...ت...س..لام
اناااا ضد السلام الزيف
انت
سائل حنينك مرّه
كيف والنزيف زي الطيور
في جو سماك مرّ
عفصت ترابك ريحة الغبن الحريف
فرّ النسيم فرّ
سائل وجع صوتك
رجع من تاني
ما سمعوهو
دخلك موت
صداك تشّاك
سائل كراعك
غشّتك
ماشي هناك قدّام
و ماك عارف
انّك رجعت بعيد
الي اوّل قيام الصاح
سائل ضراعك
هل مسك طورية الحاصل
فتح جدول كتابتك
للعيون الكفّنت شوفها وبكت
دسّت ملامحا في الدموع ؟
سائل شفاهك
هل ناضمت في يوم نداك ؟
او قبّلت خدالمحنّه
اتبدهل الشوق
يا صديقي
عندمارفّ الرميش للحب
وقع من الطريف شوك القبيله
وكل ازمات انحنائك
للصراعات الطويله
اهي الكتب
اتبخرت
مشت الحبيبه بقيت براك
لمتين ضراك ناشف
حيران وما لاقيك
عارفك تمام واعي
لكن ماعونك فاضي
لو بس
بهدوءء
لمّيت ما تشتت من نباهة العاطفه
اتحايلت
صدّقت انهزامك
و من بداياتك بديت
رتّقت سروال القلب
فرتقت ساس الحس
قريت
من تاني هذا الطين
بنيت
غرف الحنين
اكيد تلقاك
لكنّك فقري
يا الزول الساكن جوّاي
ضاريتك من قريش
لوّن مساك الديش
خرشك
جبد من جلدك العافيه
هبش فيك الشوارع
أذّنت
ندهت حضور الفكره
حين داك بكره
مخطوطة حلم
في قولك الدافي ونجض
طنّشت ليه ..؟
شرقي ..؟
ام كنت نايم وماك صحيت بدري ؟
انّ الغباش مسّاك
مسّح ضهر شوفك
باسئلة البحر
مدّك شحيح
جزر انتظارك هدهدك
هدّاك طاعون النبيح
في كل وادي تبق شمس
تقبض عليها وتحتفل
تطلع سراب
اتسرّبت جوّاك بلاوي الضلمه
كتّاحة السنين الغرّبوك
مالك نسيت انّك رهان الاسئله
جاوب اذاً
هل كنت في كل المواقف فنجري ؟
هل انت حين وحدك بتتزكّر تونّس ناسك
السمّوك قمر بعد الخمستاشر غياب
فلّيت من الماضي الحنين لي آدم الاوّل ؟
هديك الكعبه
حولك طوف
تواريخ انهزام العرفه
هل قطّيه في غرب الكلام
بتدفي عريك ؟
وين الشتا..
غطّيت نعاسك
وانطفيت
قرفان
انا منّك
بحبك!
ايوه
زول زيّك سمح!
حاول اذاً
تمشي مسافة ننستر بالشعر
او
نشعر بما فات من زمن
نلحق قطر انسانا
او
ننسي الحزن ونحن
نجن بالامهات الحب
ضفاير الآنسات الجب
نقع كب كب
عميق بال النهار يا رب
اذاً
هل طار من العش الودار
ولّا المسافه اتمشّطت بالانتباه الني ؟
كتبنا
في جدار الروح
بيان اوّل
كتبنا
الي الاصحاب
بيان فقري
اليك انت
فتّش رئة نفسك
تنفستك
هوا طاعم
تنفستك
نسيم انساني
حرّضتك عليك ؟
ام برضو غالطت احتضارك
وانتظرت الرب
علي ساحل دعاك والحب
وغيّبتك
فلنتخيّل
لو كان القلب مكان قدميك
مطلوب تمشي
علي كيف اللهفه
في حقل من الاشواق منثوره عليهو الاشواك !
يقدر حبّك يتحمّل
تحت تلاتين درجة صفر الوخزه
وما يتجمّد ؟
ما الالم احياناً بارد جدّاً
رغم القهوه
رغم النعناع
الفي اللفّه
لضرا الكلمات
لمّن تبدا
تكتب عنّك
في كتاب الريد الانساني
....
فلنتخيّل
انّك قدر الاحلام
لمّيت همّك في حقيبه
و سرت علي مهلك خطوات
اكتر من بكره شويّه
الريح هبّت
شالت في جرابا الاشواك
السكّه تمام
لكن ...
ماذا لو نار شبّت
في خشب البال
واتحرق الشوف
في ضلام زي دا
والهوي عميان
البت نادت ناس الشرطه
اتلمّوا عليك فكّوا البمبان
قالن نسوان الحلّه عليك جاسوس
اشعلت في كل بنات الدنيا حنين
رادوك
و
سرحت براك
ايد اتمدّت
شرحت خدّيك لي نسمة قبله
اتهندم عقلك
واتمدّيت في شط عينيك
تقدر تحلم بالحب تاني ؟
.....
فلنتخيّل
انّك تاني
شهّدت عليك الواطه
ونسجت الضو خيط وطلعت
لي فوق
املك تصل القمرا
طول النجمات والليل يضحك
نسمات تعبر في الجو تضحك
عصفور يضحك
حتّي الغيمه
تضحك عينيها
تنقّط مطره وتسقي الارض
طالع طالع
مع آخر درجه سلّم فيك
غشّاك الريد
بطلوع مرتاح للشمس
ما حصّلت
حسناً حسناً
فلنتخيّل
انّو صبرت
ورجيت الليل في محلّك
رغم حرارة الطقس
رغم الشفقة
شفقة ايديك لي زول فنّان
يمسك قلبك
يمشي الخطوه
خطوه وخطوه
مع ريدك ليهو هناك قدّام
وبديت بطلوع مرتاح
مشحون ببريق في عيون
تتمنّي حبيبه تشوفا هناك
تمام الحب
ووصلت
لكن
ماذا لو كان القمرا حجر
او شكل محطّه
الضو غسّل ايديهو حداها
ورحل الارض
تقدر تحزم قدرك ترحل للشمس
تكوس الضو ؟
تعرف يا حنين
يمكن تحرق اوراق الحس
يمكن تدفا
ما الحب التحت تلاتين درجة صفر الوخزه
محتاج يتغطّي
......
فلنتخيّل
انّك جازفت وسافرت
لنواة المركز في الروح
سلّمت علي الضو في بيتو
قيّلت معاهو وناقشتو
عن سر جنّة آدم وحوا ..
ما ذنب الارض ؟
عن حب يافع ..
ما ذنب الشفّع في القلب
يكبروا فجأه ! ؟
عن دقّة درويش للنوبه ..
ما ذنب الاخضر ؟
لون عادي
في صباح هادئ
فستان للشدر الفي البستان !؟
عن معني الحزن وكت يحتاج لصديق
في ساعة ضيق وجداني
اتراكم فيك ..
ما ذنب يدي تكتب عنّي !؟
.........
فلنتخيّل
حين تتسرّب جوّاك فجأه
انغام الناي
ترقص واناك
تبكي لغناك
في كل مسام
درباً لعشم مفتوح
لصبيّه تفج الرمله
وتجرح خيبة ظن البوح
يدفّق ريد
يروي الآهات
تنبت شجره
ترقد تحتا
تنجمّ كما اللون في لوحه
.......
فلنتخيّل هذا المعرض
شوق مستلقي في خط اسود
النوم ازرق سايل من اعلي الشبّاك
الباب مفتوح
علي ابسط حمره لافق بعيد لمغيب
ايد منبسطه
تتساقط منها الكلمات صفرا وجافه
حسناً
ماذا لو كان المعرض في السهله
والسما شالت مخزون المويه وانفجرت
تبكي
تبكي
تبكي
انمحت اللوحه
اختلط اللون باللون
ومشي
سابك بتحدّق في الورقه
بيضا ومحروسه بكم قمرا
فلنتخيّل هذا الاحســــــــاس ؟؟
فضّيت القلب منّك
غسّلت العصب
شرّيت العشق
في حبل الحنين
نشف الحزن حبّه
و سرّخت المحبّه
انسدل الشعر
احلي كما الضفيره
فوق كتفك و غنّي
ودّيتك بعيد
اقرب من رموشي
عاينتك تمام
فرّحت الغمام
قهوجت الاماكن
في جوّاك فاح
نعناع الوصال
و اتكيّف كلامك
بي لغة الغرام
ناديتك تعال
خش في كل حتّه
شخبط في جداري
اسمك و ما تبالي
بس اوعاك تداري
شكل الابتسامه
لمّا تحن لكلمه
تشرح انتظاري
في سكّة مدارك
قطر الحب ركبتو
كالاطفال رسمتو
جوّاي و ركبتو
احمر و مره اصفر
ازرق من سماك
ابيض من حضورك
لمّا تهل بدورك
بمبي و مستحمّي
هادي اذا الفراشه
غطّتني بقميصا
يا متعة حديثا
بشرح انتظاري
في سكّة مدارك
هاك
الورده
دي
بسأل هل وصلت ؟
ازعل و ما يهمّك
امشي و ما يهمّك
ارح و ما يهمّك
ارجع و ما يهمّك
و ما همّاني انّك
همّيت لمّا افتح
دفتر فيك و اسطّر
ما دسّيتو عنّك
من شوقي المحنّك
حبّيتك لأنك
أرضك جنّه لي
احلي متل ضمير
ابيض في الحمايم
طينة حب حميم
و فصل من الحنين
كل ما اغزو قلبك
تنده كل سهامك
ينطلقو و يصيبو
كم فجّة تعب
في ورقك تلمّك
و حبرك يشتهيني
و ريشك كالطواقي
في شكل السواقي
مسقي بكل لون
في راسك معلّق
و ديمه هنا احلّق
بينات النسيم
ما هم الخساير
لو كل ما اراك
القاك انت ذاتك
ناير و ما بتساير
وجعك تنطفي
تشعل خيل حنانك
اجي في التو الف
صرخة حرب فيك
صرخة حرب فيني
ما كل المعارك
انك ما تفارق
انك ما تفارق
انك ما تفارق
فارق معاي جداً
الاقيك و انت مارق من شراييني و حزين
فارق معاي جداً
احرّض عنكبوت في القلب
ينسج شبكتو
يقبض علي الحب يربطو
في الشارع الخلفي لذاتك
فارق معاي جداً
اذا ما الدنيا حر
وحّيدي في كل الممرات انتظر
حبّة دعاش
حتي الفراش
ندهك معاي
فارق معاي جداً
اناديك ما تجي .
و عض النجم انفي
اجنرحت كتابه
ركّت فوق همسي
و سال الضو شفيف
شفت قليبي منفي
جوّه عيون في بالي
يا حال انشغالي
بالتي في خيالي
و يا حيل انتظاري
لمّا سؤالي عنّك
تاوق لي جوابك
و ظنّيتك كتبتو
لكنّك جدعتو
في شارع بلادي
سلّم للقطاطي
و قال للنيل حليلك
لمّا يقيف هتافك
و يلقي الريد كقيف
شاهر اعترافك
انّك زي كأني
و انّي فيك و اغنّي
تلوّح لي تعال
اتلهّف و اقيف
اريم في ترابك
خط و ارجاك تنط
لكنّك تفط
سطري و ابقي مافي
و لمّا تهل عيونك
كالغيمه في سماي
و اطوف بين جفونك
تتكّي كالحنين
في ذاتك براك
و تهم كيف اكونك
هل انساك و اقول
صاح يمكن بدونك
برتاح للمقيل
في ضل الوريقه ؟
يا هذي الحريقه
بكتب كم طريقه
لي وعي الهتاف
بالقلب الفتحلك
ابوابو و ندهلك
علي مهلك تخش
تنستر الضفاف
هل انساك
و اخاف
انّك هسّي ماف ؟
و انا بتمشّي
في شارع الروح
بالضبط كدا
في ساعة بوح
لاقيتك واقف علي كيفك
اشّرت و طيفك ما اهتمّ
و انا كنت في نص كيفك مخفي
لكنك وحدك مستني
اتحسس صوتك في فمّي
تعرف يا حبيب
انا بتوجّس
افضحلك مرات احساسي
بشتاقلك
لكن لو تدري
عن قلّة حيلة نجماتي
برّاقه بتلمع و اوراقي
سمّتها شوارع آهاتي
فتران من دونك اكون وحدي
و اظنّك برضو بتلمحني
حين اشرح لليل ساعاتي
يحتاج ادفّق في وريدك
ارويلك وكتك بهديلي
بحتاج اتنفّس ترتيلك
للزمن الفهو بناديلك
بحتاج يا حبيب
اقعد جمبك
و اضمّك و احكيلك عنّك
يتكيّف لونك
و ترسمني
في بالك و اشتاقلك اكتر
بحتاج انا اكتر تستعجل
لو تمسك ايدي
و نتمشي
في شارع الروح
بالضبط كدا
من دون ما نروح
في انا و انت
ما نحنا اتوحدنا في غيمه
و الغيمه بتهطل في بيتنا
و البيت احساسنا بلون مخفي
في ذات الفجه الفي قلبي
وكتين اندهلك و تسبقني
لوريد الشوق
و اصلك بضحك
تزعل و اصالحك بي ورده
من قلبك ترضي
و نتمشي
في شارع الروح
يا حبيب يلا
يا حبيب يلا
يلاك هسه
و برضو قاعد في محلّك
شوف قليبك
في عيوني
و ما تبالغ لمّا تتعمّد و تنسي
خطوه منّك
خطوه منّي
قلبي يفتح حسّو شارع
و انت تعبر
كالنسيم فارع دواخلي
و في دواخلك
لمّا نتونّس بتنسي
انّو انت
و الانا الجوّاي بتسكت
يا سلام لو عيني تنضم
كان ضحكت
و قلت مجنون
اصلي لابس لبني فاتح
و انت فاتح لون حضورك
و ما مصدّق
انّو اسمي
فوق سماك طوّالي واضح
الزهجلوجيا
مغامرة الكائن في فضاء المزاج
هديل القلق
هي :
ان اجترح في سديم اللغة خطرأ انيقاً لي
ان اصعد عتبة الجمال حتي أقاصي التهلكة
و
ان اتعرّي حتي توهّج احتشامي بقلب حبيبتي .
زاي
زقاق
نكهة درب شعبي
نفّاج عشب ازرق
زرقة قلب رجّاف
فتح الصباحات باب
انجمّ دم الطين .
ها
همّيت
هبّاني نسّام الشعر
بشتنّي
اتشهّيت عصيدة ريد
و بت تبداني
من فوق مرق شوشاي الصبر
تقراني
أقر بالحب
و اترجّاني كان اركز
المّ اشجاني .
جيم
جربت امشي براي
باراني الكضب
نسّاني شلّيخ الوهم لي خدّي
زمن اضحك نزيف
و القيف حزن ينتح
براح ضيّق
و لمّة ناس
مسممها النواح مرتاح .
لام
لمّيت علي خوفي
ضاريتو من شوفي
توب الضلام شفّاف
فضح الجسد نوّر
توّر عذاباتو
و انشاف سواد البال
جدع النجوم تيراب
نبت الشدر ابيض
تش البخور للروح
و اتحتّ منّو حريق
ريحة براي طقّت .
واو
واقف
سند طولي الشعر
اشعر بأنّي غريب
اكتب و اروح
في خاطري المجروح
مرّات اقوم ترتيح
اقراني للنيمه
نمّ البلد ضلّي
بلدي احتمال النيل
زمناً يفر عطشي
شارع ملان ألمي
و زمن يزيد ألمي .
جيم
تنّيت الجيم تاني
جنب الحلم سلّيت مراكيبي
حفيان من الواقع
جدّفت في المويه
و ركبت مركب شوق
شقّيت لحاف النوم
راجي الهتاف يطلع
من شارع الخرطوم
مردوم وجرّاري
يا جاري وين داري
يا داري ماك داري
انّو العمر جاري
و العشق مدّاري .
يا
يد الهواجس
اصفّق كيف وانا وحدي
اكيد
كتف النشيد حيشدّنا
صفقتنا يوم حتمدّنا
بالصبر
او بالتمر
او بالعمر
هوي يا ضدّنا
وينك تعال ما كلّنا
واقفين نبرّد حرّنا .
أ
الف الحنين
وحدك بحبّك
كم بعيد منّي الشقا
شقلبتو تاريخ العنا
عندك
لقيت ما فات
من الفات و السنا
يا
زهجلوجيا الازمنه
نيلين وقمريّه
رمله و رواعيّه
يرعو القلب في الليل
و صباحنا يا بنيّه
روّاب نضم هيّن
هيّن و ما ليّن
فجراً صحيت بدري
حمّيت كراع عقلي
سرّحت عاطفتي
و لبست توبي نسيم
و ركبت عصفوره
طارت معاها الغيم
ركّت في عينك بيت
نزل المطر دوبيت
و ما بينك و بين لونك
و ما بين البنات و الحب
و ما بين القبيله وكت تكون كونك
و ما بين القرايه ام دق
سؤال كمّك
و نوع دم الوعي في الدم
انا جيتك
صراع ضدّين عليك واحد
و واحد ضد صراعغ زمنين
زمن صاحي
يصحّي فيك مسامات الحنين و الحق
زمن تاني
يفنّك بالضلام تاني
و تاني من بداية آدمك تبدي
تكنّسي حوش سماك تاني
انا جيتك
أيا
حين جهجهات الزهجلوجياتونّسك
و ترتّبك
و تذكّرك بي مختلف
هل نأتلف ممكن سوا ؟؟
يا عقلنة هذا العشق
قلبك نوي
خلّيهو درويش الجوي
وينك
نبات حيلي اكتوي
صفق الصدق
صدق الفروع الفي السما
شايلات قمح
و اعصابي بايتات القوي
اتراكم الشوق هل اذاً
ريق المسامات ارتوي ؟؟
يا زوله جيت
نهد السؤال اتنفّسك
يا زوله كيف
و الزهجلوجيا الصاغت احزانك هنا
حرنت اجيك
بالايدلوجيا الحب غنا
اوعاك
غلاطك بشرحك
يمكن افوت
........
ياااا ربكتك
فضحت سكاتك و وجعتك
هل تذكري ؟
راهنت انّك زي بلد
سمّنها في ايدي
اتر نيلها
علي باب الوريد و الريد
حماس نساني حمّستك
و عرّيت الدواخل فيك
برق نجمك
فردت جناح شعور شعرك
عرشت البال
رقدت الليل
اعد نجم البعاد الطال
سهرت الولي فيني الصاح
و صاح انّك معاي كنت
كما نخل البرق شاهقه
شهق ضوّك
تنفّستك
وقع منّك بلح قولك
و رطّب كبد ماعوني
و ما بينك وبين الزهجلوجيا من البلاد
طلّيت
و ما بين البلاد و الوهجلوجيا من العباد
طلّيت
و ما بين العباد و الزهجلوجيا من السكات
طلّيت
و ما بين السكات و الزهجلوجيا من الموات
طلّيت
و
طلّيتي
معاً صلّينا غربتنا
و مغربنا
دخلنا حوش حوار الذات
و كم ليلات واصبحنا
جدعنا في الشوارع همّنا
اوراق عمل
اركان نقاش
في اليد بيان
في العين حواديت للجنا
نتمنّي
لو صاحب يضاري ها الضنا
و مشينا كدّاري
مرات يغالبنا النعاس
مرّات هزيم الزهجلوجيا يمدّنا
بالمن و السلوي
نهيم
و هدمنا في الخاطر
زمن اعوج
و حاضرنا
مشي يحاضر دفاترنا
و بكرانا
يحندك في الشعر
تيرب حداثتو
و ما حديث الواطه
الّا انهزام القمرا
هل قمريه فيغصن الكتابه حتنتبه ؟
و تغنّي احلامنا البلد ؟
و ولد وبت ؟
و الروضه
انسنة السياسه الجب ؟
و تاتينا
كبرنا كان حلم مغشوش
صحينا
كان درب منفوش بسم الشوك
طعن ايدنا
و تاني
من جديد صلّينا غربتنا
و مغربنا
دخلنا حوش حوار الذات
و فات الفات
تلاته بلاد
انا و انتي
و بينّا الناس
توحدنا
علي باب الحنين مسدار
قرينا الزهجلوجيا كتاب
و تاب الحس !
و تب فتنا
اذاً
هل حب
قلب وطني
و راكوبه ؟؟؟
فتحت السما
لقيتك هنا
ندهتك تعال
اجاب الهناك
بأنك براك
وقفت في ضراك
الملم هنا
لارحل هناك
تماماً اراك
و ما اندهش
لأنك اذا
فتحت الكتاب
بتلقي السراب
بيحفر غناك
بتلقي التراب
رسم لون معاك
كضو و اختفي
اهو الضد رمي
وسادة رؤاك
اذاً ما به
كلام الهنا
اذا من دماك
مشيت لي براي
كشاهي المزاج
اكيّف اساي
و اكتب غناي
لبكره الهناك ؟.
طنطن وطني
قال : ( الجفلن خلّهن .. أقرع الواردات )
قلت :
الشوارع ؟
قال :
البكانات ضلّمت
ابريل حرن
ما نحتفل بالفات
قلت :
الشوارع ؟
قال :
وكت قنّب جنا الروح
فوق جرح امّاتو
ما لامنّو
بس قالنلو
افتح ما مضي من فكره
لي آخر الم
و اكويهو
تهبش بكره مرتاح للحوار
وابنيهو
ما قالنلو
طنّش هسّع الزمن الغباش
خلّيهو
بس قالنلو
امشي ابنيهو
واجه حس نضم زيف المكان
لا تفز
ايادي تهدّم الهدم اللصق
وسخان يهد جتّتنا
هوي لا تفز
مصير العطر منسوب للورد
بلدك محل قبّلت ما بتختا الحلم في النوم
و في الصحيان تدافرك بالحنين للحي
حليلك لا تقول أحّي
تعال منّك لها حاحي الصبر يا جني
ضهب لون الصباح سكّتنا
يا سكّة سفر للقهوه حين لمّتنا
يا لمّة بنات زغرادهن الطمّن غنا عرفتنا
يا شردة حرف في البال
يبل شبّال قصيده روتنا
يا فرقتنا
نبكي حين يموت التاني
ما نبكينا موت في موت
حدا لمّتنا في بلداً بموت وحداني
كيف نبكينا والوجع المشوّه فينا ؟
ما دافرنا شارع بالوكت دارفوري
ما شرق الهتاق بالضو
وكت ضلّم هناك في الشرق كم عصفور
و لا خرطومنا يوم مرقت تثور
حين الجنوب جنّ بكم مليون مشو تحت التراب حنّ
بكم ابنوسه بتموت بالرصاص
صنّ
و في فت فزعه
كورك للايادي تشيل حجر
تجدع هناك في دولة العرب الفسيحه عدو
دحين كيفن عدو الانسان حدانا هنا
نقوم نبرانا نتهجّي الهناك للدم؟
ايا زول انستر بالنم
و فتّش نيمك النايم
بدورك يوم تحت ضلّو
و اهبش فيك حزن مرتاح
قبل ترحل بعيد منّو
لانّك دون وعي بالذات
و في وكت الوجع بالذات
اخير تطراك
تعرّف لون سماك وغناك
تضخ في نكهتك رؤياك
شوق في شوق
تراهن كم مدينه و دين
تراهن كم زقاق و حنين
تراهن كم وكت في العين
عشان تعرف
حدود الخطوه منّك للذي بي وراك
تعرف طنطنة وطنك
و طن هذا الاسي الفي الريد
و ماهو الريد
اذا لم ينستر فيك الحبيب
بالفكره ؟
ان الفكره انسانك
تخت ايدك محل لون الطمي و تقراك
تقرا التاني
تتمنّاك لو هبهن مزاجك اختلاف التاني
تحشد احترام و امان
و ترحل للحوار
نتلم
اهو الشارع اذاً اهتم
اهو البت ناقشت معني الحنين في الدم
اهو البكره الهناك هنا
و رفعنا علم .
يا حبيب يلا
و انا بتمشّي
في شارع الروح
بالضبط كدا
في ساعة بوح
لاقيتك واقف علي كيفك
اشّرت و طيفك ما اهتمّ
و انا كنت في نص كيفك مخفي
لكنك وحدك مستني
اتحسس صوتك في فمّي
تعرف يا حبيب
انا بتوجّس
افضحلك مرات احساسي
بشتاقلك
لكن لو تدري
عن قلّة حيلة نجماتي
برّاقه بتلمع و اوراقي
سمّتها شوارع آهاتي
فتران من دونك اكون وحدي
و اظنّك برضو بتلمحني
حين اشرح لليل ساعاتي
يحتاج ادفّق في وريدك
ارويلك وكتك بهديلي
بحتاج اتنفّس ترتيلك
للزمن الفهو بناديلك
بحتاج يا حبيب
اقعد جمبك
و اضمّك و احكيلك عنّك
يتكيّف لونك
و ترسمني
في بالك و اشتاقلك اكتر
بحتاج انا اكتر تستعجل
لو تمسك ايدي
و نتمشي
في شارع الروح
بالضبط كدا
من دون ما نروح
في انا و انت
ما نحنا اتوحدنا في غيمه
و الغيمه بتهطل في بيتنا
و البيت احساسنا بلون مخفي
في ذات الفجه الفي قلبي
وكتين اندهلك و تسبقني
لوريد الشوق
و اصلك بضحك
تزعل و اصالحك بي ورده
من قلبك ترضي
و نتمشي
في شارع الروح
يا حبيب يلا
يا حبيب يلا
يلاك هسه .
[/font][/size][/align]
