إنتو سمعتوا حكاية البت الصارت وردة
كان في مرة من المرات
وكنت بغط في نومة عميقة
وجوة النومة حلمته
بأني بغط في نومة عميقة
وجوة النومة أنا كت حلمان
جات ( نادوس )
ووقفت جنب الشجرة
وكانت شجرة غريبة شوية
أول حاجه هي كانت نخلة
وفجأة إتقلبت شجرة حنة
وكان زارعنها جوة النومة الأولى
وضلها رامي لغاية النومة التانية
وكان في الأولى بتثمر ( ويكة )
وجوة النومة التانية تشيل قندول ( الدلكة )
.... حاجه ....
نرجع تاني بداية القصة
جات ( نادوس )
ووقفت جنب الشجرة
الكانت نخلة وفجأة إتقلبت
شجرة حنة
ولمن عرفت إني مبحلق فيها
قامت هي براها إتقلبت ( وردة )
وكان الدنيا ضلام
وكان الصيف يادوب في بدايتو
ومافي غمام
وكان الموية بعيدة شوية
وخفت البت الوردة
تموت عطشانة
وإتبخرته وصرته سحابة
ولامن جيت بي قصادا
نزلته مطر
تقوم يا زول البت ماتصدق و (شربتني )
وجوة الوردة
لقيتلك نوسة فرحته
( أجمل حاجة تلاقي حبيبتك جوة الوردة )
إتونسنا قرينا شعر
وبرضو حكيتلها عن
البت الصارت وردة
وفجأة صحيتلك من النوم
وقلنا نكمل باقي الونسة
جوة النومة الأولى
وتاني صحيتلك من النوم
وكانت أبيخ صحية تلاقيني
وإتمنيت لو أرجع أنوملك تاني
وجوة النومة أنوملك تاني
وجوة النومة أنوملك تاني
وجوة النومة أنوملك تاني
وأسكت أنوم
وأيي إتنين في الدنيا بحبوا بعض
تقوم يا زول البت طوالي
تفرهد وردة
ويللا الود يتبخر ويبقي سحابة
وينزل مطرة
ولامن يلقي حبيبتو
يقوم يحكيلا حكاية البت الصارت ( وردة )
************************
القصيده كلمات الشاعر المرهف ياسر بيناوى
.
فوتو صوره وتحل فزوره
اصورك كم صوره اجيبك مسروره
اصورك كم كرت واجيبك شرط
خت صورتك فى البم
خليه يشكى وبراه ينضم
مامهم من زعلى اردم
المهم الف وادور
وليك القط اصور
افرح انور واضحك اقرقر
فوتو فلم وانت وينك ياعلم
خلى صورتك فى الحلم
وما مهم انظلم
المهم اكمل كم فلم
يا جماعة عندي دكتورة بحبها لي سبعة سنة ومافتحتا ليها الموضوع وغير المحاولات الشعربة دي مافي حاجة بتصبرني
ريدتي ليك حد العبط
بستني شوفتك كل يوم
لو كان الاقيك بالغلط
برجاك من فجرا دقش
راجيك عديل انا في الظلط
لابس كيس مخدة نومي كط
ولابس الملاية انا بنطلون
تحت الركب ماطيها مط
ولابس شبيشب امي نجوي
ومحل الحزام لابس شبط
وما اقسي لمن تمشي بالترحيل كمان
ببقي زي زول ممتحن قدا وسقط
الله يجازيك يا وجدان
والدكـتورة السبعة سـنين ماقادره تفمك دي دكـتورة شـنو
امشـي اكـشف ياخ امكـن يكون عندك سـكري
اتصـرف قـبال مايقول لـيك
Too Late
وتبقي عليك قصة الاسـتاذ محمد الجاك الصراف
Too Late
آاااه على قلبي
وعلى أملا حملته دهور
قطعت بحور
سواد الليل علي ليلين
صبرت كتير
و يادي النور
يا قطعة البلور
ويا رنة الطنبور
ويا سكر بنات الحور
ويا قصبة جروف أهلي
و يا رنة الطنبور
عليك اسم الله يا حاني
علي ما تجور
شفتك يوم عجبتيني
و قلت أقول
أنا الفي أولى داير أخطب؟؟
دا ما معقول
بقيت ساكت
فرحان بيك
أحدث زول و أدس من زول
و ماااا حبا أصيل و عريق
لف و دار عليهو الحول
لكن صحيح
الدنيا ما بتصفى و تروق لي زول
كربتو المعاك.. محلول
أتقدم و أتراجع و أتردد
لاااامن حصل محصول
إتمحن.. وقف
سكر مدلول
و قلبو المجرح بالملح مسلول
يا اللينة
يا شتلة فريع البان
ويا أملا بنيتو عليك..
وعشت زمان
أفكر فيهو لامن بان
بقيت للحسرة و الأهات
يا درة دامر المجذوب
ويا زينة الطالبات
و يا أمل السنين الفات
و يا طفلي الرضيع المات
إتحسرت و إتبهدلت ما خليت
ودمع نزل
وقت قات لي.. أووووه
Too late
طوعني الدكتور عشا البايتات
وعاد خطبوك لي زولا عريض و كبير
وعجنو كتير
و لابس ليهو نضارات
عربتو تسوي حي وا ليل
و حافظ الدنيا في راسو
وحاكي أشنابو نصطربات
دا عاد شغال و باني البيت
رضيتي بيهو طوالي
و ما قتيلو
Ooooh Too late
الشاعر الميكانيكي قال :
[grade="00008B FF6347 008000 4B0082"]يا واقفة بين صبري وتروس الفرملة
أنا بحكي ريدك للملأ
والجاني من بستم مشاعرك
بلفو طار بحكيبو لليل والخلا
وأنا بعذرك
وأوزن دركسون الصبر
وأضغط كلتشي الامنيات
لو ألحقك
يا الحنتها ذي زيت رجوع
أسود من الشقاء والدموع[/grade]
وقال جزار :
[grade="00008B FF6347 008000 4B0082"]يا طاعمة زي كبدة إبل
بالشطة والليمون شفا
أنا بي وراك سبت القطيع
ضل الدريب وعليك حفا
يا كاسرة بي فرار هواك
أضلعي .. وظروفي المؤسفة [/grade]
وقال مكوجي :
[grade="00008B FF6347 008000 4B0082"]يا كاوية قلبي قبل قميصي
رشيت لياقتو وما انكوى
يا ريتني لو أغسل دواخلي من الهوى
زي عمة بيضا أشرها
صابون هواك غسل النوى[/grade]
وقال نجار :
[grade="00008B FF6347 008000 4B0082"]مسمار ودقيتي
في خشب الليالي المحزنة
منشار هواك
قطع الصلات الممكنة
يا أبلكاش و فرمايكة
او تك خشب الجنوب [/grade]
وقال زول جيعان :
[grade="00008B FF6347 008000 4B0082"]يا حاجة أشبه بالرغيف
مرقوها هسع من الفرن
أنا بفقدك لما العيون
تشتاق أماسيك الشبع
واتخيلك قدرة
ورحيق الفول
ان شاء الله في أحلك
ظروف
ما نشتهي الجبنة ونطوف
كل الدكاكين مغلقة
والزيت صبح يا زيت مناي
ما في ونشَفِ
مصران مشاعري المرهفة[/grade]
هذه قصيدة جميلة لشاعر الحلمتيش المعروف محمد الجاك الصراف المعروف بإسم (المتشعلق بن المنبرش) قد أوردها شاعرنا الهمام منفل النور ضمن ردوده علي بعض الأخوة الذين كانت لهم تعليقات علي قصائده.
حــلـيل خــالك ...!
محمد الجاك الصراف
[grade="00008b ff6347 008000 4b0082"]الدُّخـْرِى يا ود اختِـى عِـز الدين
بآكـر تزور بيتنا وتشوف صورتى
وتقول : حبوبه ديييك صورة مِـنـُو الملصـُوقـَه فى الحيطه ؟ ! ...
يقولوا ليك : دى صورة خالك آ ولدى ... حليل خالك ! ...
أكان زولاً بشد الحـيل
يونسنا وكلامو لذيذ ... عديل بلحيل ....
كتير الناس تقول مجنون .. وما مجنون ...!
فى شيتاً جُـوّه فى قلبو يزاول ليهو حَامِى النـوم
يبـرِّم فى سبيب راسو ويساهر لى هوايد اللـيل
يقوم من نومو ضربة ديك
يفوت من بيتو بى ِريقـو زى الضيف
يشيل مُحْجَانو فى كتفو ..
وِيطـُـب مُخـْلاتـُو فى باطو..
وِيفارق الحله مستعجل مع هبة نسايم الصيف
وحفيان ساى ! .. يبارى القيف
يضُـرب الغابه وِتـْوَكـَّـر.. يحـِتْ فى ( السـّعَـفـه و العـُـلـّيف )
يهـز شـدراً فروعـو حديد
ولمّا العين تكون شافت قريب وبعيد ,
بهايم الحله تتوجه عشان ما تاكـُل المحتوت ..
يعاين ليها وِتـْبسم .. وما يحاحيها .. يمشى يفوت
حشاهُـو ضَـمرْ تقـول عجلاً مكـَدَّن فى الوِتِـد مربوط
بعد ماتـْغيب يقوم يرجع .. . يجيب نبقـاً تقول ياقوت
مغـسـَّـل بى دموع الحـُور ..
معلـّق فى رِقيبة السمحه فى البنوت
يخـُتـُّـو حداهـُو وِتـْـلـفــّتْ .. وجيهـو حزين ..
بدل مايقول بدور آكل .. يقول بس نادوا عز الدين
حليل خالك ... !
* * * * * * * * * *
[grade="00008B FF6347 008000 4B0082"]إن إسمي مستكاوي
للإساءة لست راوي
من يعثر لي طريقي
لن يفر من البلاوي
***
لا أميل إلى الحضارة
في زواياها البعيدة
في كلامي إستعارة
وفق آراءٍ سديدة
***
قد أزيد الشعر بحراً
في روايات فريدة
قد أعير الناس قلبي
وأبقي ماشي على الحديدة
***
ثم أطلب من يراعي
نظم أبيات شديدة
وأطربق وأنادي
في مواضيع عديدة
***
وأحيل الجو صحواً
فاتحاً أفقاً جديدة
وأطربق رغم إني
صاحب الرؤيا الرشيدة
***
وأدافر وأعافر
خلف حنجرتي التليدة
ما يليني من جضومٍ
فهي أورام حميدة
***
قد أهضرب في منامي
بالدجاج وبالمديده
وأحيل البوش بيتزا
يا لأحلامي السعيدة
***
وأهمهم وأرمرم
كالغضنفر والطريدة
وأخوض غمار حربٍ
كالأصابع في العصيدة
***
ثم أصحوا من منامي
رغم أحلامي السعيدة
كلها كانت هباءاً
كشمار في جريدة
***
وياجماعــــــــــة تعالـــــــوا نبدأ
نبدأ في ســـــــرد الوقــــــــــائع
والـــــــــــحقـــا ئـــق مستمــدة
مــن صميــم وحــي الطبيعــــــة
وفـــي قلوب النــاس نعايــــــــن
فبنا سئ وفينــــــــــــــا fine
ونــــاس ملولوة في طــــــــريقا
ونـاس مشيــــــــها as aline
ونـــاس تكرفس فـــــي وشوشا
وناس وشيشا طبيعـيshine
ونــاس drinking tea بقرفة
وناس دوام تديـــــــــهاwine
ونـــاس اساســـــــــا يوما عدي
ونـــاس ضعـــاف زي المـــرآين
ونـــاس عديـل مافيها كـــــــــدة
ونـــاس عليــها الغلب بايــــــــن
وزول قميصــو اللابســـو شــدة
وناس دوام في حال trying
ونـــاس بتنعـم بالمــــــــــــــودة
ونـــاس بتحلم تمشـــــــــي جدة
وفــي المنــــــام الكشـــة تبــدأ!! [/grade]
أريدك كيف ؟؟؟؟
الشاعر محمد على عبدالمجيد (الجو الرطب)
[grade="00008b ff6347 008000 4b0082"]اريدك كيف ...اريدك كيف وبيتكم انتو سابع دور
وريحة كلبكم ريف دور . أريدك كيف
انحن البيتنا جمب الخور وبيتنا الديما قاطع نور
ملاحنا الفول كمان بنحلي بالعجور
اريدك كيف يا زينة بنات الحور
انحن حياتنا مختلفة وقتين تقعدوا في الصفرة
وكل واحد حداو صحنو
عجب والله ورانا الزمن محنو
فرق شعب في وطنو
دا ما الخلي الحسن هاج فوق أخوه وطعنو
أريدك كيف وانتو بتاكلو بالشوكة
تغازلو اللحمة في السرويس تهبشوا صلطة المايونيز
وطبعاً دا كلو بالشوكة
ونحن ملاحنا مفروكة وبنعجنة كسري بي ويكة هنديك يمه بت الزين تعوس الكسري في الدوكة وتزيد خمار عجينة دقيق وتقولنا كسري مبروكة
دقيقة زواره في الشيخة هديــــــــــكه بهايمه مفكوكة
بتعوس يمه عقب لا تكل ولا بتمل تضاري دموعه بشوقه وقت الصاج يحر يسخن تهديهو يمه بروقه وتجيب معراكته وتمسح وتطعن فوقه طايوقه .
طبق الكسري يتندل تضاريو يمه بتوبه عشان أحمد وقت يقطع بجز الكسري من فوقة ويابه الجاي من شغلو وعارف الشاري سبلوكة بتسمع فوق سكاتو انين تحس في حلقو ديك العبرة مخنوقة
يشيل احمد يعاين ليهو تكنو بيشك في يوم باكر ويجر سبلوكتو بروقة ويصلي صلاتو ويستغفر .
تروح العبرة مفكوكة يصيح ليمه بت الزين هياااا ست البنات بسرااااع بطنا مطقطقة عروقة .
ونقعد في البنابر ديك بطنا الخاويه بجوعة
نبلع لقماً تحلف تقول ضفدع متلب جو بالوعة
بنبلع ومافي زول بمدغ سخانة الويكه والجوعة
والايد ماشه مرفوعة و ويكة سايلة لكوعة
نقوم من الاكل شله وجماعة وما اظن شبعو
هديــــــكه بيكابسو في الحله لكن ماهي كسري بي مويه من الزير أو القلة بنفرقة تمله بستله وهو انحن ملاحنا دا بنسمي ملاح
أريدك كيف وانتو ملاحكم التفاح يمين باباكي لو شافني ببلع في لقمة بلع صاح يحلف يقو جد دا ما زول دا تمساح
انحن خشمنا وقتين ينفتح تحلفي تقولي بس يتمزع ما بتمزع طق..طق..طرق بصل الاضان ممكن كمان يدخل ضلع .
أريدك كيف وانا كراعي التقول مكوه وقت احلم .. بحلم بأوقات في الغالب تكون بلوه .
أريدك كيف .. وكيف يتحب زول فطموهو بالقهوة .. وكيف يتحب زول فطموهو بالقهوة [/grade]
[grade="00008b ff6347 008000 4b0082"]لها سفة لو انها دخلت
بها يوما على واحد عاش فى
السجن وانقفل
لاصبح مهووسا بها ولهاج
واغتاظ وانفعل
منشية الكرعين
و الحشا
تكاسية الالفاظ
من شافها جفل
ام بدية الكعال
وسطية الضفر
كمسارية الحوار مقطوعة الاهل
محدبة الفكين
ريحتها بصل
لاعبتها السيجة حجارى ترادفت
ودكتها لاننى البطل
فلبعتها تسع وتسعون لبعة
وبلنجة اخرى وكنت على عجل
ثم انى حرستها على بابها
اربع وعشرون ساعة
لم يهمنى الحر ولا السقط
ولا اولاد حيها اذاما الليل
جن او دخل
عصاتى مدببة مضببة
ودراعى بها سكينة تجقد من تطاول
او سأل
ولم تعر الباب مرة لتعرف ما بى
لا انا اكل ولا هدمى ينغسل
واباك اذا ما مر بى ادسس وجهى
او ادنقر راسى او اكب الفلل
ومرة اباك لقانى فى الشارع
فحيانى وظننته فصل
وكم من مرة تمنيت لو اننى
دخلت توشا
لكننى اتردد حين يتملكنى الخجل
الدنيا قست معاى حين نشأتى
وحالتى شلش ووالدى يبيع القلل
ولانه حين ولدونى وسمونى
كانت سمايتى على سخل
وانت رغم صدقى وصبرى
يستهويك من له كريسيدا او كرونة
او حتى من يمشى على عجل
انا من له الجسم غريب الى الان
لم ازل اصفر اللون باسم
وانا فى الكتشينة اول من
نزل[/grade]
[grade="00008b ff6347 008000 4b0082"]رقه وظرافة ووشوشه.....وسهم عيونك موت عديل
..الحلاتها مطششا
صاب قلبي .........و الروح طفشا
آه يا رحيق آه يا يا بحر.......يا دروشه
عايز اشرح ليك حكايتي .....البقت لي هترشا
عيوني يا ست الجمال..ميتة في عيونك.. الحلاتها معمشه
ومن البكي شايفة الصباح ....ذي العشاء
وشفايفي رافضة الإبتسام لو ما شفايفك تهبشه
واضاني ذاته بقت معاهم...عايزه الاضان للوشوشه
وقلبي إتفكفك رحل......قفل شراينو ومشي
والكراع حلفت قسم...لا تمشي خطوه ولا قدم.. لو ما كراعك تطقشا
والغريب حتي الشبط...رايد جزيمتك الحلاتها مورنشه
ومن الزعل عامل حداد.......وسخان و حالته مغبشه
والعجيبه كمان قميصي......رايد بلوزتك الحلاتها مزركشه
ومن البكي شوفيهو كيف....اكماموا بايظة منتشة ومكرمشة
حتي البطن عملت صيام رافضة الطعام..منتظرة بطنك بالعشي
كمان المنام..عامل خصام.....مستني طيفك ليه...ماغشا
جيت للعقل إنت الكبير...خليك كبير..إتخيلي...سابني ومشي
قاصد دياركم تب عديييييل ...قائد المسيرة وهارشا
أها يا أموله ادينا رأي؟ إما تحبينا ونعيش..وحياتنا بالورد نفرشا
إما تخلينا ونفوووووت وايامنا تصبح مؤحشة
وانا ذاتي يا حبي الوحيد..يابت هدي...يا مهندسه
إما تحبيني وأعيش....وحياتي معاك أقدسا
إما تفارقيني..وتكون ايامي بعدك دبرسه
إما إتجنن عدييييييييل....وتبقي السبب في الهلوسه
إما إتهور واموت ...وذكراي تصبح مدرسه
يتعلموا فيها الصغار..إنو الوفاء انبل احاسيس و أقدسا [/grade]
[grade="00008b ff6347 008000 4b0082"]جلست في ظل النيمة
تتأمل في الودع المرصوص
قالت يا ولدي شيل شيلتك
وتسلح فالحرب ضروس
امامك مشوار طويل
الا ان تركب مخصوص
الموقف مكتظ مليان
ستدافر يا ولدي كثيرا
وستركب وسط النسوان
وستنشل كل نقودك
وستصبح دوما حزنان
الناس يا ولدي جيوش
مندفعة مثل الطوفان
فنصيحتي أن تذهب كداري
ولا تركب بص ام درمان
زواجك يا ولدي محال
أصبر يا ود الصًرة
حاليا وضعك بطال
وحتبقى حياتك مرة
فالمهر في كل الحلال
قد اصبح بالعملات الحرة
احببت فتاة مغرورة
لعبت بي قلبك كورة
أنساها وأبحث عن غيرها
ويا ريت لو شرطت الصورة
أنسى وتبسم
فالزوجة قسمة وتوتوكورة [/grade]
واحد من الشوايقه الحرامي نط بالليل وسرق بيتو ..
وصاحبنا زعل زعلاً شديد وقام يشتم في الحرامي
[grade="00008b ff6347 008000 4b0082"]تعيقني انا ؟؟
يعيقك الله يا مجرم ..وكيف هسع تسرقني ؟؟
تسرقك بطنك ان شا الله ..تخليك ديمه متألم
حضيري ان شا الله يبراك ..وفلساً للجيوب يخدم
والعطش اليحرق الجوف..يخليّ الفقرا قايمي وقاعدي ليك تعزم
تعيقني انا ؟؟
يعيقك الله يا مجرم..بمدفع كلاشنكوف ..يواليك في المسيمع عاد
يخليك لاسمع لا شوف
تعيقني انا ؟؟
نان بالله لو سألوك ..نان عميان من الاسواق ؟؟؟
تسوق اروتّي في ساقيه تورها يقطّع الخناق
تسوق لك داف تدقشوا ترلّه في عقبه .يخليك لاضهر لا ساق
حكمت تجيني انا المسكين ..البلقط بي قرش وقرشين
تقرشك عقرباً تلقاك فوق الريق يكون جسمك مرطب تب
تقرشك سمومة صيف ..تخلي وشيك قايم حب
وقرشاً يبلعك يسرع يلف بي جده والصومال ويجيبك لينا تاني هنا
يرميك في الرصيف بي جاي يخليك بس عضام وعصب
تعيقني انا ؟؟
تطرشق ليّ برنامج اخطط فيه لي سنين ؟؟
يطرشق فيك كمبرسور يخليك انت بس سردين
يطرشق فيك بوتوجازاً يكون جمبك صفيح بنزين
وترقد ما نشوف لنا زول يقول لنا ماشي في تحسين
تعيقني انا ؟؟
كمان تسرق ملاياتي المن كيسها ما انفكت ؟؟
ولا عارف نقوشهن كيف ؟؟يفكك مننا الله اليوم قبل باكر
يخليك لاف صيف وخريف ..
يفك ضلعك ..تفارق عقلك تسك الماشي فوق عدلك
زي جملاً عشاه الزيف
نفسك فاااااااااتحي ترقد فوق ملاياتي
ترقد يابا في عنبر نصيحو يشابي كايس ايدو
ترقد يابا في قبراً اعوذ ربي من هولو وعذاب سيدو
ترقد يابا في غرفه ..تكون مفروشه بالصرفه
ونملها يخمّو بالقفه ..
ولا تشوف جنّه بي عينك ولا في العتبه تتعتب
عشان عملك تملّي كعب ..تسرق الجيب
تسوي العيب
انت حرامي ود الكلب[/grade]
حبيبتي قديسة تبارك الصفوف
حينما نمارس الوقوف
عندها كل يوم أو نطوف
حبيبتي يحبها الألوف
رغيفتي
*****
لأجلك طلقتها العواسة
طلقتها ثلاثة
كي لاتحول بيننا قراصة
وكسرة
ياقبلة بطعم ثمرة الكمسرة
*****
كم وجبة تمر ولا أري محياكي
كم مخبز يحول دون أن أراكي
أصطلي بنار فرنكي وبيننا الشباكي
يارغيفتي
*****
لأجلكي دخلت شرطة المرور ِ
كي أراك دون بذل طاقة
فعندما أجي ُ
أبرز البطاقة
أقول للزحام عذرا ً
لأفسد النظام لكنني
أريد أن أري حبيبتي
قبل موعد التمام
هذا أصير في الأمام
رغم همهمات ِ بعضهمو
******
أراك عند الطاولة وأرتجف
أخاف ياحبيبتي من وزنك الخفيف
فجسمك الضعيف
لا يزال يعتليه وجهك النحيف
لكن صوتك الحميم يقول
لاتخف إنه الرجيم
****
أحبكي وأهلك رغيفة ٌ رغيفة ٌ
ألمكم أضمكم إليا في مخلاية ٌ نظيفة ٌ
أصيح فينفيعالي
حبيبي رغيفتي تعالي
أحبكي تموينا ً أحبكي تجاري
حبيبتي قديسة تبارك الصفوف
حينما نمارس الوقوف
عندها كل يوم أو نطوف
حبيبتي يحبها الألوف
رغيفتي
*****
لأجلك طلقتها العواسة
طلقتها ثلاثة
كي لاتحول بيننا قراصة
وكسرة
ياقبلة بطعم ثمرة الكمسرة
*****
كم وجبة تمر ولا أري محياكي
كم مخبز يحول دون أن أراكي
أصطلي بنار فرنكي وبيننا الشباكي
يارغيفتي
*****
لأجلكي دخلت شرطة المرور ِ
كي أراك دون بذل طاقة
فعندما أجي ُ
أبرز البطاقة
أقول للزحام عذرا ً
لأفسد النظام لكنني
أريد أن أري حبيبتي
قبل موعد التمام
هذا أصير في الأمام
رغم همهمات ِ بعضهمو
******
أراك عند الطاولة وأرتجف
أخاف ياحبيبتي من وزنك الخفيف
فجسمك الضعيف
لا يزال يعتليه وجهك النحيف
لكن صوتك الحميم يقول
لاتخف إنه الرجيم
****
أحبكي وأهلك رغيفة ٌ رغيفة ٌ
ألمكم أضمكم إليا في مخلاية ٌ نظيفة ٌ
أصيح فينفيعالي
حبيبي رغيفتي تعالي
أحبكي تموينا ً أحبكي تجاري
[/quote]
هههههههههههههههههههههههه
بختها الرغيفة دي [/align][/size]
