تقول لي سليتك ... تقول لي جفتيك ...
تقول لي عفصتك ... بعفصك وبعفص حنانك ...
دبايب عقارب تداعب بنانك
وكيفن هوحالك ؟
... سألت التمرجي : البطاطس بعادي ؟
تخيل تجاهل وقبل لغادي ....
فيها ايه لو مرة مسطول قال شعر ...
عن السحالي الماشة موضة على
الرصيف .. عن ضب بساكك في المعاش لمن فتر
... عن ديك بنقز في الحبل زي التقول بكر ...
عن صارقيلة تتمطى وتقول
يارب متين حنكون متر.............!!!
عالم مركب بالغلط ...
طاحونة بتبيع في
اسكريم ... راكوبة في نص الزلط ...
كديسة لابسة فانيلة كط ...
مستر عتود لابس شبط ...
الحفلة راابة وفنانا بط ...
التيس يبشر في الغنم ..
وخرفان مسننة واقفة لط ...
عالم غريب يابلد ...
قشرت الليلة شديت ليك قميص خالي وقاش عمي
ونعال صاحبي عشان ألقاك
وقفت كتير وإستنيت بقيت مسواك
حرارة الجو عمت عيني التقول كنتاك
وأسأل كل زول جاي عن الساعة أقول إمكن إكون في السكة
زول حاقد بي عربيتو قام كشاك
وأقول إمكن نسيتي التايم الليلة نسيتي هناك في زول إنشر وإستناك
هو يالغالية حنانك وين وين ميعاد عيوني معاك
أريت تقول لي أقيف وأستنى خطواتك وما بنساك
أريت تديني بالبنية وبي شلوت مدافع باك
وأريت شلوتك يجدعني ويرميني في صف تمباك
بقيف بستنى لو ترضي فطوري تسالي بي ترمس
غداي إنشاء الله بي كوجاك
أنا الفي الإمتحان طشيت وفي الملحق كمان قديت عشان بطراك
وأنا إتشردت من بيتنا وفي بابكم كتير دقيت خيم
لو يرضى قلبي يحن ويبقى حداك
تعال وريني كيف الحل وكل ما إنت تبعد تنأى عن عيني
بتلقى قليبي قايدو وراك
بقيت أنا والعذاب أخوان وأنا البي ريدو ما هماك
لو إنتي بقيتي عشوشة في الغابة بكون ود أبرق البهواك
ولو غيرتي رأيك دا بقيتي جدادة في الحلة بجيك طايع وأقول ليك كاك
واحدة من بنات الراحات قالت : انا عندي كديسة قاعدة اكله بيرقر واحضنه وابوسه وانومه معاي .
واحد أخونا إتمغس شديد فقال ليها :
ظهر اخر الزمان عادات دخيلة حديثة
بيرقر للقطط والناس تكوس للعيشة
ياحظ الكديس باكر بجر الشيشة
من بعد الشبع بوسه وكمان تحشيشه
وحظك يا الكديس الشلتو يوم ما شلتو
واحسن انستر خايف لساني افلتو
باسوك يا القبيح جامبو البراقر اكلتو
نايم في الحضن واحمر شفاها لثمتو
وبعد اكل الجقور شوف الكديس اترقي
ساب نوم الحيط وادوهو سرير في الشقة
راتل في النعيم والكيف برنجي وحقه
شبعان في القبل من الشبع انشقه
والله الكديس من قلبي ما عافيلو
ياكل في اللحوم بيرقر جداد بالكيلو
ونحن ننوم جياع نرضي الفلس بهديلو
بي سبب الكديس انسانه زاد تهميلو
شاحد للكديس من جوه قلبي البوره
لا يعرف بريره واريتو بالماسورة
يشحد للعضام للناس يمد الكوره
اجدعلو الشلن في بير لهب محفوره
الفار وقف جنب القفص
سافر خيالو سرح بعيد
لو اكرمو رب العباد
جكسوية واحدة من الجداد
يتزوجا .. ويعيش سعيد
تكفيهوا لا شركاً يصيدو
ولا كديس
تحميه من حظو التعيس
فطورو بيض
وغداهو بيض
وعشاهو بيض
أحلامو بيض
صاحبنا ما اتردد وقال:
قال لي الجدادة تعالى جاي
انا عندي ليكي كلام كتير
قالتلو هاي يالفار اخوى
ان شاء الله خير
قال ليها خير
بس منكسف
قالتلو قول ما تنكسف
الفار رجف
طقطق اصابعينو ووقف
قال للأسف
انا ما بقول
احساسي وضاح
ومشاعرى ما عايزة الفضول
الجدادة استغربت
اتنفضت واتهوززت
قاتليهو
ياخ ما تقول يا فار
صاحبنا قام
قال ليها طمعان في الجوار
الجدادة اتدللت
قاتليهو هيي ما انت جار
الفار سرح
راح الكلام منو ووقع
قال لي الجدادة بلاش دلع
لو جاكي فار طالب القرب
طالب ايديك
طالب الغرام من مقلتيك
رايك شنو؟
قاتليهو اييييييييييك
ما يسمعك في الحلة ديك
الفار كضم شم الوضع
شتت مشى
وعيونو من كتر الزعل
ما شايفة حاجة مطششة
ومشاعرو كيف متخربشة
حرد الفطور
حرد العشا
ورسم على جدار الزمن
صورة الجدادة ونقشة
وقال الجدادة قست علي
وعملت علي متحنكشة
باكر بعرس ستها
تمسح دموعي تقشقشة
[grade="4b0082 ff1493 4b0082 ff1493"]لو وصفوك مابوفو
ولو مدحوك ما بكفو
لانك انت في دنياي
لانك انت جوة دماي
بعزك جد بريدك موت
...بموت في وكتك الهداي
منو الغيرك بشيل الهم
منو الغيرك بزح الغم
يا احلي ملاك
عشانك انت يا السفة
بموت في دنية التمباك
*******
وكت جابوك بي النيسان
عبر بي دربك انت امان
وختوك جوة بطن السوق
ملوبك مخزن الدكان
وعبوك بي الرطل والكيل
عبارك اصلو بي الميزان
وختوك جوة بطن الحقة
ممطرة زي بخور نديان
يفوح الصندل المحروق
يفوح ينفح عبير الشان
وصفك طال مع الشباك
دهب موجود في كل مكان
*******
وشالك كل راقي ظريف
وكل من كان بيهوي الكيف
لانك انت سر الكيف
وسيل الراحة لما تقيف
تسل من روحك الاتعاب
تدقرا دي المزاجا لطيف
*******
ياما شالك الدكتور
عبر بي مشرط الف بحور
وياما شالك المفقور
وعاش احساس جميل مدخور
وياما شالك الفنان
عزف بي نشوتك الحان
وياما شالك البقرا
حفظ لي دروسو جد بي امان
انت الفرحة يوم جيتك
وانت النجدة لي الخرمان
*****
حلاتك وانت في الفطرة
وحلاتك وانت في رمضان
وكت ختوك بعد افطار
وجنبك جك عصير مليان
شعورا مابيقولو شعر
ولا بيخطر ببال الجان
حلاتك وانت سر الكون
مدغدغ فيك بي الكيمان
حاج الجمري كان بهواك
وود الباشا بيك ولهان
والشقراوي همو رضاك
وودالماحي بيك نشوان
وجردق لما يلقي الكيس
بينسي احبابو والخلان
******
تعال يا اخويا قرب لي
وسيبا عوادم الدخان
تعال انضما لي العالم
عالم بي المزاج مليان
فيهو الراحة فيهو الحب
وصل لي مراتب الادمان
فيهو الفن وفيهو الذوق
فيهو الافة والتحنان
تعال بس سف واتكيف
وقارن فرقو بي الدخان
******
عشان عينيك يا السفة
بقت في دنانا احلي ملاك
بضاريك انت من الجكس
خفتة يغيرو من محياك
ولو ضاقوك مابخلوك
بغلو اسعارك التالاك
بنيشوك تب يطقوك عين
لانك انت احلي ملاك
عشانك سبتة كل الكيف
وكيف غيرك محال يتلاك
عشانك سبت كل الكون
وماتت روحي في التمباك[/grade]
يا ناس يا هووووي تعالو عشان تبقو شاهدين أمونه بت ود الزين البت الخاطبها من سنين جاتني الليله زي قطعت الشيطان وقالت لي: على بلاطه كده ومن غير لا شمال لا يمين أعتبر العلاقة البيناتنا إنتهت وكل زول يشوف مستواهو وين!؟ طيب يا أمونه بت ود الزين واحده واحده وريني الحاصل شنو!؟ ولو أنا غلطان حقك علي متأسفين ولو إنت الغلطانه برضو حقك على و متأسفين بدل المره مرتين قالت لي :يا ود الناس إنت ما مستواي إنت زول رجعي .. زول مسكين وأنا زوله مستواي فوق.. فوق فووووق في العليين سبحان الله مغير المستويات أمبارح القريبه دي مستواك كان من مستواي ونحن الإتنين مستوى زي الطين بين يوم وليله بقى عندك مستوى وبقيتي في العليين يازول بطل جرسه وأسمعني داك خطيبي واقف لي ونحن مستعجلين ده خاتمك الجبتو لي هسع بالله ده خاتم ولا نقوم جاريين ودي رسايلك والحمد لله كل الجبتو رسايل لا خسرت الورقه أم عشره ولا أم عشرين كل الدعوه قزازتين بارد لا شفنا منك فستان ولا نعلين وأديني حاجاتي العندك وبي كده نكون خالصين
يابت الناس أستهدي بالله وأنعلي الشيطان وأجعليني ليك من الناصحين أدي نفسك فرصه عشان ما بعدين تقولي ياريت وندمانين نادمنين وتضحك قر على الكلمه والله لكن قال ياريت ونادمنين أندم على شنو!؟ سبحان الله فقر وعنطظه والله صحي ناس مساكين أندم على حفي الكرعين ولا أندم على الجوع وسخ الأيدين أندم على شنو!؟ لا أيباد لا أيفون لا لابتوب لا عطور لا كريمات ولا حتى فازلين قال أندم قال أندم على شنو!؟ على الكرعين المشققات من خمج الطين لاك دكتور لاك مهندس لاك محامي ولاك طيار زي الطيارين والله لو في ندم يبقى الندم على عمري الضيعتو معاك وفقدت منو سنين طيب يا ستي والله أنا متأسف أسف ..متأسف أسف أسف يسففني التراب ده كلو وأشتري تراب بالدين وأقول ليك حاجه أنا ما خسران إنتو الخسرانين عشان أنا أصلاً كنت مدبس فيك والحمد لله فرجت من رب العالمين وإسمك ذاتو مشاتر لا نيفين لا نسرين لا شيرين ولاك حلوه زي البنات الحلوات عشان ما تزيدي فوق الناس شبرين وإن لي قرايت الجامعه جامعتك راحت غسيل عده وفناجين و دي رسايلك وبالمناسبه خطك زي درب النمل جنس شخبته تحوص بي العينين ودي صورك كلها وبالمناسبه شكلك شين لا لون لا نخره لا إضنين لا خصر مضمر لا شعر لا حاجبين وأكتر حاجه مكرهاني فيك بطنك وضهرك الزي البرميل مدورين ما زي شكل الناس الحلوين الصدر البارز وبطن وضهر ما فيشين إنت بعاتي في شكل إبن أدم وأنا ذاتي مستغرب كيف كنا أنا وإنت عايشين ؟ وأديكي ردي في كلمتين عليكي يسهل وعلينا يمهل وزي ماغنى الغناي روحي إنشاء الله في ستين بس خوفي بكره تجو راجعين أصلو العرجه لي مراحه وإن ده حصل من هسه أنا داير أقرأ وأعتبريني في المدرسه مع العايدين
قدمت طلبي إليكم من مدة
صهينتموا مثل وزارة الإسكان
حبحبتكم حبا يؤدي بأضلعي سجلته بالفحم في الحيطان
أنسيت قعداتي مقاصد بيتكم
متفرجخا في عتبة الدكان
راجيكي تفتحي بابكم في مرة حتي أشوفك حايمة بالفستان
أو تكشحي موية الغسيل بجردل
ويا جردلا شالته أحلي يدان
أو تندهي لأخوك من شارع الظلط وأخوك كبسة معاكي في كل مكان
أنسيت جلساتك في حفلات العرس
تتجملين بأجمل التيبان ..
وأنا مصنقر ناصية في مقعد ومقهي فيك مسهي فيك مشحط العينان
وينقرش الطبال في طرقاته
ويلولو الفنان بالألحان
ويقوم ملعون يلوك بوسطه يدعوك للكاروشه في الميدان وتقومي ترقصي في الجمايكا بخفة
وتوزعي البسمات بالمجان
والكل ماج وهججوا مثل الجزيرة تموج بالفيـــــران ..
يا ليتني سما زعافا قاتلا
لقرضتهم قرضا بلا إحسان
حتي العريس وعروسه سممتهم وغرغرت باقي السم للفنان
جبت الكراسي كلها وردمتها
وأطلقت فيها حارق النيــران
كوركت يا ناس المطافئ الحقوا النار إمتدت إلي الصيـــــــوان
واذا أتوا ناس المطافئ قلت :
يا ناس المطافئ ثوانــــــــي .!
في القلب بارود وفي المصران ألغام فلتطفوا نار الحب في مصراني
أو تأمروا هذي البنية تحبني
ما دام أبت ريدتنا بالإحســـــــــــان
بحبك
منو القال ليك بحبك !؟
حصل شفتيني اتكبكبت ولا جريت انا في دربك
ما ساكت قدر مكتوب كان جابني وقعد جنبك
ولمن كان بعاين ليك
ماعاجبني لون عينيك
ساكت كنت بتسلي
وبفكر في خلقة الله
وقادر انت يا الله
كيف خلقك وكيف رسمك وكيف سواك غوريلا
ورقبتك ناطة منسلة
وراسك ذي غطاء الحلة وكلك توب وباروكة
ياملوخية مفروكة
وبرضك تاني ليكي امل
برضو تقولي شاغلتك اشاغلك ليه رماني جمل
