قصص تراث .. شعر و أغاني الحماسة

[waya]

البشيل فوق الدبر
كلمات / بابا
حسب رواية وغناء الفنان مبارك حسن بركات

البشيل فوق الدبر
البشيل فوق الدبر ما بكل
قدل شيخى للرباع مهيل

***
يا ناير الخوده
يا سرالرمى يا مكمل الجوده
الحاره أم دمى أنا شيخي دا بخوده
الجبل المغور حكار للدوده

***
ساقية ابوى طنت
تيرانك طرابه وقيره بتقنت
غنيلك ضحى والبشاقره تتصنت

***
سيدي وسيد السارحه بقيده
سيدي وسيد الساويه بوليده
سيدي وسيد الجديه بورهيده
كم جلسن دقون الطيب بفيده

***
غنى وشكريه الليله يا بنيه
ترمبيلو الملك بيتو الماهو عاريه
طاحونتو البتدور الماه مكريه
ايدك المطره الرعدت ودودت وصبت نهاريه

[waya]

بنونه بت المك

الشاعرة " بنونه بنت المك نمر " الفارس وشيخ الجعليين الذي حرق ( إسماعيل باشا ) إبن الخديوي محمد علي الذي غزا السودان في عام 1821م ، وذلك إسترداداً لكرامة المك نمر الذي قام إسماعيل بقذفه بالغليون في وجههحين رفض المك تلبية رغبة إبن الباشا في إحضار نساء للسهر معه هو وجنده في تلك الليلة التي أقيمت له عند زيارته لشندي بمثل رفض المك توفير جنود لزيادة جيشه الفاتح ..
والمهم هنا أن ( بنونه) كانت شاعره تراثية تتحدث بمضامين الفخر عن أهلها ، وظلت تردد هذا الشعر حتي بعد هجرة المك نمرإلي الحبشه درءاً لبطش حملة محمد بك الدفتردار المعروفة تنفيذاً لتعليمات ( محمد علي باشا ) في مصر إنتقاماً لحرق المك لإسماعيل ولقادة حملته علي السودان .

ولقد قالت هذه القصيدة في أخيها عمارة والذي مات على فراش المرض ولم يمت في ساحة الوغى والنزال كما كانت تتمنى له ، حيث كانت تريده متوشحا بدمائه في يوم القتال والحرب حيث انه كان رجلا شجاعا ومقداما وبطلا , نازل مع والده الأتراك ومعاركه مع القبائل الأخرى . ولكن أصيب بمرض الجدري ومات متأثراً به .

ولها قصيدة أخرى ( فرتيقت أم لبوس ) قالتها في أخيها " علي " الصغير الذي كانت ترتجي فيه أن يشب كأبيه حاميا للعشيرة والأهل من بطش الغزاة الأجانب .

ماهو الفافنوس

ما هو الفافنوس ماهو الغليد البوص
ود المك عريس خيلا بجن عركوس
احى على سيفه البحد الروس

***
ما دايرالك الميته أم رمادا شح
دايراك يوم لُقاء بدميك تتوشح
الميت مسولب والعجاج يكتح
احى على سيفه البسوى التاح

***
إن وردن بجيك في أول الواردات
مرنا مو نشيط إن قبلن شاردات
أسد بيشه المكرمد قمزاته متطابقات
وبرضع في ضرايع العنز الفاردات

***
كوفيتك الخوده أم عصا بولاد
ودرعك في أم لهيب زى الشمس وقاد
وسيفك من سقايتو استعجب الحداد
وقارحك غير شكال ما بقربه الشدّاد

***
يا جرعة عقود السم
يا مقنع بنات جعل العزاز من جم
الخيل عركسن ما قال عدادن كم
فرتاق حافلن ملاى سروجن دم

[waya]

فرتيقت أم لبوس
" بنونه بت المك "

فرتيقت أم لبوس لويعة الفرسان
الليل ما بليل عنزة وقرونها سنان

***
كوراك ضرب مرقن جداد الدار
أنداد النصارى الكلهم بولاد
كرار علي كبر عليهم زاد
وسيفك في قضاريف الرجال صياد

***
متين يا علي تكبر تشيل حملي
أياكا علي خلاّك أبوي دخري
للغني والفقير الكان ابوك بدي
للجار والعشير الكان ابوك بحمي


***
جابو لنا الكرامة وصبحنا فرحانين
ضربوا دنقرهم جوني العيال مارقين
بسأل عن علي الفارس البيقود تسعين
يا هو علي الولد البيقود تسعين

***
هو اللدر العلي ظهره الخبوب و الطين
ما بياكل الضعيف ومابيسولب المسكين
الا سيبت الأسد المقابل الطين

[waya]

المك نمر

الشاعر ابراهيم العبادي


أرباب دار جعل الفارس الارباب
وليك فى قلبى تقدير احترام وكتاب
لو كان شعرى فى مدحك نظمتو كتاب
تســتاهل عشان أرباب و ود أرباب

***
نمراً بركــب الكـيك البطـر يتحـــرّن
نمراً بقــلب العــوق أب صفوفاً جرّن
خلوات صدرو في علوم الحروب كم قرّن
ســيفو بِينتـف الدرع الحديــدو مقــرّن

***
مو نمر الشدر حاضن فروعو مقيّل
دا النمر البســد الصف محل مايميّل
كلما أقول شُـكر ألقــاهو فيـهو قِلـيل
كفــو بيخجـل العيــنة السـحابا منيّل

***
الليلة نمــر صِبحن خيــولو يصهلن
من حر العلوق صبــحن قلوبـن بِهلن
دايرات مكبس الضحوي الفيهو يبهلن

***
نمراً ما بفـز حاشـتاهو كلا وحاشا
لمام لي الهمائل البي العتامير طاشا
ذو عفة وثبات كرماً معاهو بشاشا
وتشـهد دار جعـل يوم حـرقة الباشا

[waya]

عمدة كلى

العمدة أبو جديرى عمدة كلى عليه رحمة الله
إسمه على سعد محمد الشميمى يكنى (أبوجديرى) أو (أب عاجات اللحو)
ولد عام 1849 وتوفى عام 1938 و هو فى التسعين من عمره
تولى العموديه فى فترة الحكم البريطانى فى قرية كلى التى تقع شمال غرب شندى بحوالى 40كم.
يقال أنه كان رجل قوى الشخصية جهورى الصوت ؛ شجاعا فى مواقفه ؛ ذكيا لماحا و صاحب مروءة وكرم وشهامة.
و قيل عند وفاته الكثير من المرثيات و من أشهرها هذه المرثية الشهيرة
لشاعر كلى الشيخ ود بشير
و التى تغنى بها و أبدع فى أدائها الفنان على إبراهيم اللحو:

عمدة كلى

أب عاجات اللحو وكتين إزم وانتّر
إن جات الإلوف لا بضل ولابفتّر
حوّد يا الخصم بغادي دربّو بضر

***
اب رسوة اب هرش الضارب الوكرة
تمساح دار كلي بمرق مع الهجعة
أبو شما اللزوم كم درج العاطلة
هو الاسد المربعن دونو الرجال قاصرة

***
يا حليل ابجديري الفارس المنبور
يحرن في المحاصة وكت الحرابه تدور
في اليوم المشوّم تبقى الحجازة صقور
وبيهو بِيجبر الصف ان بقّت مكسور

***
بجيب قولّن صحيحفي ابويا ماهو شكر
مثبوتات فضايلو ومافي من ينكر
اب زيد الهلالي زايد عليهوقدر
عباس تور قريش منو مابقصّر
زناد ان حركّو بقوم وما بفكّر
دايماً فاكضراعّو وبيهو مابفشّر

***
رحل يا شما أبوك وقفّا خلا الدور
وأنحلَّ النظام الكان زمانمعمور
بوجود ناس ابوي قبل العبوس ماتدوور
أنهدَّ الجبل واشتت المطمور
ياابو زينب وراك اتكشّف المستور

***
دابي القاش حليلو الفي المحاصة بِكُر
من شوفتو بتضل ناساً دقوننقُر
ان شاف الحديث زايد بقالّو كُتر
بشلح في الصفوف امات طبول وزمر
زيحمزة الجسور في يوم أحد وبدر
سم الصاقعة ابوي يا ال لى الخصم بدمّر

***
اب قدحاً سبيل مسا وصباح مجرور
ولي الضيفان يباشر ووشّو مامصرور
منو البمسك مكانك ويفهم المضرور
بِتراجع في المواشي وفي خِدمت البور
غرارة العبوس ما بتلتفت لي زول
حُكم السيد نفد ما بنحجب مقدور

***
تمساح القيوف اللى العزول بتكيد
اب مسكاً يفوح يعم القريب وبعيد
يوم جاني الخبر اسفاً عليا شديد
ياعمدة كلي فرقك علينا صعيب
ياالعمدة اب جديري فرقك علينا صعيب

[waya]

" الصافي دهب الخزانة"

للشاعرة : الحرم عبدالله أبوسن
هذا هو النص الكامل لقصيدة الصافي دهب الخزانة التي نظمتها الشاعرة الحرم عبدالله أبوسن في إبنها عبدالله إبراهيم أبوسن القاضي الشرعي ونائب رئيس البرلمان الأول ورجل السياسة الشهير يرحمه الله . ولقد كان بالفعل -مثلما تمنت له – رجلاً ذا شأن :

الصافي دهب الخزانة


الصافي دهب الخزانة
الدولة أم فوت سيد بكانة
بريدو .. ودشيوخ البطانة

***
شدو ليه البمغي الرسانة
ومرق الما بدورلو إعانة
يقيم الليل بالديانة
ويحل مفصول الضمانة

***
مرق ود كرسي الحكومة
وقشاش دموع الظلومة
الضايقة بفرج همومها
والواجبة بيعرف لزومها

***
بريدو ود شيوخ البطانة
شدو ليهو قارحو المقلد
نهم تيلادو المولد
نسف الكيس لينا جرد
وشيشك لي الدمعو برَّد

***
مرق ود بيت الفضالة
تيتب للهاكعة شاله
عظيم بالحيل ياأب قدارة
متل قريش في الشطارة

***
مرق ود بيت الدراسة
الطاهر خاتي النجاسة
شدو ليهو أم جراسة
ودخل البرطن نحاسها

***
مرق أب زينا مكمل
لو مسفوه لو مهمل
درعوا البي الجوخ منمر
ولبسو البي الخوخ مسمر

***
قاضي أوكاته وفروضه
مرق السابلات عروضه

***
عوق الآلاف بقودو
وحرسه وصنعة جدودو
عبد اللاه يبلغ قصودو
ومتل حاتم يحكو جودو

***
عبد اللاه دقر الحرايق
ونافي العيب والنقايق
بالأغراب ما هو عايق
كريم أخلاق ديمة فائق
بريدو ودشيوخ البطانة

***
دارس سايس الطرايق
وفارس جاب الحقايق
وراسي وفي جلوسو رايق
وبحل المسجون وضايق

***
شدو ليه القارح جوادو
ووافر للعامة زادو
عبد اللاه يبلغ مراده
علي الهايكوت ظعنو قادو

***
عبد اللاه الفرسان صميمن
يشلع عيقان زحيمن
جدو البيهات عظيمن
ملك ذاوات مو نديمن

***
شدو قارحو أب فراية
وسل أب جدلة وسقاية
عبدالله كاب الولاية
جليس ستات السراية

***
فروخوا نفضت بديدو
وتسمع كورو وجضيضو
قود العوق يا عقيدو
النصر والفوز إنت سيدو

***
شدو ليهو الصر كوروا
ونقرو نحاسو وطبولو
عوق الآلاف يجولو
وثقاة الناس بشهدولوا
بريدو ود شيوخ البطانة

***
شدو ليه البنسف سبيبو
ومرق الما بعيق قريبو
أمين الجار يا حسيبو
جليس للبارعين وضيعو

***
غلق زاد مو مخاده
ومرق الخاتي البلاده
النصر والفال هيلو عاده
وبجبد ناس في الشهادة

***
غلق زائد مسدر
مرق اللي الروح بودر
ركب حافلو المبدر
جدو بضاري وبحدر
بريدو ود شيوخ البطانة

***
غلق نيل التسابه
وقائد راس الحرابة
قاطع عاقة القرابة
بكان الموت ما بهابه
بريدو ود شيوخ البطانة

***
يوم القيلة بنعاين
بالطاقات ما هو باين
تقيل موزون بالقباين

***
سد أم دور بالعساين
ومنع القش بالبطاين

***
شدو ليه البعجب رسيسن
وقود الخيل يا عريسن
بنات الطيب إت جليسن
والتاج والنيشان وريثن

***
حفلن ولبسن لبوسن
وجنو سايقات عروسن
دوام مبسوط من خصوصن
أديب ما بواخد جلوسن

***
حتلن جلبن طقومن
وجنوا طالبات لزومن
دوام مبسوط من همومن
قدر ما يقولن فهومن

***
شدو ليهو الكورو صر
مو مسفوه مو مخلي
بدر في الحافلة سلة
والمسجون ليه حل

***
الفروخ بارياهوا بره
وحنوا ولاقو المسرة
بريدو ود شيوخ البطانة

***
شدو قارحو البلاوي
وشويم لي بيتو ناوي
عظيم ود عمد المقاوي
وقدر ما أقول يهو ساوي

***
الصافي دهب الخزانة
الدولة أم فوت سيد بكانة
بريدو .. ود شيوخ البطانة

[waya]

الجاغريو

هو لقب للشاعر الفذ ( أحمد محمد الشيخ أب شرا ) وأمه آمنه بت الفكى ابو فايدة .
من مواليد الدبيبة عام 1910 ودرس بخلوة الفكى الأمين . ثم رحل هو وأسرته إلى برى ثم عادوا إلى موطنهم العيلفون .
صحب كرومة ودخل عالم السياسة فى نهاية الثلاثينيات وشارك فى مؤتمر الخريجين عام 1938 واشتهرت قصيدته فى المؤتمر والتى لا يحضرنى منها إلا البيت هذا ...

الينكسر السلم بعد ما طلعنا *** والزارعنا غير الله اليجى يقلعنا

وبعد حياة مليئة بالعطاء توفى فى يوم الاربعاء 1/1/1969 ودفن بالعيلفون فى موكب مهيب كان على رأسه الزعيم الأزهرىو قال هذه القصيدة في عمه العمدة بركات عبد القادر عمدة العيلفون في إحدى المواقف الشجاعة له ....
ولقد تغنى بها الفنان الكبير مبارك حسن بركات

الظــايط

الظائط ما بنقـدر سيل الوادي المنحدر

الليله الظايط جـاكم حـايم
صاحـي ما بتلقـوه نائم
شادي الخيـل امات لجـايم
اســد الخشـش اب قـوائم
هاشـك فـوق ام تمـايم

***
النيـل العـم التراسـه
البليـغ من غيـر دراســه
خاتنلنوا النظـاره وراسـه
شــدوا علـي أب جراسـه
وقفـل ابـواب الفراسـه

***
صــد ياعــازل وانقـرع
ده الاصل والنـاس فـرع
الوافـر ما بنضــرع
سيفـو وكتيـن ينشـرع
بياخد الـزول والدرع

***
ما شفت أخوك يا أم سماحه
العاصيات كسر جماحــه
عينه للبعيد لمـــاحه
الخيل الشبكن رمــــاحه
شافنه وصدن قماحه

***
ماتهمـوك بنميمـــــه
بتكفــي ضــيفان الهجيمــه
سيد بت فــرج وسيــد حليمــه
القصدوا التار رضــوا بالهزيمــه

[Hoomy]

وايا ياخ انت مبدع
والله قريت موضوعك دا كلمة كلمة واستمتعت بغزارة المعلومات الفيه
والتراث النقي وكلمات الشجاعة والقيم

وايا

انت مبدع اكررها تاني وتالت وعاشر

[waya]

تشكراتي يا الحبيب " هومي "

بدخل في المحاص

كلمات زينب بت فايد قالتها في أخيها الحسن ود فايد


بدخل في المحاص أب جلة بتفور قاهر
صمد البجن طابور
****
شدولو فوق تاتاى
مطلوق الجبين اللى عرضو مو نساى
عجل مشن اب قرون للساهله مو رعاى
لسع صغير وقتين يسوى كيفن الرأي
****
أرباب الفراسه الوسمو فوق ناظرو
والعوقه أب صفوف انت بتجى بتناظرو
ود فايد حسن ما بتقدرو تناظرو
والخوف حين قسمو أخوى ما حاضرو
****
يا شقاق عتامير الخلا والصو
يا أب قلبا شجيع صوانو واقف كو
أشعت في القتال ليهو العرض والهو
في كباد الرجال شبع صقور الجو
****
الليله العيال اتسامرو البارود
جاك يا من كان على صف الحرابه يقود
ود فايد حسن الفارس المأسود
كوفيتو أم عبل وسط المحاص بتخوض
****
عاجبنى العيال الكلهم نجاح
جاك يا من كان يجيك فوق العبار مو شاح
ود فايد حسن الفارس اللفاح
أتبسم لقاهن بين الحجل والراح

[waya]

الشيخ سيرو

اغنية الشيخ سيرو التي يُتغنى بها في الأعراس تعد من الأغاني التراثية
والتي قيلت في المفخرة والمدح ,, وقد ألفتها الشاعرة الشهيرة " ام برعة " التي كانت معجبة بشخصية الخليفة الشيخ
وهو الخليفة الشيخ (النظيف) بن الخليفة أحمد ود بدر
بمناسبة زواجه المشهورة من بنت عمه الشيخ العباس بدر الذي كان مشهورا بالكرم والشجاعة وكان اميرا في المهدية وناظرا في ايام الحكم الانجليزي الذي اعقب المهدية وكان ايضا من اثرياء البادراب ومن كرمائهم وزعمائهم
:


[align=center]الشيخ سيرو[/align]

النصيح جديدو
البريد الشيخ
أنا يا ناس بريدو
*****
غنت ليك السرارا
ود العز والقهارا
ود البدقو النقارا
عينك حمرا وشرارا
حاجبك فيه انصرارا
قلبك فيهو المرارا
صدرك فيه انكرارا
دخل البقعه جالا
وكمل قماش النصارا
*******
غنت ليك أم ضمير
قالت الشيخ وارث كثير
تلات ألاف صنف البقير
تلات ألاف صنف البعير
تلات ألاف درجن صغير
تلات ألاف وردن حفير
تلات ألاف فوق في المقيل
تلات ألاف شايلات حرير
لاك عمدة ولاك مدير
دا الفتح المن الكبير
******
غنت ليك أم رسا
للعريان طبق الكسا
تلا أرادب عشا
تلا أرادب عشا
متحكر لعبادة العشا
عبدالكريم ترك النسا
يا ولادة الصفا
العتق الدم بالعصا

[waya]

السيل بوبا

نُظِمت القصيدة في البطل محمود ود بساطي أحد ضباط قوة دفاع السودان الذي منحه الحكم الثنائي رتبة بك لشجاعته وإقدامه في الحرب العالمية الثانية مما جعل شقيقته آمنة تمدحه بقولها:

غير خالد ماليك تنين عرش دود الأربعين
السيل بوبا يا الفوتك مو دحين
***
تغني ليك أم هاني
ويشهدو أهل المعاني
نضيفا خاتي ريحة الشاني
كتل ديلاك خبرو جاني
***
يا القمره الماك شهير
يا الرأسى الماك صغير
أبوك بساطى القبيل
تبراهو الشعبه والجنزير
خت كرسيه للعديل
وكورك قال يا غفير
سيفه بدلي الجفير
العاداك وين يطير
شقيا صادف نكير
***
شدلوا ليك في أم سبيب
كشفن ليك أمات وضيب
يالقاصدو ظنك ما بخيب
والف الشمس قبال تغيب
***
تغنى ليك ظبية الحدر
ما بتبلع من بي وصفو مر
المكنه فوقو بتكاكى
والمدفع تحتو بيخر
لا بيخاف ولا بيتر
قدام العينهم خضر

[waya]

الجنزير في النجوم

كتبت هذه القصيدة الحاجه :زينب بت عبد المجيد

ومناسبتها

كان النجومي شقيق الشاعره زينب يشكل خطرا علي المستعمرالانجليزي
لانه لاينصاع الي اوامرهم وطلب المفتش من الجنود اعتقال النجومي
ودخلوا في وقت الظهيره ووجدوا النجومي جالس داخل المنزل
وتم وضع الكلبيش علي يديه التي كانت ان ذاك تصنع من الجنزير العادي
ولم رات زينب هذا المنظر كتبت الجنزير في النجوم زي الهيكل المنضوم
مابخاف الفي المحاصه زموم.

واستخدمت الشاعره في هذه القصيده بلاغه اعجب لها كل المهتمين بالتراث..

غناها المخضرم خلف الله حمد

الجنزير .. في النجوم
زي الهيكل المنظوم
ما بخاف في المحاصة زموم

غنيلو يا أم رشوم
دابى الروم شرابو سموم
ما بخاف في المحاصة زموم

إنت .... يافرنيب
جازم مابتجيب لي عيب
اسمك في الرجال عمسيب
وإنت لي الضرس عرديب

العيشتو مي عوايل
وجدك بضبح الشايل
اضرب كفك الطايل
ماترى الجنزير سمح وخايل
مابخاف في المحاصة زموم

غنيت بجر قولو
كضبو القالو بتنولو
هو التلب العرك زولو
ماترى الخصيم قصر طولو
مابخاف في المحاصة زموم

[waya]

المنــــاحة .. " غرار العبوس "

.

مناحة في رجل قامة في العلم والتصوف ذلكم هو العارف بالله الشيخ عبد الباقي بن الشيخ حمد النيل ( ازرق طيبة ) رجل الدين والخلاوى المشهور والذي اسس مجتمع ديني في قرية طيبة بمنطقة وسط الجزيرة اصبحت منارة يقصدها القاصي والداني الى يومنا هذا ، وزاع صيت الشيخ عبد الباقي في ربوع كل السودان واصبح المريدون يتقاطرون عليه من كل صوب وحدب ، قراءة في سيرته الذاتية


يعتبر الشيخ عبد الباقي بن الشيخ حمد النيل هو المؤسس الثاني لطيبة بعد جده الشيخ يوسف أبو شرأ فارتبطت باسمه لسكنته فيها دون أب حراز ولد الشيخ عبد الباقي سنة 1848م ووالدته هي السيدة فاطمة بنت الشيخ عبد الباقي بن الشيخ يوسف أبو شرأ ودرس القرآن الكريم وختمه ثلاث مرات حفظاً وأتقن العلوم الإسلامية ومذهب الإمام مالك . آلت له الخلافة عام 1900م فأعاد بناء خلوات القرآن بالطوب وأهتم بالتعليم المدرسي فأسس مدرسة من أوائل المدارس في السودان عام 1906م وكان يرسل إلي زعماء العشائر وأهل القرى المجاورة وأولياء الأمور لضرورة إرسال أبنائهم إلي طيبة لإلحاقهم بالمدرسة الأولية كما أهتم بتعليم البنات بتأسيس مدرسة أولية عام 1942م وكان الشيخ عبد الباقي ينفق علي المدارس من حر ماله يطعمهم ويسقيهم ويكسوهم ويسكنهم في منازله تلاميذ ومعلمين كما إهتم بالمجال الصحي فأسس الشفخانة الصحية أما علي المستوى القومي فقد كانت له وقفات حق سجلها له التاريخ أمام مفتشي الإنجليز لرفضه ظلمهم للأهالي ورفضه أن يكون جاسوساً علي أبناء المسلمين .ورغم إختلافه مع سياستهم فقد أهدى حكومة الإنجليز الأراضي التي أقيمت فيها مدرسة حنتوب الثانوية ـ كلية التربية جامعة الجزيرة حالياً ـ أهداهم الأراضي بمزارعها وجنائنها لوجه الله . كما كانت أراضى شيخ عبد الباقي تمثل اللبنات الأولى لمشروع الجزيرة الزراعي فحينما فكر الإنجليز في إنشاء المشروع كانت طيبة محط أنظارهم ويعتبر مكتب طيبة الزراعي الذي أقيم علي أراضى الشيخ عبد الباقي أول المكاتب الزراعية بمشروع الجزيرة . توفي الشيخ عبد الباقي عام 1952 م بعد أن أسس مملكة دينية ممتدة في ربوع السودان وعاصمتها طيبه وقد حزن الكون لفقده ورثاه أهل العلم وأهل الأدب ولعل من اشهر ما قيل فيه مرثية الشيخ دفع الله ود فريجون والتي يتغنى بها الفنان محمد الأمين حيث بكاه وهو يقول :



غرار العبوس

غرار العبوس دار الكمال ونقاص
دوبة حليل ابوي اللي العلوم دراس

تبكيك الجوامع الانبنت ضانقيل
لقراية العلم وكلمة التهليل
بتصادم المغارة خيولا بجن بالليل
يا ود ليل البحور يا الجدك المانجيل

دوبة حليل ابوي اللي العلوم دراس

في يوم الخميس جانا الخبر وانشاع
في الاربع قبل ازرق طويل الباع
تبكيك الخلوق بي اغزر الدماع

دوبة حليل ابوي اللي العلوم دراس

غرار العبوس دار الكمال ونقاص
دوبة حليل ابوي اللي العلوم دراس

[waya]

عيال ابوجويلي
تقول الرواية بانه حدث
ان سرقت ناقة "ضئيلة الحجم وهزيلة" لعيال أب جويلي.... ولكن عيال أب جويلي ولأنهم أشتهروا بالفروسية، مابرضواالحقارة فاجتمعوا يناقشوا: ماهم فاعلين بحق ناقتهم التي سلبت منهم
في ظلمة الليل . فكان الرأي الأغلب ان "يقصوا درب السارق" وأن يستعيدوا ناقتهم مهما كلف الأمر ومهما سال من دماء. فاجتمعواللخروج وراء الناقة ، تزغرد لهم النسوة وتدق الطبول، وهم
يؤدون رقصة العرضة على المضارب، معلنين ان أوان خروجهم قد حان.. وحين كثرت الأهازيج وعلا صوت الزغاريد، أصروا انهم لن يخرجوا وراء السارق الا حفاة، وأن لا يحملون معهم الا المطارق. "فمن سرق ناقتهم لا يخرج وراءه بسيف" كناية عن شجاعتهم وشدة بأسهم. ماسبق كان التحقيق للاحداث حتى خروج عيال أب جويلي الى المضارب: حقيقة ما حدث بعدها وعودتهم بالناقة اختلفت فيها المصادر أيضاً وهو تحت التحقيق الآن ولكن أعظم الظن انهم: عندما تتبعوا أثر الناقة حتى الفاشر مرورا بكردفان وعبورهم لطريق "درب أب درق" حفاةً، وجدوا ناقتهم ترعى بدون راعي واكتشفوا انها قد شردت ولم تتم سرقتها "وعادوا بها بدون معركة".... ولكن رغم ذلك قابلتهم الاحتفالات عند العودة بالنصر الذي حققوه بارجاع الناقة المسلوبة. فعرضو وكمبلو "بعد ان جابو سمح الخبر"



النص :


عيال اب جويلي الكمبلوا وعرضوا
في دار كردفان اتغربوا وسدروا
ضربوا الجوز عديل حاشا ما ضلوا
لبنات البلد سمح الخبر جابوا

***

غني و شكري يأم قرقدا سايح
من دار كردفان جانا الشناع فايح
في الفاشر الكبير طلعوا الصايح
دقوا الجوز عديل اصلوا العمر رايح

***

دقي وزغردي يام قرقدا حسوا
الليله بجيب القول علي البيسوا
عيال اب جويلي الجيلوا و تعلوا
ديل درب اب درق شقوا

***

غني و شكري يا خدرة الورتاب
فوق ود الفحل الليله جبتا جواب
حقيت الاسم ياسالم الارباب
قيدومة العيال ... ركازة للمرهاب

***

[الاميرة توتة]

لك خالص الشكر أستاذ على هذا المجهود الرائع ..

[waya]

أسد الخشاش
كلمات الشاعر /عباس الطيب
من قرية كلكول ريفي الكاملين " وقيلت في الفارس الامين الاصم "
وتغنى بها " قيقم "

أسد الخشاش

أسد الخشش الضريه
كابي فوق الوليه
يا ليلا
ود العز والبنيه
***

غنت ليك أم سماحة
يا الولدة التامة النجاحة
خيولك ما جن قماحة
الجدري التفق القراحه
أنت الجلة وباروده فـاحة
***

يا التمساح العشاري
يالليل العم الضهاري
ما قالو خاف جانا جاري
شايل البيلصف يراري
يضرب يمين ويساري
***

شدو ليك البتاتى
كريم الخيل العواتى
وكت الموت ساعتو تاتى
بذكر دهب البراتى
ويشق الزول ان جاهو خاتى
***

اهلك سموك الأصم
ما سرحوك* بى بهم
يا التامي الرأي والفهم
في يوم الهول واللطم

حيرت الفصاح والعجم
***

شدو ليك البطير
وسيفك سبق الجفير
الكازاك وين يطير
في يوم والنحس الخطير
بس شقيا وصادف نكير

لك خالص الشكر أستاذ على هذا المجهود الرائع ..

تشكراتي يا أميرة ,,