نافذة علي الماضي الجميل

[الشمالي]

علي الجزيم دي عشانك يااا نمرة اربعة ونظام ترحيب بيك وبرضو ام ايمن غالية غااااااغ

اها ياا الاحبة خبر ضيوف الحلبي ضرب الحلة وخالد شمارات لف الحلة بيت بيت وراكوبة راكوبة وما خلي ليهو زوول ما حدثوا , والحلة وقفت علي كراع واحدة باقي كلمة خرطوم دي براها بتعمل الخلعة والواحد الخرطوم ما بشوفوا علا في سنة ساتة ( سادسة ) بمشي يتصور لامتحانات الابتدائية وناس الكباشي ابو عوينات ديل الواحد لما ابوهو يقول ليهو ها جنا خلاص مودينك الخرتوم عشان تتصور للمدرسة يقرب يطير من الفرحة وشوف عيني الكباشي ابو عوينات لما ابوهو كلمو الزول تلاتة يوم ينطط ويعرض ويصقّر ويدوبي مخير الله ما كان خرتووم ده وقبل السفر بيوم الزووول استحم من العصر ونزلت منو جنس كتاحة تحيّر ومن المغرب اتكامل عنقريب القِد ( عنقريب كبير موسر من جلد البقر ) الوراني وانلجق بزيت سمسم من شعرو وحتي اخمص قدميه لزوم جهوزية لمشوار الخرطووم وبقي يلمع مع نور اللمبة القعونجة ومشوار الجنا ابو عوينات للخرتوم ده حكاية براهااا بنرجع ليها ومع حكاوي تاني كتيرة , دحين خلونا في ضيوف الحلبي ديل باقي الحلبي ده من قام منجعص ومتفهلم ياا قول عشوشة مقشاشة وطبعاً هي قاصدة متفلهم , اها الحلبي عزم اصحابو ديل زوج وزوجة وابنائهم ولد بنت وياا دوبكم الجماعة وصلو الحلة وكان في استقبالهم ام حُمد ابشعر وام حمد ده جنس شناتاً عليهو تقطّع اللبن في النار والبنت الصغيرة دي من شافتو بقت شغالة :- مامي مامي شوفي الغوريلا ؟ المراءة بقت تقرص في بتها ياا بت اسكتي , تسكت شنو يااا امي ؟ اذا كان ناس ام حمد كلمة مامي دي براها عملت ليهم لوَز وبقي يفتشوا لي معناها , ام حمد :- هاا ناس هوووي مامي دي شنو ؟ والله ام حمد اخوي ضنيتها حاجة حلوة من الليلة الخرتوم , ده تعقيب عوض هجم بالجيم المعطشة , يعني شنو يعني شنو ؟ هنا اتدخل الزين فطيرة انتو اناااس مغفلين دي يعناتا (امي ) بالايراقي , انا هنا فنقلت عيني جوز لوز وحنكي نزل في الواطة وريالتي سالت بحور هاا الزين فطيرة ايراقي دي جبتها من وين ؟ الزين فطيرة الايراق اللِيلة صندام حسين , انت ياا يابا يصطدمك بص الطيب ويشتتك صامولة صامولة ايراق شنو ؟ دي اسمها القراق , دي مداخلة سيد جبجبة , انا هنا رقدت جرجير من الضحك يااا حليل العراق البقوها ايراق وفي رواية اخري بقوها قراق وصدام بقي صندام مخير الله علي شترة اللسان . بالله شوووف كلمة (مااامي ) السوتها حالتنا لسة ما هبشنا كلمة ( غوريلا )

اها فتكم عافية وبكرة باذن واحد احد نشوف الغوريلا ونتم باقي الحكاية غاااااغ

[تائب]

والله يا الشمالى كفيت ووفيت
واحلى حاجه ان زكرياتك الجميله كانت من واقع معاش كلنا عشناه
الله يعطيك العافيه

[قمر وراكبه همر]

رائع يالشمالي

بجد موضوع جميل

[ام مودة]

الشمالي جمعتك مباركه واسعدتنا عودتك لنافذه ومنتظرنك تحياتي واحترامي ام مودة

[ahmedBolbol]

[align=center]اسبوع العطاء والتقدير والحب والشكــر لمجـهوداتــ اعضــاء المنتدى
نهر المحبـــــة
ضيفة الاسبوع[/align][/size]

[ود الخير]

اها يا خوى كمل لينا
ما تشحتف بينا
الغوريلا اههه

[الأميرالحب]

والله يا الشمّالي اخوي ياريت
يرجع الزمن الجميل حتي ف المنتدي
الناس دي طفشت وين ماعارف وانت اولهم

[الشمالي]

اها نرجع ليكم بالشووووق والحنين للكل .
طبعا ما بين القراع والايراق بتاعة صندام ظهرت لينا حكاية ام حمد البشبة الغوريلا وبصراحة البنية ما قالت علا الحقيقة باقي الزول بشعرو وده ما بتشوف الا عويناتو الدقااااق ديل , اها حكاية غوريلا دي ما ريحت ام حمد وقلبو اكلو منها طوالي قام سأل السيد الممرض , هااا السيد اخوي غونيرلا دي معناتا شنو ؟ يااا ام حمد غونيرلا شنو دي كمان ! اااااا ولا قصدك غوريلا , بس ياااها ذاتها كتلتها كتلا , رد السيد ضاحكا بتعرف الشيتة يااا ام حمد الشين , رد ام حمد الشيتة حقت جنينة الحيوانات ولا غيرها ؟ يااا ها ذاتها الغوريلا , هنا ضحك الزين فطيرة حتي استبانت ضروسو الوراء كااااااااااااك , وطبعا ام حمد الزعل قرب اشرطو , ان شاء الله الغونيرلا التبلعها جب .
المهم طبعا ضيوف الخرتوم بقعدو الكلام قعيد واختيار الكلمات من شاكلة ( اغمي علي , وانفلونزا وانت ما شي لا فوووق ) والجيلي العوووقة يعاين ويريل ولا فاهم حاجة , وطوال يخش شماااال هلا هلا يمين ناس الخرتوم ديل عليهم جنس تنقليزي يحير , دحين العنفلونزا دي مي ياها السعال الديكي القاصدو السيد الممرض , انت ياا ايابا الديك اليخلي عويناتك الاتنين شمال ده صوت الزين فطيرة العنفلونزا دي الوردة المعاها تهرشك ( مخير علي العطس الاسمو تهرشك ) , ما بعدت من المعني يااا خوي ده صوت النور شعيرية كاااااااااااك , المهم علي الحال ديك جبدنا الونسة تب وفي عز الونسة ديك نسمع صوت القعونج جاي من حفير الشيخ وصوت للقعونج ده النغمة المحببة البنتكامل بيها النوم , اها اكان نسمع ليك صوت الجنا الليل الخرتوم ما ما ما ده صوت الصرصاااار , علي الجزيم كلمة صرصاااار دي كهربت الجو كلو النطط عينيهو والدلدل لسانو والبلع السفة من الخلعة , انا ذاتي جاتني حال انشداه عاطفي ياااربي الشافع ده قاصد شنو بالصرصااااار , يااا ربي يكون قاصد الكدينكة ولا ام تعبر , قطع شك الشافع ده قاصد ابو الرقيع و ...............................
ولنا عودة باذن الله ونستميحكم عذرا للغياب وكلما نجد سانحة ستجدونا .

[بت السرف]

حمدلله على السلامة يازول ...
ونورت النافذة والنوافذ المجاورة ...
خليك قريب ...

[الشمالي]

حمدلله على السلامة يازول ...
ونورت النافذة والنوافذ المجاورة ...
خليك قريب ...

نور الله قلبك بالتقوي والايمان
والله يسلمك , وقراب وما بنقدر نبعد

برمة بعداوية

سلفيني توقيعك ده غاااااااااااغ

[بت السرف]

نور الله قلبك بالتقوي والايمان
والله يسلمك , وقراب وما بنقدر نبعد

برمة بعداوية

سلفيني توقيعك ده غاااااااااااغ

تسكن فيه ؟؟؟؟

مافى ضفادع جنبو

[بت السرف]

نور الله قلبك بالتقوي والايمان
والله يسلمك , وقراب وما بنقدر نبعد

برمة بعداوية

سلفيني توقيعك ده غاااااااااااغ

تسلم ياغالى كتبر
وربنا يحفظك ويرعاك.

[The Sniper]

الشمّالي بالشدة , وينك يا الحبيب

منتظرنّك ترجع زي زمان و ما تنسى تجيب معاك باقي الشلة
تجي اولا تكمل لينا البوست و بعدها تكتب تعهُد بعدم الغياب ...

[بعد الزمن]

الشمّالي بالشدة , وينك يا الحبيب

منتظرنّك ترجع زي زمان و ما تنسى تجيب معاك باقي الشلة
تجي اولا تكمل لينا البوست و بعدها تكتب تعهُد بعدم الغياب ...

وين ياقلب يا قناص
شوق لمن مافي طريقة

[الشمالي]

الشمّالي بالشدة , وينك يا الحبيب

منتظرنّك ترجع زي زمان و ما تنسى تجيب معاك باقي الشلة
تجي اولا تكمل لينا البوست و بعدها تكتب تعهُد بعدم الغياب ...

حبيب القلب اسنبر شووووق الشوق
يتجدد تاني وانت معانا في عمق الخاطر
وين يااا زول ياااروعة , باذن الله عائدين
بس خليك قريب انت وبتمني عودة كل الاقمار
وبنحي كل الاقمار المتواجودة ومواصلة

[الشمالي]

وين ياقلب يا قناص
شوق لمن مافي طريقة

بعدووووو ياااااااااااا

[امال الناس]

بعدووووو ياااااااااااا

تميهااااااااااااااااااااااا

[The Sniper]

وين ياقلب يا قناص
شوق لمن مافي طريقة

اكتر اكتر و الله يا حبيب

وينك ما باين !؟ مشتاقين ليك ياخي ...

[The Sniper]

حبيب القلب اسنبر شووووق الشوق
يتجدد تاني وانت معانا في عمق الخاطر
وين يااا زول ياااروعة , باذن الله عائدين
بس خليك قريب انت وبتمني عودة كل الاقمار
وبنحي كل الاقمار المتواجودة ومواصلة

شوق كتير يا حبيب ...
انا رجعت و قاعد قريب لباب المنتدى منتظركم
بس انتو استعجلو شوية ياخي

و تحية لكل الرائعين الموجودين الآن و الغايبين ...

[الشمالي]

دي بس خاطرة رمضانية علي ان نرجع لمواصلة القديم باذن الله

امنة بنت الشيخ من عصيراً بدري جهزت ملود العواسة وصاج العواسة الغريق وبرضو بقولوا عليهو طش العواشة , صوت حاجة امنة شااااقي البيت كر وقاسمو نص النص باقي سخانة رمضاااان عاملة ليها حراق رووووح , هاااا بت هاااا جيبي لي العجين وكبي فوقوا الخماااارة خليني اعوس عصيدة الفطور الزمن ضائق تب تصيق عليك ولازم الكوراك والجوطة دي تكون مصحوبة بدعا لزوم حراق روح وشحتفة نِفِيسة , وكان علي الوقت الضائق , علي الجزيم لسة باقي علي الافطار كان خمسة كان ست ساعات والبشوفها يقول باقي علي الفطور خمسة دقائق , وفجاءة يقطع صوتها عنان السماء هااا الجني الشمّالي الجن الكلكي قوم امشي علي الزريبة وكسر لي حطب عواسة اتكسرن كريعاتك , هسة في داعي تدعيني يااا حبوبتي ما انا ماشي اجيب ليك الحطب , مشيت علي الزريبة القِدامية وكشكشة اقدامي وهي تغوص في روث ( بعر) الغنم اثار السخيلات قامن جرن يمين ويساااار , فَرار مرمي في فسخة خالية من الروث تم اعدادها لتكون (الكمينة) تستخدم لحرق الحطب الكبااار واستخدامة كوقود فقد كان الفحم انذاااك من الكماليات ولا يشتريه الا الناس المرتااحة اما فحم الغلابة من الكمينة وبعر البقر المحروق وحكمة الله كان بدي الطبيخ نكهة من خلالها تقدر تعرف نوع الحطب المستخدم , البليلة دي مطبوخة ببعر بقر ودي بحطب طلح ودي ب ..... , بعد ان كسرت الحطب لحبوبتي امنة بنت الشيخ وجدتها تنظف في طش العواسة من (الشيط ) باقي شدّ عصيدة امس وصوت الملووود يدوي شيييت شييييت شييييت يصرج الاذان , يمة بت للخليفة عليك الله اديني حبات الشيط ده ما تجدعيهو هااا جنا الشرفان ده اصلي عائزة ادي ليك , اها شيل الشيطات ديل ومدت يدها ببعض الشيط المسوّد اخذته بلهفة وبسرعة رميته في غياهب خشمي حتي احظي بقُبضة اخري من الشيط ولا زلت اقرمش الاول بتلذذ طلبت كتحة اخري فردتني حبوبتي يااا الشرفان خلي معاك لي اخوانك واخواتك عندها خربت وجهي ورسمت نظرة حزينة في عيني كنت اعلم ان جدتي لن تصمد امامها لحظة وبالفعل جادت علي بقُبضة شيط اخري ثم قالت :- يلا امشي جيب لي حبة قُشٌش اويقد بيهو الناااار والقٌشقُش فريعات الحطب الصغيرة تولع سريع بالتالي يتم هبل الحطب الكبار بسرعة لترتفع السنة اللهب في التكل ليعانق سواد الدخان سقف التكل تاركاً سوادة مرتسما هنا وهناك ليشكل صوراً هلامية سوداء , دقائق وصوت الملود وسط العجين وجدتي تصب شوية ماء للعجينة نظام تليين حتي لا تكون العصيدة قوية وجهزت العصيدة وقطعتها في الصحون الكبيرة واثناء عمل العصيدة كان بجانب جدتي كانوون تغلي فيهو حلة كبيرة ورائحة اللوبة تداعب انفي لتحرك مصارين بطني لتعزف لحن الجوووع المعهوووود كُركُررررررر , في اَن واحد جهّزت العصيدة وملاح اللوبة وصبت حبوبتي حبة ملاااااح في احد الصحون ونادتنا انا واخوتي هااا شفع تعالو اكلو تاكلو (الحَمت رمت) لتاريخ الليلة لا اعرف ماهو ( الحِمت رمت ) رغم اني سمعت هذه الدعوات ملايين المرات في صغري , وقبل ان تنهي حبوبتي دعوتها لنا بالاكل كانت ايادينا تغوص في العصيدة وملاح اللوبة وبلذة العاشقين نهلنا وتهنا في غياهب اللقيمات وخشومنا تتمطق بتلذذ بالملاح اممممممممم طق مح اححححح الواحد تقول بياكل بياكل في مشاوي وحاجات تاني حامياني , عندما رأتنا حبوبتي ما كان منها الا وان مدت يدها واخدت ليها لقمة مااااكنة ومميزة وعلي الفم طوالي ومن الفم للدم والزولة مع السويعااات الكانت صائماها اخدت تاكل بشراهة اكتر مننا وهنا دخل علينا عمنا حااااج ابوعاقلة هااااا بت الشيخ انت ماك صائمة ؟ عاينت ليهو بت الشيخ قائلة :- هوووي يااا بعاقلة اخوي انا رمضان ده لا قدرو لا لحم سدرو , ولقمة كبيرة اخري تتجه الي مثواها الاخير في خشم حبوبتي بت الشيخ ,, غفر الله لها وتجاوز عنها واطال في عمرها علماً انها اساساً لها رخصة الفطور فهي طاعنة في السن ومريضة بالسكري ورغم ذلك كانت تصوم بعض الايام ,,,,,,,,,,,,,,,