سالمي الفجر واديهو وصفي وخلي منك ليهو ضي
مديني إيدك للقدر نتونسك بالليل شوي
أوعاكي خوفك يندمج في حس هتافاتك علي
جوفي البريد عينيك رقد في حافة الجرح النزف
جرتقتي حسك بالغنا وسيرتي صوتك بالأسف
قلبك سكن آخر مضيق في الجوف ودربك ما انعرف
ممزوجه آخر اختزال بين الشرايين والغرف
ما تحنسي القلب البريدك وتغري بي لحظة صفا
أنا ما البقيف كاتف يدينو علي اليقين الانطفا
وأنا ما البسوقو من الأمان لي صوت هبوب العاصفه
وماني البسد اضنيهو واتوسد قفا
وأنا هسي بتقريف دموع
ما فضلت دمعة عيون
مربوط لسان حال الكلام
غيرك ولا قادر أكون
عينيك مرفا الإنتظار
راحة المسافر في الظنون
زمنا مكلفت بالوجع
مفتوح علي شارع الجنون
واحشني شاهيك باللبن
وأنا دايره أقول ليك جملتين
حطب العواسه حذاري منو
عماكي ما خلا لي عين
نوري ووهج ضلمة حروفي
مصب كلامي و منتهاي
زي التقول ما كان في شي
فكاني في أول طريق
والريد عذاب ما بتمشي
سال الدمع يا يمه رقراق قشقشي
وبعد المتاهات الودار
خليني جنبك أنتشي
وأنا يمه ما خليتلو شي
والله سكنتو الوريد
والله ما طل الصباح
قبال يضخ لي جسمي ريد
والله كل ما يكون حداي
أنا قاعد أحس الدنيا عيد
يا عم .. أقيف يا عم
أديــني قــطرة دم ..
بي كم تكون الروح ولا العمــر بي كم ..؟
هــّد المرض أعضاي .. ستــّف دواخلي الهم
وانا في ضرا الأموات .. تنقــذنـي قطرة دم
يا خالة نقطة دم ..
تاوقـت بالشـباك .. رد الحزن حزنان
مالك تتاوق بي .. وانا منكسر حيران
شوف نجوى تبكي هديك .. دار تجري للدكان
علي قال بدور يقرا .. وبكى من امس للآن
يا عمو قطرة دم ..
نجوى الغنا الما انقال في حفلة لا اتغنى
نجوى انتظار للشوق في خنجر انســـّن
نجوى امتداد أحلام لو بكرة تتهنى ..
والكانيولات تنشال شان ننقش الحنة
ويا عمو نقطة دم .. واهو عمو ما حن
ويا عمو غني معاي لي شفع الجنة
و اهو عمو ساكت ساي .. نصح البكا وجن
وترا عمو لا خلاك.. لا بيك صدح غنّى
لا قال صباح الخير .. يا نجوى لا صــّن
وبدا سكة الزوار... من تاني ما تنــّى
ويا عمو قطرة دم
واهي نجوى يا مسكين .. وهي حية شبعت موت
اتخيل احساس أم .. رغم الحشا المنكوت
قدر الكلام الجا .. واتحدى ألف سكوت
تدعي في الصلوات .. يا ربي نجوى تموت
يااااااااااااااااااالله نجوى تموت .. بدل العذاب والهم
يا الله قطرة دم .
واهي نجوى شبعت موت.. وكلاها مهرودة
وام نجوى تبكي الدم .. بالحسرة موعودة
هسع بدل أبكيهو .. ونجوى مفقودة
انا كنت لو بعلم .. بنزف دموع الدم
أنا كان بكيتو زمان .. يوم نجوى موجودة
ومحتاجة نقطة دم ..يا خالة قطرة دم
وعلى امتداد مشوار.. لي نجوى والتانين
على يا صحاب شافع .. عارف فروض الدين
كان حافظ القرآن ..من عمرو ست سنين
واسع برا الأهات غالبو النطق حولين
يا ربو قطرة دم ..
حولين اكان عطشان .. بسقوهو بي أنبوب
حولين عصيرو دوا .. وسكر سفوفتو حبوب
حولين ولا سكلب . . لا سمعنا كورك ووب
لا تلب الحيشان .. لا لاعب المحبوب
يا عمو نقطة دم ..
علي كان طموحو كتاب .. كراس وسبورة
وأنا داير أكون دكتور .. شان أختي دكتورة
لا داير أكون مشهور .. لا شاشة لا صورة
بس أنحر السرطان شان روحي منحورة
ومحتاج شوية دم ...
كل البتلقا هناك .. داير يكون دكتور
شايف امنياتو سراب ..إلا العشم منصور
صارع خروج الروح .. نط الخطر والسور
واسع هداك راضي .. وشايل الأسى ومسرور
بشحد شوية دم ..
وانا غايتو شفت الناس الدايرة لقمة عيش
بتصارع الايام .. وتجيبا من ما فيش
شفت الطيور بتعيش .. لو كان معطنا الريش
لكن علي المسكين .. يا ربي ممكن يعيش
وهو راجي قطرة دم ..
كنت دايره وكت اموت ترثيني انفاسك زفير
وانا كنت دايره الليل يمر ويشرق صباح باكر امير
و تجيني بي ضو الشمس شان يندفق الم الضمير
والقاك محمل اوكسجين ترجاني في النفس الاخير
بس موتي جواك كان اخير
كان اخير من لو اكون ناذراكا للافراح رفيق
كان اخير من وجعتي الكبت وساع السكه ضيق
مش كان اخير من جيتك يملا البحر لون الحريق
وانعل تفاصيل النفس لو حضرتك تعني الشهيق
واحضن ضلامي واقيف براي لكني مابرجاك بريق
واعطش واصد بحرك قفاي وانشاالله ماينبل ريق
شان موتي في جواك اخير
والله لو وروكا كيف انا كنت يوم القاك بكون
كان شلت اسمي مضيت عليو وبصمت انو ده اغلي كون
كنت استلفت من الزمن لحظات وحرشت العيون
تهواني لي حد العمي وتعشقني لي حد الجنون
بس موتي جواك كان اخير
شان يوم الا قيك كنت مابتعرف عيوني النوم يمين
و انا كنت جمبك بس بفكر تاني حا القاك متين
واناكنت شايله متاع سفر احزانو مامعروفه وين
ونهايتو لي آخر ثواني حياتي تتدفق حنين
لكن وحاتك ياقلب مسكين و واطاتك سراب
مسكين وماك عارف رؤي العشق البتعمي العين تساب
مسكين تلاقيك الهموم شقيش تفوت لوحه وكتاب
ترسم نهاياتك مدن تكتب علي جيتك غياب
الله اذا لحظة رحيلك مني تبكي المفردات
الله اذا يوم وجعتك تحزن جميع الكائنات
مابوعدك ارجاك امل وكتين يفوت فيك الفوات
بس بوعدك يوم رجعتك تلقي الحنين الفيني مات
وجنين غرامك قلبو مات
شان موتي جواك كان اخير
بس موتي جواك كان اخير
شان يوم الا قيك كنت مابتعرف عيوني النوم يمين
و انا كنت جمبك بس بفكر تاني حا القاك متين
واناكنت شايله متاع سفر احزانو مامعروفه وين
ونهايتو لي آخر ثواني حياتي تتدفق حنين
لكن وحاتك ياقلب مسكين و واطاتك سراب
مسكين وماك عارف رؤي العشق البتعمي العين تساب
مسكين تلاقيك الهموم شقيش تفوت لوحه وكتاب
ترسم نهاياتك مدن تكتب علي جيتك غياب
الله اذا لحظة رحيلك مني تبكي المفردات
الله اذا يوم وجعتك تحزن جميع الكائنات
مابوعدك ارجاك امل وكتين يفوت فيك الفوات
بس بوعدك يوم رجعتك تلقي الحنين الفيني مات
وجنين غرامك قلبو مات
شان موتي جواك كان اخير
جامعة البحر الأحمر وبطريقتها الجميلة البسيطة في الكلام والحكي .. حكت نضال حسن الحاج :
الناس قالوا عيد الحب .. وأنا شغالة منتدى شعري في جامعة ..... وجاية داخلة الجامعة لابسة أسود في أسود والناس كلها بتعاين قلت والله دي قشرة عجيبة الليلة .. فلمن وصلت المنتدى قالوا لي دة شنو يا نضال لابسة أسود في أسود وكاتبة أنا بكرهك قلت ليهم قالوا الأسود حق الناس الراقين قالوا لي الليلة عيد الحب قلت .. بس أنا ما بؤمن بعيد الحب لأنو البحب بصدق كل يوم بحب قالوا ليها دا كلام شعراء ساي قالت ليهم :
عيد حب شنو ؟؟؟
وأنا كل يوم بعشق
وأدسك فيني فال
الحب دة نحنا فتحنا ليه
روعة ترانيم الخيال
نحنا الزرعناه في القلوب
شلنا وشتلناو في الرمال
نحنا الدخلناو بإمتياز
.....................
قول لي فلنتاين تعال
وإتعلم الحب من نضال
