بسم الله الرحمن الرحيم
شاعر الشباب .... محمد احمد نقد الله
قدام بيوتنا اللاتحت
اتمردن قوزين رمال
والنخلة خانت ضلها
واتمايلت عكس الجريد
وحمامة جاية من الشمال
نتفت جناحيها وبكت
وقفت عديل تالا الغروب
واتعوذت قرت القلق
والفاتحة بالسر والفلق
وطارت على جيهه السما
واتعلقت بين الهموم
ماتت وشيعتا النجوم
فى اللحظة ديك غابت شمس
وشرق الامس لابس جلاليب النواح
واتبرجت كل البيوت الفى الفريق
من جيرا غنت للمطر ..
الاسم:محمد احمد نقدالله
من مواليد الخرطوم بحرى المزاد اغسطس 1981
مثل السودان في:
مهرجان الشباب العربي الافريقى..
مهرجان الخرطوم عاصمة للثقافة العربية ..
مهرجان الوفدالشبابي المصرى السودانى المشترك..
مهرجان شباب الدول العربيةالمشترك 2007م..
لة عدة دواوين تحت الطبع (بتول ومهرجان العمدة وابناءالعالم المافى وسرقة الموية فى زمن الفيضان)
الجوائز:
حائز على جائزة افضل شاعر فى جامعة النيلين 2005-2006_2007م..
حائز على جائزة افضل شاعر فى الجامعات السودانية 2007م..
حائزعلى جائزة الاتحادالوطنى للشباب السودانى2007م..
حائز على جائزة في برنامج نجوم الغد 2005م..
حائزعلى جائزة الصندوق القومى لرعاية الطلاب 2007_2008_2009م..
حائزعلي جائزة الطبقة الاولى مهرجان سحر القوافى 2008م..
حائز علي جائزة مهرجان الثقافة 2009م..
حائز على جائزة الطبقة الاولي المركز القومى للانتاج الاعلامى 2010م..
كرم من قبل السيد رئيس الجمهورية عمر حسن احمد البشير في مهرجان سحر القوافي 2008م..
رئيس مجموعة الاشواق للثقافة والفنون ..
عضو عدد كبير من المراكزودور الثقافة بالعاصمة القومية والولايات السودانية المختلفة..
ولة مشاركات عديدة فى برامج التلفزيون القومى والنيل الازرق وقناة الشروق ..
برنامج شوارد ..
نجوم الغد ..
سباق المبدعين ...
سحر القوافي ...
مطلوب حضـــورك ؟؟
من ديوان الشعر:
الفاتحة فينى على البحر ..
للشاعر :
محمد احمد نقد الله
النص:
ترابك والبلد راجيك
سرابك والامانى دليل
سحابك والبرق والناس
غيابك بكى فينا شليل
ايابك فى زمن ود ناس
حلم وطنك صعب بالحيل
تعال كان جفت الاقلام
طشاش صورتك على الايام
تلوح لينا بين زمنين
نصيب عينك من الاحلام
يصيب كل البلد بى عين
ملامحك فى زمانا جاى
هناك واضحة ولابختلفو فيها اتنين
رجوعك فى الخريف فى الصيف
دة هو الخلانا بين رايين
بنترجاك معانا الدين
بنترجاك معانا الطين
ونترجاك عليك اسم الله
قول للماشي ديل جايين
بنترجاك تعال مارق من الاحزان
تعال مارق من الازمان
تعال مارق من الاوزان
تعال مارق من الانسان
تعال فى الحلة شايل سيف
تعال فاضي ومعاك الكيف
تعال ان شاء الله ماتقول كيف
تعال نبض الزمن جواك
خلاص جوانا قرب اقيف
تعال غير ملامح اجيال
تعال لى ها البلد واحفر
معانيك فى التبس والنال
تعال نفض غبار الفال
تعال علمنا او كلمنا عن معنى الشعرفى الحال
عليك مابينا من اشواق
ومن حرقة طيور راجعة لى احضان وطن مشتاق
تقايط ليلنا بى شمسا تخش جوانا بالرقراق
تفتح فى مسام الكون ملامح لى مطر نقناق
يغسل من صباحنا الليل
يطيب جرحنا الحراق
فهل كان التمنى سبيل
وهل يعنى الترابط دم
ضميرنا المات بلا تاريخ
على قبر القصيد بكم
زمانك والمطر ضدين
بنتحدى السحاب مالم
تكون زى مابنكونك خيل
على ايقاع خطاوى النم
نجيك بالسكتين راكزين
معاك جوة الوجع نتلم
بيوتنا الفاتحة جد راجياك
تقيل فوق بيوتنا وكم
معاك لسة الوسيع قدام
سماك يادوبا دار تنجم
مكانك كان هو ضاق بالحيل
بشيل كل الوطن حرم
بشيل كل الوطن حرم
بشيل كل الوطن حرم
نعمة بت ود الفكى ...
من ديوان الشعر :
الفاتحة فينى على البحر ..
للشاعر :
محمداحمدنقد الله
اضاءة :
مستفة بى سترة الحال
مغسلة توبا بالأيمان
دعاها المافتر فد يوم
صلاتا التعقب الآذان
تناضم فوق زمن روح
حديثا المانضم نسوان
بتدخل زى مروق الهم
دخول الروح على الانسان
تطلق العافية فى الشارع
اذا مرقت على الجيران
النص :
النعمة بت ود الفكى
سنتين ولاطلع الصباح فى وشها
سنتين يلوح برق الزمان ويقشها
سنتين بتحلم بالأمان
والجمرة فى الايام تذيد وتشها
سنتين ولاشرقت شمس
سنتين ولايوم تشتكى
دى النعمة بت ود الفكى
ركازة قبال الحكى
وتشرق ملامحا كل يوم
فوق ضلها الناس تتكى
فى الحلة زى سعة البيوت
واسع ضميرا كمان زكى
قعدت تورق فى الملاح
تال العصير
نادت على ولدا البكر
بى صوت مستف بالأنين
كان عمرو داب سنتين ونص
قالتو قرب أشكى ياولدى
مادام مافى زول
غيرك بحس وجعى العلى
عارفاك صغير وعمرك دابو نى
مرق الكلام من جوفا كان غابات حزن
صحرا ورمالا بكن سنين
لليلة مازارا المطر
جواها كم رحلة عذاب مابتنتهى
الا وتلاقى وجع جديد
لمعت عيونا النازفة دم
جرت شريط الذكريات بى حرقة لآخر ألم
قالتلو شوف ياولدى كيف حالنا الزمان
والليلة كيف حالنا اصطبح
قبال ابوك يرحل بلاد الاغتراب
كان حالنا ماشي ...وماشي زين
مااحتجنا لى زول بالغلط
عايشين حياتنا ميقنين
والليلة كمل الفى الجراب
ومعاهو كمل الفى الفهم
سنتين ولارسل ابوك
سنتين بنبكى انا واخوك
سنتين عيون كل الرجال الفى الفريق
طمعانة دار تغدر ابوك
سنتين وابوك قاطع الخبر
سنتين بنحلم بالمطر
والليلة غشانا السحاب.
