رواد الفن الاصيل فى السودان

[مها]

الجيل يا الخليل

الجيلْ يَا الخَلِيلْ جَالِسْ وَسِطْ ضَامْرَاتُه
والَنَّغَمْ المُوسِيقِى سِكِرْنَا مِنْ خَمْرَاتُه
الجَّيشْ إحْتَفَلْ كُلْ وَاحِد رَسمْ غَمْراتُه
وإتْصَاوَرْ نَجِمْنا وإحْتَوتْ قَمَرَاتُه
كُلمَا تكُونْ بَرَاكْ لَيكْ التَّعَايُشْ آتُو
بَى حُسْنَ الزَّخارفْ وإخْتِلاَف هَيْئآتُه
آه لَوْ شُفْتُو غَافِل فَوْقَ مُتَّكَئاتُه
هيْهَات لو إغْترَفْ كَانْ سَيْئَة مِنْ سيْئَاتُه
إتْمَجْلَس والفُؤَادْ إتْرَادَفَن وحَّاتُه
وسْوَس قَلْبِى مِنْ وسْوَسَة وشْحَاتُه
تتْمَنَّى العَذَارَى لَو نفْحَة مِنْ نفْحَاتُه
مَا بَسْلاَهُ مَا بَحْسِرْ رِوَيحْتِى وَحَاتُه
كُلْمَا أكُونْ بَرَاى تَتْرَأى لَىْ هَسْكَاتُه
وأتْطَلَّبْ مِنْ النَّسَّامْ مِرُورْ مِسْكَاتُه
يَسْكِر إنْ نَغَمْ نَقْعَ العَسَل فِى سُكَاتُه
والفَرْض البِصَلُّو النَّاسْ نِسِيتْ أوْكَاتُه
آهٍ ثُمَّ آهٍ لاَ تَذْكُر صَفَاهُ صِفَاتُو
مَا سِمِعْ بَيهَا بَلْ مَا شَافْ مُقَدَّر فَاتُه
أتْلَعْ جِيدُه ضَامِرْ خِصْرُه بَينْ كَتْفَاتُه
يارَيتْ لَوْ رَمَتْنِى مِلاَرْيَا بَينْ هَيْهَاتُه
زَىْ غُصْنَ الرَّوَا مَنْصُوبََة قَامَاتُه
بِعَينْ الخُمْرَة صَافْيَة مُعَمَّرَاتْ هَامَاتُه
يَا حَسَنْ الزُّمَامْ إتْضَارَى مِنْ بَسَمَاتُه
والرَّشْمَة إنْمَحَتْ دِى طَبِيعَه مِنْ أُمَّاتُه
جِنْيَاتْنَا إتْبَاقَرُوا كُلْ وَاحِدْ مِسَمِّنْ شَاتُو
وأنْوَاعْ الحُلَى والمَرَاشْ عَظِيمْ قِمْشَاتُو
لَكِنْ وَجَعْ القَلِبْ صَادَفْ قِلَيبِِى وشَاتُو
كَسَّرْ قَامَتُه وقَلْبِى إتْكَسَّرَتْ رِيَشاتُه
بَعْدَ الهَجْعَة نَادِيهنْ جَلَنْ سِرْجَاتُه
نِحْنَ إتْنَينْ وهِنْ جَيَشاً لِبسْ تَاجَاتُه
بنَغَماً دَابْ سَمَعْنَا غَنَّى المُغَنِّى وجَاتُه
قَمْرَه وعَايمَه بَى صِدَيراً رُحْنا فِى مُوجَاتَه
بَعْد إتْوَالَسَن جَابَنْ طَلَبْنَا بِذَاتُه
أرَيتَك كَانْ مَعَانَا الزُّولْ يَغِيبْ مِنْ ذَاتُه
تَشُوفْ النُّورْ يَبُق بَينْ رَشْمَتُو وبِزَّاتُه
والرُّوحْ تَنْسَلِبْ بَينْ دَوَاعِجُه وحَزَّاتُو

[مها]

المشاطة

كُلْمَا أدْنىِّ وأظهر لأمْ حَدَاقَه حَسيبَه
تَتْخازَزْ منى تَتْحجب كَأنِّى نسِيبَه
لى شُوفهتك نِسِيتْ عَرْضِى وشَواغلى أسِيبَه
ظَمْآنْ رِيقِى نَاشِفْ يَا مِيَيهْة السَّيبَه
أغيب أيَّام وأرْجعْ به مَحَنة وطيبَه
قاصدْ نَظْرَتَه البيهَا الأذى والطِّيبَه
تَصِيرْ أسْحَارِى مَسحُورَة وأزيد تَعطيبَه
أُم رَيد مِنِّى تَتدسْدَسْ كأنِّى خَطِيبَه
قُتْ للمَاشطَة حَالتِى كَئيبَه مَا بتَدرِى بَه
قَصْدِى أكُون فى زَاوْية وتَبْقى منِّى قَرَيبَه
بَسْ غَايتُو أنْظُره مُشْ يعَنِى نَظْرَة رَيَبَه
قَالَت بَى غَضَب .. إنْ قُتَّ؟ أمَّ غَرِيبَه!
غَايَّتُو بَإخْتِصَارْ مَا وَجَدْتَ ضَرِيبَه
قُتْ لَيهَا يَا خَالَه مَاكْ عَارَْه الوِْرَده كَيفْ هِضْرَيبَه
كَبْدِى انْشَوَتْ مَرَاتْ اشُمْ كَتْرَيبَه
قَالْتَ مَا تَنِيتْ إنْ لَمْ تَفْكُه دِرَيبَه
الله والنَّبِى سِكَّتْنَا مَا تَبَارِى بَه
يَا وَلَدِى أحْفَظْ شَرَفَك أحْقِن دَمِّى فِكُّو دِرَيبَه
أهُو إنْتَ تَبْكِى وتَرْجِف ومَاكَ قَاصِد رِيبَه
فهَل للمَرْفَعِين أمَاناً عَلى البُرَّيبَه؟
قت ليها: الله يَسَامْحِك يَا وَالدَة وعليكِ لا تَثْرِيبَه
لاَ أنَا هَكذا .. ولا هِى صَيد مَحرَيبَه
كِدَى جَرِّبينِى كَان حَالتِى تَدرِى بَه
ضِحكَت وقَالت: آكل السِّم وأقُول تَجْرِيبَه
بَهدِيك يَا وَلَدى ها دِى صفَتك سِيبَه
دِى المَصْيُونه خِلْقَه والضَّوارِى وَثِيبَه
رَبَّنا خَاصَّها بالعَفَاف هُو حَسيبَه
يَا خَزْنَتْنَا حَالِتك تَصْبحِى وتَمْسِى بَه
تَعَال نورِيك شِرَيكاً بِقْبُض البُريَّبَه
جِدْ وكِدْ وأجتَهِد أوعَهَ الفِلُوس خَرَّيبَه
جَمِيع أُمَّاتَه سَوْ فَرضَاً عَلَيك ضَرِيبَه
بهَذَا تَكُون لَك الثُّرَيَّا قَرِيبَه

[مها]

مقرن النيلين

مَقْرَنْ النِّيلَينْ تَهَلَّلْ أجَلْ بتَاجْ العِزْ مَكَلَّلْ
قُمْ شَادِينَا لَيلْنَا فَلَّلْ الكَرِيمْ لَى شُوْقنَا بَلَّلْ
يَا مُحَجَّبْ مُوجْ ومِيلاَ رَنِّعْ القَامَه الجَّمِيلَه
عَرْجِنَة ونَسِّفْ رَمِيلَة خَجِّلْ الوِزَّه وزَمِيلَه
صَافِى حُسْنَها مِنْ تَفِيلَه سَالْمَه مِنْ قَايلْ وقِيلَه
قُومِى قَامْتِكْ عَرْجِنِى لَه أفْضَحِى الوَزْ جَاتُو نِيلَه
وَاجَّه أنْوَارْ المُحَيَّا ولَّعَنْ للأصْلُه حَيَّه
العِيُونْ نَاعْسَاتْ سَحيِةَ لَيهِنْ آلاَفْ التَّحِيَه
خُضْرَةْ الجُوقَانْ جَلِيَّه هَدَّمِى القَامَه العَلِيَّه
دَرِّجِى الرَّبْوَه العَلِيَّه عَطِّرِى الكُونْ صَنْدَلِيَّه
زَهْرَةْ الحُسْنِ حَبَابَه مُزْمُرَه وفِرْهَيدْ هَبَابَه
رَبِّى مَتِّعَهَا بشَبَابَه هِى المِيَيهَة والنَّاسْ غَبَابَه
الدِّهَيبَة نَسَفْ عَبَيقَه الوَرِيدْ مَحَّقْ أبَيقَه
مَالَهَا فِي الحَىْ طَبِيقَه الصِّدِيرْ الزَّىْ التَّبَيقَه
يَاخَيَالْ إحْترْتَ وَيْحَكْ دِى الدُّرَرْ مَابِقِيسَه مَدْحَكْ
دَرِّسْ أخْوَانَكْ بِنُصْحَكْ نَبْكِى والنَّقَرَابِى يِضْحَكْ
جِيدَه سَبْعَه حِزُوزْ عَدْ فِيهُ كُلْ حَزَّاً تَبَاعَدْ
شُفْنَا نَفْسْ النَّاسْ تَصَاعَدْ إنْتَ مَسْئولْ يَا مَسَاعَدْ

[مها]

حليل آمنه

حِلَيلْ آمْنَه يَا حِلَيلْ آمْنَه نَارْ آمْنَه فِى القِلُوْب كَامْنَه
زَىْ آمْنَه حَسَنَت أيَّامْنَا نِجدْ بَرَّه فِى بِلاَد شَامْنَا
بَدُورْ آمْنَه تَبْقَى مُتْطَامْنَه وتَكُونْ آمْنَه فِي الخِدُورْ آمْنَه
بَدُورْ آمْنَه تَتْتَبِعْ أمْرِى تَِلْ إيْدَه لَى نَعِيمْ عُمْرِى
إنْتِ يَا رُوحِى رُوحِى أنْدَمْرِى طَفَشْ نُومِى قُوقِى يَاقُمْرِى
عَلَيكْ الله تَلِفِّى للفَرْدَه تَمُرْقِيبَه مَرَّه فِي العَرْضَه
خَفَى المَاظَه عَارْضِك الفَرْضَه يَقُولْ لَيهَا يِخْسِى يَا قِرْدَه
مِنْ آمْنَه كُلَّ زُولْ مَمْنُونْ حَدِقْ لَهْجِك أنْتِ يَا حَنُّونْ
بَسَمْ آمْنَه نَصَّحْ المَجْنُونْ وإنْ غِضْبَتْ العَسَلْ مَشْنُونْ

[مها]

طرفى ساهر

طَرْفِى سَاِهْر النُّودَة رَافِدَة كُلَّ عُمْرِى لَيكْ يَا حَبِيبْ فِدَى
جِئتُ أقْصِى المَرَاصِدَا كَىْ أرَاكُمْ خِبْتُ مَقْصَدَا
النَّجُومْ كُنْتُ رَاصِدَه كَالَّذِى أرَاكُمْ خِبْتُ مَقْصَدَا
النَّجُومْ كُنْتُ رَاصِدَه كَالَّذِى خَاطَبْ الصَّدَى
كَمْ وكَمْ ضَلَّ قَاصِدَه زَارِعَاً لَيْسَ حَاصِدَا
للمُحَالْ دِيمَة رَاصِدَا يَامَا خَابَتْ مَرَاصِدَا
النَّسِيمْ لَىْ تَرَدَّدَا أحْيَا لَى رُوحِى رَدَّدَا
هَيَّجْ أشْوَاقِى جَدَّدَا والطُرُقْ آهٍ مُسَدَّدَا
كَرِّرْ كَرِّرْ يَامُغَرِّدَا كَانْ تَفِيدْ أوْ تَبرِّدَا
الصَّبُرْ عَنِّى جَرَّدَا والدِّمُوعْ لَىْ مُبَرِّدَا
مَا الحَيَاة غَيْرَ أغْيَدَا فِي الحِصُونْ المُشَيَّدَا
تَالِدْ المِجْدِ آبِدَا فَلتَعِشْ طَايْلَة اليَدَا
الجَّبِينْ نُورُو يَصْعَدَا والأسيسْ كَابِى أجْعَدَا
والسَّعَدْ طَوْعَ سَاعِدَه شَاهْدَه بَى ذَلِكْ العِدَى
كالقَطِيفْ بَلْ هِيَّ أجْوَدَا والحَفَاوَة المَعَوَّدَا
الأدَبْ حِينْ تَعَاوِدَه دِيمَه بَاسِمْ مِرَاوِدَه

[مها]

الفى عفاه

الفِى عَفَاهُ مَا أبْدَع صَفَاهُ
جَافِى ودَمْعِى جَارِفْ مِنْ جَمْرَة جَفَاهُ
أحبُّو وأحِبْ ذِكِرْتُو والبَى ذِكْرُو فَاهُوَ
عنْدَ أمْثَالُو مَحْبُوبْ مَمْدُوحْ فِي قَفَاهُ
الدُّرْ المُنَضَّدْ والابْرِيزْ صَفَاهُ
مَا بِنْسَاهُ لَحْظَة قَلْبِِى الاصْطَفَاهُ
فِى ذَاكِرْتِى دَايْماً لاَ أحَدَاً سِوَاهُ
غَيرْ حُبُّه البَحِبُّه ومَالُو إذَا رَعَاهُ
أحِبُّو والبِحِبُّو ثُمَّ أحِبْ قَسَاهُ
صَبَاحْ الخَيرْ صَبَاحُو مَسَاءَ الخَيرْ مَسَاهُ
مُرْتَاحْ بَالُو فَاضِى مُعْتََادْ النَّسَاهُ
نَاعِمَ الكَفْ تَعَطِّرْ كُلَّ اللاَّمِسَاهْ
إنْ تَسْألْنِى عَنُّه أدَبُو يَزِينْ صِبَاهُ
والنَّسَّامْ يَهِزَّكْ إنْ مَرَّيتْ خِبَاهُ
يَجْهَلْ حَالْنَا أيْضَاً يَجْهَلْ حَالْ صَبَاهُ
يَسْعَدْ كَوْنُه يَسْعِدْ الشَّقِى لَو صَبَاهُ
العَلَّمْنِى أهْوَى خِلَّى أمَا كَفَاهُ
يَرْأفْ مَرَّه يَرْحَمْ قَلْبِى الكَانْ كَفَاهُ
دَايرْ مَرَّه أسْمَعْ وأنْظُر دُرَّ فَاهُ
عَلُّوَ بِأىِّ كِلْمَه تَتْحَرَّكْ شِفَاهُ
تَعْجَبْ إنْ تَمَشَّى مُتْدَانْيَاتُ خُطَاهُ
مَا أعْظَمْ عَظَمْتُو مَا أحْلاَهْ بَطَاهُ
مَالُو إذَا تَعَظَّمْ رَبْ النَّاسْ عَطَاهُ
جَعَلْ النَّاسْ تَحِبُّه المَفْقُودْ خَطَاهُ
إذَا سَنَحَتْ ظِرُوفِى زَاوَرْ مُنْحَنَاهُ
تَتْرَنَّحْ خُطَاىَ حِينْ أوْطَأَ فَنَاهُ
مَا أصْلَبْ شَكِيمْتُو الثَّنَا مَا ثَنَاهُ
جَافِى ورُوحِى تَايْقَه دِى المِسْتَحْسِنَاهُ

[النورس المهاجر]

كيف نعرف المطر وخاصة الهطااال منه؟

الرعووود والبرووق .. هي الدلالة

كيف نعرف حقيقة معدن الذهب ؟
النار وصدق اللمعان .. هي التي تجليه

أفصحتي عن سؤال لمحتار يسأل عن عظيم الدرر والأشعار التي تهبيها إلينا ونقتات ونتذود منها في مسيرتنا فكان أصلها وتأصيلها من منابع متفردة في الكلمة والمعنى ( رواد الشعر السوداني الرصين القديم ) شعراء الحقيبة ..
أحييك على هذا النهل العظيم من عظماء الكلمة الشعرية .. فمذيد من الإبداع

[مها]

أحرمونى

أحرِمُونى ولا تحرمُونِى سُنَّة الاسْلاَمْ السَّلاَم

عَطْفَكُمْ يَا مَنْ ألَّمُونِى كالأشعَّة الأسهُم رَمُونِى
الشَّجُونْ باللَّيلْ نَادَمُونِى الأنَينْ والنُّوحْ علَّمُونِى
لَوْ مُعَنْعَنْ قُولْ كلَّمُونى حُبَّى طَاهِرْ لِمَ تَظلِمُونِى
بَرْضى قَابل الظُّلُم إحْتِرامْ

قلْبي رَاحلْ أنا كَيفْ سكُونِى صَبرى مَاحلْ يَا كَايْنَه كُونِى
كُفُّوا صَبْراً يَا مَنْ بكُونِى مَهْمَاَ كُنْتُمْ لَنْ تَدركونى
مَانِى ضَاجِرْ لاَ أشْكُو كَوْنِى سُنَّة العُشَّاقْ أتْرَُكُونِى
كُلَّ عَاشِق هَدَفْ السَّهَامْ

يالنَّفُونِى كَفَى أعْرفُونِى سَاهى سَاهرْ سَاحَّاتْ جِفُونِى
فِى هَوَاكُمْ يَامَنْ جفُونِى لاَ ألُومْ إنْ لَمَ تَنْصفُونِى
إنْعِكَاسْ الأحْوالَ كَفُونِى أيْضاً الأيَّامْ عَرَّفُونِى
يُوم سَمُوماً ويوماً غَمَامْ

كُلَّمَا النَّسَماتْ عَطَّرُونِى فاجَأونِى دِمُوعْ مَطَّرُونِى
رَبِّى أغْفِرْ للعَكَّرُونِى فى وَدَاعَةْ البَارى العَرُونِى
رُبَّ وَقْتٍ يتَذَكَّرُونِى أو يقُولْ القَايِلْ دِرُونِى
أو يَحدَّثْ عَنَّى المَنَامْ

الدُّهَاةْ بالسَّلَو مَا دَهُونِى عَنْ تِجَاهكَم مَا وَجَّهُونِى
بَىْ تحَكُّوا وشمْتُوا النَّهُونِى وبَرْضِى هَايمْ وخَاضَعْ لهُونِى
لا أقُولْ مُسْتَنْكِفْ وهَونِى عَنْ كُثَيرْ عًنْ قَيسْ نَبَّهُونِى

ما تَنَفَّسْ صُبُحْ أو ضَحَى لى إلا غَابَ هُدْهُدْ فِكْرى ووَحَى
قَالَّى قُرْبكْ عَينْ المُحَال قلْبى غَير ذكْرَاك مَا صِحَى
يَكْفِى إنُّو السُّهُد إكْتِحَالى يكْفِى شَاَهدْ لَىْ إنْتحَالِى
المَدَامِعْ ألْسُنْ لِحَالِى شَاكِى شَاكِرْ شَاخِصْ دَوَامْ

طَافْ خَيَالكْ واللَّيْلُ كَافِرْ شُفْتَ بَدْرُه المِتَجَلَّى سَافِر
صَكَّ غَاضِب لِقَى دمْعى دَافرْ قَالُّوا جُمْلَه وعَقَدْ الأظَافِر

فى التَّفكُّرْ أصْبحْ وأمْسِى أيْضاً التِّذْكارْ نَجْوَى هَمْسِى
وَحَيَاتِى أشْبَه برمْسِ أشْكُو يُومِى وأسْتْرحَمْ أمْسِى
مَا عَهِدْتَك يَا لَيْلُ تَمْسِى طلْتَ وإمْتَى إشْرَاقُ شَمْسِى
وإنْتَ وَينْ يا بَدْرِ التَمَامْ

النِّفُوسْ إمْتَحَلَتْ لريفَكْ تَصْبُو مَعَنَى تَزَاورْ وَريفَكْ
والزِّهُورْ تَتْنَافَسْ لِكَيَفَكْ وقَلْبِى يخْفُقْ مَا هَبْ طَرِيفَكْ
قَلْبى صَاحِى وأنَا كيَفْ أنَامْ

قُتَّ لَيْتَ الأيَّامُ ينْدنُ تَبْقَى لاَنَتْ وسِحَابِه دَنْدَنْ
بلِمَاكْ النَّيرَانْ يخَمْدَنْ لَيكَ رُوحِى وأجزيكَ حَمْداً
قَال لِى كَيفْ تَسْتوجَبْ لى حَمداً مَنْ تَعَاطَى المَكْرُوهَ عَمْداً
غَيْرَ شَكْ إتْعَاطَى الحَرَامْ

قُلْتُ أهْلاً وإزْدِتَّ حُباً وَجْهى هَلَّلْ وعِيُونِى عَبَّنْ
كَسَحَايْباً فى مَاحْلَه صَبَّنْ حُبِّىَ زَرَّعْ وطَوَارْفُه هَبَّنْ
وحَوَاسِّى لَنِدَاكِ لَبَّنْ العِصُورْ بمِثَالِكْ تَنَبَّنْ
مِثْلَ ذَلِكْ لَيْتَ الأنَامْ

[مها]

دمع المحاجر

دمْع المَحَاجِرْ قَرَنْ أفْكَارِى المَا بِنْدَرَنْ
يَا حِلَيلُو اللِّ حِجِيلُو رَنْ
وقَّلْ مَهِيرَاً حَرَنْ فى مِعْصَمُه العَاجْ حَرَنْ
نَاعْس العِيُونْ يَسْحَرنْ هَارُوتَ (1) والبَحَّرَنْ
لَيهُ الأرْدَافْ حَدَّرَنْ ألْحَاظُه كَمْ وَدَّرَنْ
أمْرَ الهَلاَكْ صَدَّرَنْ مِنْها القلُوبْ حَذَّرَنْ
أنْهَار خدُودِكْ جَرَنْ فُوقْ قَلْبِى كَىْ جَرْجَرَنْ
لَكِنْ عَوَايْدَاً جَرَنْ رَحِيْم لَدِمُوعِى الجَرَنْ

مَا الزِّلاَل والعَسَلْ لَى نِغَيمَكْ مَافِيشْ مَثََلْ
الفِى الشَّامْ والأسَلْ لُونِكْ لَيهِنْ مَثَلْ
فَدِعْ الصِّدَيرْ مَهَّدُو صَارْ مَرْتَبَاتْ نُهَّدُو
أيشْ تَهْدُو يَامَنْ هَدُوا أنَا قَلْبِى رَاحْ شَاهَدُو

[مها]

متى مزارى

مَتَى مَزَارِى أوْفِى نَذَارِى وأجْفُو هَذَا البَلَدْ المُصِيفْ
مَا أقُولَ إمْتَى المَزَارِ إلاَّ تَجْرِى دِمُوعِى الغِزَارِ
زَارْنِى نَاسِمْ شَاقْنِى المَزَارِ لَوْ يَزُوْرْنِى الطَّيفْ يَبْقَى كَيفْ
يَا خَصِيبْ الُّسوحْ أمْتِى أطُوفَكْ وأسْتَرِيحْ الرُّوحْ منْ قِطُوفَكْ
يَا حَبِيبِى إنْ شَاء الله أشُوفَكْ فِى نَعِيمَكْ وظِلَّكْ وَرِيفْ
أشْهَى والآمَالْ يَفْرِحُونِى مَالِى إلاَّ سَجْعِى ولِحُونِى
صِرْتَ أبْغَضْ مَنْ يَنْصَحُونِى هَلْ تَجَامِلْ تَرْسِلْ لِى طَيفْ
إمْتِدَاحَكْ بِقَى لَىْ قِرَايَة لَى تَمَلِّى القُرْطَاسْ مِرَايَة
الوَحَايِحْ فَصَمَتْ عُرَاى هَا جَزَا مَنْ يَعْشُقْ ظَرِيفْ
شَعْرَكْ أسْوَد زَىْ حَظْ حَسُودَكْ نُورْ تَضَاحِكْ بَدْرَكْ فَصٌودَكْ
كَمْ غِضَنْفَرْ فَاتْكَابُو سُودَكْ والمُهَا تَهْوَاكْ يَا خُشَيفْ
عَفْوَكْ أسْمَحْ لاجْلَكْ ثَنَاىَ لاَ أمَلْ مِنْ قِبَلَكْ عَنَاىَ
عِنْدِى مُرَّكْ حُلُو يَا ُمَناىَ والَّذى يَرْضِيكْ هُو اللَّطِيفْ
يَامَا عَاِشْق ومَاهُوَّ وَافِى ويَامَا شَاعِرْ يَقْصُدْ عَوَافِى
مِثْلَهُمْ مَنْ يَعْشُقْ قَوَافِى ومِثْلَنَا مَنْ يَعْشُقْ عَفِيفْ
يَا مُحَجَّبْ صَايِنْ جَمَالَكْ يَا مُهَفْهَفْ بَعْضًكْ أمَالَكْ
دَامْ زَهَاكَ ودَايِمْ كَمَالَكْ يَا وَحِيدْ القَدْر المُنِيفْ
يَا رَشِيقَاً حُسْنَكْ نَمَالَكْ قُلْ لِطَيفَكْ هَاجِرْنِى مَالَكْ
دَمْعِى كُفَّ وكَفَى إنْهمَالَكْ إنَّ بَعْدَ الصَّيفْ الخَرِيفْ
يَا لَهِيبِى الزَّادْ إشْتِعَالاَ لَىَّ جَمْر الغَضَى إنْتِعَالاَ
يَا نَسِيمْ المَحَبُوبْ تَعَالاَ مِنْ أرِيجَكْ أرْحَمْ بِِهََيفْ
يَا أمَانِى مِنْ كُلِّ وَاقِبْ مَالُه طَيفَكْ لَىْ مَاهُو رَاغِبْ
هَلْ فِي طُرُقْ الأحْلاَمْ مُرَاقِبْ أمْ يُحَاذِرْ أمْرَاً مُخِيفْ
إنْ حَكَيِتْ مَا حَلَّ بَىَّ لاَ شِي يا ذُو الرُّوح الأبِيِّه
كُيف أرضَى الحَاله الغَبِيَّه وكَيف أقْبل بـهَـا تَتَصِف
إنْ أقُول ْالثَنَا يَا جَحَاجِحْ فَهْوَ مِنْهُ وإلَيهِ رَاجِحْ
إنْ تَزِنْبُو تَرَى وَزْنُه رَاجِحْ خِلِّى مَعَنَى الرُّوحْ خَفِيفْ
مَا أبَالِغ في شَأنه نَاصِح بَل هو يَعْجِز لى كُل نَاصِح
لَن يَطُول سَعى المُراصِح تَأبى نَفس الحُرْ يَا حَرِيفْ
السَّلامْ مَا أبْتَسَمَتْ زهُورَكْ مَا تَلألأ رَفْ نُورْ نِهُورَكْ
مَا جَلَتْ بَسَمَاتَكْ شَهُورَكْ يبْقَى لَى مُتَّكَأكْ قَطِيفْ

[مها]

فلتحيا يا ضاوى المحى

فَلتَحْيَا يَا ضَاوِى المُحَىْ فلتَهْنَا يَا شَمْسِ الضُّحَىْ
اللَّيلَة بَالَغْ بَخْتِى هَبْ شُفْتَ العَوَارِضْ كاللَّهَبْ
يَلْعَنْ أبُو المَاظْ والدَّهَبْ يَالله فُوق لَىَ بِتْ وَهَبْ
جَاتْ بِتْ وَهَبْ جيلْنَا إنْقَرصْ خَافْيَه المَجَمَّر والبُرَصْ
تَلَّجْنَا والعَرَدَيبْ ضَرَصْ يَسْتِرْنَا الله مِنْ الجِرَسْ
سَاقْ مُعْتَدلْ قَدَماً قَصِيرْ لَدِنْ القَوَامْ فَاقِلْ خَصِيرْ
مَا بَينْ الكَوَاعِبْ والمسير لاَ تَعْجَبْ الصَّانِعْ بَصِيرْ
جَلَّ الآلَه الصَّوَّرَه بَلُّورْ صَفَاهَا مِنَوِّرَه
الجَبْهَة زَانَه ودَوَّرَه نَجْلاَ وعِيُونًه مَحَوَّرَه
شُوفْ الفَقَلْ فَاقْ العِبَارْ والخَدْ مَجَلَّى مِنْ الغُبَارْ
غَيمْ الخَرِيفْ نَقْشَ الابَارْ هَل دَيلْ سِنُونْ أمْ رُزْ كُبَارْ
رَبْيَانَه مِنْ ثَدْياً لَبِينْ وهَلُمَّ سِتْ نَفَلاً مُبِينْ
لِجَنَابُو قَطْ مَا مِغَضِّبَينْ وعَلَيهَا مَا بِنْصُرْ جَبِينْ
طَرْفَك سَحِى وحَابْك الكُحُلْ إنْتَ الخَرِيفْ وأنَا فِي مَحَلْ
لَيكْ شُكْرِى مَا بَالِغ مَحَلْ حَبَّايَة فِى فَمْ الرَّحَلْ

[مها]

يا مولاى زوجة

يَا مَوْلاَىَ زَوْجَه هِىَ الشِّلًوخَه تَلاَتَه
والاثْنَينْ نَبَكِّرْ بَى بِنَيَّه حَلاَتَه
بَالطَّرَبْ الشَّدِيدْ إتْرَامَحن خالاته
يَات مِنْ شَالَه أوْضَحْ فَمُّو فِي وِجَينَاتَه
إِنْصَرَف السِّبُوعْ وأتَنْ جَمِيعْ أُمَّاتَه
بَاللِّتْنَينْ عَزَمْنَا عَلَى ضَبحْ تِسْمَاتَه
إِجْتَمَعُوا الأَحِبَّه الجُمْلَه عَزُّو حَمَاتَه
وَاقْفِينْ كَالْكَهَارِبْ يَضْوُوا لَى مُهِمَّاتَه
ياتْ منْ كانْ حدَقْلُو إسم بِقتْ العِبارة جسِيمَه
سَمَّينَاهَا{ آمْنه} إنْ شَاءَ الله حَاقَّة إسَيمَه
"بِتْ أرْبَابْ" تَحَضِّرْ لُو وتَخُتُّو وِسَيمَه
قَبَلْ المَايِقَينْ يِلْمَعْ كَأَنُّو قِسَيمَه
مِنْ جَاىْ وَجاىْ النَّاسْ يَجُوا يَشِيلُوهَا
أُمَّهَا مَى المِسَيخَه مَا بتَقُولْ خَلُّوهَا
زِيَادَة عَنْ اللِّزُومْ الزَّارَتُنْ جَلُّوهَا
فِي صِنَيقِيرَة بِإصَيبْعَاتْ مُرُدْ بَلُّوهَا
تَتْعَفَّفْ مِنْ الأرِضْ أن بِقْيِتْ دلَّوهَا
مَاحَتْ جَاىْ وجَاىْ مِنْ الدَّفَاقْ تَكَلُوهَا
بَالرَّضَّاعْ والجَّلاَدْ وعِقْدَ المِسِكْ حَلُّوهَا
هِى يَا اللَّيلَة مَنْوَه أتْشَهَّدُوا بِتَاكْلُوهَا
مِى وِسَيخَانَه حَاجَه لَطِيفَه
نَفْسَكْ تَنْفَتِحْ وِكْتَينْ تَمُسُّه قَطِيفَه
إنْ جيتْ شِلْتَهَا تَجِيكَ هِى مِلَيهِيفَه
وتَأَخُذْ ليَهَا ضَحْكَه وتَبْرِدَكْ بَى هَيفَه
حِلَيوَه حِنَيْنَه
ورَايِقْ طَبْعَهَا ذَاتَه البَرِيدَه لِوَيْنَه
للْمُرْسَالْ تَحَضِّرْ مِى القِرَيزْنَه هِوَيْنَه
ومِى شَالْقَه أُمْ شَلِيقْ واللهِ أَعْظَمْ عَيْنَه
مِمَّا نَشَتْ بَى بَالَه
العَجَبْ إنْ جَانَا زُولْ فَدْ حَبَّه مِى خَارْبَالَه
إنْ دَخَلَتْ تَقَنِّيْب َما بِتَحُومْ شِرْبَالِه
إنْ مَرَقَتْ تَشِيلْ نَاسْ خَالَتَه القَارْبَالَه
شُوفْ أُمَّهَا شُوفْ ذُوقَه مَا أَصْفَاهَا
مَا بِتْقُولْ بَدُورْ وبَدُورْ مَا خَصَّاهَا
بَى كُلَّ القَنَاعَة رَبْ العِبَادْ خَصَّاهَا
أنَا مَا وصَّيتَه إلاَّ النَّاسْ تَقُولْ وَصَّاهَا
سِمْحتْ وإنْجلَتْ جُو الجِّنياتْ مِوَقِّفَه حالى
كَلَّ العَاجْبُه ولَدُه يِجينِى بَى يَا خَالَى
بِرَّيبْة العَفَا الفِى الدَّانْقَه مَا فِى أخَالَى
بِتْمُوتْ بَالضِّحِكْ وِكْتَينْ تَقُولْ لكْ "حَالَى"
تَقُولْ لَىْ يَابَا أقُولْ لَيهَا أُمِّى إِتِّى
تعَالِى لَىَّ بَرِيدِكْ الحَاشَا مَا خَشَّنْتِ
قُولْ للعَاشِقِينْ بَالبَخْتِ مُشْ بَالبَحْتِ
وأَنَا حلالِى بَيهَا أدَّيَها لَى وَدْ أُخْتِى
قُولُو بَخِيتْ جَاهَا البَاذِلْ اللاَّ هُو لَكْ ولاَ هُو لَكَالِكْ
عَادْ لا بِرَحِّلَه لا بِقُولْ لَيهَا مَالِكْ ومالِكْ
وهى بِتطِيعُو كَمَا قَال "طِيعُوا" إمَامْكُمْ مالِكْ
قولوا آمين ألقَاهَا وتَكُونْ هِى كَذَلِكْ

[مها]

طيف خيالك

طَيفْ خَيَالَكْ بَىْ قَدْ أَلَمْ يَا حَبِيبِى وزَادْ الأَلَمْ
ذَكَّرْنِى زِينْة المَلَمْ اللِّ كَانْ لَى قَلْبِى إسْتَلَمْ
فِى مَنَامْ عَينَىْ إنْظَلَمْ شِنْ أَسَوِّى المَحَبُوبْ ظَلَمْ
المُحَدَّقْ حُلْوَ النَّغَمْ الطَّبِيبْ البِشْفِى السَّقَمْ
يُومْ فُرَاقُو اليُومْ الأغَمْ عَلَىْ صَارْ نُورْ الدُّنْيَا غَمْ
النِّغَيمْ الزَّىْ القِسَمْ والقَوَامْ إنْ رَقَدْ إنْقَسَمْ
لَوْ تَمَشَّتْ جَلَّ الرَّسَمْ أَعْمَلْ أيه القَسَّامْ قَسَمْ
يَا أطِبَّا مَا بَىْ وَهَمْ مَانِى حَامِلْ للدُّنْيَا هَمْ
مَانِى فَاقِدْ بَسْ مُتَّهَمْ فَقْدِى فَقْدَ الرُّوحْ الأهَمْ
العَفَافْ المَا إتَّهَمْ المُبَطَّرْ مَا إنْقَهَمْ
صَابْنَى مِنْ قُوسَينُو السَّهَمْ صِرْتُ أجْهَلْ حَتَّى السِّهَمْ
وِجْنَتَيهُ البَدْر الأتَمْ مُقْلَتَيهُ الفُلْ والكَتَمْ
بَسْمُو بَرْق اللَّيلْ العَتَمْ كُلُّو حُلُو إنْ قَالْ وإنْ كَتَمْ
أبَّهَاتُو رِجَالْ العَشَمْ ثَابِتِينْ كَالجَّبَلْ الأشَمْ
أُمَّهَاتُو مِثَالْ الحَشَمْ دُوِبْ مَا بِقَتْ رَيْحَانَه للشَّمْ
مَا بَهِمْ مِنْ جِلَلِ دَهَمْ مَهْمَا خَطْبَاً كَانْ مُدْلَهَمْ
لَيْتَ بَعْضَ البَىْ إنْفَهَمْ أَلْقَى لَىْ مِنْ فَاقِدْ فَهَمْ

[مها]

بى هوى الخلخال

بَى هَوى الخَلْخَالِ لَى حَبِيبْ الرُّوحْ
جِيبلِى طِيب الحالِى يَا نَسِيم اللَّيلْ
قُولُّو نَامْ الخَالِى وَهو يَتْخَيَّلْ
رَنَّةَ الخَلْخَالِ
بَالنَّظَر أسْخَى لَى هَنِّى بَى رُؤيَاكَ
الحَيَاة المَاسْخَالِى
النَّسِيمْ هَبَّى لِى يَا حَسِينْتَ الذَّاتْ
الجَّمُرْ هَبَّى لِى
يَا حَبِيبْ رَحْمَاك لاَ تَزِيدْ بَلْبَالَى
ولاَ تَكُون شَكْوَاى مُويَة فِى غَرْبَالِى
قَالْ لِى فِيقْ يَاغَالِى إنْ تَنِلْ شَكْوَاكَ
لَىَّ لَسْتُ أبَالِى
كُلَّمَا أطْرَاكَ العَقُلْ يَابَالِى
يَاحَبِيبِى البَىْ حنَّنْ اليَابَالِى
كَمْ وكَمْ قُبَّالِى قَلْبُو مَشْغُول بَيك
وإنْتَ مَاكَ مِبَالِى
آهٍ كُلَّمَا أطْرَاكَ لاَ أعِى إقْبَالِى
صِرْتَ مِنْ البَىْ شِخْصِى كَادْ يَغْبَالِى
لاَمْنِى فِيكَ الوَالِى واللِّ مَابِسْوَى
وكُلَّ مَنْ يَأوَى لِى
لَسْتُ أعْبَأ بَى زُخْرُفْ الأقْوَالِ
بَرْضِى فِى التَّبْرِيحْ والبُكَى المِتْوَالِى
يَا عَزُولْ إجْمَالِى أهْنَأ بَى رُؤيَاكَ
خَلَّنِى وأعْمَالِى
لاَ حَياةَ لَىْ لَوْلاَ مَا الآمَالِ
خَلَّنِى وبَلْوَاىَ إنْتَ مَالَكْ ومَالِى
يَانَسِيمْ لَى وَالِى هِبْ ِمْن المَحَبُوبْ
فِى كِلاَ الأحْوَالِ
هَا أنَا الرَّاجِيك وَاقِفَاً لِنَوَالِى
وقْفَة المَرْئُوسْ فِى رَجَاء الوَالِى
هَاكَ صَافِى مَقَالِى يَابَدِيع الذَّاتْ
إنْتَ نُورْ أمْقَالِى
الجَّفَا يَانُورْ العِيُونْ لَىْ قَالِى
هَذاَ لَوْ يَرْضِيكَ حَبَّذَا يَا غَالِى

[مها]

جل المصور

جَلَّ المُصَوِّرُ كَمْ فِى الحَىِّ مِنْ قَمَرَا يَبْدُو ويَكْحِلُ اجْفَانَ الشَّجِى سَهَرَا
اذَا الصَّبَا زَارَنِى مِنْ حيَهِّم ْسَحَرَاً فَاحَ لَهُ عَرْفَاً ابْدَى لَنَا خَبَرَا
نَمَى النَّسِيمُ وفِى ارْدَانِه صُحُفَاً وشَّتْ لَنَا عَنْ رَيَاحَينٍ وعَنْ عَبَرَا
ذَاكَ النَّسِيمْ بِذَاكَ الحَىُّ مُنْأَرِجَاً مِنْ عَبْقَرِيرٍ عَلَيهُ العَيْنَ والأُمَرَا
حُورٌ حَرَائِرُ فَى حِجْرٍ مُحَصَّنِةٍ كَأنَّهُنَّ بَسَاتِينٍ حَوَتْ نَهْرَا
فَالَّجوُّ مُبْتَهِجْ والنُّشْرُ مُنْأَجٌ والنُّورُ مُنْبَلِجٌ والدُّرُّ مُنْتَشِرَا
واللَّيْلْ يَسْكُنَهُ زَهْوُ الهَوَاءِ وشَذَى فِى الجَّوِّ فَتِيتَ المِسْك مُنْتَشِرَا
وَآيَةِ اللَّيْلَ سَعْدُ السَّعْدِ مِنْزِلُهَا فِى لَيْلَةٍ إتْمَامُهَا هِىَ لَيْلَهُ البَرِرَا
وطَالِعُ السَّعْدِ ثَدْى السّعْدِ يَكْلَؤُهَا كَلاَءَة الطَّيْرُ للزُّغْبِ اذَا اضْطَرَرَا
والوِرْدَةُ شَقَّتْ ظَلاَمْ اللَّيْلِ مَبْتَسِمَة مَا غَازَلَ الحُبَّ حَتَّى ضِاحَكَ القَمَرَا
والنِّرْجسٌ الغُضُّ يَحْكِى بَالنِّعَاسَ بِهِ وَفَتَّحَتْ بِنَدَىً أكْمَامُهَا الزَّهْرَا
وشَادِنٌ يَجُرُّ الذَّيْلُ مِنْ كِبَرٍ فِى مُقْلَتَيهِ لَنَا حَتْفٌ خُذُو الحَذَرَا
ألاَّ وَجُؤَزَرَةً هَلَّتْ مُكَلَّلَةٍ وكُلَّ قَلْبٍ لَتِلْكَ الطَّلْعَةَ انْفَطَرَا
مَاسَتْ عَلَى قَدَمٍ كَالعِهْنِ رَاحَتِهَا لاَ يَعْرِفَنَّ طَرِيقَاً بَارَحَ الحُجَرَا
اذَا النَّسِيمُ أمَالَ يَانِعَا خَضِلاً يَحْكِى مَيْلاَهُ مَيْلاَهَا اذَا انْهَصَرَا
لَيْلٌ وصُبْحٌ لَدَى رَدْفَاءِ مُخْمِصَة فَلَوْ رَآهَا ذُو العَاهَاتِ مَا ضَجِرَا
فَاللَّيْلُ يَسْتُرُهَا والصُّبْحُ يَظْهِرُهَا والنَاعِسَاتُ لَبِسْنَ الدَّعْجَةِ الحَوَرَا
مَا البَانُ فِى قَدِّهَا مَا الوَردُ فِى خَدِّهَا ولاَ القَوَارِيرُ كَمِثْلِ الجِّيدِ والنَّحْرَا
بُلْجٌ عَوَاتِكُهَا تَبْرُزْ كَوَاعِبُهَا فُنْقٌ مَرَافِقُهَا مَهْضُومَة الخِصْرَا
تَخَالُهَا اذَا مَشَتْ غُصْنٌ عَلَى هَشَشٍ يَزِينُهَا قَمَرٌ بَلْ يَحْمِلُ القَمَرَا
كَأنَّهَا تَخْطُو خَضْخَاضَا عَلَى وحَل فَيطُ الحَسَان ويَسْبَى النَّاسكَ الحَذِرَا
رَفَّالَةٌ لِجَلاَبِيبِ السَّكِينَة إِنْ سَفَرَتْ تُرِيكَ صَبِيحَاً يَخْجَلُ القَمَرَا
فَالرُّعْبُ يَقْدُمَها والرَّكْبُ يَصْحِبُهَا وسَحِرَ هَارُوتَ فِى اجْفَانَهَا سَحَرَا
مَرِيضَةِ اللَّحْظَ نَجْلاَتِ الكِحَالَ َفَلَوْ رَنَتْ بِقَلْبِكْ الرَّوْعُ والأفْرَاحُ تَنْحَصِرَا
وأْن يَكُ كَسُحْبَانِ هَمٍ أنْ يُسَائَلُهَا تَبَعْثَرَ الَلَّفْظُ لَمْ يَفْصِحْ وَلَمْ يَشَرَا
فَلَوْ تَفَاءَلْ ذُو ثَأرِ بِهَا وَسَطَا بِقَلِيلُ جَيْشً وغَارَ الحَشْدُ لانْتَصَرَا
يَا زَائِرُ الحَىِّ إنْ زُرْتَ الرِّحِيبْ فَقُلَّ مِنِّى السَّلاَمُ لِتِلْكَ الطَّلْعَةُ النَّضَرَا
تَلْقَى هُنَاكَ أُولُو الألْبَابِ فِى تَرَفٍ يَخْدِمْهُمُ الدَّهْرُ حَتَّى يَبْلُغَ الوَطَرَا
بَرْتَاحُ زَائِرَهُمْ إنْ حَلَّ سَاحَتَهُمْ وَمِنْ بَشَاشَتَهُمْ تَخَالَهُمْ سُكْرَا
يَنْمُو نَعِيمَهُمُوا يَهْنَأ عَرِيسَهُمُوا عَبْدُ اللَّطِيف الأبْرَأَ الكَدَرَا

[مها]

قف بنا

قِفَا بِنَا يَاصَاحبى لنَنْظُرَا بِذَا المُخَصَّب رَبْرباً وجَازِرَا
أهْلاً وسَهْلاً مَرحباً يَاحَبَّذَا بَالغَانِيَاتِ المُتْرَفاتِ الفُتَّرَا
النَّاعِسَاتِ الفَاتِكَاتِ إذَا رَنَنْ سَدَدْنَ أقْوَاساً بِغَيرِ تَوَتُّرَا
حَفَلَنْ كَمَا عِقْدُ تَبَنِّتَ فَصْلُهُ دُرَراً ويَاقُوتاً ماظَاً وجَوْهرَا
غُصْنٌ تَمَايسَ وهوَ يَحْمِلُ بَازِغاً فِى جَوفِ عَاتِمَة وهُرِقَ العَنْبَرَا
والغُصْنُ مِنْ مَرِّ النَّسِيمِ تَعَانَقَتْ عَذْبَاتُهُ وقِد إرتَدَى بَالدَّيْجَرَا
ظَبْىٌ إذَا حَلَّ الرِّحَابَ أرَاعَنَا الطَّبْلُ رَنَّ والظَّبَىُّ تَبَخْتَرَا
والشَّادِى يُمْيلِهِ الفِنُونَ وإنَّهُ لِيُرِيهِ إتْقَانُ الفِنُونِ بِسَيْطَرَا
هَبَطَتْ مَعَاطِفُهً عَلَى مُتَرِاكِمٍ وكَأنَّه قَلَمٌ يَجُرُّ الاسْطُرَا
يَمْشِى كَصَبَبٍ لاَ تَبِنْ خَطَوَاتُهُ كَسَفِينَةِ الأستَاذِ وسْطَ الأبْحُرَا
مَوْجٌ بِلا بَحْرً ونَوِمٌ لا سَنَا فَاعْجَب لِمَوجِ الكَاعِبَاتِ يَا مَن تَرَى
زَمَرتَ سِيُوفَ الصَّفْتَينِ رُمُوزَهَا ضَرباً وطَعَناً للقُلُوبِ مُحَيِّرَا
والبِشْرُ للجِنسَينِ أقْبَلَ حَافِلاً والجَمْعُ مِنْ مُزْنِ السِّرُورِ تَمَطَّرَا
هَذَا مُزِينُ الدَّارَ هَذا مَنْ إذَا مَا مَالَ مَيَّلَنَا وأَفَنَى وَلاَ دَرَى
هَذَا الَمُقَلَّدُ بَالدِّرُوعِ أبْرَزَا والعَينُ دَائرَةُ الحُرُوبِ ولَم تَرَى
الرُّعب حَلَّ والقُلُوبُ رَوَاجِفٌ الله أكْبَرَ إنَّ هَذَا عَنْتَرَا
لَدَنُ القَوَامِ بَطِىءُ القِيَامِ لَو ادِّعَى خُلُصَ المَحَاسِنِ ربَّهُنَّ لَمَا افْتَرَى
يَا عَبْدُ دُمْتَ والهَنَاءُ يَحُفُّكَ مَا أمْسَى لَيلٌ أو صَبَاحٌ أسْفَرَا
والنِّعْمَةُ الخَضْرَاءُ والجُود والنَّدَى والسَّعْدُ مَا مَرَّ النَّسِيمُ ومَا سَرَى

[مها]

نسايم الليل

نَسَايِمْ اللَّيلَ كَلِّمِى للبِرِيدْ رُوحُو سَلِّمِى
العَصُرْ عَصْرِكْ أَجْرُمِى جُودِى وإِنْ شِئْتِى أَحْرِمِى
قَلْبِى أَنَا العِنْدَكُمْ رُمِى أَصْلُو مَا نَافِعْ أَفْرُمِى
الكِتَيفْ سِتِّى أَهْدِلِى جَارِدْ السِّبْحَة بَهْدِلِى
فُوقْ بَهَاكْ تِيهِى وأَقْدِلِى شَارَعْ الحَارَة صَنْدِلِى
الوَضِيبْ طُولُو نُصْ مِتِرْ والوَرِيدْ مَاهُو مِنْبَتِرْ
فَاقْلَه ضَامْرَة الضِّهَيرْ فِتِرْ(1) والنِّغَيمْ سُكَّرَاً كِتِرْ
إحْمِرَارَاً مُزِجْ بَيَاضْ تَشْبَه الزَّهْرَة فِى الرِّيَاضْ
آهْ أَنَا الضَّاقْ بِىَ الفَيَاضْ سَيدْنَا أَحْجِبْنِى لَيكْ بَيَاضْ
بِنُورْ الحَيَا خَدِّكْ إِنْغَسَلْ والنَّظَرْ طَبْعَتُو الكَسَلْ
المُزَمْزَمْ ضَرِبْ مَثَلْ عَجْوَه مَعْطُونَه فِى عَسَلْ
شُوفَه جَاتْ تَمْشِى بَى مَهَلْ عَطَّرَتْ أَحْمَدْ السَّهَلْ
العِيُونْ للعِبَادْ ضَهَلْ مَاء الحَيَاء فُوقِن إِنْبَهَلْ
شُوفَ كَيفِنْ مُنَعَّمَه بالعَفَافْ كَيفْ مُعَمْعَمَه
الجِّسَيمْ نَاقْشُه وأَنْعَمَه الحَسُودْ عَينُه بَالعَمَى
جَالْسَة والهَيْبَة حَفَّتَه تَشْبَه الغُوفَة كفَّتَه
قَامَتْ وتِيَابَه لَفَّتَه والقِلُوبْ جَاتَه رَجْفَتَه
الشَّلِخْ هُوَّ حَيَّتِى رَسْمُو زَىْ رَسْمِ كَيَّتِى
زَادْ أَنِينِي وكَيَّتِى نَيَّتِى مِلاَضَّه نِيَّتِى
المَنَاظِر عَلى التِّلاَلْ والعِيُون طَابِعه الدَّلاَلْ
المَدَوَّر كَذَا الهِلاَلْ أحْسَن أحْسَن نَمْوت حَلاَلْ
حِصَّه محشِيَّه بى زُبَد جَلْسه لَى مُدَّة الأبَدْ
بَدْر تَمْ ضَوَّى فِى كَبَد إلاَّ بسْ عارْضُه مُستَبَد

[مها]

الغوانى البارع جماله

الغَوَانِى البَارِعْ جَمَالَه أَمْ غصُونْ الهَبْهَبْ أَمَالَه
مَالِى أَرَى العَالَمْ ثََمَالَه والبِدُورْ مُزْدِهَرَة بِكَمَالَه
المَلاَيْكَه اليُومْ فَرْحَى مَالَه يِبْقَى بِتْ السَّمَا سَدُّوا مَالَه
هَلْ دِى حَورْ الجَنَّة وزِلاَلَه حَافْلَة بَى رِضْوَانَه وبِلاَلَه
أَمْ دِى حَفْلَةْ طَاهْر السُّلاَلَة فِى وِدَاعْة الحَىْ ذُو الجَلاَلَة
شُوفْ وِجُوه الخَيرْ المَهَالَه هَاتْفَه بالتِّرْحَابْ بانْزِهَالَه
بَاهْلَة أَيْدِى الكرَمَ ْإِنْبِهَالَه عَاطْفَة عَطْف الأمْ لَى جُهَالَه
شُفْتَ فِى الفِتْيَانْ البَسَالَه وفِى الشَّبَابْ الحَيَا والأَسَالَه
مِنْ ذَوَايْبَاً مَاهِنْ نِسَالَه النَّسِيمْ يَأتِيكْ بَى رِسَالَه
شُفتَ شُفتَ النُجُل الكِحَالَه والمَعَاطف الرُّنَّع وحَالَه
والخِدُودْ اللِّيلْ إنْمَحَى لَه شُفْتَ بَدر السَّمَا إسْتَحى لَه
شُفْتَ فِيهِنْ ظَبْيَةْ تِلاَلَه إِنْجَلَتْ والكُونْ إِنْجَلِى لَه
قَمْرَة طَلَعَتْ فِى بَيتْ حَلاَلَه والخَيرْ مِوَشِّحْ تَاجَه وهِلاَلَه
المُهَاةْ الرُّنَّحْ كَسَالَه رَفَّ نُورْ الهَيْبَاتْ كَسَى لَه
حَالْ تَمَخْوِلْ دَارْسَ الرِّسَالَه عَنْ صَلاَتُه إِتْلاَهَى ونِسَى لَه
السَّلاَمْ لَى تُوتِى ورِمَالَه الزُّمَلاَ يَانِعْمَة الزَّمَالَه
الخَرِيدَة المَوْرُوثْ كَمَالَه جَاهْلَة حَالْنَا وتَجْهَلْ جَمَالَه

[مها]

مره مره

مَرَّه مَرَّه يَانُسَيْمَ السَّحَرْ هِبْ لَىْ مِنْ شَاطِى البَحَرْ
طُوفْ الخِبَا وجِيبْ لَىَّ مِنْ أُمْ دُرْ عَبِيرْ ذَاكَ النَّحَرْ
مَثَّلْتَ غَرْقَانْ البَحَرْ أنْقِذْنِى وأَبْرِدْ عَنِّى حَرْ
أَنْدُبْ زَمَانِى الانْسَحَرْ وأرْحَمْ فُؤَادِى الانْتَحَرْ
هَجَرْ الحَبِيبْ زَادْنِى وَفَرْ هَجَرْ المَنَامْ عَينَىْ طَفَرْ
أَتَأمَّلْ البَدْرِ إِنْ سَفَرْ وأفْضَلْ أسَامِرْ بَدَلْ نَفَرْ
خِلاَّىْ إِنْ بَسَمْ الثَّغَرْ فِى جُوفِى أوْلَعْ نَارْ صَقَرْ
شَخْصَ الكَمَالْ فِيهَا إسْتَقَرْ كُلْ غَانْيَة مِنَّهَا فِى بَقَرْ
هَيْئَة غُصُنْ حَامِلْ قَمَرْ زَاهِرْ مِحَلِّيُه الثَّمَرْ
النُّورْ تَجَزَّا زُمَرْ زُمَرْ كُلْ زُولْ عَلىِ شَىْءٍ ضَمَرْ
يَا سَعْدُ بَدْرَ الجِّيلْ ظَهَرْ دُرَّةْ عِقِدْ جِيدْ الدَّهَرْ
جَامْع الزِّهُورْ جَامْع الزَّهَرْ البَدْر حَوْلُه إِتْنِينْ شَهَرْ
مَانَظَمَ شَاعِرْ أَوْ نَثَرْ لَيكْ مَاشْ عَلَى أَثَرْ الأَثَرْ
القَالْ بِصِفْ حُسْنِكْ جَسَرْ فِى جَيدِكْ الطَّايِلْ كُسَرْ
بَرَزْ الجَّمَالْ المُنْتَصَرْ مَلاَ كُلْ عِيُونْ كَالْ كُلْ بَصَرْ
بَى جَبْرَة للعَالَمْ بَصَرْ والجِّيلْ عَلَى بَعْضُه إِنْعَصَرْ
رَجَبْ إِنْتَهَى وأَقْبَلْ صَفَرْ وأَصبْحَ ْمُهَدَّدْ بَالسَّفَرْ
خِلاَّى سَيلْ عَينَىْ دَفَرْ قَلْبِى الحَنِينْ فَرَّ وطَفَرْ
نَامْ الخِلُوقْ واللَّيلْ حَكَرْ مَا صَاحِى إِلاَّ مَنْ ذَكَرْ
سَامِرْ سَجِيعْ قُمْرِى الوَكَرْ هَيَّجْتِى يَا قِمَيرِيَّة كَرْ
يَا دُنْيَا عِنْوَانِكْ صَدَرْ مَعَلُومْ سِرُورِكْ مَا نَدَرْ
نِعَمْ العَبِدْ طَوْعَ القَدَرْ فَرَّاقَه يَا دَارَ الكَدَرْ

[مها]

عينة الغيث الهطل

يَا عِينَةْ الغَيثْ الهَطَلْ جَابْ النَّسِيمْ نَيدَكْ سَطَلْ
يَا رَابْيَة بَينْ وَابِلْ وطَلْ يَارَوْضَةْ التِّيهْ والغَزَلْ
حِينْ هَلَّ بَدْرِكْ والمَطَلْ الجَّدُّ جَدْ والضِّدْ بَطَلْ
يَا سَاتِرْ أَسْتُرْ جَا الأهَمْ وغِرِقْنَا فِى بِحْرِ الوَهَمْ
القُوسْ يَنَبِّلْ بَالسَّهَمْ والنَّاسْ أصَابَتْ هَمْ فِى هَمْ
رَمَّى السِّنَجْ تِحْتَ الحَلَمْ النُّورْ سَطَعْ ضَوَّى الظُّلَمْ
الدُّرْ تَلاَلأ مِنْ عَلَمْ فُوقْ النَّفِيسْ نُونْ والقَلَمْ
حُورْ الحَرَايِرْ أُمَّهَاتْ حَفَّاهَا عِزْ الأبَّهَاتْ
حِينْ تَرْنُو بَى مُقَلْ المُهَاةْ خِلْنَا الجَّبَابِرَة آلِهَاتْ
هَذَا الوَصِفْ مَا بِنْخَمِسْ مِنْ بَعْد شَكْرِى النَّلْتَمِسْ
نُورْ بَهْجَةْ الزُّولْ الأمِسْ زَىْ المِرَايَة عَلِى الشَّمِسْ
يَاتْ مِنْ تَقُومْ تَلْعَبْ بِنَا والرَّبْرَبَه يَا حَسْبَنَا
رَمَتْ الكِتَيفْ فِى اللِّنْبَنى الجَاهْلَه يَحْفَظَه رَبَّنَا
لاَحَنْ بِرُوقْ فَتَحَنْ كَنَارْ كُلْ غَانْيَة فِيهَا إتْنَينْ فَنَارْ
الكُونْ عَبَقْ طِيبَاً ونَارْ الفَاتْحَة الله يزِيدْنَا نَارْ