ليه احنا مظلومين؟؟؟؟

[ريناد]

السلام عليكم ورحمة الله وبركاته
كيف الحلوين ان شاء الله يكونو تمام
ياجماعة ليه احنا اولاد المغتربين دايما مظلموين ليه بعد الواحد منا بعد مايقرا ويتعب يجو بكل بساطة ياخدو منك عشرة درجات وتدخل بي القروش هم فاكرين انو الواحد لمىيجيب99او98 يجيبه بكل بساطه وانو عندنا القرايه سهله والله المفروض ناس السودان هم اليخصمو منهم عشرة درجات لانهم مهملين في قرايتم حتى الواحد لمى يمشي اجازة في المطار في الرجعة ياخدو من كل واحد خمسة وثلاثين الف على شنو ماعارفه والله انا احيانا بقول لي ابوي انو انا المفروض اعمل حاجه عشان الظلم ده لكن بيقول لي حتعملي شنو يعني؟؟؟ ياجماعة عليكم الله ادوني رايكم

[زكى الدين]

اى والله كلامك صح وبعدين قايلين انحنا قاعدين فى بيونا وبندرس
وبتجينا قروش وانحنا فى بيوتنا والله انحنا بالزات مظلومين
بعد ما واحد يجى من المدرسه يمشى الشغل عشان يطلع
حق الفسحه وحق بطاقت الشحن بس هم بالسودان من جا من المدرسه
مشا الكوره
ومشكووووووووووره ريناد تقبلى مرورى

[ابراهيم الجيو]

تعديل نظام الامتحانات في السعودية لتصبح ف المدراس بدلاً عن الوزارة،، هو الذي نزل وبخس من قيمة الشهادات السعودية،،،


ومعاهم حق فعلاً فعلاً ف هذه،، يعني ممكن مدرسة أو مدرس يجامل طالب ف امكانية كشف الامتحانات وتسهيل عملية رفع النسبة للطلاب،،،


وكفاية انه اكتر من (70%) من المعدل الكلي معتمدة على المشاركة والواجبات والحضور،،

[ريناد]

اول حاجه مشكوووووووور يازكي الدين على المشاركه لكن ياابراهيم الامتحانات صح من المدرسه لكن بتجي شروط من الوزارة انو الامتحانات تكون وفق الشروط دي حتى الامتحانات بتتصحح في الوزارة يعني مافي اي فرق لمى تكون الامتحانات من الوزارة السنه الفات البنات اللي كانو في ثالث ثانوي في مدرستي انا طلعو من امتحان الرياضيات يبكو يعني زي امتحان الوزراة ويبقى في النهايه ظللللللللم بالله الواحد يخش بي 28 الف ريال في السنه الوحده ده ماظلم ياابراهيم؟؟؟؟؟

[الطالبابي]

والله انا كلامي انو الشهادة العربية ماعندها اي معنى انا امتحنت في السعودية بس ماظن انا لما قريت في السوداااااان والله صعبة صعبة شديد
اما بالنسبة للرسوووووووووم حقت المطار الخمسة ثلاثين بعد الزيادة لما كانت 30 ده فعلا ظلم قايلين الناس المغتربين كلهم اغنياء ولا شنو في ناس ظروفهم برضوا صعبة مفرووض يراعوا ليهم وده غير لما الواحد يمشي يسوي اجراءات السفر
تمشي هنا الخدمة الوطنية ماعارف بطاقة ( بطاقة فيها صورتي وكلام بالجمبة يقول ليك ب 35 على مااعتقد) ليه بطاقة من فضة ولا شنو
تتخارج منهم تمشي المغتربين
التأشيرة براها
ومابعرف شنوووووووووووووو
وجرجرة طويلة تسل الرووووووووووح فوق شنو ما عارف مكان ماتمشي دايرين قروووش
في الجامعة رسوم الشهادات العربية اعلى بي كتير من الشهادات السودانية في جامعتنا في طلاب شهادة سودانية رسومهم 150 الف جنيه بالقديم طبعا والشهادات العربية في ناس بي 800 الف ليه الظلم ده ياجماعة

تقبلوا مروري

[ايثار]

والله حسب راي انه الظروف مهياة للمغتربين للمزاكرة وفي السودان الواحدمهما اجتهد مابجيب اكتر من 97 واكيد دي مابلادة منهم وبعدينالمقاعد في الجامعات محدودة وبالذات في الكليات العلمية يعنى ممكن اولاد المغتربين بنسبهم العالية ماشاء الله يستحوزوا عليها..لكن بيني وبينك عشرة في المية كتيرة وفيها ظلم ممكن تكون في حلول احسن من كدة يعنى الطالب المغترب لو جاب 100في المية مايقدر يخش طب في جامعة محترمة الا قبول خاص وماادراك مالخاص..وال35 دى رسوم مغادرة وبياخدوها من الجميع.

[بنوته سودانية]

والله ظلم شديييييييييد
ياخي لو جبت 99 هندسة زي الناس مابتدخلها
حراااااااااااااااااااااااااااام والله
ونحن مابس بنمتحن من المدرسة
نحن عندنااااااااااااا قدرااااااااات
تحصيلي التلات سنواااااااااات والله ظلم
بس حسبي الله ونعم الوكيل

[the magic]

انا من الشهادات العربية وامتحنت وجبت نسبة لكن برضوا دخلت خاص ده كله ماظلم

[the magic]

والله كلامكم صاح يا ريناد وايثار بس نعمل شنو وربنا يعينا

[هديل الحب]

كلامكم كله صح هم متخيلين انوا الشغل خارج السودان اكتر ورواتبه اعلى بس في ناس داخل السودان ودخلهم اعلى من كتير من المغتربين ,,, وعن موضوع الاختبارات بتجي الاسئلة من الوزارة بس هي سنة واحدة اللي جات من المدرس والدراسة في السعودية ,مين اللي قال سهلة انا بعرف بنت درست في السعودية الى اولى ثانوي ومشت تكمل دراستها في السودان وقالت اللي درسته في اولى ثانوي بدرسوا في السودان لتانية ثانوي

[المقدام]

1/ موضوع الخصم من النسبة للشهادة العربية ده ظلم 100% .
ليه: اول حاجه حكاية انوا الاختبارات من المدارس ده موضوع جديد يا دوب ليه سنتين تقريبا مطبق والسودان شغال بحكاية الخصم من النسبة من زمان .

2/ موضوع الرسوم الخيالية المقررة على الشهادة العربية .
ليه: اول حاجه انا سوداني وبعتز بيها لكن حكاية الرسوم ليه التفرقه بين السوداني المقيم في السودان والسوداني المغترب ، اهلنا ما اغتربوا من كترة قروشهم اهلنا اغتربوا لان وضعهم في السودان ما كويس يعني بالعربي كده مفلسين .

3/ موضوع دفع الرسوم بالدولار.
ليه: التفرقه دي وشنو موضوع الدولار وانا سوداني وبقرى في السودان .

4/ الله يخلي جهاز المغتربين عملوه عشان يا خدوا القروش ولا عشان يساعدونا .

انا عارف طولت عليكم بس استحملوا الحكاية دي حارقاني شديد.

حكايتي طويله طبعا : اول حاجه انا طبعا اتخرجت من الثانوية (شهاده عربية ) من السعودية نسبتي كانت 83% ودي طبعا نسبة على قد الحال مشيت السودان زي اي سوداني داير اقرى في بلدي ، خصموا عشرة في المية من النسبة وبقت 73% ما مشكلة رضينا باللي مفروض علينا طبعا الكليات بقت محدودة اللي لازم اختار منها وحظي الكعب وقعني في كلية تربية كيمياء-احياء جامعه جوبا(طبعا ده كان قبول عام)ه جينا للرسوم طبعا بتقابل لجنه ، اللجنة المحترمة مكونه من حاج وحجه والله ما عرفتهم دكاترة ولا شنو في البداية من غير اي سلام ولا ترحيب.

س/ ابوك بيشتغل شنو؟
انا/ طباخ
الحاج (او الدكتور والله ما عرفت هو شنو) طوالي قال الطباخيين هم اغنى ناس في السعودية خلاص رسومك 350دولار يا ناس وده طبعا بعد ما قدروني لاني عندي اخوي الكبير بيقرى في جامعه شندي طب وبالخاص كمان .

اللي انا ما عارفه من وين جاب المعلومة الخاطئة دي انوا الطباخيين هم اغنى ناس في السعودية؟؟

والحمد لله انا حاليا طالب+موظف ده طبعا عشان اغطي رسوم الجامعه والمصاريف الخاصة بي والحمد لله انا حاليا في السنة الثانية تقنية معلومات (قسم حوسبة واتصالات )


وفي النهاية انا سوداني وبحب السودان لأنوا بلدي وفيهوا اهلي

بالله عليكم غيروا الحاجات دي عشان الناس ترجع زي اي واحد لي بلده عشان يعيش فيه كسوداني

[المسيري الأحمر]

و الله مافي ناس مظلومين زي مغتربين ليبيا

و الواحد بيتردد علاشان يرجع السودان كلو من الكلام الفاضي إلي قاعد يسمعو و يشوفو

:

[ريناد]

تسلموا على مشاركاتكم ولكن مافي حل غير نقول حسبي الله ونعم الوكيل

[ahmedBolbol]

السلام عليكم ورحمة الله وبركاته
والله اعجبت كثيرا بطرحكم هذا الموضوع والنقاش فية
نعم والله انا معاكم المقتربين صارو الحين مستهدفين من
قبل الدولة استهداف مادى شديد وضيقو عليهم شديد من كل
النواحى رسوم خيالية وقير منطقية وظلم شديد والواحد بقى
اكره ارجع السودان من العمائل البتحصل فيهو وبالاخص
جهاذ المقتربين والله ديل اكتر ناس حرااااااااااااااااااامية
غير الجامعات والامور التانية انت مقترب معناتو انت مرطب
هم بفتكرو انو المقترب دة بطبع القروش ولا شنو؟

[محمد سليمان]

مشكوووووووووووووووره ع الموضوع
الدوله فاكره المختربين بنك السودان المركزي ولا شــــــــــــــــــــــــنو؟؟؟؟؟؟؟؟؟؟؟؟؟

[صعبة المنال]

[color=[size=5]800080]اول شي شكرا على الطرح الهام

احب ارد على الاخ الطالباي في موضوع (الشهادة العربية ماليها معنى ) كيف يعني ماليها معنى احنا طول السنة ماقاعدين نلعب قاعدين ندرس وندرس مناهج معايرها تؤهلنا لدخول الجامعة من غير مانواجهه صعوبة كبيرة [/color]

اما عن راي الشخصي بلدنا الصراحة ظالمانا ظلم ماعادي في حكايات الدرجات يعني لوجبته 90 واحد تاني شهادة سودانية جاب 60 نخش الاتنين نفس التخصص وعادي جدا لو المغترب يدخل خاص وصاحب الشهادة السودانية يخش عام والمغترب الجايب نسبة اعلى يدفع فوق الرسوم المروضه رسوم براها اسمها رسوم المغتربين نقول شنو بس احسن شي الزول يقعد يقرا الجامعة في بلدو عشان ماينظلم الظلم دا كلو ودا كلو كوم والمعاملة الاجتماعية كونك شهادتك عربية

[/ولجميع الاخوات والخوان الي في السعودية والله يايحظكم بخصموا منكم 10 درجات بس احنا هنا في قطر لو خصموا 10 درجات رحمة.. احنا عندنا نظام المدارس المستقلة وانا بدرس فيها حاليا وبنقصونا اقل شي 16 درجة دا لو اعترفو بالشهادة اساسا.... والحمد لله

سوري على الاطالة لكن بالجد موضوع هام اشكرك الاخت على هذا الطرح


صعبة المنال.....color][/size]

[ThEwWw]

عينيا ابكي بس عينيا ابكي بس

[الديامي الاصلي]

والله موضوعك جميل
بس لوالموضوع بقي علينا نحن المغتربين بنتحمل نحن بنضحي عشان غيرنا وده الطريق الاخترناهو
والله يعينا المشكلة في القاعدين هناك ومكوين بي نارها ديل هم البنشال همهو
البلد محتاجه الكتير ومشكور كتير يا ريناد
ويا بلاك كات ربنا يكون معاك ويوفقك

[مومو و بس]

كلمك صح نسوي شنو الله يكون في العون بس

[عاشقة القمر]

انت جريئة جدا في طرحك للموضوع ده ........... ومع انو في كتير من الاعتراضات لكن ما في حلول........
انا عندي صحبتي جابت 93%ودارسة علمي لمل رجعت للسودان درست مختبرات عشان الحكاية بتاعت الخصم دي مع انو كان طموحها طب....... أقل كلمة ممكن تتقال في الموضوع ده انو ظلم.........