مشوار سوق ام درمان عندى حاجات داير اشتريها الراجل عندو بوتيك وكده
والدنيا عيد قولته ليهو حبابك 10 مر على بس
جانى قريبنا ومشينا سوق ام درمان ودخلنا احدى اسواق الجمله وبدأت عملية البيع والشراء وبدا حلف الطلاق دا يقول ليهو على الطلاق كده ما بتجي
وداك يقول ليهو على الطلاق دا بى راس ماله
(وأنا فى سري بقول يا حليل الحريم البحلفو بيهم طلاق فى السوق )
اها دا ما موضوعنا
اها برنامجم بتاع البيع والجرجره دا ما وقع لى قومته طلعته براحه قولته اقيف قدام المحل لمن يخلصو بيعتهم
وقعدته اكشف شمال ويمين واعاين فى الناس الماشه والجايه
لكن بالجدام درمان لذيذه خلاث
اها دا ما موضوعنا
لقيت لى كرسي قدام المحل قعدته فيهو واثناء ما انا بتلفت لفت نظرى عملية بتاعت بيعه قعدت تتم ما بين بتاع بترينا وبنوته فاتنه ممشوقة القوام
واللفت نظرى اكثر انو الكلام بى همس شديد وفيهو كمية من البسمات المهداه
من الطرفين وبعد شوية شوفته ليك بتاع البترينا طلع ليهو كيس من الدرج
التحت فيهو حبوب لونه بمبي وحسب ليهو كم حبه واداها البت
بعد داك بى صوت عالى قالت ليهو (جاو وسي يو)
قال ليها طيب نشوفكم تانى
اها دا ما موضوعنا
نسيت الموضوع وواصلته فى التلفت حقي وبعد دقيقتين جانى عمنا بتاع البترينا وقال لى يا ابو الشباب في ظومتك ما بلقي عندك فكة 50 قولته ليهو ابشر حبابك 10 الخير راقد
قولته انا القروش اللاتي كلهن خمسينات علا بشوف ليك الشباب الجوه ديل
وفعلا فكيته ليهو من قريبنا الجوه البوتيك
ولحظته جاتنى فكره خبيثه وقولته لازم ادردق الزول دا
ورجع بترينتو
بعد دقيقه وبعد ما خلص الزبائن المعاهو رجعته ليهو
قولته ليهو بالله ما بلقي عندك اسكراتش
قال بالحيل
اها اشترين منو الاسكراتش
وقولته ليهو ياخي كل سنه وانت طيب والعيد على الابواب وانشاء الله السنه
الجايه يكون عندك بوتيك كبير
الراجل قال امين وخش معاى فى موضوع انو كيف بدا البترينا دى وعييييييك
اها دا ما موضوعنا
اها طوالى باغته الراجل وقولته ليهو شايف عندك حبوب بمبيه قبل شويه
دى بندول جديد ولا شنو
قال لى لالالالالا ياخي دي حبوب حقت بنات
عملته ليهو اهبل وقولته ليهو والله اكان وقع لى انشاء الله تطقشنى ركشه
قولته ليهو ممكن تشرح لى اكتر
قال لى دى حبوب اسمها (تقيل ورا)
طبعا الاسم كيفنى شديد وقعدته اضحك وبعد داك شرح لى بالتفصيل
وعرفته انو فى اكتر من نوع من الحبوب واى نوع من الحبوب عندو معالجه
معينه لى منطقه معينه فى جسم البت وفى نوع شامل وتقريبا اسمو (استار)
وعلى ما اعتقد تقيل ورا دى ظاهره وما دايره شرح
وقبل ما اغادر صاحبنا بتاع البترينا جو بتين وقبل ما يبدو الكلام معاهو
دنقرته وهمسته ليهو فى اضانو اسمع ديل برضو تقيل وراء
قال لى لالالالا ديل دايرين شئ تانى وابتسم لى ابتسامه صفراويه
قولته ليهو طيب بس اتقي الله يجعل لك مخرجا
قال لى مع السلامه يا عمرو خالد
اها اثناء انا وقريبنا طالعين من السوق حكيت ليهو
قعد يضحك وقال لى عادى وجنس دا فى السوق كتير
يا جماعه الحمدو لله ربنا خلقنا فى اجمل صوره مفروض نرضى بى حكم ربنا
وغير كده والله قبل فترة فى قناة النيل الازرق حضرته حلقه للدكتور
عمر محمود خالد اتكلم عن سلبيات الحبوب دى والاثار الجانبيه الممكن تحدثه من فشل كلوى لى سرطانات لى طفح جلدى وووووووو وفى بعض الحالات قعد يؤدي استعمالها الخاطئ للموت فلماذا يا اخوات ؟؟؟
