شـوفـوهـا ويـن !!!

[هاشم أحمد خلف الله]

شوفوها وين ؟
الـ مني غابت
وإنفطر قلبي وحشاي
خلتني زي زولاً غريب
تائه وسابح في سماي
فتشت ليها وراء النجوم
صبحي ومساي
سافرت لكل المدن
كل الجزر ورجعت ساي
سألت عنها في المؤاسم
صيفي وشتاي
سألت عنها كل زول
حاسس وشاعر بشقاي
شوفوها وين؟
النظمت شعري وغناي
شوفوها وين؟
الما حكت لزول سواي

ورجعت اكتب في القصيد
وما عندي راي
والليل نزع صمتي
الموكر في جواي
خلاني اسرح تاني فيك
واعيد غناي
النوم شرد مني واظن
قال لي جاي
قت ليهو
ما تهزر معاي
خليني في سهدي وآساي
خليني اتنهد وابكي
اكان دموعي تكون شفاي
انا كنت عارف إني ما قدر الفرح
كل الهموم كل الظنون تنزح وراي
يا ربي يا كاشف غطاي أنا ما جنيت
أنا جيت افتش في حبيب روحي وهواي

صادفني طيفك
يوم صباح ولي باح
انكى الجراح
والشوق ملفلف
فيني صاح
كفاك مِزاح
لامتين تباري
العتمة والليل والنواح
نازعت فيك الروح
وبقيت اسكِت
في الجراح
مرات أقول ليه تظلما
اديها من حِنك براح
ومرات أقول
هي السابتك
يا زول ..... أرح
بصبر عليك
قدر المحب
قالوا السماح
وانا من عرفتك
حفظت ريدك
وفيني كم طعنت رِماح