الشمشرة حقتنا بننشرا في راكوبتنا

[moukhtar]

اذا مشيت أي حفلة بتلقاهم قاعدين يتهامسوا .. كدا النشوف عروس الزول الشيطان دا كيف؟ ... عاوزين يموتوا عشان يشوفوا العروس .. القعدة غالباهم .. انتوا العروس والعريس بصلوا متين ؟ الحفلة قربت تنتهي.
< طبعاً في عرسان .. بصلوا في آخر أغنية .. الحفلات البقت تنتهي الساعة حداشر دي .. الفنان غنيتو الاولى هي غنيتو الأخيرة ..
< العازفون يقعدوا ينفخوا في آلاتهم الموسيقية .. وقت يظبطوها .. الساعة حداشر تجي .
< الفنان يطلع المسرح .. ينزل الحفلة تنتهي.
< انت مسكين تشوف العازفين يطلعوا وينزلوا .. تقول الحفلة دي الليلة اكيد بي عبدالحليم حافظ .. وإلاّ كابلي .. واحتمال كمان تكون بي ام كلثوم ذاتها ... تموت قبل ما تعرف فنان الحفلة منو؟... الحفلة تبدأ تلقى الفنان الزول الوصلك بالركشة لي بيت العرس.
< دا بقى فنان متين؟.
< والكلام في النادي يدور على هذا المنوال.
< يا جماعة انتو العريس دا مالو اتأخر كدا .. الحاصل شنو؟ .. كدا الحقوا الجماعة ديل يمكن يكون حصل ليهم حادث بعد ما طلعوا من الكوافير.
< يا زول قول كلام غير دا.
< تيت ..تيت .. تيت .. العريس وصل ... يا شباب معليش .. شيلوا الكراسي دي من المدخل .. عشان عربية العريس بتدخل بالحتة دي .. قوموا لينا يا جماعة.
< ناس الفيديو قالوا ما بشتغلوا لو ما زحيتوا ليهم من الطريق.
< تيت .. تيت ..تيت .. العريس وصل.
< العريس لابس بدلة .. لونها كيف ؟... ماكان يلبس اللون الغامض دا .. كان يلبس ليه لون فاتح شوية.
< العريس سمن.
< في ناس تخلي أي حاجة ويتلموا في عربية العريس .. والبنت العندها (فستان) عاجبها .. يستعرض بيه في اللحظة دي .. والعندها (تسريحة) سمحة ترمي ليك (الطرحة) وما تشتغل بيها ... والعندها (موبايل) مخلوعة بيه تجي تقيف بيه قدام عربية العريس وتقعد تتكلم بيه ..
< دقيقة ما تقفلي الخط .. نديك العريس تباركي ليه .. والعريس مسكين في الموقف الصعب دا .. يشيل موبايل ويخت موبايل ... الناس كلها عاوزة تبارك ليه .. البعرفو والمابعرفو.
< مبروك .. مبروك .. دي عملتها كيف؟.
< هاك دا خالي في السعودية .. عاوز يبارك ليك.
< هاك دي عمتي في دبي .. ضربت قالت ادوني العريس.
< دا مديرنا في الشغل قال لي اديني العريس.
< انت غيرت تلفونك .. ادينا رقمك الجديد.
< دا وقتوا يا عالم.
< كل الناس تخلي أي حاجة وتتلم في (العريس) .. ناس يحضنوا فيه .. وناس تسلم عليه وا فيه .. وناس يدخلوا ليه في الموضوع طوالي ...
< اسمع الكشف العملنا ليك .. ان شاء الله يكون وصلك .. عمل اربعة مليون.
< يا جماعة افتحوا الطريق .. يا جماعة شوية.
< الناس البتكون قاعدة تراقب في الموقف .. اصحاب العريس .. بكونوا هناك كل واحد متأخذ ليه موقف مناسب للرؤية بزاوية معينة ... عاوزين يشوفوا (العروس) .
< الزول الفصيح دا عاوزين نشوف عروسه .. وقع وإلا ما وقع.
< البعاين في العربية .. والبقيف في الكرسي .. والبتابع في شاسة التلفزيون عشان يشوف العروس في الفيديو.
< اها الجماعة ديل من يشوفوا العروس ... يقعدوا ينظروا : (والله ما سمحة ... الزول دا طلع بتفاصح ساكت) ..
< لو العروس (نور) او حتى لو العروس (لميس) شخصياً برضو بقولوا ما سمحة.
< هسع دي عروس .. عروس زي حلاوة مولد .. مكترة المكياج .
< اصلاً في أي مناسبة بتلقى ناس متخصصة بس في تقييم العروس .. ما عندهم أي شغلة غير (العروس) .. والعجب لو كان في بنات من أهل العريس كانن عشمانات في العريس القام عرس بنت غريبة عليهم.
< يشيلوا حال العروس شيل .. انت الزول دا ما بشوف .. عليكم الله هسع العاجبو في العروس دي شنو؟.
< وهاك يا انتقاد.
< عيونها صغار.
< ما فيها رقبة ...
< الشعر دا ما شعرها .. دا شعر مركبنوا ليها.
< العروس ما عجبتني .. فيها حاجة غلط .. شنو هي ما عرفتها .
< هكذا كانت تخرج التعليقات من الناس الحاقدين في الحفلة.
< عليك الله يا (ندى) شوفي العروس دي ذكرتكم منو؟.. تشبه (حبوبة) ابراهيم ود جيرانكم.
< اما اذا كانت العروس جميلة وما فيها أي كلمة .. فان التعليق بكون له طابع اخر تلقاهم بقولوا : والله العروس ما فيها أي كلمة .. بس كبيرة شوية.
< اما لو كانت العروس جميلة شديد وما كبيرة كمان .. بتقرأ في الثانوي العالي .. بتلقى البنات بتهامسن براهن : (والله قالوا ليك عندها امها صعبة بشكل .. يستاهل العريس عاوز ليه حماة تأدبو .. والله امها قالوا اليوم كله شايلة (المفراكة) وواقفة في الباب) .
< والله العريس دا اسبوع ما يقدر يستمر مع العروس دي .. اهلها صعبين شديد.
< ومثلما هنالك في جماعة بشيلوا في كل الاحوال حال العروس .. هناك في ناس كمان بشكروا في العروس .. وديل غالبا يكونوا اهل العروس.
< اذا العروس ما سمحة .. والناس كلها شايفة ذلك .. بتلقى في ناس بتكلموا ليك عن اخلاق العروس : والله عندها اخلاق يا سلام .. تختها في الجرح تخليه يشفي .
< يا سلام .. اصلو ما بتسمع ليها صوت .. عروس ملكة .. والله اصلو ما بتشوف منها عيبة.
< وتلقى ايضا بعد الحديث عن اخلاق العروس في ناس من أهل العروس ايضاً بتحدثوا ليك عن العروس في قالب اخر.
< والله عروس خدامة ... (المقشاشة) دي ما بتنزل من ايدها .. اليوم كلو بضاير في البيت.
< عريسكم دا محظوظ عرس .. والله عرس ليه عروس طباخة .. جنس طبيخ .. بتعمل طبيخ اسود حاجة ما بتخلص.
< والعجب لو عملت ليك كباية شاي.
< طبعاً هذا الكلام اذا كانت العروس ما سمحة .. عشان كدا اعرف من يتكلموا ليك عن اخلاق العروس الحميدة .. وعن طبيخها الجيد .. انو العروس دي ما سمحة ، وان العريس وقع وما سمّى.
< هذا عن العروس .. في حاجات تانية بتحصل في أي عرس .. في ناس تانية كمان بشيلوا الحال في اشياء اخرى.
< الجماعة ديل تخصصهم في الاكل .. يعني لو مشوا ليهم في حفلة ما عندهم قضية بي الحفلة والفنان .. وما عندهم قضية بالنادي الفيه الحفلة .. وما بشتغلوا بالعروس .. الجماعة ديل بس بنتظروا صحن الكوكتيل بفارغ الصبر .. ويدوروا انتقادات بعد ان يصلهم صحن الكوكتيل.
< هسع دا صحن .. بالله الكوكتيل بتاعن عامل زي قائمة المأكولات البتلقاها عند الكاشير .. أي حاجة جايب ليك منها الاسم.
< والله عرسهم ما فيه كلمة .. لكن عشاهم تعبان.
< اما اذا كان صحن الكوكتيل ما فيه أي كلمة بتلقى الجماعة ديل برضو بتكلموا .. الصحن ما فيه عيب .. بس البارد بتاعهم ساخن.
< هو اسمو بارد يا عالم

[dream-lady]

مختار...رووووووووووعة

فعلا كلامك كله حاصل ...خاصة بتاع التعليق في العروس

تسلم اناملك

[moukhtar]

تسلمي على المشاركة

تخريمة: بيني وبينك كدا ماحصل يا دريم شاركت معاهم[/font][/size]

[وحـــيد]

ههههههههه موضوع جميل

ودريم دي من ناس الملاحيظ ذاااتم

[moukhtar]

يا وحيد أولاً بشكرك على مشاركتك الحلوة
ثانياً انت القال ليك منو دريم من ناس الملاحيييييييظ لو ما لاحظت ما كان عرفتها منهم صصصصصصصصصصصح !!!!!!

[dream-lady]

تسلمي على المشاركة

تخريمة: بيني وبينك كدا ماحصل يا دريم شاركت معاهم[/font][/size]

مرات بس

[dream-lady]

ههههههههه موضوع جميل

ودريم دي من ناس الملاحيظ ذاااتم

انت عاد نقتك دي لاحقانا جوة المنتدى....

أجل كيف بره؟

[dream-lady]

يا وحيد أولاً بشكرك على مشاركتك الحلوة
ثانياً انت القال ليك منو دريم من ناس الملاحيييييييظ لو ما لاحظت ما كان عرفتها منهم صصصصصصصصصصصح !!!!!!

أفحمتتتتتتتتتتتتتتته

[امال الناس]

صباجكم نور
يا سكان هذا الدار

[dream-lady]

صباجكم نور
يا سكان هذا الدار

صباح الورد ياعسل

نور بيتنا وشارع بيتنا

[امال الناس]

صباح الورد ياعسل

نور بيتنا وشارع بيتنا

بيتكم منور
بوجودكم يا
قشطة + عسل مصفى

[وحـــيد]

[quote="dreem-lady"][align=center]
انت عاد نقتك دي لاحقانا جوة المنتدى....

أجل كيف بره؟ [/align][/quote]

بالجد ناس دريم ديل يبدوها نظير من فستان العروس لحدي جزمة اخو العريس الصغير

[/color]

[dream-lady]

بالجد ناس دريم ديل يبدوها نظير من فستان العروس لحدي جزمة اخو العريس الصغير

ماقدر ده

بس ممكن في البتمشي تتلصق في كاميرا المصور زي الضبانة

[مسلمة وافتخر]

اموت واعرف الكاتب السيناريو دا منو

[مسلمة وافتخر]

ماقدر ده

بس ممكن في البتمشي تتلصق في كاميرا المصور زي الضبانة

دى بتكون كايسة ليها فى عريس

الايام دى العرس بقى ذى الجهاااااااااااد

لاااااازم الواحدة تكد وتتعب لغاية ما تصطاد ليها ضكر

[dream-lady]

دى بتكون كايسة ليها فى عريس

الايام دى العرس بقى ذى الجهاااااااااااد

لاااااازم الواحدة تكد وتتعب لغاية ما تصطاد ليها ضكر

لكن كده بهربوا زيادة

اول شئ بالسخانة كريم اساسها بسيح ووشها يلمع زي البوهية الجديدة

[dream-lady]

اموت واعرف الكاتب السيناريو دا منو

دا واحد بتاع كلو
متاااابع دقيق

[مسلمة وافتخر]

لكن كده بهربوا زيادة

اول شئ بالسخانة كريم اساسها بسيح ووشها يلمع زي البوهية الجديدة

نعمل العلينا والباقى نخليه لمصور الفيديو

[dream-lady]

نعمل العلينا والباقى نخليه لمصور الفيديو

كلما اقتربتي الصورة تطلع حلوة

شعار البعض

[وحـــيد]

[quote="dreem-lady"][align=center]
ماقدر ده

بس ممكن في البتمشي تتلصق في كاميرا المصور زي الضبانة [/align][/quote]

تلقا عريس لمن تتلصق في الكا ميرا ليه العرس ناقلنو في قناة الجزيرة


ملاحظة : (كتبت الكاميرا ما الكميرا ) صفقي لي بعدين [/color]