الخطوط الجوية السودانية

[سودانى معذب]

اعزائى السلام عليكم ورحمة الله وبركاته

تم طرح موضوع للاخت قمر السودان المهم حصلت تداخلات وقصص عن الخطوط الجوية السودانية
أولاً انا ممكن اكتر زول متضرر منها لكن ده مابمنع انه السودانية الناقل الوطنى والان بتشهد طفرة كبيرة بس الطفرة دى عاوز دعم ومساندة من جميع ابناء الشعب السودانى ومافى داعى نقعد ننشر فى الغسيل لانه فى ناس ماسافرو بيها لسه ولما نقعد نتكلم عنها بصورة سلبية ماحايسافرو وده الشئ الحاصل الآن وأغلب الناس بقت تلجأ لخطوط اجنبية اخرى خصوصا ناس السعودية والامارات وديل اكتر مكان فيهو جالية سودانية كبيرة لما كل واحد يحجز بالخطوط الفلانية حانخلى شنو للخطوط السودانية وانا اعتقد انه الادارة الجديدة متفهمة جدا للمشاكل اللى بتحصل وقاعدة تحل فيها وفعلا فى تحسن فى الاداء وماتنسو انه الطائرات كانت قديمة والآن فى تحديث وتم شراء طائرات جديدة لذلك ارجو واتمنى من جميع الاخوة انهم يدوهم فرصة للتطور وان شاء الله تعود لسيرتها الأولى وماتنسو ياجماعة التساهل والتسامح فى العفش الزائد

[العربى]

مشكور اخوى سودانى معذب ولهجتك فيها شى من الوطنية ودى صفة محمودة فيك

لكن ناس السودانية وبصراحة ناس عندهم المادة اولا ثم الوطنية
تعرف لمن القاش غرق كسلا اخوانا السودانيين عملوا اغاثات عاجلة للاقليم ولكن الطيران الوطنى
رفض توصيل هذة المساعدات دى الا بعد وزنها

وزى مابتعرف السودانية بتتميز عن غيرها بقصة الوزن الذائد
لكن بعد القانون الجديد مطلوب من طيرانا الوطنى تقديم المذيد من التنازلات عشان فعلا يكون قدر المنافسة الدولية

واكيد بتعرف انهم رحلوهم المطار رقم 2 مع الآسيوين عشان مواعيدهم الضاربة

اتخيل تلاتة يوم اسر واطفال محجوزين فى المطار بسبب ست الناس المدلعة الطائرة السودانية
واذا ركبت الطائرة لازم تصم خشمك عليك اى كلام مع المضيفة الله يحلك منها
واذا وصلت انت بالسلامة مطلوب ترفع يدك بالدعاء عشان عفشك يصل فى اليوم التانى
يعنى بصراحة السودانية طيران يحتاج الى تحديثات عاجلة




.

[sunni]

عزيزي سوداني معذب،، من فترة طويلة كنت عاوز أكتب في الموضوع ده،، لكن ترددت كتيراً،، ولنفي منطلقاتك (الناقل الوطني و و و )

ومن بداية الثمانينات زأنا أستقل السودانية،، ولغاية كم سنة لوراء بس،، وقفت منها،،، والأسباب معروفة. السودانية هي الخطوط الوحيدة التي لا تسعى وراء ركابها،، ولكن ركابها يسعون إليها. دي الحقيقة الأولى. الحقيقة التانية،، إن الراكب السوداني نفسه مسافر مزعج،، ودي حقيقة ما عاوز أطول فيها عشان ما أزعل زول،، لكنها حقيقة،، من عدم إلتزامه بمواعيد الميزان،، لغاية كمية العش و و و و.

المهم،،،،
أطرح ليكم مشكلة أمس بتاعة السودانية في مسقط،، ولمن لا يعلم، فالسودانية في مسقط،، سفرياتها موسمية،، بسبب قلة عدد السودانيين هنا ،،، ماشي،، بس ده إعتراف ضمني أنه السودانية لا يركبها إلا السوداني،، أو المضطر!!!!!.
ففي بداية الموسم جانا وفد من السودانية مصحوب بمجموعة من محطة دبي،، وحاولوا يقنعوا الناس بالحجز في السودانية،، مع وعود بمميزات للسفر العائلي، وأوزان خيالية، وأسعار خيالية،،، كل الناس كان ردهم وااااحد،، (مما يسرنا إنه تستفيد الشركة السودانية،، والوزن والسعر ما بيهمنا قدر الإلتزام والمعاملة) قالوا لينا أنسسسسسسسسسسوا التاريخ،، وحاسبونا من الليلة وإنت ماشي ؟؟؟؟؟


طيب،، نجي للحساب
يوم الخميس مساء (5/7/2007) كان مفروض هناك سفرية تقلع من مسقط الساعة 9:30 مساء،،، والتأخير ما مشكلة،، وكونها تجي متأخرة ويركبوا الناس الساعة واحدة صباح الجمعة،،،، مشيييناها (وكلمة مشيناها دي هي زاتا المغتسة حجرنا،، ولو في زول بيرفع قضية،، كان إستعدلوا). بعد ركوب الركاب للطائرة بفترة،، طلبوا منهم ينزلوا لأنه الطيارة فيها عطل،،، وبعد بهدلة شديدة،، وساعات إنتظار في صالة الترانزيت،، ودوهم فندق درجة عاشرة،، وفي مدخل المنطقة الصناعية... الغريب في الموضوع،، إنه هناك عدد من الركاب لما نزلوا،، طالبتهم السلطات ببطاقة الصعود للطائرة Boarding Pass،، وكانت المفاجأه إنه عدد منهم ما عندهم،، شخصياً لدي زوجة صديق قالت (زوجها طلب منها الإلتزام بالمقعد ورقمه،، لما ركبت الطيارة،، لقت إنه الرقم العندها في كرتها، أصلا ما موجود في الطيارة ؟؟؟؟؟ لما سألت المضيفة (الله يسامحها) ردت ليها المضيفة بكل زوق وأدب (أقروا دي بالقلبة لو سمحتوا) وقالت ليه (رقم كرسي شنو كمان،، أقعدي في أي حتة) وأخدت منها الكرت، ورمته في الأرض !!!!!!!!!! طيب،، لما المضيفة ترميه،، هي تشيله ليه،، ومر الزمن ولما نزلوهم،، وين الكرت ،،، أوباااااااااااا ،، مافي كرت.
تاني يوم،، تم إرسال 3 مهندسين من الخرطوم لإصلاح العطل،، وتم الإصلاح بحمد الله،، بس وين كانت المشكلة ؟؟؟؟

وجدنا إنه سلطات المطار في مسقط إكتشفت العيب،، ومنعت الطيارة من الإقلاع ما لم يتم تصحيح العيب،، السادة المهندسين (يدعوا) إنه السلطات العمانية محبكاها ومعقداها جدا،، وإنه العيب ده لا يمنع الطيارة من الإقلاع،، وإنهم عارفينه من قبل ما تقلع من الخرطوم..... يعني بدأت الرحلة،، والطيارة فيها نفس العيب وهم على علم بيه،،، أما الإصلاح،، فقد إستغرق حوالي الساعتين،،
يا عالم،، ليه طيب ما إتصلحت في الخروم بدل ما تختوا لناس في خطر،، وتحجزوا الطيارة 2 4 ساعة في مسقط،، قال إيه،، ما عيب خطر.... علما بأن القادمين بالرحلة كانوا بيحكوا عن كركبة وهزة غير عادية في الطيارة،، خصوصا في المطبات.

حبيبي أيها المعذب،، ما ساهل علينا نقول إنه شركتنا الوطنية فاشلة،، طيب ما بنقولها،، بس الكلام الحكيته ليك ده،، يؤكد إنهم ما مهتمين بأرواح ركابهم...... وانا متأكد إنهم ممكن يطلعوا مليون عذر،، بس والله كترت أعذارهم

[سودانى معذب]

|أعزائى السنى - العربى
شكرا على التعقيب المنطقى بس زى ماذكرت فى بداية حديثى انه انا من اكثر المتضررين
لكن ده مابمنع انه نحاول نديها فرصة
وكلامك مظبوط سنى فى انه انحنا مابنطالب بى حقنا اذكر ليك مثال
السنة الماضية كنتا جاى من الخرطوم - جدة المهم موعد الطيارة الساعة 6 مساء حضور المطار ذهبنا فى موعدنا وقعدنا لغاية الساعة 2 صباحا فى الآخر قالو يلا ياجماعة والرحلة عن طريق بورتسودان فأنا اعترضتا لانه انحنا حاجزين الخرطوم - جدة فقام واحد بكل برود قال ليى لو ماعاوز تسافر فى ستين (عفوا) المهم قلتا ليهو اكتب لى كلامك ده فى ورقة ووقع عليه وانا ماحاسافر فعلا وقع ولغيت السفر ورفعتا عليهم قضية وتم تعويضى

[sunni]

عزيزي سوداني معذب،،،

أي فرصة بتتكلم عنها ؟؟؟ لما الناس تضحي بإجازة 7 سنوات متتالية،، في كل سنة سودانير ترسل مندوب (لوعد) الناس بإنه السنة دي الأمور ح تكون أحسن،، وأنسوا الماضي و و و و.

السنة دي،، في واحد خلاهم يكملوا كلامهم،، وأداهم شريط كاسيت هديه،، لما شغلوه لقوا فيه تسجيل للقاء السنة الماضية مع الجالية السودانية في مسقط،، وفيها نفففففففس الكلام،، والسنة دي برضو،، فشل من أول رحلة.

عزيزي ،،، سودانير وإدارة سودانير بتراهن على طيبة ووطنية السوداني،،، بل وصلت بيها المرحلة لأن تستهتر بحياته،، ناهيك عن إحترامها ليه ووقته وإلتزاماته مع الأهل وفي العمل. وما عاوز أذكرك،، مرات بتضرب ولدك كف،، وإنت قلبك بينفطر من الألم الهو فيه،، بس الكف بيوعيه،،، سودانير عاوزه كف،، وكف جاااااااامد. ولما يوعوا،، ح يعرفوا،، نحن ما رفضناهم عبث،، ولا قفلنا عليهم الأبواب،، لكن كفاية إستهتار بينا وبي أرواحنا وظروفنا.

سوداني جاي من صلالة (1200 كيلو عن مسقط)،، ورموه في المطار حوالي 18 ساعة،، وما قادر يتحرك،، لأنه ما بيضمن سودانير،، ممكن في أي لحظة يفتحوا الميزان،، رسل أولاده لجماعة بيعرفهم،، وقعد هو في المطار طووول الفترة،، كل القروش العنده والما حولها لدولارات،،كلمها .... لما قامت الطيارة،، صاحبنا كان مهوي،، جابوا الأكل،، حتة رز،، مع قطعة لحمة،، صاحبنا ما شبع،، قال للمضيفة،،، ممكن صحن تاني؟؟ تصور المضيفة ترد عليه وتقول ليه شنو ؟؟؟؟



إنت قالوا ليك نحن ضابحين الليلة؟؟؟

ولك أن تتخيل ختة الكوع والذي منه


ياخي دي أخلاق دي؟؟ ولا دي ضيافة

[emadbaan6]

بصراحة موضوع الخطوط السودانية دة موضوع بقة مستفحل و انا لي اكثر من تجربة مع الخطوط السودانية سواء علي مستوي الشحن الجوي او علي مستوي الرحلات و شفت منها ويلات و عذابات الله لا يوريكم و بعدين لمتين المغتربين بيطلب منهم يضحوا الناس مرتبطة بي مواعيد اجازات و تذاكر. ياخ السودانيين بقوا في مطار الرياض ينوموا علي الارض زيهم زي المشردين و السبب الخطوط السودانية و الغريب انه الخطوط السودانية عندهك موظفين غير اللآمة و الردود السخيفة ما بعرفوا حاجة (( اعمل ليك شنو ؟؟ لو ما عاجبك امشي شوف ليك خطوط تانية )) دة رد من موظف مسؤل لي راكب مفروض يكون عنده كل الحق، و البقول انه دة تصرف يخص الشخص و لا يمثل الكيان فهذا عبط لأن مثلهذا الشخص يعلم بانه لا يوجد رقيب و لا حسيب لتصرفاته فله حق الرد و التصرف. يجب ان تخجل الخطوط السودانية من كثرة الإعتذارات التي لم تبقي لها ماء وجه، حتي إدارة جهاز الأمن و المخابرات لها لم تفلح معها و لم تجدي و لن تجدي.باختصار الخطوط السودانية محتاجة لمكنسة تزيل كل ماهو بالي و لا يعبه لمصلحة الوطن ويوم ان يعلم من يعمل بها ان للوقت قيمة حينها سوف ينصلح حال الخطوط السودانية

[ود المسالمة]

سودانير السنة دي بسبب التاخير خسرت كل السودانيين الذين سافروا بها لانهم كلهم حلفوا تاني لن يسافروا عن طريق سودانير حتي لو يسافروا بالبحر حتي وبالجاني وعلي ادارة سودانير العمل علي جبر الضرر وتعويض المتضررين والا سوف تخسر كل الركاب

[جذاب وما كذاب]

خالنا يا حلاوه


(وما تنسي يا خال مويه الفول وزيت السمسم اهم شي )


احنا مع تشجيع الناقل الوطني ودفعه نحو المذيد من الرقي والتقدم


لكن لكن يكون ذلك علي حساب راحت المسافر وخصما من زمنه المهدر سدا :mad:


تخريمه:

خلي الدعايات يا خال وكسير التلج

[سودانى معذب]

جذاب والله ما ادونى حاجة حبا فى السودان فقط
هو بقى فى تلج عشان يكسرو؟؟؟؟؟؟؟

[Sudani_w]

والله صدقت يا اخ sunni
كلامك 100%
سيب انو انت الكلام دا حصل لزوجت صديقك انا حصلت معاي نفس المشكله برضو الوالده واخواني الصغار كانو مسافرين يوم 7-7 من جده.
اسمع القصه من البدايه تفاديا للإحراج والكلام الكتير اللي بنسمعو من ناس الخطوط في مكاتب الحجز وعشان الزول مايلجأ للواسطه والمذله من فلان وفلان جحزت للأهل من شهر 4-2007
عشان يسافرو يوم 7-7-2007
وعشان نقة ناس الخطوط وكلامهم المسيخ قطعت التذاكر يوم 1-6-2007
م7ع انو عندك فرصه انو تقص التذاكر لحدي قبل السفر باسبوع دا في ايام ااجازات والمواسم
وكالعاده لازم قبل السفر بيوم تعمل ok للحجز مع انو الحجر معمول والتزكره مقطوعه
المهم مشيت اكدت الحجز وتاني مبسوط مودي الاهل المطار في الموعد المحدد مشيت ازون قالي الجواز والتذكره اديتو طقطق في الجهاز وقال لي يأخينا انت ماعندك حجز :mad: طبعا انا قلت اكيد غلطان
قلتليهو يازول كدي شيك شوف يمين شمال انا حاجز وقاطع
المهم في النهايه طلع انو فعلا الحجز مافي في السيستم
المهم بعد الشكل والمناقره مشينا اشتكينا وطبعا لاحياه لمن تنادي وفي الآخر هددناهم وتوعدناهم لو مارجعو حجزنا ماحيصل طيب طبعا الكلام دخل بي هنا وطلع بي هناك
نص اللي كانو في المطار جايين بي واسطات
بعد ساعتين من الشكل طلعو لينا حجز درجه اولى وقالو تدفعو الفرق
طبعا الوقت داك الوالد كان قافله معاه للآخر والاهل خلاص جهزوا شعورهم للسفر قمنا سفرناهم بعد دا كلو اتأخر الطياره حوالي 11 ساعه
وسفرنا الاهل والحمد وحلفا انو تاني لو الخطوط السودانية بقت ال برتش اير لانينز تاني ماراكبينها
والحمد لله الأهل اليوم وصلو برضو بالسودانيه لانو التذكره كانت ذهاب وعوده وصلو بعد تأخير 14 ساعه لاكين الحمد لله انهم وصلو سالمين يادوب الجيه من المطار على متندانا الحبيب طوالي

انا عن نفسي السودانيه جربتها مره وكنت محظوظ تاني ماحأركبها مهما كان
( الحمد لله الوطنية موجوده لاكين ماححنوجه وطنيتنا نحو الخطوط السودانيه حنشوف شي تاني )
أخوك وائل من جده

آسفين على الاطاله

[كيمو]

والله يا خال معليش يعني بس قالو شكر نفسو ابليس


وانا ما بشكر ليك الخطوط الجويه السودانيه ,,,,,,,,


وبقول ليكو افشل خطوط علي وجه الارض ,,,,,,,

الخطوط الجويه والسفارات السودانيه ,,,,,,,,,,,,,,,

ياخ معقوله في طيرات بتوحل في الجو ...ولا بتقطع غاز ولا بنزين ما عارف

الطيران السوداني بقطع بانزين والكابتين بقول للركاب انزلو ادونا دفره

نطلع الخرده دي عشان تقوم تاني ...................................الخ


اما السفارات ...السفارره السودانيه غير زادو لينا قروش الايصال بتاع التجديد

وقلبو لينا الايصال بالعربي ,,,,دي وجه نظري يا اخوانا وما تزعلو

لكن بالجد طيران فاشل وخدمات ما فيهو وما فيهو اي حاجه