المهم قلت اعمل اوكي واشوف الخبر شنو بالله لمن قالت لي الووووو ترترب وقفت علي حيلي وعيني التانية فتحت بمقدار 24 درجة فرهنهايت حسب التوقيت المحلي لام القري وقلت بصوت متقطع مرحب قالت لي المرسال مالك بتقطع زي العربية الشرقانه كده اول مرة تسمع صوتي ده قلت ليها ايوااا اول مرة انت كمان عاوزه تلخبطيني مالك انا متأكد شديد قالت لي خلاص اقفل يعني قلت لالالا تقفلي كيف حبابك قالت لي شكلي ضربت عليك في وقت مزعج شويه قلت ليها ياخي انت تضربي في اي وقت قالت لي يعني الوقت ده معاك كويس عشان انا عاوزه اتكلم معاك شويه قلت ليها تمام التمام ياخي احكي وقولي وماعليك قالت لي انا يالمريسيل اخوي عازمة جماعتنا ديل شاي وزلابيه منو ديل العازماهم قالت لي ام اسامة ودريمو والسنبلاية وهمسات المطر وام صباء وبت السرف وبانه والغالية بت الغالي وبعد الزمن ووحيد والفردوس وناجي ووايا وودابنعوف ماشاء الله ديل كلهم خبارك عليهم والمناسبة شنو
قالت لي عاوزه اعمل لي كرامة لي بيتي الجديد ده اشتريناه قبل اسبوع كده وقلت لازم اضيف فيه الناس ديل واعمل معاهم قعدة حلوة تكون ذكري وكده
طيب ياذاتو هسع انا المطلوب مني شنو
قالت لي جيب لي بس معاك كركدي وعرديب و خميرة ....
كركدي وعرديب وخميرة ليه انتم هناك ماعندكم
يازول عليك الله بطل الغلبة واسرع جيب الحاجات دي بسرعة الناس ديل قبيل دقوا لي وقالوا جاين في الطريق وكمان راكبين ليهم حافلة 14 راكب بس مشكلتهم سواقهم ده شكلو كده ماعارف الطريق كويس راحوا في الطريق وتلفوناتهم مرة تدخل معاي ومرة تكون مقفولة غايتو الله يجيب العواقب سليمة
ربنا يوصلهم بالسلامة .... اها ياذتو غير ديل ماعاوزه حاجة تانية
لالا سلااامتك يلااا سريع انا عاوزاك تجي قبالهم
كويس
يامرسال يامرساااال اقيف اقيف ماتقفل
اها في شنو تاني لعلك نسيتي حاجة تانية
ايوااا
جيب لي معاك كبريت باقي الكبريت حقي خلصت
والله ياذاتو انت الليلة شكلك حاتجهجهي افكاري ياخي
معليش ياخوي المريسيل نردها ليك في الافراح
يلاااا تلفوني فيه مكالمة تانية شكلهم ديل الجماعة مايقوموا يرحوا تاني
اوك باي
طلعت من البيت وقمت جاري علي السوق وانا مرة اضحك ومرة استغرب الناس ديل اتلموا كيف بالطريقة دي قبيل ام اسامة دي كانت بتكتب في المشاركة بتاعة يلا قولوا وهي ماقالت لينا حاجة ولا جابت لينا خبر
والسنبلاية دي كانت غايبة امس النهار كوووولو طيب كيف عزموها ولحقت اتشطفت وجات
وهمسات المطر دي اخر كلام كتبتوا بسمة المنتدي كان بوست عن نكات المساطيل وكده وردينا عليها وبرضو ماجابت لينا خبر
وام صباء قابلتها في منتدي الكنترولات بقادي وحتي قالت لي نهارك سعيد يالمرسال الله ذاتو دي عاوزه تجنني ولاشنو
وبعدو ووايا ديل ليهم عييييك كم يوم مادخلوا المنتدي وقالوا ساكين خروف العيد
خلي بالك يالمريسيل القصة دي فيها حاجة لكن ربك يكضب الشينة
دخلت السوق وجبت الحاجات كلها كركدي وعرديب والكبريت وكمان جبت حلاوة وشاي وسكر عشان ماتكون نست حاجة تانية
وطوااالي مشيت علي ناس ذاتو كو كو كو فتح لي شافع صغنون وقال لي اتفضل ياعمو الضيوف قاعدين جووووه
قلت ليه طيب اجري نادي لي ذاتو سريع عشان نديها الحاجات دي وتدخله المطبخ وانا امشي اسلم علي الجماعة ديل قال لي انا بدخلهم ياعمو وقبال ماادخل ناداني سواق الحافلة بتاع الجماعة ديل
ياابوالشباب ممكن بالله تجيب لي موية باردة
قلت ليه سمح وعاينت كده للحافلة كانت مليااانة طين في اللساتك ومغبرة تغبيرة صاح والسبت فوق مليااان قفف وشوالات ممكن ذاتو طلبت منهم يجيبو ليها كمان حاجات مامعروف
شويه كده وجات ذاتو وهي بتضحك لي مالك واقف كده ف الباب عاوز ليك عزومة يالمرسال كمان هنديلك الجماعة السنبلاية وام اسامة وبقية الجماعة قاعدين منتظرنك من قبيل والله دخلوا قبالك وعليهم جنس تعب الناس ديل رايحين ليهم قريب ساعتين ادخل لي جوه خليهم يحكوا ليك الحاصل شنو الليلة بكتلوك من الضحك
وقبال ما ادخل جوه البيت رفعت نظري في السقف وشفت النجف والانارة الجميلة وعاينت للجدارن والموكيت وقلت ليها الدار مبروكة تب يعني العيد ده عيدكم ماشاء الله ربنا يزيد ويبارك
وقبال ماادخل لي جوووه قالت لي اها وينه الحاجات جيتني مربع يديك
يازوله كدي استهدي بالله انا قبيل اديته الوليد حقكم ده ودخله جوووه
اوعي تكون نسيت الكبريت
قلت لالالا مانسيت حاجة وكمان جبت ليك حاجات تانية مني زيادة عشان ماتكوني محتاجة حاجة تانية
قالت لي سمح خلاص ادخل وانا بجهز العصير واخت الشاي في النار وبجيكم
سمح ماتتاخري علينا باقي انا مشغول شديد
سمح خلاص
وانا ماشي كده في الممر الي الصالة وقع نظري علي اول كرسي جالسة فيه مرة لابسة توب حلو شديد ومعاها ولد حليو ماشاء الله اظنها ام اسامة اكان ما ظني يخيب وهناك في المقابل تلاتة بنات جالسات سوا يضحكن ويقرقرن قلت قطع شك ياما السنبلاية وبانه وهمسات وفي الناحية التانية جالسين اخوانا ناس الشنبات يضحكوا سااكت وخالفين كرعينهم وقدامهم تربيزة كبيرة من الزجاج المعشق وعليها مقدمة حلاوة كبيرة وكم زهريات حلوة
انا غايتو لمن شفتهم وقفت في مكاني وقلت ليهم والله الليلة الزلابية خلتنا نشوف ناس
ووقف الحضوور كلهم وهم مبتسمين وكلهم بصوت وااااحد المريسييييييييييل
سلمت علي الرجال اخواني اول بالتبادي وبالجد كان كل واحد فيهم التقول اسمو مكتوب في جبينو بعدو وايا ودابنعوف كلهم عرفتهم من اول مرة بالرغم اول مرة اشوفهم حكاية عجيبة صاح
لكن بالامانة كده غلبني اتمعن في وجوه الانسات ديل ومديت يدي وقعدت اسلم وانا بين ضاحك وارجف وده كلووو يرجع عشان لي زمن ماسلمت علي مرة كانن حلوات وطيبات وكل واحدة لها رونق وحضور مختلف تبادلنا السلام والتحايا وجلسنا نتبادل اطراف الحديث يحكي هذا يرد ذاك ينكت بعدو نضحك جميعا والونسة كانت جميلة وكانت كلها عن المنتدي والمشاركات الحلوة وكيف الناس بتعلق علي المواضيع وروعة الكتاب الذين اتحفونا بالبوستات الجميلة يااااا ه كانت جلسة حلوة بالجد
جاتنا ذاتو بعدما جهزت العصائر والحلويات ولكن عاينت ليها كده وعرفتني علي طول
وانا قاصد ليها وين الزلابية والشاي
وهي تلوح لي بيدها كده شخ شخ لالا لالا
شخ شخ لالالا كيف يعني
قربت مني وقالت لي الكبريت الجبتو ابي يولع معاي
ليه ماله
وقعت مني في جردل الموية واتبلت قلت احسن اقلبه عصائر وحلويات
ضحكت كده وقلت ليها زلابية وراحت مننا وسجم الكبريت الحرمنا منها
جدعة .... اخيرة
تعيشوا وتاخدوا غيره كانت هذه حلمة من احلام اليقظة التي تراودني بين الحين والاخر
45 
