يتهموننا بالكسل

[leena'']

((وهو الطبيب الذي يعالج مرضاهم،))
انا سمعت انو في واحد خليجي ولدوا كان عيان قالوا ليه امشي لي الدكتور الفلاني سأل جنسو شنو ؟ قالوا ليهم سوداني قال ولدي يموت و ما يعالجوا سوداني
وبرضو في نكتة: واحد سوداني سألوه اول حاجة بتعملها لمن تصحا من نومك شنو ؟ قال ليهم : برتاح شوية
لكن انا بقول ليهم غيظ دي بس غيرة

[HAPPY GIRL]

انا لاحظتا الشيء دا يعني هممم قمةةةة النشاط والله صحي كلامك احنا السودانين بنشغل ليهم حاجتهم في بلدان
يسلممووو
اتمنى تتقبل مروري
وياريات واحد من الناس ديل يشوف الموضووع

[كمال محمد على]

تحية للاعضاء الكرام

السودانيين ما كسلانين وأذكر أننا فى مشروع حلفا الجديدة كان نذهب الى مزارعنا من الصباح
الباكر وما نعود الى القرية لا بعد غروب الشمس
علما أن مزارعنا تبعد عن القرية مسافة 5 كيلو متر تقريبا

هل فى خليجى ممكن يمشى 5 كيلو متر كدارى دعك من ان يعمل من الصباح حتى المساء

ولكن بصراحة المظهر الخارجى للانسان السودانى يوحى بانه كسلان
هو قوى فى جسمو وكل حاجة ولكن فى هلهله فى جسمو
عندما يمشى تلقاهو ظاهر وسط كل الاجناس الذين يمشون معه فى الطريق أنا الاحظ هذا الشىء
هنا فى الخليج
وايضا الاحظ فى المسلجد هنا تلاقى السودانيين الوحيدين الذين يجلسون والواحد فينا متكئ
على يدو .. الاخرين تجدهم جالسين كانهم مصبوبين
أنا عندما اذكر مثل هذة المظاهر اذكرها حتى نقوم بتصحيحها وهى سهلة
لاننا لو بقينا على وضعنا هذا ولم نصححه
سوف يكون مدخل للذين يتندرون علينا
بس هذة المظاهر هى المشكلة
السودانيين بحبو النوم هذة مش حقيقة لانو بالمنطق ما فى خليجى بيدخل بيت سودانى حتى يعرف
انو السودانى بنوم كم ساعة هذة تبعات للمظاهر التى ذكرتها وفعلا موجودة فى السودانيين
ومتى ما غيرنا هذة المظاهر سوف نقفل امامهم هذا الباب

أنا لم اقل كلامى هذا وبهذة الصراحة الا حبا لسوداننا والانسان السودانى وان لا نرى
فى السودانى اى شائبة ولو كانت صغيرة

وشكرا

[شعاع الشمس]

السلام عليكم

أخي العزيز تسلم على هذا الموضوع الرائع

وبصراحه يكفي ما قاله الأعضاء كرد على هذه الإتهامات

ونحنا العايشين بره بنقدر نقارن بينا وبين الجنسيات التانيه والفرق طبعاً واضح

الكسل ماجاي بجنبنا أصلاً

ودمتم بود

[توقن فنتي]

موضوع مهم صراحه نسمع كثيرا من الاشقاء في الدول العربيه من نكات
وامثال كثير عن كسل السوداني وكان اخرها كتاب العقل اولا ترجمها مكتبه
جرير وكتب اخ سوداني مقال في سودانير اون لاين لمين نشكيك يا مكتبة جرير
والنكته يقول ما الفرق بين السوداني النشط والديناصور بالقول الاثنان انقرضا ويوجد
في اي دوله نسبه من الكسل والسوداني كتلك الشعوب هناك الكسول والنشيط والسودانيين
نجحو في كل دروب العمل داخل السودان او حارجها وهم قدمو الكثير للدول العربيه في جميع
المجالات ونجحو في اصعب المهن الزراعه والرعي والعمران وهي المهن الشاقه واثبتو وجودهم
ويتهم معظم العرب السودانيين بالكسل لوجود اراضي بور شاسعه او غير مستصلحه وهذايتوقف على امكانية المزارع او الدوله

[بشوره الأموره]

طبعا بشكرك عالموضوع
وعايزه اوضح نقطه
يعني قبل كم يوم مشينا حديقه مليانه سودانيين ومستحيل تلقى عائله سودانيه وما فيهم زول راقد ولا مبطوح..اما باقي الناس من الأجناس التانيه فكانو بيمارسو رياضة المشي او الجري او الجلوس العادي من جد كان موقف محرج جدا" والبيحرجك أكتر لمن يجي مطوع ماشي وتكون وحده ممده على الأرض ووحده راقده والتانيه متكيه المهم يعني ما كان منظر حضاري بتاتا" ......ومن رأيي لو وحده تعبانه ولا حاجه ترقد في البيت مافي الأماكن العامه..يعني دي حاجه وضحت لي أسباب اتهامهم لنا بالكسل ..وانا معاك في انو الكسل موجود حتى في الأجناس التانيه لكن مش في العلن زينا.......وتقبل مروري

[المرسال]

بصراحة الكسل صار يربط بالسوداني بشكل محرج ... بس في وجهة نظري الكسل موجود في كل مكان
هنا مثلا في السعودية نسبة الكسل كبيرة بس ما تظهر للناس .. السوداني ماشاء الله شهم يظهر كل شيء
للناس السوداني لمن يجي وقت الشغل مافي أنشط منه .. السودان محتاج تنمية كبيرة ومحتاج وقت
عشان تتغير نظرة الناس في السوداني بشكل عام ..تحياتي وحبي لكل السودانيين أهلي وناسي

[السعدابى]

أخى ود السكوت
أصبت كبد الحقيقة بموضوعك الرااااائع
حقبقة أنا يحزننى هذا الاتهام بالكسل للسودانيين
و كما هو معروف أن هذا السبب وراء ذلك هم أخوان لنا من دولة عربية أخرى
حقدوا على السودانيين بالخارج و ذلك للمكانة و السمعة الطيبة التى يتمتعون بها
فألصقوا بهم هذه الصفة و ألفوا فيها النكات و للأسف نجحوا فى مهمتهم